30 C
Phnom Penh

លោក ហ្សេឡេនស្គី អំពាវនាវ​យ៉ាង​រំជើបរំជួល​សុំ​សហរដ្ឋ​អាមេរិក​បន្ត​ផ្ដល់​ជំនួយ​យោធា​ដល់​អ៊ុយក្រែន

ដោយ ឌឹ ខេមបូឌា ដេលី

បទវិភាគ

ប្រធានាធិបតី​អ៊ុយក្រែន លោក វ៉ូឡូឌីមៀ ហ្សេឡេនស្គី បាន​អំពាវនាវ​យ៉ាង​រំជើបរំជួល​សុំ​ឱ្យ​សហរដ្ឋ​អាមេរិក​បន្ត​ផ្ដល់​ជំនួយ​យោធា​ដល់​ប្រទេស​របស់​លោក ដោយ​ភ្ជាប់​ជាមួយ​ការ​ព្រមាន​ថា ក្រុង​វ៉ាស៊ីនតោន មិន​សម្រេច​បន្ត​ផ្ដល់​ជំនួយ​ជួយ​អ៊ុយក្រែន នឹង​ជួយ​ឱ្យ​រុស្ស៊ី​ឈ្នះ​សង្គ្រាម។

លោក​ទទូច​ថា បើ​សហរដ្ឋ​អាមេរិក​មិន​ជួយ​អ៊ុយក្រែន នឹង​ឱ្យ​លោក ពូទីន បំផ្លាញ​ប្រជាធិបតេយ្យ​ក្នុង​តំបន់​អឺរ៉ុប ហើយ​អឺរ៉ុប​ទាំងមូល​នឹង​អសន្តិសុខ ចំណែក​វិមាន​ក្រឹមឡាំង គេ​ប្រកាស​ថា​គេ​មិន​ត្រឹមតែ​ឈ្នះ​សង្គ្រាម​នោះ​ទេ គឺ​ឈ្នះ​សង្គ្រាម​ចិត្តសាស្ត្រ​ដែល​នាំ​ឱ្យ​ប្រទេស​ឈ្លានពាន​មួយ​នេះ​ឡើង​ឫទ្ធិ​អំណាច​កាន់តែ​ខ្លាំង។

ទីភ្នាក់ងារ​សារព័ត៌មាន AFP ដែល​បាន​ចេញ​ផ្សាយ​របាយការណ៍ នៅ​ថ្ងៃ​អង្គារ ទី​១២ ខែ​ធ្នូ បាន​ឱ្យ​ដឹង​ថា ការ​ថ្លែង​របស់​លោក ហ្សេឡេនស្គី ដូច​នេះ ក្នុង​សុន្ទរកថា​ទៅ​កាន់​អ្នក​ចូលរួម​ក្នុង​វេទិកា​មួយ​រៀបចំ​ឡើង​នៅ​ឯ​សាកលវិទ្យាល័យ National Defense University នា​ឱកាស​លោក​បំពេញ​ទស្សនកិច្ច​ទៅ​កាន់​សហរដ្ឋ​អាមេរិក​ជា​លើក​ទី​២។

លោក វ៉ូឡូឌីមៀ ហ្សេឡេនស្គី បាន​និយាយ​ថា អ៊ុយក្រែន​មិន​ត្រឹមតែ​កំពុង​ប្រយុទ្ធ​ដើម្បី​ការពារ​អាយុ​ជីវិត​ជាតិ​សាសន៍​របស់​ខ្លួន​ប៉ុណ្ណោះ​ទេ តែ​ក៏​កំពុង​ប្រយុទ្ធ​ដើម្បី​ការពារ​សេរីភាព​ដែល​កើត​មាន​ពាសពេញ​តំបន់​អឺរ៉ុប ក្រោយ​សហភាព​សូវៀត​រលំរលាយ។

ដោយ​ឆ្លើយតប​ទៅ​នឹង​ក្រុម​អ្នក​តំណាងរាស្ត្រ​មួយ​ចំនួន​មកពី​គណបក្ស​សាធារណរដ្ឋ ដែល​រារាំង​រដ្ឋការ​លោក បៃដិន ក្នុង​ការ​ផ្ដល់​ជំនួយ​យោធា​សម្រាប់​អ៊ុយក្រែន លោក វ៉ូឡូឌីមៀ ហ្សេឡេនស្គី ក៏​បាន​សង្កត់​ធ្ងន់​ផង​ដែរ​ថា អ្នក​នយោបាយ​មិន​ត្រូវ​ក្បត់​កងទ័ព​របស់​ខ្លួន​នោះ​ទេ។ លោ​បន្ត​ថា ការ​ពន្យារ​ពេល​ផ្ដល់​ជំនួយ​របស់​សហរដ្ឋ​អាមេរិក នឹង​ក្លាយ​ជា​ការ​បំពេញ​ក្ដី​ស្រមៃ​របស់​លោក​ប្រធានាធិបតី​រុស្ស៊ី វ្ល៉ាឌីមៀ ពូទីន។

លោក វ៉ូឡូឌីមៀ ហ្សេឡេនស្គី ពន្យល់​ថា អស់​លោក​កំពុងតែ​ពឹង​ផ្អែកលើ​អ៊ុយក្រែន ដែល​ជា​រនាំង​ការពារ​សេរីភាព​របស់​អស់​លោក ប៉ុន្តែ​អ៊ុយក្រែន ក៏​ពឹង​ផ្អែក​លើ​អស់​លោក​ផង​ដែរ គឺ​ការ​បន្ត​ជួយ​អ៊ុយក្រែន។

កាលពី​ខែ​ធ្នូ ឆ្នាំ​២០២២ លោក វ៉ូឡូឌីមៀ ហ្សេឡេនស្គី បាន​ទៅ​សហរដ្ឋ​អាមេរិក​តាម​ការ​អញ្ជើញ​របស់​លោក ចូ បៃដិន ហើយ​បាន​ថ្លែង​នៅ​ចំពោះ​សមាជិក​សភា​ទាំង​ពីរ។ សហរដ្ឋ​អាមេរិក​ជា​ប្រទេស​ផ្ដល់​ជំនួយ​ធំ​ជាងគេ​ទៅ​ឱ្យ​អ៊ុយក្រែន ទាំង​ជំនួយ​យោធា ជំនួយ​មនុស្សធម៌ និង​ជំនួយ​ហិរញ្ញវត្ថុ។

នៅ​លើ​ទឹកដី​សហរដ្ឋ​អាមេរិក​លើក​នេះ លោក វ៉ូឡូឌីមៀ ហ្សេឡេនស្គី ត្រូវ​ជួប​ពិភាក្សា​ជាមួយ​លោក ចូ បៃដិន នៅ​ឯ​សេតវិមាន ព្រមទាំង​ត្រូវ​ជួប​តំណាងរាស្ត្រ​មកពី​គណបក្ស​ធំ​ទាំង​ពីរ​របស់​សហរដ្ឋ​អាមេរិក នៅ​ថ្ងៃ​អង្គារ​សប្ដាហ៍​នេះ ក្នុង​នោះ​រួម​មាន​ទាំង​ប្រធាន​សភា​តំណាងរាស្ត្រ​អាមេរិក លោក Mike Johnson។

លោក វ៉ូឡូឌីមៀ ហ្សេឡេនស្គី ដែល​ទៅ​ដល់​សហរដ្ឋ​អាមេរិក​ជា​ថ្មី​ទៀត​តាម​ការ​អញ្ជើញ​របស់​លោក ចូ បៃដិន បន្ទាប់ពី​លោក​បាន​ទៅ​ចូលរួម​ពិធី​ស្បថ​ចូល​កាន់​តំណែង​របស់​ប្រធានាធិបតី​ថ្មី​នៃ​ប្រទេស​អាហ្សង់ទីន។

វត្តមាន​របស់​លោក វ៉ូឡូឌីមៀ ហ្សេឡេនស្គី លើក​ទី​ពីរ​នេះ បន្ទាប់ពី​សមាជិក​ព្រឹទ្ធសភា​សហរដ្ឋ​អាមេរិក​មកពី​គណបក្ស​សាធារណរដ្ឋ​កាលពី​សប្ដាហ៍​មុន បាន​រាំង​ខ្ទប់​សំណើ​របស់​សេតវិមាន​ឱ្យ​ទម្លាក់​កញ្ចប់​ថវិកា ១០៦​ពាន់​លាន​ដុល្លារ​សម្រាប់​អ៊ុយក្រែន និង​អ៊ីស្រាអែល។

គេ​រំពឹង​ថា ក្រោយពី​លោក វ៉ូឡូឌីមៀ ហ្សេឡេនស្គី ថ្លែង​រៀបរាប់​អំពី​ផលវិបាក និង​គោលដៅ​របស់​លោក​ក្នុង​ការ​ទប់ស្កាត់​ចលនា​ឈ្លានពាន​របស់​រុស្ស៊ី ហើយ​នោះ សមាជិក​សភា​ទាំង​ពីរ​របស់​សហរដ្ឋ​អាមេរិក អាច​នឹង​ប្រែប្រួល​ជំហរ​របស់​ពួកគេ​ឡើងវិញ​ចំពោះ​ការ​រាំង​ខ្ទប់​បំណង​របស់​រដ្ឋការ​លោក បៃដិន ដែល​ស្នើ​បន្ថែម​ជំនួយ​យោធា​ទៅ​ឱ្យ​អ៊ុយក្រែន។

គោលដៅ​របស់​លោក ចូ បៃដិន និង​រដ្ឋការ​របស់​លោក រួម​ទាំង​ក្រុម​សមាជិក​សភា​គណបក្ស​ប្រជាធិបតេយ្យ​មាន​ចក្ខុវិស័យ​រួម​គ្នា គឺ​ជួយ​អ៊ុយក្រែន រហូត​រុស្ស៊ី​សម្រេច​ដក​ទ័ព​ចេញពី​អ៊ុយក្រែន ឬ​បញ្ចប់​សង្គ្រាម ហើយ​ចំពោះ​ក្រុម​បស្ចិម​ប្រទេស និង​បណ្ដា​ប្រទេស​សម្ព័ន្ធមិត្ត​ដែល​បន្ត​ផ្ដល់​ជំនួយ​ទៅ​ឱ្យ​អ៊ុយក្រែន ក៏​មាន​គោលដៅ​ដូច​រដ្ឋការ​លោក បៃដិន ដែរ។

មក​ដល់​ពេលនេះ សង្គ្រាម​របស់​មហាអំណាច​រុស្ស៊ី​ឈ្លានពាន​អ៊ុយក្រែន ចូល​ដល់​ខែ​ទី​២២ ហើយ។ សង្គ្រាម​ដែល​កំពុង​ប្រយុទ្ធ​គ្នា​យ៉ាង​សាហាវ​នៅ​ភាគ​ខាងត្បូង និង​ភាគ​ខាងកើត។

បើ​តាម​ក្រសួង​ការពារ​ជាតិ​អ៊ុយក្រែន ទ័ព​របស់​រុស្ស៊ី​ដែល​បាត់បង់​នៅ​លើ​សមរភូមិ​កើន​ឡើង​ជិត ៤៤​ម៉ឺន​នាក់ និង​សព្វាវុធ​ធុន​ធ្ងន់​មាន​រថក្រោះ រថពាសដែក កាំភ្លើង​ធំ ប្រព័ន្ធ​ការពារ​ដែនអាកាស នាវាចម្បាំង សរុប​ជាង ២៦០០០​គ្រឿង។ តែ​ក្រសួង​ការពារ​ជាតិ​អ៊ុយក្រែន មិន​បាន​បង្ហាញ​តួលេខ​ដែល​ភាគី​របស់​ខ្លួន​បាត់បង់​ទ័ព​ប៉ុន្មាន​ម៉ឺន​នាក់ និង​សព្វាវុធ​ប៉ុន្មាន​ម៉ឺន​គ្រឿង​នោះ​ទេ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស