អតីតមេដឹកនាំបក្សប្រឆាំងលោក សម រង្ស៊ី អំពាវនាវឱ្យអង្គបោះឆ្នោតសម្រាប់ការបោះឆ្នោតព្រឹទ្ធសភានៅថ្ងៃទី២៥ ខែកុម្ភៈ ឆ្នាំ២០២៤ ខាងមុខនេះ នាំគ្នាទៅបោះឆ្នោតឱ្យគណបក្សភ្លើងទៀន គណបក្សកម្លាំងជាតិ និងគណបក្សឆន្ទៈខ្មែរ ដែលលោកចាត់ទុកថាជាគណបក្សដែលតំណាងឱ្យកម្លាំងអ្នកប្រជាធិបតេយ្យនៅកម្ពុជានៅពេលនេះ ទើបអាចកម្ចាត់ការដឹកនាំបែបផ្ដាច់ការបានជោគជ័យ។
លោក សម រង្ស៊ី បានសរសេរលើទំព័រហ្វេសប៊ុករបស់លោកនៅថ្ងៃទី៣០ មករា នេះថា នៅក្នុងទីលាននយោបាយរបស់កម្ពុជាសព្វថ្ងៃនេះមានគណបក្សនយោបាយតែបីប៉ុណ្ណោះដែលជាគណបក្សតំណាងឲ្យកម្លាំងប្រជាធិបតេយ្យសម្រាប់ការតស៊ូយកឈ្នះក្នុងការបោះឆ្នោត ហើយគណបក្សទាំងបីនេះ ក៏ជាគណបក្សដែលមានអ្នកគាំទ្រចេញមកពីប្រភពដើមតែមួយដែរ គឺចេញមកពីគណបក្សសង្គ្រោះជាតិតែម្តង។
លោក សម រង្ស៊ី អំពាវនាវឱ្យគណបក្សភ្លើងទៀន គណបក្សកម្លាំងជាតិ និងគណបក្សឆន្ទៈខ្មែរ ដែលជាគណបក្សតំណាងឱ្យកម្លាំងប្រជាធិបតេយ្យនៅប្រទេសកម្ពុជា និងគណបក្សនយោបាយផ្សេងទៀតដែលមានបំណងលើកស្ទួយប្រជាធិបតេយ្យ រួបរួមគ្នា និងសហការគ្នាដើម្បីលើកកម្ពស់លទ្ធិប្រជាធិបតេយ្យនៅកម្ពុជាឡើងវិញ ព្រោះថាមានតែការរួបរួមគ្នារវាងអ្នកស្នេហាប្រជាធិបតេយ្យប៉ុណ្ណោះ ទើបអាចកម្ចាត់ការដឹកនាំបែបផ្ដាច់ការបានជោគជ័យ។
អតីតមេដឹកនាំបក្សប្រឆាំងរូបនេះបញ្ជាក់ថា គណបក្សប្រជាជនកម្ពុជាដែលកំពុងគ្រប់គ្រងអំណាចមានលោក ហ៊ុន សែន ជាមេដឹកនាំ កំពុងបំផ្លាញអនាគតពលរដ្ឋខ្មែរតជំនាន់ ដូចជា ការបង្កើតឱ្យមានអំពើពុករលួយ និងការបង្កើតបក្សពួកនិយមជាប្រព័ន្ធ ដែលជាដើមហេតុធ្វើឱ្យចុះខ្សោយប្រព័ន្ធដឹកនាំប្រទេស ដូចជា ចុះខ្សោយប្រព័ន្ធអប់រំ ប្រព័ន្ធសុខាភិបាល និងសេដ្ឋកិច្ច ជាដើម ខណៈពលរដ្ឋខ្មែររាប់លាននាក់ត្រូវបង្ខំចិត្តធ្វើចំណាកស្រុកទៅធ្វើការនៅប្រទេសជិតខាងសព្វថ្ងៃនេះ។
កាលពីថ្ងៃទី១១ ខែមករា ឆ្នាំ២០២៤ អតីតមេដឹកនាំបក្សប្រឆាំងលោក សម រង្ស៊ី ធ្លាប់បានចេញលិខិតអំពាវនាវឱ្យគណបក្សកម្លាំងជាតិ និងគណបក្សឆន្ទៈខ្មែរ រួបរួមកម្លាំងគ្នាម្តងរួចទៅហើយ ដើម្បីឱ្យគណបក្សនយោបាយទាំងពីរនេះប្រមូលកម្លាំងអ្នកគាំទ្ររបស់ខ្លួនសម្រាប់ការបោះឆ្នោតព្រឹទ្ធសភាអាណត្តិទី៥ នេះ។
យ៉ាងណាក៏ដោយ ក្រោយការអំពាវនាវនេះបានមួយថ្ងៃ គឺនៅថ្ងៃទី១២ ខែមករា ឆ្នាំ២០២៤ ក្រសួងមហាផ្ទៃបានចេញសេចក្តីប្រកាសព័ត៌មាន ដោយព្រមានទៅកាន់គណបក្សនយោបាយដែលពាក់ព័ន្ធនឹងលោក សម រង្ស៊ី ឱ្យបញ្ឈប់ជាបន្ទាន់នូវរាល់សកម្មភាពដែលបំពានច្បាប់ស្ដីពីគណបក្សនយោបាយជាបន្ទាន់ផងដែរ។
ក្រសួងមហាផ្ទៃ ប្រកាសយ៉ាងដាច់ណាត់ថា ចំពោះគណបក្សនយោបាយដែលបានចុះឈ្មោះចូលរួមការបោះឆ្នោតជ្រើសតាំងសមាជិកព្រឹទ្ធសភាអាណត្តិទី៥ ខាងមុខនេះ ត្រូវបញ្ឈប់ជាបន្ទាន់រាល់សកម្មភាពដែលបំពានច្បាប់ស្ដីពីគណបក្សនយោបាយ ពិសេសមាត្រា៦ថ្មី(ពីរ) ក្នុងចំណុចទី៧ ដែលបានចែងថា ការយល់ព្រមដោយចំហ ឬដោយឃុបឃិតជាមួយទណ្ឌិតជាប់ទោសពីបទឧក្រិដ្ឋ ឬពីបទមជ្ឈិម ឱ្យធ្វើសកម្មភាពណាមួយដើម្បីជាផលប្រយោជន៍នយោបាយសម្រាប់គណបក្សនយោបាយរបស់ខ្លួន គឺជាសកម្មភាពដែលត្រូវបានហាមឃាត់។
ក្រសួងមហាផ្ទៃ បញ្ជាក់ថា ផ្អែកតាមមាត្រា៤៤ថ្មី(ពីរ) បានបញ្ញត្តិថា គណបក្សនយោបាយដែលប្រព្រឹត្តល្មើស អាចប្រឈមនឹងការផ្អាកសកម្មភាពប្រាំឆ្នាំ ឬប្រឈមមុខនឹងការរំលាយដោយតុលាការ។ ទន្ទឹមគ្នានេះ មាត្រា៣៨ថ្មី នៃច្បាប់ស្ដីពីគណបក្សនយោបាយ បានផ្តល់លទ្ធភាពដល់សមត្ថកិច្ចរបស់ក្រសួងមហាផ្ទៃ ក្នុងការចាត់វិធានការដើម្បីផ្អាកសកម្មភាពគណបក្សនយោបាយនោះ ឬប្ដឹងទៅតុលាការ ដើម្បីរំលាយគណបក្សនយោបាយនោះចោល។
ក្រោយមានការព្រមានរបស់ក្រសួងមហាផ្ទៃបានមួយថ្ងៃ គឺនៅថ្ងៃទី១៣ ខែមករា ឆ្នាំ២០២៤ គណបក្សភ្លើងទៀន ក៏បានចេញសេចក្តីថ្លែងការណ៍មួយដោយប្រកាសបដិសេធថា ខ្លួនមិនពាក់ព័ន្ធនឹងបុគ្គលទាំងឡាយណាដែលជាទណ្ឌិតជាប់ទោសពីបទឧក្រិដ្ឋ ឬបទមជ្ឈិមនោះឡើយ។
ចំណែកប្រធានគណបក្សកម្លាំងជាតិ លោក ស៊ុន ចន្ធី ដែលទើបត្រូវបានបង្កើតឡើង និងចូលរួមប្រកួតប្រជែងការបោះឆ្នោតព្រឹទ្ធសភានៅពេលខាងមុខនេះ បានអះអាងថា គណបក្សរបស់លោកក៏មិនបានពាក់ព័ន្ធជាមួយទណ្ឌិតណាមួយដូចការអះអាងរបស់ក្រសួងមហាផ្ទៃនោះដែរ។
ការបោះឆ្នោតសមាជិកព្រឹទ្ធសភា នឹងធ្វើឡើងនៅថ្ងៃទី២៥ ខែកុម្ភៈ ឆ្នាំ២០២៤ ដោយអង្គបោះឆ្នោត គឺជាតំណាងរាស្ត្រ និងក្រុមប្រឹក្សាឃុំ-សង្កាត់ទាំងអស់ក្នុងមុខតំណែង ដោយបោះឆ្នោតជ្រើសរើសសមាជិកព្រឹទ្ធសភាចំនួន ៥៨រូប ក្នុងចំណោមសមាជិកសរុប ៦២នាក់។
សមាជិកព្រឹទ្ធសភាចំនួន ២រូបតែងតាំងដោយព្រះមហាក្សត្រ និង ២រូបទៀតត្រូវបានរដ្ឋសភាជ្រើសតាំងតាមមតិភាគច្រើន ដោយឡែកការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុកខណ្ឌ អាណត្តិទី៤ ក៏គ្រោងនឹងធ្វើនៅថ្ងៃទី២៦ ខែឧសភា ឆ្នាំ២០២៤ ផងដែរ៕