រដ្ឋាភិបាលតពូជថ្មីដែលមានអាយុ ៩០ថ្ងៃ លោក ហ៊ុន ម៉ាណែត បដិសេធថា រដ្ឋាភិបាលលោកមិនមែនជារដ្ឋាភិបាលដេកអេះពោះ ហើយដើរខ្ចីតែលុយបរទេសទេ ប៉ុន្តែជារដ្ឋាភិបាលដែលបានដាក់ចេញនូវគោលនយោបាយអភិវឌ្ឍន៍ និងសម្ពោធសមិទ្ធផលជាច្រើនដើម្បីផ្តល់ផលប្រយោជន៍ឱ្យពលរដ្ឋ។
លោក ហ៊ុន ម៉ាណែត បានលើកឡើងក្នុងពិធីសម្ពោធកំណាត់ផ្លូវជាតិលេខ៥ ពីព្រែកក្តាម ដល់បាត់ដំបង នៅថ្ងៃទី២២ ខែវិច្ឆិកា ឆ្នាំ២០២៣ នេះថា រដ្ឋាភិបាលកម្ពុជាត្រូវការថវិកាច្រើនណាស់ដើម្បីយកទៅវិនិយោគលើវិស័យផ្សេងៗ រួមទាំងវិស័យហេដ្ឋារចនាសម្ព័ន្ធដែលជាសរសៃឈាមដ៏សំខាន់របស់ប្រទេសផងដែរ ដូច្នេះ បញ្ហានេះបានតម្រូវឲ្យរដ្ឋាភិបាលត្រូវតែខ្ចីលុយពីបរទេស ដើម្បីកសាងហេដ្ឋារចនាសម្ព័ន្ធចាំបាច់របស់ខ្លួន។
លោក ហ៊ុន ម៉ាណែត លើកឡើងថា កម្ចីពីបរទេសត្រូវរដ្ឋាភិបាលគ្រប់គ្រងបានយ៉ាងត្រឹមត្រូវ និងមានផែនការច្បាស់លាស់ មិនឱ្យបាត់ម្ចាស់ការឡើយ ហើយបំណុលទៀតសោត គឺរដ្ឋាភិបាលយកមកអភិវឌ្ឍ ដើម្បីបម្រើប្រយោជន៍សាធារណៈ ក្នុងការពង្រីកសក្ដានុពលសេដ្ឋកិច្ចក្នុងគោលដៅផ្តល់ប្រយោជន៍ដល់ពលរដ្ឋខ្មែរនៅទូទាំងប្រទេសដែរ។
លោក ហ៊ុន ម៉ាណែត បញ្ជាក់ថា មិនថាកម្ចីពីប្រទេសជប៉ុន ពីប្រទេសចិន ឬពីធនាគារពិភពលោក និងបណ្តាប្រទេសផ្សេងៗ គឺដើម្បីធ្វើការវិនិយោគបង្កើនលទ្ធភាពសម្រាប់ដោះស្រាយបញ្ហាឱ្យបានលឿន និងដើម្បីបង្កើតចរន្តសេដ្ឋកិច្ចសម្រាប់កម្ពុជាទាំងមូល។
អតីតអ្នកទោសនយោបាយ និងជាមន្ត្រីជាន់ខ្ពស់អតីតគណបក្សសង្គ្រោះជាតិលោក មាជ សុវណ្ណារ៉ា បានប្រាប់សារព័ត៌មាន The Cambodia Daily នៅថ្ងៃទី២២ វិច្ឆិកា នេះថា ចាប់ពីលោក ហ៊ុន ម៉ាណែត ឡើងកាន់តំណែងជានាយករដ្ឋមន្ត្រីអស់រយៈពេល ៣ខែមកនេះ លោកមិនទាន់ឃើញនាយករដ្ឋមន្ត្រីថ្មីនេះដាក់ចេញនូវផែនការអភិវឌ្ឍន៍ ដើម្បីស្ដារសេដ្ឋកិច្ចជាតិនៅឡើយទេ ក្រៅតែពីប្រើនយោបាយប្រជាភិថុតិដែលបន្សល់ពីឪពុករបស់គាត់នោះ។
លោក មាជ សុវណ្ណារ៉ា លើកឡើងថា បញ្ហាចំពោះមុខរបស់រដ្ឋាភិបាលថ្មីដែលត្រូវដោះស្រាយ គឺគ្មានអ្វីក្រៅពីស្ដារសេដ្ឋកិច្ចរបស់កម្ពុជាឱ្យល្អប្រសើរឡើងវិញទេ ដើម្បីជួយដល់ប្រជាពលរដ្ឋដែលកំពុងជំពាក់បំណុលធនាគារ ឱ្យពួកគាត់អាចស្ដារជីវភាពគ្រួសារឡើងវិញ ព្រោះថាមានពលរដ្ឋខ្លះដោយសារតែការជំពាក់បំណុលនេះ បានធ្វើឱ្យពួកគាត់បាត់បង់ និងខាតបង់នូវទ្រព្យសម្បត្តិយ៉ាងច្រើន ដូចជាការដែលគ្មានលទ្ធភាពបង់រំលស់ផ្ទះបន្តនៅតាមបុរីនានា ជាហេតុធ្វើឱ្យម្ចាស់បុរីរឹបអូសយកផ្ទះវិញ ជាដើម។
មន្ត្រីជាន់ខ្ពស់អតីតបក្សប្រឆាំងរូបនេះបញ្ជាក់ថា បើរដ្ឋាភិបាលគ្មានលុយអាចធ្វើកិច្ចការនេះបានទេ ពួកគេក៏អាចដោះស្រាយបញ្ហាផ្ទៃក្នុងរបស់ខ្លួនដែលជាបញ្ហាបន្ទាន់ដែរ ដោយការធ្វើកំណែទម្រង់តាមក្រសួងស្ថាប័ននានាទៅលើបញ្ហាអាទិភាពមួយចំនួន ដូចជា អំពើពុករលួយ ប្រព័ន្ធយុត្តិធម៌សង្គម ការត្រួតពិនិត្យលើភារកិច្ច និងតួនាទីមន្ត្រីក្រោមឱវាទឱ្យមានប្រសិទ្ធភាព ក្នុងការអនុវត្តការងារ និងការបើកលំហប្រជាធិបតេយ្យសម្រាប់មុខមាត់រដ្ឋាភិបាលថ្មីរបស់ខ្លួន ជាដើម។
ក្រុមអ្នកសង្កេតការណ៍លើកឡើងថា រយៈពេល ៣ខែបន្ទាប់ពីឡើងកាន់តំណែងនាយករដ្ឋមន្ត្រី គេមិនទាន់ឃើញលោក ហ៊ុន ម៉ាណែត ដាក់ចេញនូវគោលនយោបាយអភិវឌ្ឍន៍ណាមួយនៅឡើយទេ ទាំងសេដ្ឋកិច្ចជាតិ ការគោរពសិទ្ធិមនុស្ស និងលទ្ធិប្រជាធិបតេយ្យ ជាដើម ប៉ុន្តែគេគ្រាន់តែឃើញនាយករដ្ឋមន្ត្រីតពូជថ្មីរូបនេះចេះត្រឹមតែដើរសម្ពោធសមិទ្ធផលនានាដែលឪពុករបស់គាត់បានខ្ចីបុលពីបរទេស ជាពិសេសកម្ចីពីប្រទេសចិន យកមកសាងសង់តែប៉ុណ្ណោះ។
ទាក់ទិននឹងបញ្ហានេះ មន្ត្រីរដ្ឋាភិបាលកម្ពុជាមួយរូបធ្លាប់បានទម្លាយប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះថា មិនមែនលោក ហ៊ុន ម៉ាណែត មិនចង់ប្រកាសផែនការ ឬប្រកាសគោលនយោបាយអភិវឌ្ឍន៍ប្រទេសក្នុងតំណែងថ្មីរបស់គាត់ទេ ប៉ុន្តែទំនងជាដោយសារតែមិត្តដែកថែបចិន មិនទាន់ប្រកាសផ្តល់កម្ចីឱ្យរដ្ឋាភិបាលថ្មីរបស់គាត់ ហេតុដូច្នេះហើយបានជាគាត់មិនដែលប្រកាសពីការកសាងហេដ្ឋារចនាសម្ព័ន្ធនានាបន្តពីរដ្ឋាភិបាលចាស់ដែលដឹកនាំដោយឪពុករបស់គាត់បែបនេះ។
កាលពីថ្ងៃទី១៧ ខែវិច្ឆិកា ឆ្នាំ២០២៣ ក្នុងពិធីជួបជាមួយកម្មករ លោក ហ៊ុន ម៉ាណែត បានអះអាងថា ឆ្នាំ២០២៤ គឺជាឆ្នាំដែលចាប់ហ្វ្រាំងសម្រាប់រដ្ឋាភិបាលថ្មីរបស់លោក ដែលមានន័យថា មន្ត្រីរដ្ឋាភិបាលត្រូវតែពិនិត្យពីដំណើរការរបស់ខ្លួនឡើងវិញ មុននឹងដំណើរការបន្តទៅមុខទៀត។
ទោះជាបែបនេះក្តី អតីតមន្ត្រីសន្តិសុខលំហសមុទ្រប្រចាំខេត្តកោះកុង លោក មុំ អស្សនី ធ្លាប់បានអះអាងកាលពីពេលថ្មីៗនេះថា រដ្ឋាភិបាលថ្មីរបស់លោក ហ៊ុន ម៉ាណែត កំពុងប្រឈមនឹងវិបត្តិខ្វះខាតលុយធ្ងន់ធ្ងរ ដោយសារតែលុយបម្រុងក្នុងធនាគារជាតិត្រូវបានប្រើប្រាស់អស់ហើយ ខណៈរដ្ឋាភិបាលចិន ក៏មិនទាន់ប្រកាសផ្តល់កម្ចីឱ្យរដ្ឋាភិបាលរបស់គាត់ដែរចាប់តាំងពីគាត់ឡើងកាន់អំណាចមក៕