មន្ត្រីបក្សប្រឆាំង ចាត់ទុកការឃុំខ្លួនលោក សុខ ស៊ុនណារ៉េត ឪពុករបស់សកម្មជនបក្សប្រឆាំងលោក ស៊ន តារា ជាល្បិចកលនយោបាយខ្មៅកខ្វក់របស់លោក ហ៊ុន សែន ដើម្បីទុកធ្វើជាចំណាប់ខ្មាំងបង្ក្រាបក្រុមប្រឆាំងមិនឱ្យរិះគន់រដ្ឋាភិបាលកម្ពុជា។
តំណាងរាស្ត្រគណបក្សសង្គ្រោះជាតិ លោក អ៊ុំ សំអាន ប្រាប់សារព័ត៌មាន The Cambodia Daily នៅថ្ងៃទី៣០ មិថុនា នេះថា ការចាប់ខ្លួនលោក សុខ ស៊ុនណារ៉េត ពាក់ព័ន្ធនឹងករណីគ្រឿងញៀន គឺជាបទចោទប្រឌិតឡើងដោយលោក ហ៊ុន សែន ប៉ុណ្ណោះ ព្រោះការពិតនៃការចាប់ខ្លួននេះ គឺក្រោមហេតុផលនយោបាយដែលលោក ហ៊ុន សែន ជាអ្នករៀបចំឡើងទាំងអស់។
លោក អ៊ុំ សំអាន លើកឡើងថា ទង្វើរបស់លោក ហ៊ុន សែន ដែលប្រព្រឹត្តលើក្រុមប្រឆាំង និងសកម្មជនសង្គមដទៃទៀត បាននាំឱ្យជាតិខ្មែរទាំងមូលបែកបាក់សាមគ្គីជាតិយ៉ាងធ្ងន់ធ្ងរ ព្រោះការចោទប្រកាន់ និងការឃុំខ្លួនអ្នកទាំងនោះ ត្រូវបានធ្វើឡើងក្រោមភាពអយុត្តិធម៌ដែលមិនមែនជាការអនុវត្តច្បាប់ដោយត្រឹមត្រូវនោះទេ។
មន្ត្រីបក្សប្រឆាំងរូបនេះ អំពាវនាវឱ្យតុលាការក្រោមបញ្ជាលោក ហ៊ុន សែន ដោះលែងលោក សុខ ស៊ុនណារ៉េត និងដោះលែងអ្នកទោសមនសិការទាំងអស់ រួមទាំងប្រធានគណបក្សសង្គ្រោះជាតិ លោក កឹម សុខា ផងដែរ ឱ្យមានសេរីភាពឡើងវិញ ដើម្បីរួមគ្នាទប់ទល់នឹងសត្រូវឈ្លានពានរហូតឈានទៅដល់ការបង្រួបបង្រួមស្មារតីជាតិតែមួយ។
សាលាដំបូងខេត្តកំពង់ស្ពឺ បានចេញដីកាកាលពីដើមខែមិថុនា ឆ្នាំ២០២៥ ដែលទើបនឹងត្រូវបានផ្សព្វផ្សាយនៅថ្ងៃទី៣០ មិថុនា នេះ អំពីការបើកសវនាការលើសំណុំរឿងលោក សុខ ស៊ុនណារ៉េត នៅថ្ងៃទី៩ ខែកក្កដា ខាងមុខ ក្រោមការចោទប្រកាន់ពីបទ «រក្សាទុកដោយខុសច្បាប់នូវសារធាតុញៀនដែលត្រូវបានប្រព្រឹត្ត កាលពីអំឡុងខែវិច្ឆិកា ឆ្នាំ២០២៤»។
លោក សុខ ស៊ុនណារ៉េត ត្រូវបានចាប់ខ្លួនដោយកងរាជអាវុធហត្ថខេត្តកំពង់ស្ពឺ នៅភូមិដក់ពរ សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ នៅជិតមុខទីបញ្ជាការយោធភូមិភាគ៤ កាលពីថ្ងៃទី១៣ ខែវិច្ឆិកា ឆ្នាំ២០២៤ ខណៈពេលដែលគាត់បានបើករថយន្តទៅជួបមេបញ្ជាការរងយោធភូមិភាគ៤ តាមការណាត់ជួបនោះ។
ក្រោយចាប់ខ្លួន នៅថ្ងៃទី១៤ ខែវិច្ឆិកា តុលាការខេត្តកំពង់ស្ពឺ បានបញ្ជូនខ្លួនលោក សុខ ស៊ុនណារ៉េត ទៅឃុំខ្លួននៅពន្ធនាគារបណ្ដោះអាសន្ន ពីបទ «ជាប់ពាក់ព័ន្ធនឹងបទល្មើសគ្រឿងញៀន» ប៉ុន្តែលោក សុខ ស៊ុនណារ៉េត បានប្រកែកមិនទទួលស្គាល់ការចោទប្រកាន់នេះឡើយ។
លោក សុខ ស៊ុនណារ៉េត គឺជាឪពុកបង្កើតរបស់សកម្មជនបក្សប្រឆាំង លោក ស៊ន តារា។ ជារៀងរាល់ថ្ងៃ លោក ស៊ន តារា ដែលតែងរិះគន់រដ្ឋាភិបាលលោក ហ៊ុន សែន ឥតសំចៃមាត់តាមរយៈការផ្សាយផ្ទាល់លើគណនីហ្វេសប៊ុករបស់លោកពីប្រទេសបារាំង។ ចំណែកឪពុករបស់លោក គឺលោក សុខ ស៊ុនណារ៉េត ធ្លាប់ធ្វើជាទាហានសឹករងខេត្តកំពង់ស្ពឺ និងធ្លាប់មានតួនាទីជានាយរងសេនាធិការផងដែរ ប៉ុន្តែលោកបានចូលនិវត្តន៍កាលពីអំឡុងឆ្នាំ២០២២ កន្លងទៅ។
ជុំវិញបញ្ហានេះ ក្រុមអ្នកសង្កេតការណ៍លើកឡើងថា ការឃុំខ្លួនលោក សុខ ស៊ុនណារ៉េត គ្រាន់តែប្រើលេសដើម្បីដាក់សម្ពាធលើលោក ស៊ន តារា ឱ្យឈប់រិះគន់ ហើយចុះចូលជាមួយរដ្ឋាភិបាលប៉ុណ្ណោះ មិនមែនព្រោះតែមន្ត្រីបក្សកាន់អំណាចរូបនេះប្រព្រឹត្តខុសច្បាប់ដូចការចោទប្រកាន់របស់តុលាការឡើយ៕
© 2025, ឌឹ ខេមបូឌា ដេលី. All rights reserved.