ក្រុមអ្នកវិភាគលើកឡើងថា ជារឿងគួរឱ្យសង្ស័យលើចំណាត់ការរបស់សមត្ថកិច្ចខ្លាំងបំផុត មេឧក្រិដ្ឋជនគ្រឿងញៀនត្រូវបានគេរំដោះល្បីខ្ចរខ្ចាយពេញប្រទេស តែសមត្ថកិច្ចគ្មានសមត្ថភាពទប់ស្កាត់រហូតអាចឱ្យឧក្រិដ្ឋជនដែលមានទោសជាង ៥០ឆ្នាំឆ្លងដែនគេចខ្លួនចេញពីកម្ពុជា។
អ្នកវិភាគនយោបាយ និងជាប្រធានវេទិកាពលរដ្ឋ លោក គឹម សុខ ប្រាប់សារព័ត៌មាន The Cambodia Daily នៅថ្ងៃទី២១ សីហា នេះថា ឧក្រិដ្ឋជនដែលរំដោះអ្នកទោសសុទ្ធតែនាំគ្នាបិទមុខជិតទាំងអស់ បែរជាសមត្ថកិច្ចអាចចាប់ខ្លួនបាន ប៉ុន្តែអ្នកទោសដែលអត្តសញ្ញាណរបស់គេត្រូវគេស្គាល់ពេញប្រទេស បែរជាចាប់ខ្លួនមិនបានទៅវិញ។ ជាងនេះទៀត ការអះអាងរបស់សមត្ថកិច្ចដែលថាមនុស្សដែលខ្លួនចាប់បាន គឺជាក្រុមឧក្រិដ្ឋជនរំដោះអ្នកទោសនោះ នៅតែមិនគួរឱ្យទុកចិត្តបាននៅឡើយ ព្រោះថាគ្មាននរណាម្នាក់បានស្គាល់មុខអ្នកទាំងនោះពេលពួកគេចូលទៅរំដោះមេឧក្រិដ្ឋជនគ្រឿងញៀននោះទេ ដូច្នេះអ្វីៗគឺនៅលើសមត្ថកិច្ចជាអ្នកអះអាងទាំងអស់។
លោក គឹម សុខ លើកឡើងថា តើមនុស្សដែលសមត្ថកិច្ចអះអាងថាជាក្រុមឧក្រិដ្ឋជនដែលចូលទៅរំដោះអ្នកទោសនោះជាមនុស្សពិត ឬជាការរៀបចំរបស់សមត្ថកិច្ច គ្មាននរណាម្នាក់ដឹងឡើយ ត្បិតចម្ងល់ គឺនៅត្រង់ថា ហេតុអ្វីពួកគេមិនឆ្លងដែនចេញពីប្រទេសកម្ពុជាជាមួយមេឧក្រិដ្ឋជនគ្រឿងញៀន ត្បិតពួកគេពាក់របាំងមុខទាំងអស់គ្នា ដូច្នេះបើពួកគេឆ្លងដែនចេញទៅប្រទេសក្បែរខាង ក៏គ្មានអ្នកណាស្គាល់ដែរ ព្រោះថាសូម្បីតែមេឧក្រិដ្ឋជនគ្រឿងញៀនដែលគេស្គាល់មុខលើបណ្ដាញសង្គមហ្វេសប៊ុក នៅតែអាចឆ្លងដែនបាន ចុះទម្រាំអ្នកដែលពាក់របាំងមុខទាំងនោះ រឿងអីថាឆ្លងដែនមិនបាន។
អ្នកវិភាគនយោបាយរូបនេះបញ្ជាក់ថា ផ្ទុយទៅវិញ បើឆ្លងតាមច្រករបៀងដោយគ្មានការត្រួតពិនិត្យ នោះគឺរឹតតែងាយស្រួលថែមទៀត ព្រោះថាពួកគេមានគោលដៅទៅរំដោះតែអ្នកទោសប៉ុណ្ណោះ ដូច្នេះពួកគេគ្មានហេតុផលអ្វីត្រូវនៅកម្ពុជាដោយមិនធ្វើដំណើរទៅជាមួយមេឧក្រិដ្ឋជនដែលខ្លួនបានរំដោះនោះទេ ដូច្នេះរឿងនេះបន្សល់នូវចំណុចសង្ស័យច្រើនណាស់ជុំវិញចំណាត់ការរបស់សមត្ថកិច្ច។
កាលពីថ្ងៃទី១៧ ខែសីហា ឆ្នាំ២០២២ មានក្រុមឧក្រិដ្ឋជនចំនួន ៥នាក់ប្រដាប់ដោយអាវុធ បានសម្រុកចូលទៅគ្លីនិកព្យាបាលធ្មេញមួយកន្លែងនៅក្នុងខេត្តសៀមរាប ដើម្បីរំដោះអ្នកទោសជាជនជាតិចិន ដែលជាមេឧក្រិដ្ឋជនគ្រឿងញៀនម្នាក់មានឈ្មោះថា Chen Hsin Han ក្រោយសមត្ថកិច្ចបញ្ជូនរូបគេទៅព្យាបាលធ្មេញនៅគ្លីនិកខាងលើនោះ។
បន្ទាប់ពីមេឧក្រិដ្ឋជនគ្រឿងញៀនខាងលើត្រូវបានរំដោះ នៅថ្ងៃទី១៩ ខែសីហា ឆ្នាំ២០២៣ អគ្គស្នងការរងនគរបាលជាតិទទួលផែនប្រឆាំងបទល្មើសគ្រឿងញៀន លោក ម៉ក់ ជីតូ បានអះអាងក្នុងសន្និសីទសារព័ត៌មាននៅមន្ទីរប្រឆាំងគ្រឿងញៀនថា មេខ្លោងថ្នាំញៀនជនជាតិចិនឈ្មោះ Chen Hsin Han ដែលក្រុមឧក្រិដ្ឋជនរំដោះបាននោះ បានគេចខ្លួនចេញពីកម្ពុជាហើយ។
លោក ម៉ក់ ជីតូ អះអាងថា កម្លាំងសមត្ថកិច្ចកម្ពុជាបានដឹងទីតាំងប្រទេសដែលមេខ្លោងគ្រឿងញៀននោះរត់ទៅលាក់ខ្លួនហើយ និងកំពុងតែសហការគ្នាយ៉ាងស្អិតល្មួតជាមួយប្រទេសជិតខាង ដើម្បីតាមចាប់ខ្លួនយកមកផ្ដន្ទាទោសតាមច្បាប់យ៉ាងតឹងរ៉ឹងឱ្យខាងតែបាន មិនអាចលើកលែងបានឡើយ ខណៈកម្លាំងសមត្ថកិច្ចតាមព្រំដែនក៏កំពុងសហការគ្នាដើម្បីស្រាវជ្រាវផងដែរ។
អគ្គស្នងការរងនគរបាលជាតិទទួលផែនប្រឆាំងបទល្មើសគ្រឿងញៀនរូបនេះបញ្ជាក់ថា រហូតមកដល់ពេលនេះ ឧក្រិដ្ឋជនស៊ីឈ្នួលចំនួន ៧នាក់ហើយត្រូវបានកម្លាំងនគរបាលចាប់ខ្លួន ក្នុងនោះមានខ្មែរសញ្ជាតិអាមេរិកចំនួន ៦នាក់ (កាន់លិខិតឆ្លងដែនអាមេរិក) និងជនជាតិចិនសញ្ជាតិអាមេរិកម្នាក់ (កាន់លិខិតឆ្លងដែនអាមេរិកដែរ) ហើយពួកគេគឺជាក្រុមឧក្រិដ្ឋជនដែលមានអង្គការចាត់តាំងច្បាស់លាស់ ដោយរៀបចំផែនការត្រៀមធ្វើសកម្មភាពរយៈពេល ២ខែមកហើយ។
ក្រុមអ្នកសង្កេតការណ៍លើកឡើងថា ករណីរំដោះមេឧក្រិដ្ឋជនគ្រឿងញៀននេះបានបន្សល់នូវចំណុចសង្ស័យជាច្រើនពាក់ព័ន្ធនឹងអំពើពុករលួយផង ពាក់ព័ន្ធនឹងការគប់គិតរបស់មន្ត្រីពន្ធនាគារផង ត្បិតចំណុចដែលគួរឱ្យសង្ស័យមុនដំបូង គឺមន្ត្រីពន្ធនាគារ បានអនុញ្ញាតឱ្យអ្នកទោសគ្រឿងញៀនដល់ទៅជាង ៥០ឆ្នាំចេញមកខាងក្រៅពន្ធនាគារដោយគ្មានការប្រុងប្រយ័ត្ន ដែលមានសមត្ថកិច្ចការពារត្រឹមតែ ៤នាក់ ហើយចេញមកខាងក្រៅញឹកញាប់ថែមទៀត។
ប្រភពដដែលលើកឡើងពីចំណុចសង្ស័យបន្ថែមថា បន្ទាប់ពីមេឧក្រិដ្ឋជនគ្រឿងញៀនត្រូវបានរំដោះ សមត្ថកិច្ចកម្ពុជាបែរជាអសមត្ថភាពរារាំងពិរុទ្ធជនមិនឱ្យចាកចេញពីកម្ពុជា ស្របពេលដែលឧក្រិដ្ឋជនបានស្នាក់នៅរាជធានីភ្នំពេញមុននឹងរូបគេរត់គេចខ្លួនចេញពីប្រទេសកម្ពុជានោះ។
ជុំវិញការរំដោះមេឧក្រិដ្ឋជនគ្រឿងញៀននេះ មន្ត្រីពន្ធនាគារដែលបានចុះហត្ថលេខាឯកភាពឱ្យមេឧក្រិដ្ឋជនគ្រឿងញៀនទៅព្យាបាលនៅគ្លីនិកឯកជន កាលពីថ្ងៃទី១៦ ខែសីហា ឆ្នាំ២០២៣ កន្លងទៅ ដូចជាមន្ត្រីពេទ្យពន្ធនាគារលោក ពៅ តុងហុង ប្រធានការិយាល័យអគ្គានុរក្ស យឹម សុវណ្ណឡង់ឌី ប្រធានពន្ធនាគារខេត្ត លោក សី វណ្ណា និងអនុប្រធានពន្ធនាគារលោក ពេញ រិទ្ធ មិនទាន់មាននរណាម្នាក់ក្នុងចំណោមពួកគេចេញមុខទទួលខុសត្រូវលើករណីនេះនៅឡើយទេ ប៉ុន្តែពួកគេកំពុងទម្លាក់កំហុសឱ្យគ្នាទៅវិញទៅមកនៅពេលនេះ។
ទាក់ទិននឹងបញ្ហាគ្រឿងញៀននេះ គេនៅមិនទាន់ភ្លេចទេកាលពីថ្ងៃទី២៣ ខែកុម្ភៈ ឆ្នាំ២០១៩ ដែលអាជ្ញាធរក្រុងភ្នំពេញបានចាប់ខ្លួនឧកញ៉ា គិត ធាង ម្ចាស់ក្លឹបកម្សាន្ត Rock ដែលត្រូវបានចោទប្រកាន់ពីបទពាក់ព័ន្ធនឹងការចែកចាយគ្រឿងញៀនជិត ៥០គីឡូក្រាម។ ក្នុងសំណុំរឿងនេះ តុលាការសម្រេចផ្ដន្ទាទោសឲ្យជាប់ពន្ធនាគារត្រឹមតែរយៈពេល ៤ឆ្នាំប៉ុណ្ណោះ ក្នុងនោះត្រូវអនុវត្តទោសឲ្យជាប់ពន្ធនាគារមួយរយៈពេលខ្លី និងសម្រេចឲ្យព្យួរទោសរយៈពេល ២ឆ្នាំផងដែរ។
យ៉ាងណាក៏ដោយ គេបានរកឃើញថា អំឡុងពេលដែលឧកញ៉ា គិត ធាង ត្រូវបានឃុំខ្លួនក្នុងពន្ធនាគារ PJ បណ្ដោះអាសន្ន កាលពីថ្ងៃទី១២ ខែមីនា ឆ្នាំ២០១៩ ពិរុទ្ធជនរូបនេះនៅតែអាចដើរហើរសេរីក្រៅច្បាប់ដូចជនគ្មានទោសដូច្នោះដែរ៕