40.6 C
Phnom Penh

មន្ត្រី​បក្ស​ប្រឆាំង​ឯកភាព​នឹង​ការ​បង្កើត​ក្រុម​អ្នក​នាំពាក្យ​នាយករដ្ឋមន្ត្រី​ដើម្បី​ផ្តល់​ភាព​ងាយ​ស្រួល​ដល់​ស្ថាប័ន​ពាក់ព័ន្ធ

ដោយ ឌឹ ខេមបូឌា ដេលី

បទវិភាគ

មន្ត្រី​ជាន់ខ្ពស់​បក្ស​ប្រឆាំង ឯកភាព​នឹង​ការ​បង្កើត​ក្រុម​អ្នក​នាំពាក្យ​របស់​នាយករដ្ឋមន្ត្រី​សម្រាប់​អាណត្តិ​ទី​៧ នេះ ថា​ជា​រឿង​ល្អ ដើម្បី​ផ្តល់​ភាព​ងាយស្រួល​ទៅ​ដល់​ស្ថាប័ន​ពាក់ព័ន្ធ​នានា ដូចជា​អង្គការ​ក្រៅ​រដ្ឋាភិបាល ឬ​ស្ថាប័ន​ព័ត៌មាន​ឯករាជ្យ​នានា។

អតីត​អ្នកទោស​នយោបាយ និង​ជា​មន្ត្រី​ជាន់ខ្ពស់​គណបក្ស​សង្គ្រោះ​ជាតិ លោក មាជ សុវណ្ណារ៉ា ប្រាប់​សារព័ត៌មាន The Cambodia Daily នៅ​ថ្ងៃ​ទី​២៥ សីហា ថា ការ​បង្កើត​ឱ្យ​មាន​ក្រុម​អ្នក​នាំពាក្យ​ជួយ​សម្រួល​ការងារ​នាយករដ្ឋមន្ត្រី​បែប​នេះ គឺ​ស្ថិត​ក្នុង​បំណង​ពីរ គឺ៖

  • ទី​១ អាច​ជា​ការ​បែងចែក​បុណ្យ​ស័ក្តិ​តួនាទី​ឱ្យ​បក្ខពួក​របស់​ខ្លួន​ដើម្បី​កុំ​ឱ្យ​មាន​ទំនាស់​ផ្ទៃក្នុង​ព្រោះ​តែ​ការ​ផ្តល់​ឋានៈ​បុណ្យ​ស័ក្តិ​មិន​គ្រប់​គ្នា។
  • ចំណែក​ទី​២ អាច​ជា​ការ​បង្កើត​ឡើង​ដើម្បី​ជួយ​សម្រួល​ការងារ​នាយករដ្ឋមន្ត្រី​ទៅ​ដល់​ស្ថាប័ន​ពាក់ព័ន្ធ​ដែល​ចង់​បាន​ការ​ឆ្លើយតប​ពី​នាយករដ្ឋមន្ត្រី​តាមរយៈ​ក្រុម​អ្នក​នាំពាក្យ​ទាំងនេះ ចៀសវាង​ដូច​ពេល​កន្លងមក​ដែល​អង្គការ​ក្រៅ​រដ្ឋាភិបាល និង​ស្ថាប័ន​សារព័ត៌មាន​ឯករាជ្យ​នានា​ពិបាក​ក្នុង​ការ​ទទួល​បាន​ការ​ឆ្លើយតប​ពី​នាយករដ្ឋមន្ត្រី​នោះ។

លោក មាជ សុវណ្ណារ៉ា អះអាង​ថា ប្រសិនបើ​លោក ហ៊ុន ម៉ាណែត បង្កើត​ក្រុម​អ្នក​នាំពាក្យ​នេះ​ដើម្បី​ជួយ​សម្រួល​ដល់​ការ​ធ្វើ​ទំនាក់ទំនង​ជាមួយ​បណ្ដាញ​សារព័ត៌មាន​ជាតិ និង​អន្តរជាតិ ព្រមទាំង​ជាមួយ​បណ្តា​ស្ថាប័ន និង​អង្គភាព​នានា​សម្រាប់​ព័ត៌មាន​ពាក់ព័ន្ធ​នឹង​នាយករដ្ឋមន្ត្រី​ដូច​បាន​លើកឡើង​ក្នុង​សេចក្តី​សម្រេច​របស់​ខ្លួន​មែន​នោះ គឺជា​រឿង​គួរ​ឱ្យ​អបអរ​សាទរ​បំផុត។

ការ​អះអាង​នេះ ធ្វើឡើង​បន្ទាប់ពី​លោក ហ៊ុន ម៉ាណែត ចេញ​សេចក្តី​សម្រេច​បង្កើត​ក្រុម​អ្នក​នាំពាក្យ​របស់​នាយករដ្ឋមន្ត្រី ក្នុង​បំណង​ដើម្បី​បង្ក​លក្ខណៈ​ងាយស្រួល​ក្នុង​ការ​ធ្វើ​ទំនាក់ទំនង​ជាមួយ​ស្ថាប័ន​នានា​សម្រាប់​រដ្ឋាភិបាល​ដែល​ខ្លួន​នឹង​ត្រូវ​ដឹកនាំ​នៅ​ពេលនេះ។

កាលពី​ថ្ងៃទី​២៤ ខែ​សីហា ឆ្នាំ​២០២៣ នាយករដ្ឋមន្ត្រី​កម្ពុជា​ដែល​ទើប​នឹង​ត្រូវ​លើក​បន្តុប​លោក ហ៊ុន ម៉ាណែត បាន​ចេញ​សេចក្តី​សម្រេច​បង្កើត​ក្រុម​អ្នក​នាំពាក្យ​របស់​នាយករដ្ឋមន្ត្រី​ឱ្យ​ធ្វើ​ជា​សេនាធិការ​លើ​កិច្ចការ​ព័ត៌មាន​របស់​នាយករដ្ឋមន្ត្រី ដែល​មាន​លោក មាស សុភ័ណ្ឌ ជា​ប្រធាន។

សេចក្តី​សម្រេច​នេះ​បញ្ជាក់​ថា ដើម្បី​បង្ក​លក្ខណៈ​ងាយស្រួល ក្រុម​អ្នក​នាំពាក្យ​របស់​នាយករដ្ឋមន្ត្រី​មាន​ភារកិច្ច​ដូចជា​សម្របសម្រួល​ព័ត៌មាន​ផ្ទាល់ខ្លួន​របស់​នាយករដ្ឋមន្ត្រី ធ្វើការ​ទំនាក់ទំនង​ជាមួយ​បណ្ដាញ​សារព័ត៌មាន​ជាតិ និង​អន្តរជាតិ ព្រមទាំង​ត្រូវ​ធ្វើការ​ទំនាក់ទំនង​ជាមួយ​បណ្តា​ស្ថាប័ន និង​អង្គភាព​នានា​សម្រាប់​ព័ត៌មាន​ពាក់ព័ន្ធ​នឹង​នាយករដ្ឋមន្ត្រី​ផង​ដែរ។

ជាង​នេះ​ទៀត ក៏​ដើម្បី​ស្រាវជ្រាវ និង​ប្រមូល​ចងក្រង​រាល់​ព័ត៌មាន​ដែល​ពាក់ព័ន្ធ​នឹង​នាយករដ្ឋមន្ត្រី រៀបចំ​សេចក្តី​បំភ្លឺ សេចក្តី​ប្រកាស​ព័ត៌មាន សេចក្តី​ថ្លែងការណ៍ និង​ការ​ផ្សព្វផ្សាយ​ផ្សេង​ទៀត​អំពី​ព័ត៌មាន​របស់​នាយករដ្ឋមន្ត្រី​ឱ្យ​បាន​ទាន់​ពេល​តាម​ការ​ប្រគល់​ពី​នាយករដ្ឋមន្ត្រី​ថែម​ទៀត។

អ្នក​ប្រឹក្សា​យោបល់​ផ្នែក​អភិវឌ្ឍន៍​ផ្នត់គំនិត និង​ការ​ស្រាវជ្រាវ​លោក សេក សុជាតិ ប្រាប់​សារព័ត៌មាន The Cambodia Daily នៅ​ថ្ងៃទី​២៥ សីហា ដែរ​ថា ប្រសិនបើ​ការ​បង្កើត​ក្រុម​អ្នក​នាំពាក្យ​នាយករដ្ឋមន្ត្រី​នេះ​ដើម្បី​បង្ក​លក្ខណៈ​ងាយ​ស្រួល​ក្នុង​ការ​ផ្តល់​ព័ត៌មាន​ចំពោះ​បញ្ហា​ដែល​កើតឡើង​ជូន​ទៅ​ប្រជាពលរដ្ឋ គឺជា​រឿង​ល្អ​ដែល​ត្រូវ​អបអរ​សាទរ ប៉ុន្តែ​បើ​បង្កើត​ក្រុម​អ្នក​នាំពាក្យ​នេះ​ឡើង​ដើម្បី​ការ​គេចវេះ​របស់​នាយករដ្ឋមន្ត្រី​ចំពោះ​បញ្ហា​នានា​ដែល​បាន​កើតឡើង នោះ​គឺជា​រឿង​ដែល​គួរ​ឱ្យ​សោកស្តាយ​ទៅវិញ​ប៉ុណ្ណោះ។

លោក សេក សុជាតិ ត្អូញត្អែរ​ថា បើ​ប្រៀបធៀប​ការងារ​របស់​ក្រសួង​នីមួយៗ​ជាមួយ​នឹង​ចំនួន​មន្ត្រី​រដ្ឋាភិបាល​ដែល​មាន​ដល់​ទៅ​ជាង ១៥០០​នាក់ (១៥៤៣​នាក់) សម្រាប់​រដ្ឋាភិបាល​ថ្មី​នេះ គឺជា​ចំនួន​ច្រើន​លើសលប់​ទៅ​ហើយ ប៉ុន្តែ​ប្រសិទ្ធភាព​ការងារ​គេ​នៅ​មិន​ទាន់​ដឹង​នៅឡើយ​ថា តើ​ពួកគេ​អនុវត្ត​បាន​កម្រិត​ណា​នោះ។

លោក សេក សុជាតិ បញ្ជាក់​ថា នៅ​ពេលនេះ​ការ​ព្រួយបារម្ភ​របស់​ពលរដ្ឋ​គឺ​នៅ​ត្រង់​ថា តើ​មន្ត្រី​ថ្មី​ទាំងនេះ​អាច​នឹង​ប្រព្រឹត្ត​អំពើពុករលួយ ដើម្បី​ធ្វើ​មាន​ធ្វើ​បាន​ក្នុង​តំណែង​ថ្មីៗ​ដែល​ពួកគេ​នឹង​ដឹកនាំ​សម្រាប់​អាណត្តិ​ថ្មី​នេះ​ដែរ​ឬ​ក៏​អត់​ប៉ុណ្ណោះ ព្រោះ​ថា​អំពើពុករលួយ​នៅ​កម្ពុជា​សព្វថ្ងៃ​នេះ​ត្រូវ​គេ​មើល​ឃើញ​ថា កំពុង​រីក​ធំធាត់​ចាក់​ឫស​យ៉ាង​ជ្រៅ​នៅ​តាម​ស្ថាប័ន​រដ្ឋ​ជាច្រើន​អាណត្តិ​មក​ហើយ​នោះ។

ក្រុម​អ្នក​សង្កេតការណ៍​លើកឡើង​ថា រដ្ឋាភិបាល​ថ្មី​ក្រោម​ការ​ដឹកនាំ​របស់​លោក ហ៊ុន ម៉ាណែត ទំនង​ជា​មិន​អាច​ដឹកនាំ​កម្ពុជា​ទៅ​រក​ភាព​ល្អ​ប្រសើរ​ជាង​លោក ហ៊ុន សែន ទេ ព្រោះ​ថា​ប្រព័ន្ធ​ដឹកនាំ​ដែល​លោក ហ៊ុន សែន បាន​រៀបចំ​ទុក​ឱ្យ គឺជា​ប្រព័ន្ធ​ដឹកនាំ​បែប​គ្រួសារ​និយម​ប៉ុណ្ណោះ មិនមែន​ជា​ប្រព័ន្ធ​ដឹកនាំ​តាម​បែប​ប្រជាធិបតេយ្យ​នោះ​ទេ ដូច្នេះ​អ្វីៗ​ដែល​គាត់​រៀបចំ​នៅ​ពេលនេះ គឺ​គ្រាន់តែ​ធ្វើ​ឱ្យ​ល្អ​មើល​នោះ​ទេ ប៉ុន្តែ​ការពិត គឺជា​ការ​រៀបចំ​ខ្សែ​បណ្ដាញ​ដើម្បី​តែ​អំណាច និង​ផល​ប្រយោជន៍​ក្រុម​គ្រួសារ​បក្ខពួក​របស់​ពួកគេ​ទៅវិញ​ប៉ុណ្ណោះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស