36 C
Phnom Penh

លោក ហ៊ុន សែន៖ មរណភាព​កូនប្រុស​របស់​លោក​ក្នុង​របប ប៉ុល ពត ធ្វើ​ឱ្យ​លោក​ចងចាំ​ដល់​សព្វថ្ងៃ

ដោយ ឌឹ ខេមបូឌា ដេលី

បទវិភាគ

អតីត​ទាហាន​ជាន់ខ្ពស់​ក្នុង​ជួរ​កងទ័ព​ខ្មែរក្រហម​លោក ហ៊ុន សែន ត្អូញត្អែរ​ថា ក្នុង​នាម​ជា​ឪពុក លោក​មិន​អាច​សុំ​មេបញ្ជាការ​របស់​ខ្លួន​យក​សាកសព​កូនប្រុស​ទៅ​បញ្ចុះ​ឱ្យ​បាន​ត្រឹមត្រូវ​តាម​ប្រពៃណី​ឡើយ ដែល​សោកនាដកម្ម​នេះ​បាន​ធ្វើ​ឱ្យ​លោក​ចងចាំ​រហូត​ដល់​សព្វថ្ងៃ ខណៈ​ប្រជាជន​ទូទាំង​ប្រទេស​មាន​សិទ្ធិ​តិច​ជាង​សត្វ​ឆ្កែ ឬ​ឆ្មា។

អតីត​មេ​កម្មាភិបាល​ខ្មែរក្រហម​លោក ហ៊ុន សែន បាន​សរសេរ​លើ​ទំព័រ Facebook របស់​ខ្លួន​នៅ​ថ្ងៃទី​១០ វិច្ឆិកា នេះ​ថា ក្នុង​របប​ប្រល័យ​ពូជសាសន៍ ប៉ុល ពត ប្រជាជន​ទូទាំង​ប្រទេស​មាន​សិទ្ធិ​តិច​ជាង​សត្វ​ឆ្កែ ឬ​ឆ្មា​ទៅ​ទៀត ដែល​សត្វ​ទាំងនោះ​មាន​សិទ្ធិ​ការពារ​កូន​ខ្លួនឯង​ច្រើន​ជាង​មនុស្ស ប៉ុន្តែ​លោក​ត្រូវតែ​ទ្រាំ​អត់ធ្មត់​ដើម្បី​រំដោះ​ប្រជាជន​កម្ពុជា​ទូទាំង​ប្រទេស​ចេញពី​របប​ឃោរឃៅ​មួយ​នេះ។

មេដឹកនាំ​ដែល​ដឹកនាំ​ប្រទេស​តាម​របប​ខ្មែរក្រហម​លោក ហ៊ុន សែន អះអាង​ថា ដើម្បី​ទឹកដី និង​ពលរដ្ឋ​ខ្មែរ​រាប់​លាន​នាក់​មាន​ជីវិត​រស់ លោក​ត្រូវតែ​អត់ធ្មត់​ធ្វើ​តាម​បញ្ជា​របស់​ពួក​ឃាតករ ហើយ​ការ​អត់ធ្មត់​នេះ​បាន​ជួយ​ឱ្យ​លោក​អាច​រួម​ចំណែក​ដឹកនាំ​ចលនា​តស៊ូ​រំដោះ​ជាតិ និង​ប្រជាជន​ពី​របប​ប្រល័យ​ពូជសាសន៍ ប៉ុល ពត និង​កសាង​ប្រទេស​បាន​រីកចម្រើន​រហូត​ដល់​សព្វថ្ងៃ​នេះ។

មន្ត្រី​ជាន់ខ្ពស់​អតីត​គណបក្ស​សង្គ្រោះ​ជាតិ និង​ជា​អតីត​អ្នកទោស​នយោបាយ​ក្រោម​របប​ដឹកនាំ​របស់​លោក ហ៊ុន សែន គឺ​លោក មាជ សុវណ្ណារ៉ា ប្រាប់​សារព័ត៌មាន The Cambodia Daily នៅ​ថ្ងៃទី​១០ វិច្ឆិកា នេះ​ថា ភាព​សោកសៅ​របស់​លោក ហ៊ុន សែន និង​ការ​ធ្វើ​បុណ្យ​ឧទ្ទិស​កុសល​ដល់​វិញ្ញាណក្ខន្ធ​ដល់​កូនប្រុស​របស់​គាត់ គឺ​ជា​គុណធម៌​ក្នុង​នាម​ជា​ឪពុក ដែល​ត្រូវតែ​ធ្វើ​ចំពោះ​កូន​របស់​ខ្លួន ខណៈ​ប្រជាពលរដ្ឋ​ខ្មែរ​ទូទៅ​ដែល​ឆ្លងកាត់​របប​ខ្មៅ​ងងឹត​មួយ​នេះ ក៏​មាន​អ្នក​ជួប​សោកនាដកម្ម​ឈឺផ្សា​មិន​ខុស​គ្នា​ប៉ុន្មាន​ដែរ។

លោក មាជ សុវណ្ណារ៉ា លើកឡើង​ថា ការ​រំឭក​ពី​ការ​ឈឺចាប់​របស់​លោក ហ៊ុន សែន ក្នុង​របប​ប្រល័យ​ពូជសាសន៍ ប៉ុល ពត គួរតែ​ជា​មេរៀន​ដ៏​សំខាន់​សម្រាប់​មេដឹកនាំ​កម្ពុជា​គ្រប់​រូប​នៅ​ពេលនេះ ព្រោះ​ថា ប្រជាពលរដ្ឋ​ខ្មែរ​សុទ្ធតែ​រង​ការ​ឈឺចាប់​ខ្លោចផ្សា​ដោយសារ​ការ​បាត់បង់​សមាជិក​គ្រួសារ​របស់​ខ្លួន​ក្នុង​សម័យ​នោះ ហើយ​ការ​ដឹកនាំ​ដែល​ជាន់ឈ្លី​ជាតិ​សាសន៍​ឯង​បែប​នេះ ពលរដ្ឋ​ខ្មែរ​គ្រប់​ស្រទាប់​វណ្ណៈ​មិន​ចង់​ឱ្យ​កើត​មាន​ទៀត​ទេ។

អតីត​អ្នកទោស​នយោបាយ​រូប​នេះ​បញ្ជាក់​ថា ការ​ជិះជាន់​គាប​សង្កត់​ដើម្បី​បំបិទ​សំឡេង​រិះគន់​លើ​រដ្ឋាភិបាល​បច្ចុប្បន្ន​នេះ គឺ​មិន​ខុស​ពី​ការ​ដឹកនាំ​នា​ពេល​អតីតកាល ដែល​មេដឹកនាំ​គណបក្ស​កាន់​អំណាច​គ្រប់​គ្នា​បាន​ឆ្លងកាត់​នោះ​ដែរ ហើយ​បទពិសោធន៍​នៃ​ការ​ឈឺចាប់​របស់​មេដឹកនាំ​ទាំងនោះ​ក្នុង​អតីតកាល គួរ​ណាស់​តែ​ពួកគេ​យល់​ពី​ការ​ឈឺចាប់​របស់​ប្រជាពលរដ្ឋ​ខ្មែរ​ដែល​កំពុង​រង​ការ​គាប​សង្កត់​ក្រោម​ការ​ដឹកនាំ​របស់​ខ្លួន​សព្វថ្ងៃ​នេះ។

លោក មាជ សុវណ្ណារ៉ា បញ្ជាក់​ថា ទោះ​ការ​ដឹកនាំ​បច្ចុប្បន្ន​មិន​ដូច​របប ប៉ុល ពត ក៏ដោយ ប៉ុន្តែ​ការ​គំរាមកំហែង និង​ការ​ចោទប្រកាន់​ចាប់​ដាក់​គុក​យ៉ាង​អនាធិបតេយ្យ​សព្វថ្ងៃ​នេះ បាន​គំរាមកំហែង​ដល់​អ្នក​រិះគន់​ពី​ការ​ដឹកនាំ​មិន​ត្រឹមត្រូវ​របស់​រដ្ឋាភិបាល​យ៉ាង​ខ្លាំង ដែល​បង្ហាញ​ឱ្យ​ឃើញ​នូវ​ការ​រំលោភ​បំពាន​សិទ្ធិមនុស្ស និង​សិទ្ធិ​នយោបាយ​របស់​ពលរដ្ឋ​ខ្មែរ ដែល​ការពារ​ដោយ​រដ្ឋធម្មនុញ្ញ​យ៉ាង​ធ្ងន់ធ្ងរ។

ទាក់ទិន​នឹង​បញ្ហា​នេះ កាលពី​ថ្ងៃទី​១៩ ខែ​វិច្ឆិកា ឆ្នាំ​២០១៩ អតីត​មេ​កម្មាភិបាល​ខ្មែរក្រហម លោក ហ៊ុន សែន ធ្លាប់​គំរាម​ថា លោក​ស្តាយ​ណាស់​ដែល​មិន​បាន​សម្លាប់​មេដឹកនាំ​បក្ស​ប្រឆាំង​ដែល​បាន​រៀប​ផែនការ​ផ្ដួល​រំលំ​រដ្ឋាភិបាល​របស់​លោក​កាលពី​ពេល​កន្លង​ទៅ។

កម្ពុជា​ស្ថិត​ក្រោម​ការ​ដឹកនាំ​របស់​លោក ហ៊ុន សែន ជាង ៤០​ឆ្នាំ​មក​នេះ ត្រូវ​គេ​មើល​ឃើញ​ថា បាន​បង្កើត​ឱ្យ​មាន​អំពើ​ឃាតកម្ម​ក្រៅ​ប្រព័ន្ធ​ច្បាប់​រាប់​មិន​អស់​លើ​សកម្មជន​សង្គម​ល្បីៗ​ជាច្រើន​នាក់ ដូចជា លោក ឈុត វុទ្ធី លោក ជា វិជ្ជា និង​បណ្ឌិត កែម ឡី ជាដើម ដែល​ត្រូវ​បាន​បាញ់​សម្លាប់​យ៉ាង​អយុត្តិធម៌ បន្ទាប់ពី​អ្នក​ទាំងនោះ​រិះគន់​ពី​ការ​ដឹកនាំ​រដ្ឋាភិបាល​ឯក​បក្ស​របស់​លោក។

ការ​គំរាម​សម្លាប់ និង​ឃាតកម្ម​លើ​បណ្ឌិត​បញ្ញវន្ត​ខ្មែរ​ដែល​ជាប់​ពាក់ព័ន្ធ​នឹង​មេដឹកនាំ​របស់​កម្ពុជា​រូប​នេះ មិន​មែន​ជា​លើក​ទី​មួយ​ទេ​ចាប់តាំងពី​រដ្ឋាភិបាល​វៀតណាម លើក​បន្តុប​រូបលោក​ឱ្យ​ដឹកនាំ​កម្ពុជា​កាលពី​អំឡុង​ទសវត្ស​ឆ្នាំ​១៩៨០ មក ក្នុង​នោះ លោក ហ៊ុន សែន ក៏​បាន​ជាប់​ពាក់ព័ន្ធ​យ៉ាង​ជ្រៅ​នឹង​បទល្មើស​ឧក្រិដ្ឋកម្ម​សង្គ្រាម​ក្នុង​ព្រឹត្តិការណ៍​បង្ហូរ​ឈាម​ឆ្នាំ​១៩៩៧ ដែល​បាន​សម្លាប់​កម្លាំង​ទ័ព​រាជា​និយម​រាប់​រយ​នាក់​ដែល​បាន​សារភាព​ចុះចាញ់​នៅ​ពេល​នោះ​ផង​ដែរ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស