អ្នកឃ្លាំមើលសិទ្ធិការងារក្នុងស្រុក សម្ដែងការព្រួយបារម្ភអំពីការធ្លាក់ចុះសិទ្ធិមូលដ្ឋានរបស់ពលរដ្ឋ និងសេរីភាពរបស់សហជីពក្នុងវិស័យការងារនៅកម្ពុជា បន្ទាប់ពីមានការធ្វើទុក្ខបុកម្នេញជាច្រើនករណីពីសំណាក់ថៅកែរោងចក្រ និងក្រុមហ៊ុនលើកម្មករនិយោជិតសព្វថ្ងៃនេះ។
អ្នកគ្រប់គ្រងផ្នែកសិទ្ធិការងាររបស់អង្គការសង់ត្រាល់ លោក ឃុន ថារ៉ូ បានប្រាប់សារព័ត៌មាន The Cambodia Daily នៅថ្ងៃទី១៩ ធ្នូ នេះថា ក្នុងរយៈពេល ៣ឆ្នាំចុងក្រោយនេះ សង្គមស៊ីវិលសង្កេតឃើញថា សិទ្ធិ និងសេរីភាពរបស់កម្មករមានការរំលោភបំពានគួរឱ្យកត់សម្គាល់ ក្នុងនោះក៏មានការវាយប្រហារយ៉ាងខ្លាំងទៅលើក្រុមចលនាសហជីពឯករាជ្យ និងអង្គការមិនមែនរដ្ឋាភិបាលក្នុងវិស័យការងារផងដែរ។ ជាក់ស្តែង សហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ ត្រូវរងនូវការបញ្ឈប់ពីការងារដោយខុសពីច្បាប់ការងាររបស់កម្ពុជាយ៉ាងធ្ងន់ធ្ងរ។
លោកបន្ថែមថា កម្មករសមាជិក និងថ្នាក់ដឹកនាំសហជីពនៃក្រុមហ៊ុនណាហ្គាវើលដ៍ ដែលហ៊ានចេញមុខក្នុងការតវ៉ាទាមទារឲ្យក្រុមហ៊ុនអនុវត្តច្បាប់ការងារ ត្រូវបានភាគីក្រុមហ៊ុនធ្វើទុក្ខបុកម្នេញគ្រប់ទម្រង់ ដែលបង្ហាញឱ្យឃើញពីការរំលោភបំពានសិទ្ធិការងារលើបុគ្គលិកកម្មករ និងបង្ហាញពីការរំលោភបំពានច្បាប់ការងាររបស់កម្ពុជាយ៉ាងអនាធិបតេយ្យ។
លោក ឃុន ថារ៉ូ បញ្ជាក់ថា កន្លងមក ករណីនៃការបញ្ឈប់ការងាររបស់សមាជិក និងថ្នាក់ដឹកនាំសហជីពទាំងក្រុមហ៊ុនណាហ្គាវើលដ៍ និងក្រុមហ៊ុនដទៃទៀតដែលហ៊ានចេញមុខការពារសិទ្ធិកម្មករ ត្រូវបានសហជីពប្តឹងទៅក្រសួងការងារដែរ ប៉ុន្តែករណីទាំងនោះនៅតែមិនមានដំណោះស្រាយ ខណៈក្រសួងការងារ តែងតែចាត់ទុកវិវាទការងារនៃការបញ្ឈប់ថ្នាក់ដឹកនាំសហជីពទាំងនោះទៅជាវិវាទបុគ្គលទៅវិញ ដែលធ្វើឱ្យបញ្ហានេះកាន់តែស្មុគស្មាញ និងចេះតែបន្តកើតមានដល់សព្វថ្ងៃនេះ។
មន្ត្រីជាន់ខ្ពស់សង្គមស៊ីវិលរូបនេះបញ្ជាក់ថា រដ្ឋាភិបាលគួរតែពិចារណាពិនិត្យការអនុវត្តសិទ្ធិមូលដ្ឋានរបស់ពលរដ្ឋឡើងវិញនៅពេលនេះ ដើម្បីធ្វើឱ្យប្រសើរនូវការគោរពសិទ្ធិមនុស្ស ព្រោះថាប្រទេសកម្ពុជាកំពុងស្ថិតក្នុងដំណើរការពិនិត្យឡើងវិញជាសកលតាមកាលកំណត់ UPR នៃអង្គការសហប្រជាជាតិ នៅដើមឆ្នាំក្រោយនេះ ដូច្នេះការអនុវត្តនានាស្ដីពីសិទ្ធិពលរដ្ឋ គឺជារឿងចាំបាច់បំផុតដែលជួយលើកមុខលើកមាត់រដ្ឋាភិបាលសម្រាប់អាណត្តិថ្មីនេះ។
ការអះអាងនេះ ធ្វើឡើងជំរុញឱ្យរដ្ឋាភិបាលកម្ពុជាអាណត្តិទី៧ នេះ ជួយដោះស្រាយវិវាទនានាដែលបានកើតឡើងលើកម្មករនិយោជិតដោយគ្មានដំណោះស្រាយជាបន្តបន្ទាប់មកនោះ។
សហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ ហៅកាត់ថា LRSU បានចេញសេចក្តីថ្លែងការណ៍មួយកាលពីថ្ងៃទី១៨ ខែធ្នូ ឆ្នាំ២០២៣ ថា ស្ថានភាពកូដកម្មរយៈពេលពីរឆ្នាំរបស់បុគ្គលិកនៃក្រុមហ៊ុនណាហ្គាវើលដ៍ ដើម្បីទាមទារឲ្យមានការគោរពសិទ្ធិសហជីព គិតមកដល់ពេលនេះ គឺជាថ្ងៃគម្រប់ខួប ២ឆ្នាំហើយដែលបុគ្គលិកនៃក្រុមហ៊ុនណាហ្គាវើលដ៍បានចេញមកធ្វើកូដកម្ម ដើម្បីមានការដោះលែងកញ្ញា ឈឹម ស៊ីថរ ទម្លាក់ចោលរាល់បទចោទលើសមាជិកសហជីពនានា និងទទួលយកបុគ្គលិកដែលក្រុមហ៊ុនបានបញ្ឈប់ ឱ្យចូលធ្វើការវិញ។
សេចក្តីថ្លែងការណ៍ខាងលើលើកឡើងថា រយៈពេល ២ឆ្នាំមកនេះ វិវាទការងារនៅក្រុមហ៊ុនណាហ្គាវើលដ៍ មិនអាចដោះស្រាយបានសូម្បីតែមួយចំណុច។ ផ្ទុយទៅវិញ ក្រុមកូដករដែលភាគច្រើនជាស្ត្រីត្រូវរងនូវការប្រើប្រាស់អំពើហិង្សា និងការបៀតបៀនពីសំណាក់កងកម្លាំងអាជ្ញាធរមានសមត្ថកិច្ចគ្រប់បែបយ៉ាង រហូតបង្កទៅជារបួសស្នាមលើក្រុមកូដករ ទាំងរូបរាងកាយ និងផ្លូវចិត្ត ក្នុងនោះ កូដករដែលជាស្ត្រីមានផ្ទៃពោះ ក៏រលូតកូនក្នុងផ្ទៃដោយសារការប្រើអំពើហិង្សារបស់សមត្ថកិច្ចថែមទៀត។
ប្រភពដដែលបញ្ជាក់ថា ក្រុមកូដករទាំងអស់បានប្ដេជ្ញាដូចគ្នាថា នឹងបន្តធ្វើកូដកម្មរហូតមានដំណោះស្រាយ ព្រោះថាពួកគេមិនមែនជាទាសករសម័យថ្មីក្នុងប្រទេសដែលបានប្រកាន់យករបបប្រជាធិបតេយ្យនោះទេ ដូច្នេះក្នុងនាមពួកគេជាកម្មកររងគ្រោះ ស្នើសុំឲ្យរដ្ឋាភិបាលថ្មីជំរុញឲ្យអ្នកបន្តវេនរបស់ក្រុមហ៊ុនណាហ្គាវើលដ៍ ដោះស្រាយបញ្ចប់វិវាទការងារដ៏រ៉ាំរ៉ៃនេះឱ្យបានឆាប់ ក៏ដើម្បីមុខមាត់របស់រដ្ឋាភិបាលកម្ពុជាដែរ។
កាលពីថ្ងៃទី៨ ខែមេសា ឆ្នាំ២០២១ កន្លងទៅ ក្រុមហ៊ុនណាហ្គាវើលដ៍ បានបញ្ឈប់កម្មករនិយោជិតជាង ១ពាន់នាក់ (១៣២៩នាក់) ក្នុងបំណងរំលាយក្រុមសហជីពតែម្តង ប៉ុន្តែពួកគេបានប្រើលេសវិបត្តិជំងឺកូវីដ-១៩ ទៅវិញ ព្រោះថាបុគ្គលិកទាំងជាង ១ពាន់នាក់នេះ គឺសុទ្ធសឹងតែជាថ្នាក់ដឹកនាំ និងសមាជិកសហជីពទាំងអស់។
ក្រោយប្រកាសបញ្ឈប់បុគ្គលិកដោយរំលោភលើសិទ្ធិការងារ នៅថ្ងៃទី១៨ ខែធ្នូ ឆ្នាំ២០២១ កម្មករដែលត្រូវបញ្ឈប់ពីការងារ ក៏បាននាំគ្នាធ្វើកូដកម្មទាមទារយុត្តិធម៌តែម្តង ប៉ុន្តែរហូតដល់ពេលនេះអស់រយៈពេល ២ឆ្នាំហើយ វិវាទនេះនៅតែគ្មានដំណោះស្រាយដដែល ខណៈប្រធានសហជីពកញ្ញា ឈឹម ស៊ីថរ ក៏ត្រូវបានសមត្ថកិច្ចក្រុងភ្នំពេញចាប់ឃុំខ្លួន និងក្រុមកូដករមួយចំនួនផ្សេងទៀតកំពុងរងនូវបណ្តឹងតាមផ្លូវតុលាការសព្វថ្ងៃនេះ។
បច្ចុប្បន្ននេះ ក្រុមកូដករណាហ្គាវើលដ៍ចំនួន ៩នាក់ កំពុងរងនូវបណ្តឹងតាមផ្លូវតុលាការពីបទ «ញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម» ដូចជាប្រធានទ្រទ្រង់សិទ្ធិការងារកម្មករខ្មែរ កញ្ញា ឈឹម ស៊ីថរ ថ្នាក់ដឹកនាំសហជីព កញ្ញា ឈឹម សុខ និងសកម្មជនសហជីពអ្នកស្រី រី សុវណ្ណឌី ជាដើម ក្រោយពេលក្រុមកូដករទាំងនោះធ្វើកូដកម្មទាមទារឲ្យថៅកែក្រុមហ៊ុនណាហ្គាវើលដ៍ ដោះស្រាយវិវាទការងារជាមួយខ្លួននាពេលកន្លងមក។
ដោយឡែកបុគ្គលិកក្រុមហ៊ុនណាហ្គាវើលដ៍ ៤នាក់ផ្សេងទៀត ដូចជា កញ្ញា សៀក កញ្ញា កញ្ញា ទួន យូរី កញ្ញា ជឹម រដ្ឋា និងកញ្ញា ប៉ុន ស្រីចិន្តា ក៏ត្រូវក្រុមហ៊ុនណាហ្គាវើលដ៍បញ្ឈប់ពីការងារទាំងបង្ខំកាលពីអំឡុងខែវិច្ឆិកា ឆ្នាំ២០២៣ កន្លងទៅផងដែរ ដោយសារតែពួកគេធ្លាប់ចូលរួមធ្វើកូដកម្មនេះ៕