 ស្នើទៅរដ្ឋាភិបាលថ្មីដឹកនាំដោយលោក ហ៊ុន ម៉ាណែត ជួយអន្តរាគមន៍ដោះលែងពលរដ្ឋរងគ្រោះដីធ្លីជាមួយឧកញ៉ា ហេង ហ៊ុយ នៅខេត្តកោះកុង ដែលបច្ចុប្បន្នកំពុងជាប់ពន្ធនាគារ ៩នាក់ ឲ្យមានសេរីភាពវិញ។){kind=link}
សមាគមសម្ព័ន្ធសហគមន៍កសិករកម្ពុជា (CCFC) ស្នើទៅរដ្ឋាភិបាលថ្មីដឹកនាំដោយលោក ហ៊ុន ម៉ាណែត ជួយអន្តរាគមន៍ដោះលែងពលរដ្ឋរងគ្រោះដីធ្លីជាមួយឧកញ៉ា ហេង ហ៊ុយ នៅខេត្តកោះកុង ដែលបច្ចុប្បន្នកំពុងជាប់ពន្ធនាគារ ៩នាក់ ឲ្យមានសេរីភាពវិញ។
ការស្នើសុំនេះ ធ្វើឡើងបន្ទាប់ពីលោក ហ៊ុន ម៉ាណែត ត្រូវបានរដ្ឋសភាបោះឆ្នោតគាំទ្រឲ្យធ្វើជាមេដឹកនាំរដ្ឋាភិបាលកម្ពុជាសម្រាប់អាណត្តិទី៧ កាលពីថ្ងៃទី២២ ខែសីហា ឆ្នាំ២០២២ ដើម្បីបន្តវេនពីលោក ហ៊ុន សែន ជាឪពុកចាប់ពីខែសីហា ឆ្នាំ២០២៣។
ប្រធានសមាគមសម្ព័ន្ធសហគមន៍កសិករកម្ពុជា (CCFC) លោក ថេង សាវឿន បានលើកឡើងលើហ្វេសប៊ុកនៅថ្ងៃទី២៣ សីហា នេះថា គិតមកដល់ពេលនេះ ពលរដ្ឋដែលកំពុងជាប់បណ្ដឹងតុលាការដោយសារបញ្ហាដីធ្លីនៅទូទាំងប្រទេសកម្ពុជាសរុប ១៨៧នាក់ ខណៈពលរដ្ឋចំនួន ៩នាក់នៅខេត្តកោះកុង កំពុងជាប់ពន្ធនាគារដោយសារបញ្ហាដីធ្លី។
លោកស្នើទៅលោក ហ៊ុន ម៉ាណែត ដែលជាថ្នាក់ដឹកនាំរដ្ឋាភិបាលអាណត្តិទី៧ ជួយអន្តរាគមន៍ក្នុងការដោះលែង និងលើកលែងការចោទប្រកាន់ដល់តំណាងដែលកំពុងរងគ្រោះដោយសារបញ្ហាដីធ្លីកំពុងជាប់ពន្ធនាគារទាំង ៩នាក់នៅខេត្តកោះកុង ឲ្យមានសេរីភាពជួបជុំគ្រួសារ ដើម្បីឲ្យពួកគេមកប្រកបមុខរបរចិញ្ចឹមជីវិតវិញ។
លោក ថេង សាវឿន ថាការជួយអន្តរាគមន៍តំណាងពលរដ្ឋរងគ្រោះដីធ្លីនេះ វាជាការបញ្ចេញស្នាដៃក្នុងនាមជារដ្ឋាភិបាលដែលទើបឡើងកាន់តំណែងថ្មី ហើយក៏ជាការផ្ដល់ឱកាសឲ្យពលរដ្ឋទាំងអស់នោះចូលរួមក្នុងដំណើរការអនុវត្តកម្មវិធីទាំង ៥ របស់រាជរដ្ឋាភិបាលអាណត្តិទី៧ ផងដែរ។
ចំណែកក្រុមពលរដ្ឋរងគ្រោះដីធ្លីនៅខេត្តកោះកុង វិញ ក៏បាននាំគ្នាដាក់ប្រូហ្វាល់ហ្វេសប៊ុករបស់ខ្លួនដោយទាមទារឲ្យដោះលែងតំណាងរបស់ពួកគេដោយភ្ជាប់ជាមួយរូបថត និងឈ្មោះអ្នកទាំង ៩នាក់ផងដែរ។
កាលពីថ្ងៃទី៣០ ខែមិថុនា សាលាដំបូងខេត្តកោះកុង បានឃុំខ្លួនតំណាងពលរដ្ឋមានទំនាស់ដីធ្លីចំនួន ៩នាក់នៅពន្ធនាគារខេត្តនេះ ដោយតុលាការចោទប្រកាន់ពួកគេពីបទញុះញង់នាំឲ្យប្រព្រឹត្តបទឧក្រិដ្ឋជាអាទិ៍ពាក់ព័ន្ធនឹងរឿងវិវាទដីធ្លី។
កូនរបស់លោកស្រី ផាវ ញ៉ើង ដែលបានជួបម្ដាយនៅពន្ធនាគារ បានសរសេរលើហ្វេសប៊ុកកាលពីថ្ងៃទី១៧ ខែសីហា នេះថា ម្ដាយបានផ្តាំឲ្យខ្លួនលក់សត្វដែលលោកស្រីបានចិញ្ចឹមកន្លងមក ដើម្បីដោះស្រាយជីវភាព និងបង់រំលស់ទៅធនាគារ។
កូនរបស់លោកស្រី ផាវ ញ៉ើង ថាទោះបីជាម្ដាយរបស់ខ្លួនបានជាប់ពន្ធនាគារដោយសាររឿងវិវាទដីធ្លីក៏ដោយ ប៉ុន្តែគ្រួសាររបស់គាត់មិនអាចលក់ឧត្តមគតិឆន្ទៈជាដាច់ខាត។
ការចោទប្រកាន់ និងឃុំខ្លួននេះ បន្ទាប់ពីក្រុមពលរដ្ឋទាំង ៩នាក់ រួមទាំងសមាជិកមួយចំនួនទៀត បាននាំគ្នាជិះរថយន្តយកញត្តិមកដាក់នៅក្រសួងយុត្តិធម៌នៅរាជធានីភ្នំពេញ ដើម្បីស្នើសុំស្ថាប័ននេះជួយអន្តរាគមន៍ទៅតុលាការឲ្យទម្លាក់ចោលបទចោទប្រកាន់លើសមាជិកពួកគាត់ចំនួន ៣០នាក់ដែលរងការចោទប្រកាន់ពាក់ព័ន្ធនឹងការចេញតវ៉ាស្វែងរកដំណោះស្រាយរឿងដីធ្លី។
គិតចាប់តាំងពីចុងខែមិថុនា ដល់ថ្ងៃទី២៣ ខែសីហា ឆ្នាំ២០២៣ នេះ តំណាងប្រជាពលរដ្ឋនៅខេត្តកោះកុង ទាំង ៩នាក់ជាប់ពន្ធនាគាររយៈពេលជិត ២ខែមកហើយ ខណៈជម្លោះដីធ្លីរបស់ពួកគេក៏មិនទាន់ត្រូវបានរដ្ឋាភិបាលដោះស្រាយឲ្យដែរ។
តំណាងពលរដ្ឋរងគ្រោះដីធ្លីទាំង ៩នាក់ដែលកំពុងជាប់ពន្ធនាគារខេត្តកោះកុង រួមមានលោកស្រី ផាវ ញ៉ើង លោកស្រី ដេត ហួរ លោក ហេង ជ័យ និងលោក សុខ ជ័យ ជាដើម។
ក្រុមពលរដ្ឋមានជម្លោះដីធ្លីជាមួយឧកញ៉ា ហេង ហ៊ុយ និងឧកញ៉ា លី យ៉ុងផាត់ ចាប់ពីឆ្នាំ២០០៦ និង២០០៧ មកម្ល៉េះ ដោយក្រុមឧកញ៉ាទាំងពីរនាក់នេះបានរំលោភដីធ្លីពួកគេដែលបានអាស្រ័យតាំងពីដូនតាមកម្ល៉េះ៕