ក្រសួងមហាផ្ទៃ សម្រេចទទួលស្គាល់លទ្ធផលសមាជលើកដំបូងរបស់គណបក្សកម្លាំងជាតិជាផ្លូវការហើយនៅថ្ងៃពុធ ទី២៩ វិច្ឆិកា នេះ ក្នុងការតែងតាំងប្រធានបក្ស អនុប្រធាន គណៈកម្មាធិការអចិន្ត្រៃយ៍ គណៈកម្មាធិការនាយក លក្ខន្តិកៈ និងទិសដៅការងាររបស់គណបក្សសម្រាប់ចូលរួមការបោះឆ្នោតឆ្នាំ២០២៧ និងការបោះឆ្នោតឆ្នាំ២០២៨ ខាងមុខ។
ក្រសួងមហាផ្ទៃ ចេញលិខិតមួយទៅកាន់ប្រធានគណបក្សកម្លាំងជាតិ លោក ស៊ុន ចន្ធី នៅថ្ងៃទី២៩ ខែវិច្ឆិកា ឆ្នាំ២០២៣ ថា ក្រសួងបានពិនិត្យ និងសម្រេចទទួលស្គាល់នូវលទ្ធផលសមាជរបស់គណបក្សនេះ ដែលបានអនុម័តជ្រើសរើសក្បាលម៉ាស៊ីនដឹកនាំជាផ្លូវការហើយចំពោះការជ្រើសរើសលោក ស៊ុន ចន្ធី ជាប្រធាន លោក ជា មុនី ជាអនុប្រធាន មន្ត្រីជាន់ខ្ពស់គណបក្សចំនួន ៥០នាក់ផ្សេងទៀត។
កាលពីថ្ងៃទី១២ ខែវិច្ឆិកា ឆ្នាំ២០២៣ គណបក្សកម្លាំងជាតិ បានប្រារព្ធពិធីសមាជលើកដំបូងរបស់ខ្លួន ដើម្បីជ្រើសរើសក្បាលម៉ាស៊ីន និងលក្ខខណ្ឌផ្សេងៗរបស់គណបក្ស ដោយជ្រើសរើសប្រធានបក្ស ១រូប គឺលោក ស៊ុន ចន្ធី អនុប្រធានបក្ស ១រូបទៀត គឺលោក ជា មុនី និងគណៈកម្មាធិការអចិន្ត្រៃយ៍ ៩រូប គណៈកម្មាធិការប្រតិបត្តិ ៩រូប គណៈកម្មាធិការវិន័យចំនួន ៥រូប ព្រមទាំងគណៈកម្មាធិការនាយកចំនួន ២៧រូប និងមានការបោះឆ្នោតអនុម័តលើលក្ខន្តិកៈរបស់គណបក្សផងដែរ។
ក្រោយពីបញ្ចប់ពិធីសមាជ គណបក្សកម្លាំងជាតិក៏បានចេញសេចក្តីប្រកាសព័ត៌មានភ្លាមៗពីការអនុម័តជ្រើសរើសមន្ត្រីជាន់ខ្ពស់ និងលក្ខន្តិកៈរបស់គណបក្ស។ ជាងនេះទៀត គណបក្សនេះក៏បានប្រកាសតែងតាំងអតីតអនុប្រធានគណបក្សភ្លើងទៀន លោក រ៉ុង ឈុន ជាទីប្រឹក្សាគណបក្សកម្លាំងជាតិ និងប្រកាសដាក់បញ្ជីបេក្ខជនឈរឈ្មោះបោះឆ្នោតជ្រើសតាំងសមាជិកព្រឹទ្ធសភាទាំង ៨ភូមិភាគ និងប្រកាសដាក់បញ្ជីបេក្ខជនឈរឈ្មោះបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ នៅឆ្នាំ២០២៤ ផងដែរ។
បន្ទាប់ពីសមាជត្រូវបានបញ្ចប់បានប៉ុន្មានថ្ងៃ គណបក្សកម្លាំងជាតិបានចេញសេចក្តីសម្រេចតែងតាំងសមាសភាពក្រុមការងារតាមបណ្តាខេត្តជាបន្តបន្ទាប់ ដូចជា ខេត្តព្រៃវែង ខេត្តកំពង់ធំ ខេត្តកំពង់ស្ពឺ និងក្រុមការងារនៅក្រៅប្រទេស ជាដើម ក្នុងនោះក៏មានការអំពាវនាវឱ្យមានការចូលរួមពីសមាជិកគណបក្សភ្លើងទៀនពីសំណាក់ប្រធានបក្សកម្លាំងជាតិដែលទើបនឹងបង្កើតនេះផងដែរ។
ប្រធានគណបក្សកម្លាំងជាតិលោក ស៊ុន ចន្ធី គឺជាអតីតសមាជិកអចិន្ត្រៃយ៍របស់គណបក្សភ្លើងទៀន ដែលបានលាឈប់ពីគណបក្សចាស់ មកបង្កើតបក្សថ្មីដោយខ្លួនឯង បន្ទាប់ពីគណបក្សភ្លើងទៀន ត្រូវបានរារាំងមិនឱ្យចូលរួមការបោះឆ្នោតជាតិកាលពីខែកក្កដា ឆ្នាំ២០២៣ កន្លងទៅ និងត្រូវប្រឈមនូវការហាមឃាត់មិនឱ្យចូលរួមការបោះឆ្នោតទៅថ្ងៃមុខថែមទៀត។
គណបក្សកម្លាំងជាតិ ត្រូវបានបង្កើតឡើងកាលពីថ្ងៃទី១២ ខែតុលា ឆ្នាំ២០២៣ បន្ទាប់ពីប្រធានគណបក្សនេះបានដាក់ពាក្យស្នើសុំបង្កើតគណបក្សនយោបាយកាលពីថ្ងៃទី១៩ ខែមិថុនា ឆ្នាំ២០២៣ និងក្រោយពីប្រធានបក្សនេះបានស្នើសុំទៅក្រសួងមហាផ្ទៃ ស្នើសុំស្ដារនីតិសម្បទានយោបាយរបស់ខ្លួនឡើងវិញមុនពេលកំណត់ កាលពីថ្ងៃទី៨ ខែវិច្ឆិកា ឆ្នាំ២០២១ កន្លងទៅនោះ។
ប្រធានគណបក្សកម្លាំងជាតិលោក ស៊ុន ចន្ធី បានអះអាងកាលពីពេលថ្មីៗនេះថា ក្នុងស្ថានភាពដែលគណបក្សភ្លើងទៀន ជាប់គាំងមិនបានចូលរួមប្រកួតការបោះឆ្នោតទៀតបាន គណបក្សកម្លាំងជាតិ ពិតជាត្រូវការយ៉ាងចាំបាច់បំផុតនូវវត្តមានថ្នាក់ដឹកនាំគ្រប់លំដាប់ថ្នាក់របស់គណបក្សភ្លើងទៀន ដើម្បីរួមកម្លាំងគ្នាតស៊ូក្នុងបុព្វហេតុជាតិ សង្គ្រោះដំណើរការប្រជាធិបតេយ្យឡើងវិញចាប់ពីឆ្នាំ២០២៤ តទៅ។
លោក ស៊ុន ចន្ធី បញ្ជាក់ថា គណបក្សកម្លាំងជាតិ គឺជាគណបក្សដែលកើតចេញពីការខិតខំប្រឹងប្រែងលះបង់ដោយស្មោះត្រង់បរិសុទ្ធរបស់អ្នកប្រជាធិបតេយ្យដែលមានចំណេះដឹង និងបទពិសោធន៍នយោបាយយូរឆ្នាំ ហើយបានកំណត់គោលដៅធ្វើដំណើរទៅមុខយ៉ាងច្បាស់លាស់ជាក់លាក់ ដើម្បីស្ដារដំណើរការប្រជាធិបតេយ្យនៅកម្ពុជាឡើងវិញ។
ក្រសួងមហាផ្ទៃ ធ្លាប់បានបង្ហាញរបាយការណ៍របស់ខ្លួនកាលពីពេលកន្លងទៅថា គណបក្សនយោបាយដែលបានចុះបញ្ជីជាផ្លូវការមានចំនួនជាង ៤០គណបក្ស ក្នុងនោះមានគណបក្សនយោបាយមួយចំនួន កំពុងរងនូវបណ្តឹងផងដែរ ដែលមិនអាចឱ្យគណបក្សទាំងនោះធ្វើសកម្មភាពនយោបាយរបស់ខ្លួនបន្តទៅមុខទៀតបាន៕