28.4 C
Phnom Penh

អ្នកស្រី មូរ សុខហួរ អំពាវនាវ​ឱ្យ​លោក ហ៊ុន ម៉ាណែត បើក​ផ្លូវ​ឱ្យ​អ្នកស្រី​អាច​វិល​ចូល​កម្ពុជា​វិញ​ដើម្បី​តស៊ូ​មតិ​រក​យុត្តិធម៌​តាម​ផ្លូវ​ច្បាប់

ដោយ ឌឹ ខេមបូឌា ដេលី

បទវិភាគ

មន្ត្រី​ជាន់ខ្ពស់​នៃ​អតីត​គណបក្ស​សង្គ្រោះ​ជាតិ​អ្នកស្រី មូរ សុខហួរ អំពាវនាវ​ឱ្យ​នាយករដ្ឋមន្ត្រី​ថ្មី​របស់​កម្ពុជា​លោក ហ៊ុន ម៉ាណែត បើក​ផ្លូវ​ឱ្យ​អ្នកស្រី​វិល​ទៅ​ប្រទេស​កម្ពុជា​ដែល​ជា​ទឹកដី​កំណើត​របស់​ខ្លួន​វិញ ដើម្បី​តស៊ូ​មតិ​រក​យុត្តិធម៌​តាម​ផ្លូវ​ច្បាប់ ដោយសារ​សកម្មភាព​តស៊ូ​មតិ​របស់​អ្នកស្រី​កន្លង​មក មិន​មែន​ដើម្បី​ប្រឆាំង​នឹង​រដ្ឋាភិបាល​ទេ ប៉ុន្តែ​ដើម្បី​កែលំអ​ការ​ដឹកនាំ និង​រក​ផល​ប្រយោជន៍​ឱ្យ​ប្រទេស​ជាតិ​ប៉ុណ្ណោះ។

មន្ត្រី​ជាន់ខ្ពស់​បក្ស​ប្រឆាំង​អ្នកស្រី មូរ សុខហួរ បាន​លើកឡើង​ក្នុង​កម្មវិធី Idea Talk នៃ​សារព័ត៌មាន The Cambodia Daily កាលពី​រាត្រី​ថ្ងៃទី​២២ មករា ថា ទោះបី​នៅ​ពេល​ដែល​អ្នកស្រី​ទៅ​ដល់​ប្រទេស​កម្ពុជា ត្រូវ​តុលាការ​កាត់ទោស ឬ​យក​អ្នកស្រី​ទៅ​ដាក់​ពន្ធនាគារ​ក៏ដោយ ក៏​អ្នកស្រី​មិន​ខ្លាច​ដែរ ប៉ុន្តែ​រដ្ឋាភិបាល​ក៏​មិន​ត្រូវ​បញ្ជា​ឱ្យ​អាជ្ញាធរ​ក្រោម​អំណាច​របស់​ខ្លួន បិទ​សិទ្ធិ​ពលរដ្ឋ ឬ​អ្នកគាំទ្រ​គណបក្ស​សង្គ្រោះ​ជាតិ មិន​ឱ្យ​ចូលរួម​តាមដាន​សវនាការ​របស់​អ្នកស្រី​ជុំវិញ​ការ​ចោទប្រកាន់​នេះ​ដែរ ប្រសិនបើ​តុលាការ​យល់​ថា​សាលក្រម​របស់​ខ្លួន​ដែល​បាន​កាត់ទោស​អ្នកស្រី​ឱ្យ​ជាប់​ពន្ធនាគារ ៤០​ឆ្នាំ ធ្វើ​ឡើង​ដោយ​យុត្តិធម៌​មែន​នោះ។

អ្នកស្រី មូរ សុខហួរ អះអាង​ថា អ្នកស្រី​ពិត​ជា​ចង់​វិល​ទៅ​ទឹកដី​កំណើត​របស់​អ្នកស្រី​ខ្លាំង​ណាស់ ប៉ុន្តែ​រដ្ឋាភិបាល​កម្ពុជា​ដែល​កំពុង​ដឹកនាំ​ដោយ​វង្ស​ត្រកូល​លោក ហ៊ុន សែន និង​កំពុង​បន្ត​ទៅ​លោក ហ៊ុន ម៉ាណែត បែរ​ជា​ហាមឃាត់​មិន​ឱ្យ​អ្នកស្រី​ចូល​ទៅ​តស៊ូ​មតិ​ក្នុង​សវនាការ​ដើម្បី​ឱ្យ​អ្នកស្រី​ទទួល​បាន​ការ​ជំនុំជម្រះ​ដោយ​យុត្តិធម៌​ទៅវិញ ដែល​ទង្វើ​នេះ​បង្ហាញ​ឱ្យ​ឃើញ​យ៉ាង​ច្បាស់​ថា អ្នក​ដែល​ប្រឆាំង​នឹង​នីតិរដ្ឋ​របស់​ប្រទេស​កម្ពុជា គឺ​មេដឹកនាំ​គណបក្ស​ប្រជាជន​កម្ពុជា ដែល​កំពុង​គាបសង្កត់​រដ្ឋាភិបាល​ខ្មែរ​នៅ​ពេលនេះ​ប៉ុណ្ណោះ។

អនុប្រធាន​គណបក្ស​សង្គ្រោះ​ជាតិ​រូប​នេះ​បញ្ជាក់​ថា ដើម្បី​ធានា​នូវ​សន្តិភាព និង​ស្ដារ​ប្រជាធិបតេយ្យ ព្រមទាំង​លើកស្ទួយ​ការ​គោរព​សិទ្ធិមនុស្ស​ពិតប្រាកដ លុះត្រា​មាន​វត្តមាន​មន្ត្រី​បក្ស​ប្រឆាំង​នៅ​ក្នុង​ប្រទេស​កម្ពុជា ប៉ុន្តែ​សម្រាប់​សន្តិភាព ឬ​យុត្តិធម៌​សង្គម​ដែល​ប្រកាស​ចេញពី​បក្ស​កាន់​អំណាច​តែ​ម្ខាង​ដូច​សព្វថ្ងៃ​នេះ គ្រាន់តែ​ជា​ការ​ភូត​កុហក​ពលរដ្ឋ​ប៉ុណ្ណោះ ព្រោះ​ថា​មិន​ដែល​សន្តិភាព យុត្តិធម៌​សង្គម ឬ​ការ​ធានា​បាន​នូវ​ប្រជាធិបតេយ្យ​ឯណា​ដោយ​ការ​បិទ​សិទ្ធិ​សេរីភាព​បញ្ចេញមតិ​របស់​បក្ស​ប្រឆាំង អ្នក​នយោបាយ សកម្មជន​សង្គម និង​ពលរដ្ឋ​នោះ​ទេ។

ការ​អំពាវនាវ​នេះ ធ្វើឡើង​បន្ទាប់ពី​មន្ត្រី​ជាន់ខ្ពស់​បក្ស​ប្រឆាំង​ជាច្រើន រួម​ទាំង​អ្នកស្រី មូរ សុខហួរ ផង ត្រូវ​រដ្ឋាភិបាល​ខ្មែរ​ដែល​គ្រប់គ្រង​ដោយ​គណបក្ស​ប្រជាជន​កម្ពុជា បិទ​ផ្លូវ​មិន​ឱ្យ​វិល​ទៅ​ទឹកដី​កម្ពុជា​វិញ​សព្វថ្ងៃ​នេះ។

មន្ត្រី​ជាន់ខ្ពស់​គណបក្ស​សង្គ្រោះ​ជាតិ​ជាច្រើន​នាក់ ដូចជា លោក សម រង្ស៊ី អ្នកស្រី ជូឡុង សូមួរ៉ា លោក អេង ឆៃអ៊ាង អ្នកស្រី មូរ សុខហួរ លោក ហូរ វ៉ាន់ និង​លោក ឡុង រី ជាដើម បាន​បង្ខំ​ចិត្ត​និរទេស​ខ្លួនឯង​មក​រស់នៅ​ក្រៅ​ប្រទេស ដូចជា​នៅ​ប្រទេស​បារាំង សហរដ្ឋ​អាមេរិក និង​អូស្ត្រាលី ជាដើម បន្ទាប់ពី​តុលាការ​កំពូល​ក្រោម​អំណាច​រដ្ឋាភិបាល​ដែល​គ្រប់គ្រង​ដោយ​គណបក្ស​ប្រជាជន​កម្ពុជា ប្រកាស​រំលាយ​គណបក្ស​សង្គ្រោះ​ជាតិ កាលពី​ថ្ងៃទី​១៦ ខែ​វិច្ឆិកា ឆ្នាំ​២០១៧ កន្លង​ទៅ។

ក្រោយពី​ការ​រស់នៅ​ដោយ​និរទេស​នៅ​ក្រៅ​ស្រុក​ជិត ២​ឆ្នាំ នៅ​ថ្ងៃទី​១៦ ខែ​សីហា ឆ្នាំ​២០១៩ លោក សម រង្ស៊ី បាន​ចេញ​សេចក្តី​ថ្លែងការណ៍​មួយ​ដោយ​បញ្ជាក់​ថា មន្ត្រី​គណបក្ស​សង្គ្រោះ​ជាតិ (CNRP) ដែល​កំពុង​រស់នៅ​ដោយ​និរទេស​នៅ​ក្រៅ​ស្រុក​ទាំងអស់ នឹង​វិល​ចូល​កម្ពុជា​វិញ​នៅ​ថ្ងៃទី​៩ ខែ​វិច្ឆិកា ឆ្នាំ​២០១៩ ក្នុង​នោះ អ្នកស្រី មូរ សុខហួរ ក៏​បាន​ប្រកាស​ដែរ​ថា ការ​វិលត្រឡប់​របស់​មន្ត្រី​គណបក្ស​សង្គ្រោះ​ជាតិ គឺ​ដើម្បី​តស៊ូ​មតិ​ក្នុង​វិស័យ​នយោបាយ និង​ដើម្បី​ព្យាយាម​ឲ្យ​មាន​ការ​ដោះលែង​លោក កឹម សុខា ប្រធាន​គណបក្ស​សង្គ្រោះ​ជាតិ​ផង​ដែរ។

បន្ទាប់ពី​ការ​ប្រកាស​សេចក្តី​ថ្លែងការណ៍​នេះ នៅ​ថ្ងៃទី​៣ ខែ​តុលា ឆ្នាំ​២០១៩ សាលាដំបូង​រាជធានី​ភ្នំពេញ ក៏​បាន​ចេញ​ដីកា​បង្គាប់​ឱ្យ​ចាប់​ខ្លួន​អនុប្រធាន​គណបក្ស​សង្គ្រោះ​ជាតិ អ្នកស្រី មូរ សុខហួរ មេដឹកនាំ​បក្ស​ប្រឆាំង​លោក សម រង្ស៊ី និង​មន្ត្រី​ជាន់ខ្ពស់​បក្ស​ប្រឆាំង ៧​រូប​ផ្សេង​ទៀត ដូចជា លោក អេង ឆៃអ៊ាង និង​អ្នកស្រី ជូឡុង សូមួរ៉ា ជាដើម តែម្តង ក្រោម​បទ​ចោទ​ថា ផែនការ​ធ្វើ​មាតុភូមិ​និវត្តន៍​នេះ គឺជា​ការ​ប៉ុនប៉ង​ធ្វើ​រដ្ឋប្រហារ​ផ្តួល​រំលំ​រាជរដ្ឋាភិបាល​កម្ពុជា។

ក្រៅពី​មន្ត្រី​ជាន់ខ្ពស់​ខាងលើ ក៏​មាន​មន្ត្រី និង​សកម្មជន​បក្ស​ប្រឆាំង​ប្រមាណ ១៤០​នាក់​ទៀត​ដែរ ដែល​ត្រូវ​បាន​ចោទប្រកាន់ និង​ចាប់​ឃុំ​ខ្លួន​ក្រោម​ការ​ចោទប្រកាន់​ពី​បទ «ក្បត់​ជាតិ» និង «រួម​គំនិត​ក្បត់» ដើម្បី​ផ្ដួល​រំលំ​រដ្ឋាភិបាល ក្នុង​នោះ អ្នកស្រី មូរ សុខហួរ ក៏​ត្រូវ​តុលាការ​កាត់ទោស​ឱ្យ​ជាប់​ពន្ធនាការ ៤០​ឆ្នាំ​ថែម​ទៀត ខណៈ​លោក សម រង្ស៊ី ក៏​ត្រូវ​តុលាការ​កាត់ទោស​ពី​បទ​ផ្ដួល​រំលំ​រដ្ឋាភិបាល​ផង និង​ទោស​ដទៃ​ទៀត​ផង ដែល​សរុប​ទៅ​គឺ​មាន​ទោស ១​ជីវិត​ឯណោះ។

យ៉ាងណាក៏ដោយ នៅ​ថ្ងៃទី​២ ខែ​មករា ឆ្នាំ​២០២១ គណបក្ស​សង្គ្រោះ​ជាតិ បាន​ចេញ​សេចក្តី​ប្រកាស​ព័ត៌មាន​ម្តង​ទៀត​ពី​ការ​ធ្វើ​មាតុភូមិ​និវត្តន៍​របស់​អនុប្រធាន​គណបក្ស​សង្គ្រោះ​ជាតិ អ្នកស្រី មូរ សុខហួរ ដែល​នឹង​ធ្វើឡើង​នៅ​ថ្ងៃទី​១៧ ខែ​មករា ឆ្នាំ​២០២១ ប៉ុន្តែ​ការ​ធ្វើ​មាតុភូមិ​និវត្តន៍​នេះ ត្រូវ​បាន​ហាមឃាត់ និង​ទប់ស្កាត់​ពី​សំណាក់​រដ្ឋាភិបាល​កម្ពុជា​តាម​វិធី​គ្រប់​បែប​យ៉ាង ដូចជា ការ​មិន​ផ្តល់​ទិដ្ឋាការ ជាដើម ដែល​ជា​ហេតុ​ធ្វើ​ឱ្យ​មន្ត្រី​បក្ស​ប្រឆាំង​ទាំងនោះ​មិន​អាច​ទិញ​សំបុត្រ​យន្តហោះ​ដើម្បី​វិល​ទៅ​ប្រទេស​កម្ពុជា​វិញ​នៅ​ពេល​នោះ។

ជាក់ស្តែង កាលពី​ថ្ងៃទី​១៦ ខែ​មករា ឆ្នាំ​២០២១ លោក សម រង្ស៊ី បាន​អះអាង​ថា អនុប្រធាន​គណបក្ស​សង្គ្រោះ​ជាតិ អ្នកស្រី មូរ សុខហួរ មិន​ត្រូវ​បាន​គេ​អនុញ្ញាត​ឲ្យ​ឡើង​យន្តហោះ​តាមរយៈ​ក្រុមហ៊ុន​អាកាសចរណ៍ Singapore Airlines ឆ្ពោះ​ទៅ​ប្រទេស​កម្ពុជា ដោយ​ឆ្លងកាត់​ប្រទេស​សិង្ហបុរី នោះ​ទេ ពីព្រោះ​អ្នកស្រី​មិន​មាន​ទិដ្ឋាការ​ដើម្បី​ចូល​ប្រទេស​កម្ពុជា៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស