37 C
Phnom Penh

លោក ហ៊ុន សែន៖ ការ​បាត់បង់​ឯករាជ្យ និង​អធិបតេយ្យ​ជាតិ នឹង​នាំ​មក​នូវ​សង្គ្រាម

ដោយ ឌឹ ខេមបូឌា ដេលី

បទវិភាគ

មេដឹកនាំ​បក្ស​កាន់​អំណាច​ដែល​កងទ័ព​វៀតណាម​លើក​បន្តុប​លោក ហ៊ុន សែន ព្រមាន​ថា ការ​ចុះ​ខ្សោយ ឬ​ការ​បាត់បង់​ឯករាជ្យ និង​អធិបតេយ្យភាព​ជាតិ នឹង​នាំ​មក​នូវ​ការ​បែកបាក់ សង្គ្រាម វិនាសកម្ម ទុក្ខ​វេទនា ភាព​ឱនថយ និង​ការ​ប្រមាថ​មើលងាយ​ពី​ជាតិ​សាសន៍​ដទៃ។

លោក ហ៊ុន សែន លើកឡើង​ក្នុង​មហាសន្និបាត​រណសិរ្ស​សាមគ្គី​អភិវឌ្ឍន៍​មាតុភូមិ​កម្ពុជា​លើក​ទី​៦ នៅ​ថ្ងៃទី​១៥ ខែ​វិច្ឆិកា ឆ្នាំ​២០២៣ នេះ​ថា គ្រប់​កាលៈទេសៈ និង​គ្រប់​ស្ថានភាព គឺ​អង្គការ​ចាត់តាំង​ដឹកនាំ​ប្រទេស​របស់​គណបក្ស​ប្រជាជន​កម្ពុជា ត្រូវតែ​លើក​កម្ពស់​មនសិការ​ភ្ញាក់​រឭក ប្ដូរផ្ដាច់ ការពារ​ឯករាជ្យ អធិបតេយ្យភាព​ជាតិ និង​បូរណភាព​ទឹកដី ឱ្យ​បាន​រឹងមាំ ស្ថិតស្ថេរ គង់វង្ស​ចំពោះ​ការ​រំលោភ​បំពាន​ណា​មួយ​ពី​បរទេស​ខាងក្រៅ។

លោក ហ៊ុន សែន លើកឡើង​ថា ចំណង​មិត្តភាព សាមគ្គីភាព និង​កិច្ច​សហប្រតិបត្តិការ​ដ៏​ល្អ​ជាមួយ​ប្រទេស​ជិតខាង និង​បណ្តា​ប្រទេស​លើ​ពិភពលោក​លើ​គោលការណ៍​គោរព​ឯករាជ្យ អធិបតេយ្យភាព បូរណភាព​ទឹកដី គឺជា​កត្តា​ចាំបាច់​បំផុត ដើម្បី​ធានា​ដល់​ការ​អភិវឌ្ឍ និង​សន្តិភាព​របស់​ជាតិ ដូច្នេះ​នៅ​គ្រប់​កាលៈទេសៈ គឺ​ត្រូវ​យកចិត្ត​ទុកដាក់​កសាង ថែរក្សា ពូន​ជ្រំ​ចំណង​មិត្តភាព និង​កិច្ច​សហប្រតិបត្តិការ​ជាមួយ​បណ្តា​ប្រទេស​នានា​ឱ្យ​កាន់តែ​រឹងមាំ​បន្ត​ទៀត។

លោក ហ៊ុន សែន បញ្ជាក់​ថា រយៈពេល ៤៥​ឆ្នាំ​មក​នេះ អង្គការ​ចាត់តាំង​របស់​បក្ស​ប្រជាជន​កម្ពុជា​បាន​ដឹកនាំ​ប្រទេស​ប្រកប​ដោយ​មាគ៌ា​ដ៏​ត្រឹមត្រូវ និង​មាន​លក្ខណៈ​ប្រាកដ​និយម ឆ្លើយតប​ទៅ​នឹង​បំណង​ប្រាថ្នា​របស់​ពលរដ្ឋ។ ក្នុង​ន័យ​នេះ លោក​ថា​ការ​ប្រកាន់​យក​គោលការណ៍​នីតិរដ្ឋ ជាពិសេស​ការ​ប្រើប្រាស់​វិធានការ​ច្បាប់​ដ៏​ម៉ឺងម៉ាត់​ដើម្បី​រក្សា​ស្ថិរភាព​នយោបាយ សន្តិសុខ និង​សណ្ដាប់ធ្នាប់ និង​ការ​ទប់ស្កាត់​រាល់​សកម្មភាព​អុជអាល ញុះញង់ បំបែកបំបាក់ បង្កើត​ទំនាស់ បង្ក​អនាធិបតេយ្យ គឺជា​រឿង​ចាំបាច់​បំផុត។

មន្ត្រី​ជាន់ខ្ពស់​នៃ​រដ្ឋាភិបាល​ថ្មី​របស់​លោក ហ៊ុន ម៉ាណែត ប្រាប់​សារព័ត៌មាន The Cambodia Daily ក្នុង​លក្ខខណ្ឌ​មិន​បញ្ចេញ​ឈ្មោះ​នៅ​ថ្ងៃទី​១៥ វិច្ឆិកា នេះ​ថា ក្រោម​ការ​គ្រប់គ្រង​របស់​មេដឹកនាំ​បក្ស​កាន់​អំណាច​លោក ហ៊ុន សែន កម្ពុជា​មិន​មាន​ឯករាជភាព និង​អធិបតេយ្យភាព​ជាតិ​បាន​ទេ ពីព្រោះ​មេដឹកនាំ​ខ្មែរ​រូប​នេះ​បាន​យក​ប្រទេស​របស់​ខ្លួន​ទៅ​ដាក់​ជា​ថ្នូរ​ជាមួយ​នឹង​ការ​ជួយ​ជ្រោមជ្រែង​អំណាច​ពី​វៀតណាម និង​ថ្នូរ​ក្នុង​ការ​ខ្ចីបុល​ពី​ប្រទេស​ចិន ទៅ​ហើយ​នោះ ដូច្នេះ​កម្ពុជា​នៅ​ពេលនេះ គឺ​ប្រៀប​បាន​កំពុង​ស្ថិត​ក្នុង​មាត់​ខ្លា និង​មាត់​ក្រពើ ដែល​ប្រុង​នឹង​លេប​ត្របាក់​ដូច្នោះ​ដែរ។

មន្ត្រី​ដដែល​អះអាង​ថា ប្រសិនបើ​លោក ហ៊ុន សែន ជំទាស់​នឹង​ផែនការ​របស់​វៀតណាម ដែល​មាន​មហិច្ឆតា​ឈ្លានពាន​កម្ពុជា រដ្ឋាភិបាល​វៀតណាម​អាច​រុះរើ​ប្រព័ន្ធ​គ្រប់គ្រង​ប្រទេស​ខ្មែរ​ដែល​គេ​បាន​រៀបចំ​ក្នុង​គណបក្ស​ប្រជាជន​កម្ពុជា​បាន​គ្រប់​ពេល​ទាំងអស់។ នៅ​ពេល​នោះ អំណាច​ក្រុម​គ្រួសារ​របស់​គាត់ ក៏​មិន​ធានា​ថា​នឹង​នៅ​ឋិតឋេរ​ដែរ ដូច្នេះ​ហើយ​ការ​លើកឡើង​របស់​លោក ហ៊ុន សែន គឺជា​អ្វី​ដែល​គេ​ហៅថា ប្រជាភិថុតិ​តែប៉ុណ្ណោះ។

ប្រភព​ដដែល​បញ្ជាក់​ថា ចំណែក​ទំនាក់ទំនង​ជាមួយ​ចិន ក៏​មិន​ខុស​ពី​វៀតណាម ប៉ុន្មាន​ដែរ ត្បិត​លោក ហ៊ុន សែន ដឹង​ថា​ក្រៅពី​ចិន គ្មាន​ប្រទេស​ណា​ឱ្យ​កម្ពុជា​ខ្ចី​លុយ​ដើម្បី​ចិញ្ចឹម​រដ្ឋាភិបាល​ដែល​គាត់​ក្តោប​ក្តាប់​នោះ​ទេ ស្រប​ពេល​ដែល​ចិន ក៏​ដឹង​យ៉ាង​ច្បាស់​ដែរ​ថា កម្ពុជា​មិន​អាច​ងាក​ចេញពី​ខ្លួន​បាន​ទេ​ចំពោះ​បំណុល​នេះ ស្រប​ពេល​ដែល​ប្រទេស​មហាអំណាច​មួយ​នេះ​ក៏​បាន​ទាញ​យក​កម្ពុជា​ចូល​ទៅ​ក្នុង​ភូមិសាស្ត្រ​នយោបាយ​ក្នុង​តំបន់ ដូច្នេះ ចិន​ក៏​មាន​បំណង​ចាប់​កម្ពុជា​មិន​លែង​ដែរ។

កម្ពុជា​នៅ​ក្រោម​ការ​ដឹកនាំ​របស់​លោក ហ៊ុន សែន ជាង ៤០​ឆ្នាំ​មក​នេះ ត្រូវ​គេ​មើល​ឃើញ​ថា អធិបតេយ្យ​ជាតិ​របស់​ប្រទេស​មួយ​នេះ​បាន​ធ្លាក់​ទៅ​ក្នុង​ការ​គ្រប់គ្រង​របស់​បរទេស​ឈ្លានពាន​ជិតខាង​យ៉ាង​ធ្ងន់ធ្ងរ តាមរយៈ​កិច្ចព្រមព្រៀង​ខុស​ច្បាប់​ជាច្រើន​ដែល​លោក ហ៊ុន សែន បាន​ចុះហត្ថលេខា​កាត់​ទឹកដី​ឱ្យ​រដ្ឋាភិបាល​វៀតណាម នា​ពេល​កន្លង​មក ខណៈ​ចិន ក៏​កំពុង​ព្យាយាម​ច្របាច់​ក​កម្ពុជា​តាមរយៈ​បំណុល​នៅ​ពេល​នេះ​ដែរ។ បញ្ហា​នេះ ជា​ហេតុ​អាច​ទាញ​ទម្លាក់​កម្ពុជា​ទៅ​ក្នុង​ស្ថានភាព​ខ្លួន​មួយ​បម្រើ​ចៅហ្វាយ​ពីរ​ក្នុង​ពេល​តែ​មួយ។

អ្នកវិភាគ​នយោបាយ និង​ជា​ប្រធាន​វេទិកា​ពលរដ្ឋ​លោក គឹម សុខ ធ្លាប់​បាន​លើកឡើង​ថា រដ្ឋាភិបាល​ដែល​ដឹកនាំ​ដោយ​គណបក្ស​ប្រជាជន​កម្ពុជា​សព្វថ្ងៃ​នេះ កំពុង​ប្រឈម​នឹង​ចារកម្ម​យោធា​របស់​វៀតណាម ផង និង​ឥទ្ធិពល​ពង្រីក​ភូមិសាស្ត្រ​នយោបាយ​ក្នុង​តំបន់​របស់​ចិន យ៉ាង​ធ្ងន់ធ្ងរ​ផង​ដែរ ក្រោម​ការ​កាច់​ចង្កូត​នយោបាយ​របស់​លោក ហ៊ុន សែន ដែល​បាន​យក​ទឹកដី​ខ្មែរ​ធ្វើ​ជា​វត្ថុ​បញ្ចាំ​ជាមួយ​ប្រទេស​ជិតខាង​ដើម្បី​អំណាច និង​បំណុល។

លោក គឹម សុខ អះអាង​ថា ទាំង​វៀតណាម និង​ចិន សុទ្ធតែ​កំពុង​សង្ស័យ​អំពី​ភាព​ស្មោះត្រង់​របស់​រដ្ឋាភិបាល​កម្ពុជា​ចំពោះ​ពួកគេ​ដូច​គ្នា ហើយ​បើ​កម្ពុជា​នៅតែ​បន្ត​ដឹកនាំ​នយោបាយ​បម្រើ​ចៅហ្វាយ​កុម្មុយនីស្ត​ដែល​មាន​មហិច្ឆតា​កេង​ចំណេញ​ផល​ប្រយោជន៍​ពី​កម្ពុជា​ដូច​សព្វថ្ងៃ​នេះ រដ្ឋាភិបាល​ថ្មី​ដែល​បន្ត​ពូជ​ពី​ឪពុក​ទៅ​កូន​របស់​គណបក្ស​ប្រជាជន​កម្ពុជា ច្បាស់​ជា​ដួល​រលំ​មិន​ខាន​ឡើយ ហើយ​កម្ពុជា​នឹង​ធ្លាក់​ទៅ​ក្នុង​ភាព​អន្តរាយ​ខ្លោចផ្សា​យ៉ាង​ពិតប្រាកដ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស