37.3 C
Phnom Penh

សហគមន៍​រងគ្រោះ​ដីធ្លី​នៅ​ខេត្ត​កោះកុង​បន្ត​ស្នើ​នាយករដ្ឋមន្ត្រី​ថ្មី​ជួយ​ដោះលែង​តំណាង​៩​នាក់

ដោយ ឌឹ ខេមបូឌា ដេលី

បទវិភាគ

សហគមន៍​រងគ្រោះ​ដីធ្លី​នៅ​ខេត្ត​កោះកុង បន្ត​ស្នើ​ទៅ​លោក ហ៊ុន ម៉ាណែត ដែល​ជា​នាយករដ្ឋមន្ត្រី​កម្ពុជា​បន្ត​វេន​ពី​ឪពុក ឲ្យ​ជួយ​អន្តរាគមន៍​ដោះលែង​តំណាង​ពួកគេ​ចំនួន ៩​នាក់​ដែល​កំពុង​ជាប់​ពន្ធនាគារ​ដោយសារ​បញ្ហា​ដីធ្លី​ឲ្យ​មាន​សេរីភាព​វិញ។

ការ​ស្នើ​នេះ បន្ទាប់ពី​សមត្ថកិច្ច​ចាប់ និង​បញ្ជូន​ខ្លួន​តំណាង​សហគមន៍​រងគ្រោះ​ដីធ្លី​ទាំង ៩​នាក់​ទៅ​ឃុំ​នៅ​ពន្ធនាគារ​ខេត្ត​កោះកុង កាលពី​ចុង​ខែ​មិថុនា ឆ្នាំ​២០២៣។ គិត​ចាប់តាំងពី​ថ្ងៃ​ចាប់ និង​ឃុំ​ខ្លួន​មក​ដល់​ពេលនេះ តំណាង​សហគមន៍​ដីធ្លី​ទាំង ៩​នាក់​ដែល​សកម្ម​ចេញ​ទាមទារ​យុត្តិធម៌ និង​ដំណោះស្រាយ​ដីធ្លី​បាន​ជាប់​ឃុំ​ជិត ២​ខែ​ហើយ។

ជុំវិញ​រឿង​នេះ សហគមន៍​តានី​១៩៧ សរសេរ​លើ​បណ្ដាញ​សង្គម​ហ្វេសប៊ុក​ដោយ​បន្ត​ទទូច​ទៅ​លោក ហ៊ុន ម៉ាណែត ដែល​ជា​នាយករដ្ឋមន្ត្រី​កម្ពុជា ជួយ​អន្តរាគមន៍​ទៅ​តុលាការ​ដោះលែង​តំណាង​ទាំង ៩​នាក់​ដែល​កំពុង​ជាប់​ពន្ធនាគារ​ខេត្ត​កោះកុង ដោយសារ​បញ្ហា​វិវាទ​ដីធ្លី ឲ្យ​មាន​សេរីភាព​វិញ។

ការ​ស្នើសុំ​របស់​សហគមន៍​តានី​១៩៧ កាលពី​ថ្ងៃទី​២៦ ខែ​សីហា នេះ ដោយ​ភ្ជាប់​ជាមួយ​នឹង​បដា​ស្នើសុំ និង​រូបថត​តំណាង​ទាំង ៩​នាក់ ដែល​ត្រូវ​បាន​តុលាការ​ខេត្ត​កោះកុង ឃុំ​ខ្លួន​នៅ​ក្នុង​ពន្ធនាគារ បន្ទាប់ពី​ពួកគេ​ចេញ​ទាមទារ​ដំណោះស្រាយ​វិវាទ​ដីធ្លី​ដែល​បាន​អូស​បន្លាយ​ជាង ១០​ឆ្នាំ​មក​នេះ។

ប្រជា​សហគមន៍​តានី​១៩៧ ថា​ពួកគេ​ទាំង ៣​ឃុំ​ក្នុង​នោះ​មាន​ឃុំ​ដងពែង ឃុំ​ជីខលើ និង​ឃុំ​ជីខក្រោម ស្រុក​ស្រែអំបិល ខេត្ត​កោះកុង បាន​រង​នូវ​ភាព​អយុត្តិធម៌​ដោយ​បាត់បង់​ដីធ្លី​អាស្រ័យ​ផល ដោយសារ​តែ​បុគ្គល​មាន​អំណាច​ម្នាក់​ដែល​បាន​រំលោភ​យក​ដីធ្លី​ពួកគេ​តាំងពី​ឆ្នាំ​២០០៧ ហើយ​គិត​មក​ដល់​បច្ចុប្បន្ន ពួកគេ​មិន​ទាន់​ទទួល​បាន​ដំណោះស្រាយ​នៅឡើយ។

ក្រៅពី​មិន​ទទួល​បាន​ដំណោះស្រាយ​ហើយ តំណាង ៩​នាក់​ដែល​ជាប់​ឃុំ ក្នុង​នោះ​មាន​លោកស្រី ដេត ហ៊ួរ លោកស្រី ផាវ ញ៉ើង លោក ហេង ជែ លោក សុខ ជៃ លោកស្រី យី គន្ធា លោក ឡាំង ជៀវ និង​លោកស្រី ទិន តាំង ជាដើម។

ការ​ចាប់​ខ្លួន​តំណាង​សហគមន៍​រងគ្រោះ​ដីធ្លី​ទាំង ៩​នាក់​នេះ អំឡុង​ពេល​ពួកគេ​បាន​នាំគ្នា​ឡើង​មក​ភ្នំពេញ​ដាក់​ញត្តិ​នៅ​ក្រសួង​យុត្តិធម៌ កាលពី​ចុង​ខែ​មិថុនា ឆ្នាំ​២០២៣ ដើម្បី​ស្នើ​ទៅ​រដ្ឋមន្ត្រី​ក្រសួង​យុត្តិធម៌​លោក កើត រិទ្ធ ឲ្យ​ជួយ​រក​កិច្ច​អន្តរាគមន៍​ទៅ​តុលាការ​ខេត្ត​កោះកុង ទម្លាក់​ចោល​បទ​ចោទប្រកាន់​លើ​អ្នក​ភូមិ ៣០​នាក់​ដែល​ត្រូវ​បាន​ឧកញ៉ា ២​នាក់​ប្ដឹង​ពួកគេ បន្ទាប់ពី​រំលោភ​ដីធ្លី​ពួកគេ​ធ្លាប់​អាស្រ័យ​នោះ។ ក្រុម​ពលរដ្ឋ​មាន​ជម្លោះ​ដីធ្លី​ជាមួយ​ឧកញ៉ា ហេង ហ៊ុយ តាំងពី​ឆ្នាំ​២០០៧ មក​ម្ល៉េះ ដោយ​ក្រុម​ឧកញ៉ា​ទាំង​ពីរ​នាក់​នេះ​បាន​រំលោភ​ដីធ្លី​ពួកគេ​ដែល​បាន​អាស្រ័យ​ផល​តាំងពី​ដូនតា​មក​ម្ល៉េះ។

កាលពី​សប្តាហ៍​មុន សមាគម​សម្ព័ន្ធ​សហគមន៍​កសិករ​កម្ពុជា (CCFC) ក៏​បាន​ស្នើ​ទៅ​រដ្ឋាភិបាល​ថ្មី​ដឹកនាំ​ដោយ​លោក ហ៊ុន ម៉ាណែត ជួយ​អន្តរាគមន៍​ដោះលែង​ប្រជាពលរដ្ឋ​រងគ្រោះ​ដីធ្លី​ជាមួយ​ឧកញ៉ា ហេង ហ៊ុយ នៅ​ខេត្ត​កោះកុង បច្ចុប្បន្ន​ដែល​កំពុង​ជាប់​ពន្ធនាគារ ៩​នាក់ ឲ្យ​មាន​សេរីភាព​វិញ​ផង​ដែរ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស