នាយករដ្ឋមន្ត្រីតពូជលោក ហ៊ុន ម៉ាណែត បានព្រមានចាត់វិធានការលើមន្ត្រីជំនាញទាំងឡាយណាដែលមិនចេញបកស្រាយ ដើម្បីឆ្លើយតបឲ្យបញ្ហាភ្លាមៗដោយរង់ចាំតែនាយករដ្ឋមន្ត្រីនោះ។
ក្នុងពិធីសំណេះសំណាលជាមួយកម្មករនិយោជិតតាមបណ្តារោងចក្រសហគ្រាសដែលមានមូលដ្ឋានក្នុងខណ្ឌមានជ័យ និងខណ្ឌដង្កោ នាថ្ងៃទី៣ ខែតុលា ឆ្នាំ២០២៣ លោក ហ៊ុន ម៉ាណែត បានលើកជាសំណួរថា តើចង់ឲ្យលោកជានាយករដ្ឋមន្ត្រីក្លាយទៅជាអ្នកនាំពាក្យឲ្យគ្រប់អង្គភាពស្ថាប័នទាំងអស់ ឬយ៉ាងណា ទើបមន្ត្រីជំនាញទាំងនោះមិនព្រមចេញបកស្រាយចំពោះបញ្ហាដែលកើតឡើង។
លោកចាត់ទុកការមិនចេញបកស្រាយដោយរង់ចាំតែនាយករដ្ឋមន្ត្រីមានចំណាត់ការនេះ ថានឹងធ្វើឲ្យបញ្ហានោះផ្ទុះឡើងកាន់តែធំ ដូច្នេះដើម្បីទប់ស្កាត់បញ្ហា លោកចង់ឲ្យមន្ត្រីទាំងនោះទទួលខុសត្រូវខ្ពស់លើភារកិច្ចរបស់ខ្លួន ក្នុងការដោះស្រាយបញ្ហាប្រឈមជាមួយពលរដ្ឋ ជាជាងរង់ចាំលោកចេញបកស្រាយ និងចាត់វិធានការ។
ការលើកឡើងរបស់នាយករដ្ឋមន្ត្រីតពូជលោក ហ៊ុន ម៉ាណែត នេះ បន្ទាប់ពីពលរដ្ឋបានចេញប្រតិកម្មចំពោះរឿងរដ្ឋាភិបាលក្បាលធំ ដំឡើង និងប្រមូលពន្ធពីពលរដ្ឋលើមុខទំនិញផ្សេងៗ បញ្ហាបោកប្រាស់តាមប្រព័ន្ធអ៊ីនធឺណិត ការជួញដូរគ្រឿងញៀន ការជួញដូរមនុស្ស និងករណីថៃ សាងសង់ប្រាសាទយកលំនាំតាមប្រាសាទអង្គរវត្ត ជាដើម។
ភ្នាក់ងារអង្គការសហប្រជាជាតិកាលពីពេលថ្មីៗនេះ បានរកឃើញថា យ៉ាងហោចណាស់មានមនុស្សប្រហែល ១សែននាក់ត្រូវបានគេប្រើប្រាស់ លក់ និងជួញដូរបន្ត ដើម្បីធ្វើការបោកប្រាស់តាមប្រព័ន្ធអ៊ីនធឺណិតនៅកម្ពុជា។
អ្នកវិភាគនយោបាយ និងជាប្រធានវេទិកាពលរដ្ឋលោក គឹម សុខ ប្រាប់សារព័ត៌មាន The Cambodia Daily នៅថ្ងៃទី៣ តុលា នេះថា លោក ហ៊ុន ម៉ាណែត មិនត្រូវបន្ទោសមន្ត្រីអ្នកនាំពាក្យទាំងនោះទេ ព្រោះវិបត្តិធំៗទាំងនោះសុទ្ធតែជាចំណងដែលចងយ៉ាងណែនដោយគ្រួសារហ៊ុន ដើម្បីរក្សាអំណាចគ្រួសារ។
លោកបន្តថា មិនមែនមន្ត្រីនាំពាក្យនៃរដ្ឋាភិបាលរបស់លោក ហ៊ុន ម៉ាណែត មិនចេះឆ្លើយនោះទេ ប៉ុន្តែឆ្លើយការពិត ពួកគេខ្លាចបកស្រាយ ឬបំភ្លឺទៅមហាជន ដោយខ្លាចប៉ះចំគ្រួសារត្រកូលហ៊ុន ដូច្នេះពួកគេត្រូវរកវិធីដោះសាគ្រប់ពេល ហើយពេលណារកចម្លើយដោះសាមិនបាន គឺមានតែនៅស្ងៀមស្ងាត់អ៊ីចឹងហើយ។
លោក គឹម សុខ អះអាងថា រាល់វិបត្តិទាំងអស់កើតឡើងពីគ្រួសារហ៊ុន ហើយគ្មានមន្ត្រីនាំពាក្យណាមានសមត្ថភាពឆ្លើយគ្រប់ពេលនោះទេ ពីព្រោះបើឆ្លើយខុសចិត្តគ្រួសារហ៊ុន នោះពួកគេនឹងវ័ណ្ឌកខ្លួនឯង។ ហេតុនេះហើយមានតែលោក ហ៊ុន ម៉ាណែត ត្រូវហត់បន្តិចហើយ ក្នុងការចេញដោះសាដោយខ្លួនឯង គឺដោះសា មិនមែនដោះស្រាយ និងបកស្រាយនោះទេ៕