ក្នុងស្ថានភាពដែលកងទ័ពអ៊ីស្រាអែល វាយយកបានសឹងទាំងអស់នៃដែនដីហ្កាហ្សា ក្រុមហាម៉ាស ដែលគេថាជាអ្នករុញឱ្យអ៊ីស្រាអែល បើកការវាយលុកចូលដែនដីហ្កាហ្សា ក្រោមហេតុផលសងសឹកក្រុមនេះ បានទម្លាក់ចោលសឹងតែទាំងស្រុងនូវភាពមានះនៃការប្រយុទ្ធរបស់ខ្លួន។
បើតាមទីភ្នាក់ងារសារព័ត៌មាន Reuters បានឲ្យដឹងថា ក្រុមហាម៉ាស បានស្នើឡើងនូវផែនការបទឈប់បាញ់មួយ ដែលនឹងផ្អាកការប្រយុទ្ធគ្នានៅក្នុងតំបន់ហ្កាហ្សា រយៈពេល ៤ខែកន្លះ។
សំណើរបស់ក្រុមហាម៉ាស ក៏បានបង្ហាញពីជំហរឈានទៅរកការបិទបញ្ចប់សង្គ្រាមជាមួយអ៊ីស្រាអែល ទៀតផង។ សំណើរបស់ក្រុមហាម៉ាស គឺជាការឆ្លើយតបចំពោះសំណើរបស់ប្រទេសកាតារ និងអេហ្ស៊ីប ដែលមានការគាំទ្រពីសហរដ្ឋអាមេរិក។ យោងតាមសេចក្តីព្រាងសំណើ គេឃើញសំណើបទឈប់បាញ់របស់ក្រុមហាម៉ាស គឺមាន ៣ដំណាក់កាល ហើយមួយដំណាក់កាលៗមានរយៈពេល ៤៥ថ្ងៃ។
តាមរយៈផែនការនោះ ក្រុមសកម្មប្រយុទ្ធប៉ាឡេស្ទីន នឹងដោះដូរចំណាប់ខ្មាំងអ៊ីស្រាអែលនៅសល់ទាំងប៉ុន្មានដែលពួកគេបានចាប់យកទៅកាន់ហ្កាហ្សា អំឡុងការវាយប្រហារថ្ងៃទី៧ ខែតុលា ឆ្នាំ២០២៣។
ទន្ទឹមនឹងគ្នានេះ កិច្ចប្រឹងប្រែងស្ថាបនាតំបន់ Gaza ឡើងវិញ អាចនឹងចាប់ផ្តើមនៅពេលកងទ័ពអ៊ីស្រាអែល ដកចេញទាំងស្រុង ប៉ុន្តែសំណើរបស់ក្រុមហាម៉ាស ដែលថាចង់បញ្ចប់សង្គ្រាមទាំងស្រុង បើទោះជាមានការគាំទ្រពីប្រទេសជាច្រើននៅមជ្ឈិមបូព៌ា រួមទាំងសហរដ្ឋអាមេរិកក្ដី ក៏អ៊ីស្រាអែល មិនទាន់យល់ព្រមនៅឡើយនោះទេ។
យោងតាមផែនការរបស់ក្រុមហាម៉ាស ចំណាប់ខ្មាំងអ៊ីស្រាអែល ជាមនុស្សស្រី និងប្រុសអាយុក្រោម ១៩ឆ្នាំ ព្រមទាំងអ្នកមានវ័យចំណាស់ និងអ្នកឈឺថ្កាត់ នឹងត្រូវដោះលែងអំឡុងដំណាក់កាលរយៈពេល ៤៥ថ្ងៃដំបូង ជាថ្នូរនឹងការដោះលែងស្ត្រី និងអនីតិជនប៉ាឡេស្ទីន ចេញពីពន្ធនាគារអ៊ីស្រាអែល ប្រមាណជា ២០០នាក់។
ចំណែកចំណាប់ខ្មាំងប្រុសៗដែលនៅសល់ទាំងប៉ុន្មាន នឹងត្រូវដោះលែងនៅដំណាក់កាលទី២ ខណៈសាកសពនឹងត្រូវដោះដូរគ្នានៅក្នុងដំណាក់កាលទី៣។ ចំណែកដំណាក់កាលទី៣ ក្រុមហាម៉ាស រំពឹងថា ភាគីអ៊ីស្រាអែល នឹងអាចឈានដល់កិច្ចព្រមព្រៀងស្ដីពីការបិទបញ្ចប់សង្គ្រាមនៅហ្កាហ្សា។ បទឈប់បាញ់រយៈពេលវែងនេះ ក៏នឹងជួយបង្កើនលំហូរជំនួយអន្តរជាតិទៅកាន់ប្រជាជនប៉ាឡេស្ទីន ដែលកំពុងត្រូវការពួកវាយ៉ាងចាំបាច់បំផុត។
នៅថ្ងៃពុធ ទី៧ កុម្ភៈ នេះ រដ្ឋមន្ត្រីការបរទេសអាមេរិក លោក Antony Blinken កំពុងស្ថិតនៅលើទឹកដីអ៊ីស្រាអែល ជាថ្មីម្តងទៀត ក្រោយការបើកកិច្ចពិភាក្សានៅប្រទេសកាតារ និងអេហ្ស៊ីប ក្នុងកិច្ចប្រឹងប្រែងការទូតដែលមានគោលដៅចម្បងស្វែងរកបទឈប់បាញ់រយៈពេលវែង ដើម្បីបិទបញ្ចប់សង្គ្រាម។
បើតាមដំណឹងមកថា លោក Antony Blinken ត្រូវជួបមេដឹកនាំអ៊ីស្រាអែល មានទាំងនាយករដ្ឋមន្ត្រី មានរដ្ឋមន្ត្រីការពារជាតិ និងអគ្គមេបញ្ជាការកងទ័ពអ៊ីស្រាអែល។
លោក Blinken ត្រូវលើកឡើងអំពីសំណើរបស់ក្រុមហាម៉ាស និងការឈានដល់ការបញ្ចប់សង្គ្រាម រួមទាំងការបង្កើតយន្តការគ្រប់គ្រងសភាពការណ៍នៅហ្កាហ្សា ថាតើគួរមានកងរក្សាសន្តិភាពពហុសាសន៍ឬទេ។
សំណើឱ្យមានកម្លាំងសន្តិសុខពហុសាសន៍នៅហ្កាហ្សា ក្រោយពីអ៊ីស្រាអែល ដកទ័ព ក៏ជាការជំរុញផងដែរដោយប្រទេសអេហ្ស៊ីប ប្រទេសកាតារ និងអគ្គលេខាធិការអង្គការសហប្រជាជាតិ លោក អង់តូនីញូ ហ្គូតារ៉េ។ តែបែបនេះក្ដី អ៊ីស្រាអែល បានប្រកាសឱ្យដឹងថា ការដកកងទ័ពរបស់អ៊ីស្រាអែល ចេញពីហ្កាហ្សា លុះត្រាតែអស់រចនាសម្ព័ន្ធនៃកម្លាំងរបស់ពួកហាម៉ាស។
អ៊ីស្រាអែល បានចាប់ផ្តើមធ្វើសង្គ្រាមសងសឹកនៅដែនដីប៉ាឡេស្ទីន ហ្កាហ្សា ដែលគ្រប់គ្រងដោយក្រុមហាម៉ាស បន្ទាប់ពីពួកហាម៉ាស បានធ្វើសកម្មភាពឆ្មក់វាយប្រហារទ្រង់ទ្រាយធំយ៉ាងភ្ញាក់ផ្អើលកាលពីថ្ងៃទី៧ ខែតុលា ឆ្នាំមុន។
ក្នុងការលួចវាយរបស់ពួកហាម៉ាស កាលពីថ្ងៃទី៧ ខែតុលា ឆ្នាំ២០២៣ ដោយក្រុមហាម៉ាស បាញ់រ៉ុក្កែតយ៉ាងតិច ៥០០០គ្រាប់ចូលដែនដីអ៊ីស្រាអែល ដោយបានផ្តាច់ជីវិតមនុស្សប្រមាណជាង ១២០០នាក់ និងចាប់ចំណាប់ខ្មាំងជាង ២៥០នាក់នៅភាគខាងត្បូងអ៊ីស្រាអែល ទៅកាន់ហ្កាហ្សា។
ភ្លាមៗ អ៊ីស្រាអែល ប្រកាសដាក់ប្រទេសក្នុងគ្រាសង្គ្រាម ហើយក៏ចាប់ផ្ដើមវាយសងសឹកលើពួកហាម៉ាស។ រហូតមកដល់ពេលនេះ សង្គ្រាមរបស់អ៊ីស្រាអែល វាយសងសឹក បានឈានដល់ចូលដល់ខែទី៤ ហើយ។
យោងតាមក្រសួងសុខាភិបាលតំបន់ហ្កាហ្សា ជនជាតិប៉ាឡេស្ទីន កើនដល់យ៉ាងហោចជិត ៣ម៉ឺននាក់ (២៧៥៨៥នាក់) ហើយបានបាត់បង់ជីវិត របួសប្រមាណជាជិត ៥ម៉ឺននាក់ និងរត់ភៀសខ្លួនជិត ២លាននាក់៕