32 C
Phnom Penh

លោក ហ៊ុន ម៉ាណែត បញ្ជា​ឱ្យ​ជ្រើសរើស​មន្ត្រី​កសិកម្ម​ឃុំ-សង្កាត់​ចុះ​ជួយ​កសិករ​នៅ​តាម​មូលដ្ឋាន

ដោយ ឌឹ ខេមបូឌា ដេលី

បទវិភាគ

នាយករដ្ឋមន្ត្រី​ខ្មែរ​បន្ត​អំណាច​ពី​ឪពុក​លោក ហ៊ុន ម៉ាណែត បញ្ជា​ឱ្យ​ក្រសួង​កសិកម្ម រុក្ខាប្រមាញ់ និង​នេសាទ រួម​ជាមួយ​ក្រសួង​មុខងារ​សាធារណៈ និង​ក្រសួង​សេដ្ឋកិច្ច និង​ហិរញ្ញវត្ថុ ត្រូវ​សហការ​គ្នា​រៀបចំ​ការ​ប្រកួតប្រជែង​ជ្រើសរើស​មន្ត្រី​កសិកម្ម​ឃុំ-សង្កាត់ ដោយ​ធានា​ឱ្យ​បាន​ទាំង​តម្លាភាព សមត្ថភាព និង​គុណភាព។

លោក ហ៊ុន ម៉ាណែត ដែល​ជា​នាយករដ្ឋមន្ត្រី​ក្រោម​អំណាច​ឪពុក លើកឡើង​ក្នុង​ពិធី​ប្រកាស​ដាក់​ឱ្យ​អនុវត្ត​កម្មវិធី​នយោបាយ​អាទិភាព​ពាក់ព័ន្ធ​វិស័យ​កសិកម្ម នៅ​ថ្ងៃទី​២០ ខែ​វិច្ឆិកា ឆ្នាំ​២០២៣ នេះ​ថា ការ​ជ្រើសរើស​មន្ត្រី​កសិកម្ម​ឃុំ-សង្កាត់ ត្រូវ​បើក​ទូលាយ​ដល់​បេក្ខជន​ដែល​មាន​ចំណេះដឹង និង​ជំនាញ​វិជ្ជាជីវៈ​កសិកម្ម​សមស្រប​នឹង​សមត្ថភាព​បំពេញ​ការងារ​នៅ​មូលដ្ឋាន ដើម្បី​ធានា​បាន​នូវ​ភាព​ជោគជ័យ​ក្នុង​ការ​អនុវត្ត​គោលនយោបាយ​ចក្ខុវិស័យ​កសិកម្ម​របស់​កម្ពុជា។

នាយករដ្ឋមន្ត្រី​ខ្មែរ​ដែល​កំពុង​ដឹកនាំ​ប្រទេស​ក្រោម​ផែនការ​ឪពុក​លោក ហ៊ុន ម៉ាណែត អំពាវនាវ​ឱ្យ​យុវជន​ដែល​ដាក់​ពាក្យ​ប្រឡង​ធ្វើ​ជា​មន្ត្រី​បច្ចេកទេស​ចុះ​ជួយ​កសិករ​នៅ​មូលដ្ឋាន ត្រូវ​ធ្វើ​ការងារ​ដោយ​បេះដូង ក្នុង​នោះ មន្ត្រី​បច្ចេកទេស​ដែល​ជ្រើសរើស​ទៅ​ជួយ​កសិករ ត្រូវ​រើស​អ្នក​ដែល​ចុះ​ជួយ​ជាក់ស្តែង មិនមែន​ប្រឡង​យក​តែ​ក្របខ័ណ្ឌ​នោះ​ទេ។

ការ​អះអាង​នេះ ធ្វើឡើង​បន្ទាប់ពី​រដ្ឋាភិបាល​កម្ពុជា​ដាក់​ផែនការ​ជ្រើសរើស​មន្ត្រី​កសិកម្ម​ឃុំ-សង្កាត់ ដើម្បី​ជួយ​ដល់​វិស័យ​កសិកម្ម​នៅ​កម្ពុជា​តាមរយៈ​នៃ​ការ​ពង្រឹង​ចំណេះដឹង​កសិកម្ម​ដល់​ប្រជាពលរដ្ឋ​សម្រាប់​រដ្ឋាភិបាល​អាណត្តិ​ថ្មី​នេះ។

ក្រសួង​កសិកម្ម រុក្ខាប្រមាញ់ និង​នេសាទ បង្ហាញ​របាយការណ៍​របស់​ខ្លួន​ថា កម្ពុជា​មាន​ឃុំ-សង្កាត់​ជាង ១​ពាន់​ឃុំ-សង្កាត់ (១៥៥០​ឃុំ-សង្កាត់) ដែល​ធ្វើ​សកម្មភាព​កសិកម្ម ក្នុង​នោះ​ឃុំ-សង្កាត់​ប្រមាណ​ជា ១​ពាន់​ឃុំ-សង្កាត់ ជា​ឃុំ-សង្កាត់​ដែល​ធ្វើ​ដំណាំ​ស្រូវ​សុទ្ធ ដែល​មាន​គ្រួសារ​ជា​កសិករ​ប្រមាណ​ជា ២​លាន​គ្រួសារ។

ក្រសួង​បញ្ជាក់​ថា ដើម្បី​ឱ្យ​កសិករ​នៅ​គ្រប់​ឃុំ-សង្កាត់​ទទួល​បាន​សេវាកម្ម​កសិកម្ម ក្រសួង​គ្រោង​នឹង​ដាក់​ពង្រាយ​មន្ត្រី​កសិកម្ម​ឃុំ-សង្កាត់​ចំនួន ១៦០០​នាក់​នៅ​ទូទាំង​ប្រទេស ក្នុង​នោះ​ក្រសួង​គ្រោង​នឹង​ដាក់​ពង្រាយ​មន្ត្រី​កសិកម្ម​ឃុំ-សង្កាត់​ឱ្យ​បាន ២៥០​នាក់​នៅ​ឆ្នាំ​២០២៣ ចំនួន ៨០០​នាក់​នៅ​ឆ្នាំ​២០២៤ និង​ចំនួន ៥៥០​នាក់​នៅ​ឆ្នាំ​២០២៥ ផង​ដែរ។

មន្ត្រី​ជាន់ខ្ពស់​នៃ​ក្រសួង​កសិកម្ម រុក្ខាប្រមាញ់ និង​នេសាទ​មួយ​រូប​ប្រាប់​សារព័ត៌មាន The Cambodia Daily ក្នុង​លក្ខខណ្ឌ​មិន​បញ្ចេញ​ឈ្មោះ​នៅ​ថ្ងៃទី​២០ វិច្ឆិកា នេះ​ថា ផែនការ​អភិវឌ្ឍ​វិស័យ​កសិកម្ម​របស់​រដ្ឋាភិបាល​នៅ​ពេលនេះ គឺ​ច្របូកច្របល់​មិន​ត្រូវ​តាម​លំដាប់​លំដោយ​ទេ ព្រោះ​ថា​សព្វថ្ងៃ​នេះ មិន​មែន​ប្រជាពលរដ្ឋ​មិន​ចេះ​ធ្វើ​កសិកម្ម​ទេ ប៉ុន្តែ​មកពី​រដ្ឋាភិបាល​មិន​ធានា​ឱ្យ​បាន​នូវ​ការ​ផ្គត់ផ្គង់​ទឹក ជី ដែល​មាន​គុណភាព ថ្នាំ​សម្លាប់​សត្វ​ល្អិត និង​សម្ភារៈ​ដែល​បម្រើ​ឱ្យ​ការ​ធ្វើ​កសិកម្ម​ផ្សេង​ទៀត​ឱ្យ​បាន​ត្រឹមត្រូវ​សម្រាប់​ពួកគាត់​ប៉ុណ្ណោះ។

ប្រភព​មន្ត្រី​ខាងលើ​លើកឡើង​ថា ប្រជាពលរដ្ឋ​ដែល​មាន​ដី​ត្រឹម ១​ហិកតារ នឹង​ក្លាយ​ជា​អ្នក​ដែល​មាន​ដី ៣​ហិកតារ​ភ្លាមៗ បើ​រដ្ឋាភិបាល​អាច​ធានា​ការ​ផ្គត់ផ្គង់​ទឹក​ឱ្យ​ពួកគាត់​ធ្វើ​ស្រែ​បាន ៣​ដង​ក្នុង ១​ឆ្នាំ។ ជាង​នេះ​ទៀត បើ​រដ្ឋាភិបាល​អាច​ផ្គត់ផ្គង់​សម្ភារៈ​ដែល​បម្រើ​ឱ្យ​វិស័យ​នេះ​ក្នុង​តម្លៃ​ទាប ដូចជា ជី ថ្នាំ​សម្លាប់​សត្វ​ល្អិត ថ្នាំ​ប៉ូវ និង​ឧបករណ៍​ផ្សេង​ទៀត ប្រជាពលរដ្ឋ​ក៏​អាច​ទទួល​បាន​ប្រាក់ចំណេញ​ខ្ពស់​ដែរ។ ចំណែក​បច្ចេកទេស និង​បទពិសោធន៍​របស់​គាត់ គឺ​មាន​ភាព​ជាក់ស្តែង​ជាង​មន្ត្រី​ដែល​រដ្ឋាភិបាល​គ្រោង​នឹង​ដាក់​ពង្រាយ​ទៅ​ទៀត ដូច្នេះ​មាន​មន្ត្រី​កសិកម្ម​ឃុំ-សង្កាត់ ឬ​អត់ មិន​មែន​ជា​បញ្ហា​ចោទ​ទេ។

មន្ត្រី​ជាន់ខ្ពស់​នៃ​ក្រសួង​កសិកម្ម​ខាងលើ​បញ្ជាក់​ថា បើ​វិស័យ​កសិកម្ម​នៅតែ​រងគ្រោះ​ដោយ​ទឹកជំនន់​នៅ​រដូវវស្សា និង​រងគ្រោះ​រាំង​ស្ងួត​នៅ​រដូវប្រាំង ខណៈ​តម្លៃ​ជី ថ្នាំ និង​សម្ភារៈ​កសិកម្ម​ផ្សេង​ទៀត​នៅតែ​មាន​តម្លៃ​ខ្ពស់​ដូច​ពេល​កន្លង​មក ទោះ​ដាក់​មន្ត្រី​កសិកម្ម​ឃុំ-សង្កាត់​ក្នុង​មួយ​ឃុំ ១០​នាក់ ក៏​នៅតែ​មិន​អាច​ជួយ​កសិករ​បាន​ដែរ ផ្ទុយទៅវិញ​មាន​តែ​បំផ្លាញ​ថវិកា​ជាតិ​ប៉ុណ្ណោះ។

វិស័យ​កសិកម្ម​នៅ​កម្ពុជា​បច្ចុប្បន្ន​នេះ​គ្មាន​ការ​គ្រប់គ្រង​ច្បាស់លាស់​ទេ គឺ​តែងតែ​ជួប​គ្រោះ​ធម្មជាតិ​ជា​រៀងរាល់​ឆ្នាំ។ ជាក់ស្តែង កាលពី​ដើម​ខែ​តុលា ឆ្នាំ​២០២៣ នេះ គណៈកម្មាធិការ​ជាតិ​គ្រប់គ្រង​គ្រោះ​មហន្តរាយ​បាន​ចេញ​របាយការណ៍​របស់​ខ្លួន​ថា ដំណាំ​កសិកម្ម​ដែល​បាន​រង​ការ​ខូចខាត​ដោយសារ​គ្រោះ​ទឹកជំនន់​មាន​ចំនួន​ជាង ១​ពាន់​ហិកតារ (១៦៨៩​ហិកតារ) ខណៈ​លំនៅឋាន​របស់​ប្រជាពលរដ្ឋ​ក៏​បាន​រង​នូវ​ការ​ខូចខាត​ដល់​ទៅ​ជិត ៣​ពាន់​ខ្នង​ផ្ទះ (២៧៨៥​ខ្នង​ផ្ទះ) ដែល​ស្មើ​នឹង​ជាង ៣​ពាន់​គ្រួសារ (៣៤១០​គ្រួសារ) ផង​ដែរ។

កាលពី​ថ្ងៃទី​២៤ ខែ​វិច្ឆិកា ឆ្នាំ​២០២១ មេដឹកនាំ​បក្ស​កាន់​អំណាច លោក ហ៊ុន សែន ធ្លាប់​បាន​ជំរុញ​ឱ្យ​រដ្ឋាភិបាល​វៀតណាម រៀបចំ​កិច្ចព្រមព្រៀង​ជាមួយ​កម្ពុជា​លើ​វិស័យ​កសិកម្ម​ឱ្យ​កាន់តែ​ល្អ​ប្រសើរ​រវាង​ប្រទេស​ទាំង​ពីរ ដូចជា ការ​ធ្វើ​កសិកម្ម​តាម​ព្រំដែន ការ​ផ្គត់ផ្គង់​វត្ថុ​ធាតុដើម ការ​អភិវឌ្ឍ​ពូជ ការ​ប្រើប្រាស់​ទឹក​តាម​ព្រំដែន និង​ការ​ប្រយុទ្ធ​ប្រឆាំង​សត្វ​ល្អិត​ចង្រៃ ជាដើម៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស