នៅរដ្ឋធានីគៀវ នៃប្រទេសអ៊ុយក្រែន នៅថ្ងៃទី៦ កញ្ញា នេះ មានព្រឹត្តិការណ៍សំខាន់ពីរដែលអ្នកសារព័ត៌មានធ្វើការកត់សម្គាល់ និងធ្វើសេចក្ដីរាយការណ៍ គឺទី១ រដ្ឋមន្ត្រីការបរទេសអាមេរិក ទៅដល់ទីក្រុងគៀវ ត្រូវគេរំពឹងថានឹងប្រកាសជំនួយជាង ១ពាន់លានដុល្លារថ្មីទៀតទៅឱ្យប្រទេសមួយដែលហែកហួរដោយសង្គ្រាមឈ្លានពានពីមហាអំណាចរុស្ស៊ី និងទី២ នាយករដ្ឋមន្ត្រីនៃប្រទេសដាណឺម៉ាក ថ្លែងសុន្ទរកថាទៅកាន់សមាជិកអ៊ុយក្រែន ខណៈអ្នកស្រី Mette Frederiksen ក៏លើកឡើងអំពីជំនួយរបស់ប្រទេសដាណឺម៉ាក ផងដែរ។
ទីភ្នាក់ងារសារព័ត៌មាន Reuters បានធ្វើសេចក្ដីរាយការណ៍ពីរដ្ឋធានីគៀវ នៅថ្ងៃពុធ ទី៦ កញ្ញា នេះថា រដ្ឋមន្ត្រីការបរទេសអាមេរិក លោក Antony Blinken បានធ្វើដំណើរទៅដល់ទីក្រុងគៀវ ដោយមិនបានប្រកាសឱ្យដឹងជាមុន ហើយលោកត្រូវគេរំពឹងថា នឹងប្រកាសជំនួយទំហំជាង ១ពាន់លានដុល្លារថ្មីទៀតសម្រាប់អ៊ុយក្រែន។
ក្រសួងការបរទេសអាមេរិក បានឱ្យដឹងថា លោក Blinken បានទៅដល់រដ្ឋធានីរបស់អ៊ុយក្រែន ហើយលោកត្រូវបានទទួលស្វាគមន៍ដោយឯកអគ្គរដ្ឋទូតអាមេរិក អ្នកស្រី Bridget Brink។
មន្ត្រីជាន់ខ្ពស់មួយរូបនៃក្រសួងការបរទេសអាមេរិក បានបង្ហើបថា លោករដ្ឋមន្ត្រី Blinken នឹងប្រកាសជំនួយថ្មីទៀតរបស់សហរដ្ឋអាមេរិកដែលមានទំហំច្រើនជាង ១ពាន់លានដុល្លារសម្រាប់អ៊ុយក្រែន ក្នុងដំណើរបំពេញទស្សនកិច្ចជាថ្មីទៀតរបស់ប្រមុខការទូតរូបនេះនៅក្រុងគៀវ។
នេះគឺជាដំណើរទស្សនកិច្ចលើកទី៤ ហើយរបស់លោក Blinken ទៅកាន់ប្រទេសអ៊ុយក្រែន គិតចាប់តាំងពីសង្គ្រាមឈ្លានពានរបស់រុស្ស៊ី ដែលបានផ្ទុះឡើងកាលពីខែកុម្ភៈ ឆ្នាំ២០២២។
ដំណើរទស្សនកិច្ចនេះទៀតរបស់កំពូលអ្នកការទូតសហរដ្ឋអាមេរិករូបនេះ កើតមានឡើងរយៈពេលជិត ៦ខែក្រោយពីប្រធានាធិបតីអាមេរិក លោក ចូ បៃដិន បានបំពេញទស្សនកិច្ចទៅទីក្រុងគៀវ ក្នុងឱកាសខួប ១ឆ្នាំនៃការឈ្លានពានរបស់រុស្ស៊ីលើអ៊ុយក្រែន កាលពីថ្ងៃទី២៣ ខែកុម្ភៈ ឆ្នាំ២០២៣។
ខណៈរដ្ឋាភិបាលលោកប្រធានាធិបតីអ៊ុយក្រែន វូឡូឌីមៀ ហ្សេឡេនស្គី ត្រូវការជួយជាបន្ទាន់ទាំងជំនួយយោធា និងជំនួយមនុស្សធម៌ ប្រទេសជាង ៥០ ប្រកាសចងសម្ព័ន្ធភាពជាមួយសហរដ្ឋអាមេរិក ដើម្បីជួយប្រជាជនអ៊ុយក្រែន។ សម្រាប់សហរដ្ឋអាមេរិក គឺជាប្រទេសធំជាងគេក្នុងការផ្ដល់ជំនួយទៅឱ្យអ៊ុយក្រែន។ សភាសហរដ្ឋអាមេរិកបានអនុម័តកញ្ចប់ថវិការយៈពេល ២ឆ្នាំ ពីឆ្នាំ២០២២ ដល់ឆ្នាំ២០២៤ នូវសាច់ប្រាក់ ១១ម៉ឺន ៣០០លានដុល្លារ។
ក្នុងជំនួយយោធា បើរាប់ពីជំនួយដែលលោក Blinken ប្រកាសនៅចំពោះមុខប្រធានាធិបតីអ៊ុយក្រែន នៅក្រុងគៀវ នៅថ្ងៃនេះនូវសាច់ប្រាក់ជាង ១ពាន់លានដុល្លារថ្មីទៀតនេះ នាំឱ្យប្រទេសមហាអំណាចនេះផ្ដល់ជំនួយយោធាជាង ៤ម៉ឺន ៥ពាន់លានដុល្លារ និងជំនួយមនុស្សធម៌ជាង ២ម៉ឺនលានដុល្លារ។
កាលពីថ្ងៃទី៤ កញ្ញា ក្រសួងយុត្តិធម៌ប្រទេសអ៊ុយក្រែន ប្រកាសថា ទ្រព្យសម្បត្តិរបស់សែស្រឡាយ និងបក្ខពួកលោក វ្លាឌីមៀ ពូទីន ប្រធានាធិបតីរុស្ស៊ី ដែលមាននៅលើទឹកដីអាមេរិកជាង ១ពាន់លានដុល្លារ ត្រូវបានរឹបអូសដើម្បីយកទៅឱ្យប្រទេសអ៊ុយក្រែន។
កាលពីថ្ងៃទី២៤ សីហា ជាទិវាបុណ្យឯករាជ្យជាតិនៃប្រទេសអ៊ុយក្រែន ប្រធានាធិបតីសហរដ្ឋអាមេរិក លោក ចូ បៃដិន បានបញ្ជូនលិខិតទៅជូនសមភាគីអ៊ុយក្រែន លោក ហ្សេឡេនស្គី ដែលលោក បៃដិន ផ្ញើសារសាទរប្រជាជនអ៊ុយក្រែន ដែលបានធ្វើពលិកម្មដើម្បីសេរីភាព និងអធិបតេយ្យភាពរបស់ប្រទេស។
សាររបស់លោក បៃដិន បានបញ្ជាក់ឡើងវិញអំពីការប្ដេជ្ញាចិត្តរបស់សហរដ្ឋអាមេរិក ក្នុងការគាំទ្របុព្វហេតុនៃប្រជាជនអ៊ុយក្រែន ដែលកំពុងតស៊ូដោយការធ្វើពលិកម្មដើម្បីប្រឆាំងនឹងការឈ្លានពានពីសំណាក់ប្រទេសរុស្ស៊ី។
លោក បៃដិន សន្យាថានឹងបន្តជួយអ៊ុយក្រែន រហូតរំដោះបានវិញនូវសេរីភាពរបស់ខ្លួន។ លោក បៃដិន ក៏បានលើកឡើងផងដែរការដែលសហរដ្ឋអាមេរិកបើកភ្លើងខៀវឱ្យប្រទេសដាណឺម៉ាក និងហុឡង់ដ៍ បញ្ជូនយន្តហោះចម្បាំង F-16 ទៅឱ្យអ៊ុយក្រែន។ លោកសង្ឃឹមថា អ៊ុយក្រែននឹងទទួលបាន F-16 ពីប្រទេសទាំងពីរនេះនៅពេលឆាប់ៗខាងមុខនេះ។
ស្របពេលដែលរដ្ឋមន្ត្រីការបរទេសអាមេរិក Antony Blinken ទៅដល់ក្រុងគៀវ នាយករដ្ឋមន្ត្រីនៃប្រទេសដាណឺម៉ាក អ្នកស្រី Mette Frederiksen ដែលសន្យាថានឹងបញ្ជូនយន្តហោះចម្បាំង F-16 ទៅឱ្យអ៊ុយក្រែន ក៏មានវត្តមានផងដែរ។ ក្រោយពីជួបលោក ហ្សេឡនស្គី និងក្រោយពីបានទៅកាន់វិហារគ្រឹះនៅក្នុងសង្កាត់បូឆា ជាទីតាំងរូបថតនៃជនស៊ីវិលស្លាប់ដោយសារកងទ័ពរុស្ស៊ីសម្លាប់ អ្នកស្រី Mette Frederiksen បានទៅថ្លែងសុន្ទរកថាដ៏សំខាន់មួយទៅកាន់សមាជិកអ៊ុយក្រែន។
អ្នកស្រីនាយករដ្ឋមន្ត្រីដាណឺម៉ាក បានលើកឡើងអំពីការសម្រេចបញ្ជូនយន្តហោះចម្បាំង F-16 ទៅឱ្យអ៊ុយក្រែន។ អ្នកស្រីក៏បានកោតសរសើរជាខ្លាំងនូវវីរភាពរបស់ប្រជាជនអ៊ុយក្រែន និងសមាជិកសភាអ៊ុយក្រែន ដែលបានសាមគ្គីគ្នាជាមួយរដ្ឋាភិបាលក្រោមការដឹកនាំរបស់លោក ហ្សេឡេនស្គី ក្នុងការការពារសិទ្ធិសេរីភាពរបស់ប្រជាជន និងប្រយុទ្ធការពារទឹកដីប្រទេសអ៊ុយក្រែន ពីការឈ្លានពានរបស់ប្រទេសរុស្ស៊ី។
នេះជាលើកទី៣ ហើយដែលអ្នកស្រី Mette Frederiksen នាយករដ្ឋមន្ត្រីប្រទេសដាណឺម៉ាក ធ្វើដំណើរទស្សនកិច្ចទៅកាន់ប្រទេសអ៊ុយក្រែន ដែលកំពុងធ្លាក់ក្នុងសង្គ្រាមជាមួយប្រទេសមហាអំណាចរុស្ស៊ី៕