26 C
Phnom Penh

រដ្ឋាភិបាល​ចាត់ទុក​ការ​លើកឡើង​របស់​ប្រធាន​បក្ស​ភ្លើង​ទៀន​ថា​ជា​រឿង​មិន​ពិត​ដែល​ថា​ការ​ដឹកនាំ​របស់​លោក ហ៊ុន ម៉ាណែត កាន់តែ​ធ្វើ​ឱ្យ​ប្រជាធិបតេយ្យ​ចុះ​ខ្សោយ

ដោយ ឌឹ ខេមបូឌា ដេលី

បទវិភាគ

រដ្ឋាភិបាល​កម្ពុជា ចាត់ទុក​ការ​លើកឡើង​របស់​ប្រធាន​គណបក្ស​ភ្លើង​ទៀន លោក ទាវ វណ្ណុល ដែល​រិះគន់​ថា​ការ​ដឹកនាំ​របស់​លោក ហ៊ុន ម៉ាណែត កាន់តែ​ធ្វើ​ឱ្យ​ប្រជាធិបតេយ្យ​នៅ​កម្ពុជា​ចុះ​ខ្សោយ​នោះ ថា​ជា​រឿង​មិន​ពិត​នោះ​ទេ ហើយ​ថា​ការ​លើកឡើង​បែប​នេះ​ក៏​ជា​ចេតនា​ដើម្បី​ទាក់ទាញ​ការ​អាណិត​អាសូរ​ពី​ពលរដ្ឋ ដើម្បី​បាន​សន្លឹកឆ្នោត​ក្នុង​ការ​បោះឆ្នោត​ជ្រើសតាំង​សមាជិក​ព្រឹទ្ធសភា​នា​ពេល​ខាងមុខ​តែប៉ុណ្ណោះ។

អង្គភាព​អ្នក​នាំពាក្យ​រដ្ឋាភិបាល​កម្ពុជា បាន​ចេញ​សេចក្តី​ថ្លែងការណ៍​បន្ទាន់​មួយ​នៅ​ថ្ងៃទី​៧ ខែ​កុម្ភៈ នេះ​ថា ការ​ចោទប្រកាន់​របស់​លោក ទាវ វណ្ណុល ទៅ​លើ​រដ្ឋាភិបាល​កម្ពុជា ថា​បាន​ដាក់​កាមេរ៉ា​នៅ​មុខ​ផ្ទះ​ដើម្បី​ឃ្លាំមើល​សកម្មភាព​របស់​គាត់ ២៤​ម៉ោង គឺជា​រឿង​មិន​ពិត​ទាំងអស់ ព្រោះ​ថា​កាមេរ៉ា​នានា​ដែល​បាន​ដាក់​នៅ​តាម​ទី​សាធារណៈ​ទូទាំង​ប្រទេស ក៏ដូចជា​នៅ​ក្នុង​ភូមិសាស្ត្រ​រាជធានី​ភ្នំពេញ គឺ​ក្រោម​ហេតុផល​រក្សា​សន្តិសុខ សុវត្ថិភាព សណ្ដាប់ធ្នាប់​សាធារណៈ និង​ចរាចរណ៍​ជូន​ពលរដ្ឋ​ទូទៅ​តែប៉ុណ្ណោះ ហើយ​ក៏​គ្មាន​គោលការណ៍​ដាក់​កាមេរ៉ា​ដោយឡែក​ដើម្បី​ឃ្លាំមើល​សកម្មភាព​របស់​បុគ្គល​ណា​មួយ​នោះ​ដែរ។

ប្រភព​ដដែល​អះអាង​ថា ការ​លើកឡើង​របស់​លោក ទាវ វណ្ណុល គឺ​មាន​ចេតនា​អាក្រក់​ដើម្បី​បង្ខូច​កេរ្តិ៍​ឈ្មោះ​របស់​រាជរដ្ឋាភិបាល​ប៉ុណ្ណោះ ស្រប​ពេល​ដែល​ការ​បោះឆ្នោត​ជ្រើសតាំង​សមាជិក​ព្រឹទ្ធសភា​កាន់តែ​ខិត​ជិត​ចូល​មក​ដល់ ហើយ​ការ​លើកឡើង​បែប​នេះ ក៏​គ្រាន់តែ​ជា​ការ​សម្ដែង​របស់​លោក ទាវ វណ្ណុល ដែរ ដើម្បី​ទាក់ទាញ​សមានចិត្ត​របស់​ប្រជាពលរដ្ឋ។

អង្គភាព​អ្នក​នាំពាក្យ​រដ្ឋាភិបាល​កម្ពុជា បញ្ជាក់​ថា រាជរដ្ឋាភិបាល​ថ្មី​ដែល​កំពុង​ដឹកនាំ​ដោយ​លោក ហ៊ុន ម៉ាណែត កំពុង​ធ្វើ​កំណែ​ទម្រង់​ច្បាប់ និង​ប្រព័ន្ធ​យុត្តិធម៌ ក៏ដូចជា​ការ​ដាក់​ចេញ​គោលនយោបាយ និង​យុទ្ធសាស្ត្រ​នានា ដើម្បី​ពង្រឹង​នីតិរដ្ឋ និង​ប្រជាធិបតេយ្យ​នៅ​កម្ពុជា ក៏ដូចជា​ធានា​សុខ​សន្តិភាព និង​ការ​អភិវឌ្ឍ​ដែរ ដែល​នេះ​គឺជា​គោលជំហរ​ដ៏​ម៉ឺងម៉ាត់ និង​ឥត​ងាករេ​របស់​រាជរដ្ឋាភិបាល​ដឹកនាំ​ដោយ​គណបក្ស​ប្រជាជន​កម្ពុជា​ទៅ​ថ្ងៃ​មុខ។

ការ​អះអាង​នេះ ធ្វើឡើង​ដើម្បី​ច្រានចោល​ការ​លើកឡើង​របស់​ប្រធាន​គណបក្ស​ភ្លើង​ទៀន ដែល​បាន​រិះគន់​ពី​ការ​ដឹកនាំ​របស់​រដ្ឋាភិបាល​កម្ពុជា​ដែល​កំពុង​កាច់​ចង្កូត​ដោយ​នាយករដ្ឋមន្ត្រី​ថ្មី លោក ហ៊ុន ម៉ាណែត នៅ​ពេលនេះ។

កាលពី​ថ្ងៃទី​៥ ខែ​កុម្ភៈ ឆ្នាំ​២០២៤ សារព័ត៌មាន​ជប៉ុន​ឈ្មោះ Nikkei Asia បាន​ចុះផ្សាយ​សម្ដី​ប្រធាន​គណបក្ស​ភ្លើង​ទៀន លោក ទាវ វណ្ណុល ថា លទ្ធិប្រជាធិបតេយ្យ​នៅ​កម្ពុជា​កំពុង​ដើរ​ថយក្រោយ​ចាប់តាំងពី​លោក ហ៊ុន ម៉ាណែត ឡើង​កាន់​តំណែង​ជា​នាយករដ្ឋមន្ត្រី​បន្ត​ពី​ឪពុក​របស់​គាត់ គឺ​លោក ហ៊ុន សែន កាលពី​ថ្ងៃទី​២២ ខែ​សីហា ឆ្នាំ​២០២៣ មក ដែល​ជា​ហេតុ​ធ្វើ​ឱ្យ​រដ្ឋាភិបាល​មួយ​នេះ​កាន់តែ​អាក្រក់​ទៅៗ។

លោក ទាវ វណ្ណុល លើកឡើង​ថា លោក​មាន​ការ​ព្រួយបារម្ភ​អំពី​សុវត្ថិភាព​របស់​លោក និង​សមាជិក​គណបក្ស​ភ្លើង​ទៀន​ផ្សេង​ទៀត​យ៉ាង​ខ្លាំង បន្ទាប់ពី​រូបលោក និង​មន្ត្រី​ជាន់ខ្ពស់​គណបក្ស​នេះ​ផ្សេង​ទៀត​ត្រូវ​បាន​ត្រួតពិនិត្យ​ដោយ​កាមេរ៉ា ២៤​ម៉ោង ដែល​គេ​ប្រើ​ដើម្បី​តាមដាន​សកម្មភាព​របស់​លោក និង​មន្ត្រី​បក្ស​ភ្លើង​ទៀន​ផ្សេង​ទៀត។

ប្រធាន​គណបក្ស​ភ្លើង​ទៀន​រូប​នេះ​បញ្ជាក់​ថា លោក​មិន​ដឹង​ថា​ប្រទេស​កម្ពុជា​នឹង​ត្រូវ​ចំណាយ​ពេល​ប៉ុន្មាន​ឆ្នាំ​ទៅ​មុខ​ទៀត ដើម្បី​សម្រេច​បាន​នូវ​លទ្ធិប្រជាធិបតេយ្យ​ពិតប្រាកដ​នោះ​ទេ ស្រប​ពេល​ដែល​អ្នក​មាន​អំណាច​ធ្វើ​អ្វីៗ​តាម​អំពើ​ចិត្ត ដែល​ជា​ហេតុ​ធ្វើ​ឱ្យ​ប្រជាធិបតេយ្យ​នៅ​កម្ពុជា​កាន់តែ​ខ្សោយ​ទៅៗ​ក្រោម​ការ​ដឹកនាំ​របស់​លោក ហ៊ុន ម៉ាណែត នៅ​ពេលនេះ។

ទាក់ទិន​នឹង​បញ្ហា​នេះ កាលពី​ថ្ងៃទី​១៥ ខែ​មករា ឆ្នាំ​២០២៤ សារព័ត៌មាន​អន្តរជាតិ​ឈ្មោះ ប៉ូលិទិកូ (POLITOCO) បាន​ចុះផ្សាយ​អត្ថបទ​មួយ​ដែល​មាន​ចំណងជើង​ថា The ‘dirty dozen’ of Davos ឬ មេដឹកនាំ និង​អ្នកជំនួញ​កខ្វក់​ចំនួន ១២​រូប​ដែល​មាន​វត្តមាន​ក្នុង​ទីក្រុង​ដាវ៉ូស ក្នុង​នោះ លោក ហ៊ុន ម៉ាណែត ក៏​ត្រូវ​គេ​បញ្ចូល​ទៅ​ក្នុង​ចំណោម​មេដឹកនាំ និង​អ្នកជំនួញ​កខ្វក់​ចំនួន ១២​នាក់​នោះ​ផង​ដែរ។

សារព័ត៌មាន​អន្តរជាតិ​ខាងលើ​បាន​ចាត់ទុក​ថា បុគ្គល​ទាំងនេះ​គឺជា​ប្រភេទ​អ្នកជំនួញ​ទុច្ចរិត ជា​មេដឹកនាំ​ផ្ដាច់ការ​បែប​អត្តាធិបតេយ្យ​ដែល​ល្មោភ​អំណាច និង​ផល​ប្រយោជន៍​ផ្ទាល់ខ្លួន មិន​គោរព​ច្បាប់ ដោយ​ជាប់​ពាក់ព័ន្ធ​ក្នុង​អំពើ​ឃាតកម្ម​លើ​អ្នកកាសែត និង​បង្ក្រាប​បង្ហូរ​ឈាម​លើ​ពលរដ្ឋ​ស្លូតត្រង់ ជាដើម ក្នុង​នោះ​មាន​ចំណុច​សំខាន់ៗ​ជាច្រើន​នៃ​ការ​ដឹកនាំ​បែប​ផ្ដាច់ការ​របស់​លោក ហ៊ុន ម៉ាណែត រួម​មាន​ការ​បង្ក្រាប​ឥត​ឈប់​ឈរ​លើ​គណបក្ស​ប្រឆាំង និង​អ្នក​រិះគន់​ការ​បោះឆ្នោត​មិន​ត្រឹមត្រូវ ការ​ប្រព្រឹត្ត​អំពើពុករលួយ និង​ទំនាក់ទំនង​បក្ខពួក​និយម​រវាង​ក្រុម​អ្នក​នយោបាយ​កាន់​អំណាច និង​អ្នកជំនួញ​ក្នុង​រដ្ឋាភិបាល​របស់​គណបក្ស​ប្រជាជន​កម្ពុជា ដែល​កំពុង​គ្រប់គ្រង​ដោយ​លោក ហ៊ុន សែន សព្វថ្ងៃ​នេះ។

ចំណែក​ក្រុម​អ្នក​តស៊ូ​មតិ​កម្ពុជា​ដែល​មាន​មូលដ្ឋាន​ក្នុង​ប្រទេស​អូស្ត្រាលី អះអាង​កាលពី​ពេល​ថ្មីៗ​នេះ​ដែរ​ថា ចូល​ដល់​ឆ្នាំ​២០២៤ រដ្ឋាភិបាល​លោក ហ៊ុន ម៉ាណែត បាន​ចេញ​មុខ​ដោយ​ផ្ទាល់​ក្នុង​ការ​រំលោភ​បំពាន​លើ​សេរីភាព​បញ្ចេញមតិ​របស់​ពលរដ្ឋ​ជា​បន្តបន្ទាប់ ដែល​សកម្មភាព​នេះ​បាន​បង្ហាញ​ពី​ការ​បន្ត​បេសកកម្ម​ពី​ឪពុក​របស់​គាត់​លោក ហ៊ុន សែន ក្នុង​ការ​បំផ្លាញ​ដំណើរការ​ប្រជាធិបតេយ្យ​ក្នុង​ប្រទេស​កម្ពុជា​ទៅ​ថ្ងៃ​មុខ​ទៀត។

ទាក់ទិន​នឹង​ការ​ដឹកនាំ​របស់​លោក ហ៊ុន ម៉ាណែត អតីត​មេដឹកនាំ​បក្ស​ប្រឆាំង​លោក សម រង្ស៊ី អះអាង​ថា លោក​បាន​ប្រាប់​ប្រធានាធិបតី​បារាំង លោក អេម៉ានុយអែល ម៉ាក្រុង (Emmanuel Macron) កាលពី​ពេល​ថ្មីៗ​នេះ​ថា នាយករដ្ឋមន្ត្រី​ថ្មី​របស់​កម្ពុជា លោក ហ៊ុន ម៉ាណែត មិនមែន​ជា​នាយករដ្ឋមន្ត្រី​ដែល​ពលរដ្ឋ​ខ្មែរ​ជ្រើសរើស​នោះ​ទេ ប៉ុន្តែ​ជា​នាយករដ្ឋមន្ត្រី​ស្នង​អំណាច​ពី​ឪពុក​ដូច​លោក គីម ជុងអ៊ុន ដែល​ស្នង​អំណាច​ពី​លោក គីម ជុងអ៊ីល ដែល​ជា​មេដឹកនាំ​កុម្មុយនីស្ត​ផ្ដាច់ការ​ដូច្នោះ​ដែរ ព្រោះ​ថា​ការ​បន្ត​អំណាច​ពី​ឪពុក​ទៅ​កូន​ទាំង​ពីរ​នាក់​សព្វថ្ងៃ​នេះ កំពុងតែ​គាប​សង្កត់​អ្នក​ប្រជាធិបតេយ្យ និង​ធ្វើបាប​ប្រជារាស្ត្រ​ខ្មែរ​យ៉ាង​ធ្ងន់ធ្ងរ​ដែល​មាន​ទម្រង់​ដូច​គ្នា​ទៅ​នឹង​ការ​គ្រប់គ្រង​របស់​ប្រទេស​កូរ៉េខាងជើង ដែរ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស