35 C
Phnom Penh

អូស្ត្រាលី​រំលឹក​កម្ពុជា​អំពី​ការ​ធ្លាប់​ជួយ​កម្ពុជា​ស្វែងរក​សន្តិភាព ប្រជាធិបតេយ្យ​និង​សិទ្ធិមនុស្ស

ដោយ ឌឹ ខេមបូឌា ដេលី

បទវិភាគ

ប្រមុខ​រដ្ឋាភិបាល​អូស្ត្រាលី រំលឹក​នាយករដ្ឋមន្ត្រី​ថ្មី​កម្ពុជា លោក ហ៊ុន ម៉ាណែត ថា អូស្ត្រាលី​ធ្លាប់​បាន​ជួយ​កម្ពុជា​ស្វែងរក​សន្តិភាព ការ​អភិវឌ្ឍ ប្រជាធិបតេយ្យ និង​សិទ្ធិមនុស្ស ដូច្នេះ​នៅ​ពេលនេះ​រដ្ឋាភិបាល​អូស្ត្រាលី ក៏​នឹង​ទន្ទឹង​រង់ចាំ​ជួយ​កម្ពុជា​លើ​កិច្ច​សហប្រតិបត្តិការ​នេះ​បន្ត​ទៀត។

នាយករដ្ឋមន្ត្រី​អូស្ត្រាលី លោក Anthony Albanese បាន​ផ្ញើ​លិខិត​មួយ​កាលពី​ថ្ងៃទី​១០ ខែ​កញ្ញា ឆ្នាំ​២០២៣ ទៅ​កាន់​នាយករដ្ឋមន្ត្រី​ថ្មី​របស់​កម្ពុជា លោក ហ៊ុន ម៉ាណែត ដែល​ត្រូវ​បាន​អញ្ជើញ​ឱ្យ​ចូលរួម​ក្នុង​កិច្ចប្រជុំ​កំពូល​ពិសេស​អាស៊ាន-អូស្ត្រាលី ដែល​នឹង​ប្រព្រឹត្ត​ទៅ​នៅ​ក្នុង​ទីក្រុង​មែលប៊ន រយៈពេល ២​ថ្ងៃ ចាប់ពី​ថ្ងៃទី​៤ ដល់​ថ្ងៃទី​៦ ខែ​មីនា ឆ្នាំ​២០២៤ ក៏​ជា​ថ្ងៃ​រំលឹក​ខួប​លើក​ទី​៥០ ក្នុង​ឋានៈ​ជា​ដៃគូ​សន្ទនា​របស់​អូស្ត្រាលី​ជាមួយ​អាស៊ាន​ផង​ដែរ។

នាយករដ្ឋមន្ត្រី​អូស្ត្រាលី បាន​រំលឹក​ក្នុង​លិខិត​អញ្ជើញ​របស់​ខ្លួន​អំពី​កិច្ច​សហប្រតិបត្តិការ​របស់​ខ្លួន​ក្នុង​ការ​ជួយ​ជ្រោមជ្រែង​កម្ពុជា​ស្វែងរក​សន្តិភាព ការ​អភិវឌ្ឍ ប្រជាធិបតេយ្យ និង​សិទ្ធិមនុស្ស ព្រម​ទាំង​បង្ហាញ​ពី​ការ​ប្ដេជ្ញា​ចិត្ត​របស់​ខ្លួន​ក្នុង​ការ​ទន្ទឹង​រង់ចាំ​ជួយ​កម្ពុជា​លើ​កិច្ច​សហប្រតិបត្តិការ​នេះ​បន្ត​ទៀត។

លោក Anthony Albanese បញ្ជាក់​ថា អូស្ត្រាលី​មាន​មោទនភាព​ដែល​ក្លាយ​ជា​ដៃគូ​សន្ទនា​ដំបូង​របស់​អាស៊ាន ហើយ​អូស្ត្រាលី ក៏​នឹង​ប្ដេជ្ញា​ធ្វើ​ឱ្យ​ស៊ីជម្រៅ​ក្នុង​ការ​ចូលរួម​រវាង​កម្ពុជា និង​អូស្ត្រាលី នៅ​ក្នុង​តំបន់ ការ​កសាង​មូលដ្ឋានគ្រឹះ​នៃ​អាស៊ាន-អូស្ត្រាលី និង​ភាព​ជា​ដៃគូ​យុទ្ធសាស្ត្រ​គ្រប់​ជ្រុងជ្រោយ ដើម្បី​ពង្រឹង​ទំនាក់ទំនង​បន្ថែម​ទៀត​ក្នុង​ឋានៈ​ជា​ម្ចាស់​ផ្ទះ​នៃ​កិច្ចប្រជុំ​នេះ។

ការ​រំលឹក​អំពី​ការ​ជ្រោមជ្រែង​របស់​រដ្ឋាភិបាល​អូស្ត្រាលី ក្នុង​ការ​ជួយ​កម្ពុជា​ស្វែងរក​ប្រជាធិបតេយ្យ និង​សិទ្ធិមនុស្ស​នេះ ធ្វើឡើង​ស្រប​ពេល​ដែល​កម្ពុជា​នៅ​ពេលនេះ​កំពុង​រង​នូវ​ការ​រិះគន់​ជុំ​ទិស​អំពី​ការ​ធ្វើ​ឱ្យ​ធ្លាក់​ចុះ​នូវ​ប្រជាធិបតេយ្យ និង​ការ​ធ្លាក់​ចុះ​នូវ​ការ​គោរព​សិទ្ធិមនុស្ស​រហូត​មក។

អតីត​អ្នកទោស​នយោបាយ និង​ជា​មន្ត្រី​ជាន់ខ្ពស់​អតីត​គណបក្ស​សង្គ្រោះ​ជាតិ​លោក មាជ សុវណ្ណារ៉ា បាន​ប្រាប់​សារព័ត៌មាន The Cambodia Daily នៅ​ថ្ងៃទី​១១ កញ្ញា នេះ​ថា ការ​រំលឹក​អំពី​ប្រជាធិបតេយ្យ និង​សិទ្ធិមនុស្ស​ដល់​នាយករដ្ឋមន្ត្រី​របស់​កម្ពុជា គឺជា​សញ្ញា​បង្ហាញ​ពី​ការ​ព្រួយ​បារម្ភ​របស់​រដ្ឋាភិបាល​អូស្ត្រាលី​ក្នុង​នាម​ប្រទេស​ហត្ថលេខី​នៃ​កិច្ចព្រមព្រៀង​សន្តិភាព​ទីក្រុង​ប៉ារីស​ឆ្នាំ​១៩៩១ ចំពោះ​ស្ថានភាព​សិទ្ធិមនុស្ស និង​ប្រជាធិបតេយ្យ​ដែល​កំពុង​ធ្លាក់​ចុះ​នៅ​កម្ពុជា​សព្វថ្ងៃ​នេះ។

ប្រភព​ដដែល​ឲ្យ​ដឹង​ទៀត​ថា ការ​រំលឹក​របស់​រដ្ឋាភិបាល​អូស្ត្រាលី នៅ​ពេលនេះ មិនមែន​ជា​រឿង​ហួសហេតុ​នោះ​ទេ ប៉ុន្តែ​ជា​រឿង​ត្រឹមត្រូវ និង​ចំ​ពេល​បំផុត ត្បិត​ក្រោយ​ការ​បង្កើត​រដ្ឋាភិបាល​ថ្មី​កន្លងមក​នេះ គេ​នៅ​មិនទាន់​ឃើញ​មាន​ការ​បើក​លំហ​សិទ្ធិ​សេរីភាព​របស់​ពលរដ្ឋ​ឱ្យ​មាន​ភាព​ល្អ​ប្រសើរ​ជាង​រដ្ឋាភិបាល​ចាស់​នៅឡើយ​ទេ ប៉ុន្តែ​បែរ​ជា​កំពុង​អនុវត្ត​ការ​គាបសង្កត់​សិទ្ធិ​សេរីភាព​របស់​ពលរដ្ឋ​ដូច​រដ្ឋាភិបាល​ចាស់​ទៅ​វិញ។

អតីត​មន្ត្រី​ជាន់ខ្ពស់​បក្ស​ប្រឆាំង​រូប​នេះ​បញ្ជាក់​ថា នៅ​ពេលនេះ នាយករដ្ឋមន្ត្រី​ថ្មី​របស់​កម្ពុជា​គួរ​តែ​បង្ហាញ​ពី​គោលជំហរ​របស់​ខ្លួន​ឱ្យ​បាន​ច្បាស់លាស់​អំពី​ការ​អនុវត្ត​នូវ​លទ្ធិប្រជាធិបតេយ្យ និង​ការ​គោរព​សិទ្ធិមនុស្ស ដើម្បី​ឱ្យ​ប្រទេស​ដែល​ជា​ដៃគូ​ក្នុង​តំបន់​ឃើញ​ច្បាស់​នូវ​ជំហរ​របស់​ខ្លួន ព្រោះ​ថា​សព្វថ្ងៃ​នេះ អ្នកទោស​មនសិការ អ្នកទោស​នយោបាយ រួម​ទាំង​មេដឹកនាំ​បក្ស​ប្រឆាំង​លោក កឹម សុខា ជាដើម នៅតែ​បន្ត​រង​នូវ​ការ​គាបសង្កត់​សិទ្ធិ​សេរីភាព​ទាំង​អយុត្តិធម៌​ដដែល ដែល​ជា​មូលហេតុ​ធ្វើ​ឱ្យ​ប្រទេស​ប្រកាន់​លទ្ធិប្រជាធិបតេយ្យ​កាន់តែ​ព្រួយបារម្ភ​ពី​ការ​ធ្លាក់​ចុះ​នូវ​ការ​គោរព​សិទ្ធិមនុស្ស និង​លទ្ធិប្រជាធិបតេយ្យ​របស់​កម្ពុជា​នៅ​ពេលនេះ។

ប្រធាន​សហព័ន្ធ​ខ្មែរ​អូស្ត្រាលី​សាជីវកម្ម លោក ហុង លីម បាន​ចេញ​សេចក្តី​ប្រកាស​ព័ត៌មាន​កាលពី​ថ្ងៃទី​៩ ខែ​សីហា ឆ្នាំ​២០២៣ ថា កម្ពុជា​នឹង​ក្លាយ​ជា​របប​ផ្ដាច់ការ បន្ទាប់ពី​លោក ហ៊ុន សែន ត្រួតត្រា​ដោយ​ប្រើ​កណ្ដាប់ដៃ​ដែក​អស់​រយៈពេល ៣៨​ឆ្នាំ និង​ផ្ទេរ​អំណាច​ឱ្យ​កូនប្រុស​របស់​គាត់​លោក ហ៊ុន ម៉ាណែត ដឹកនាំ​បន្ត​ទៀត បើ​ទោះបីជា​លោក ហ៊ុន ម៉ាណែត ធ្លាប់​ទទួល​បាន​ការ​បណ្តុះបណ្តាល​ពី​ប្រទេស​លោក​សេរី​ក៏ដោយ។

ជុំវិញ​បញ្ហា​នេះ កាលពី​ចុង​ខែ​កក្កដា ឆ្នាំ​២០២៣ ប្រទេស​អូស្ត្រាលី បាន​ចេញ​សេចក្តី​ថ្លែងការណ៍​របស់​ខ្លួន​ជុំវិញ​ដំណើរការ​បោះឆ្នោត​នៅ​កម្ពុជា ថា ប្រទេស​អូស្ត្រាលី​មាន​ការ​ព្រួយបារម្ភ​យ៉ាង​ខ្លាំង​អំពី​ការ​រឹតត្បិត​នានា​មិន​អាច​ឱ្យ​ពលរដ្ឋ​កម្ពុជា​ទទួល​បាន​ព័ត៌មាន មិន​អាច​បញ្ចេញមតិ​របស់​ពួកគេ​ដោយ​សេរី និង​មិន​មាន​ជម្រើស​ពិតប្រាកដ​នោះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស