ភាគ២៖ ម្ចាស់ភាគហ៊ុនរងគ្រោះក្នុងក្រុមហ៊ុន CIC Partner ទាមទារស៊ើបអង្កេតករណីបាត់លុយរាប់សិបលានដុល្លារ

អត្ថបទដោយ៖ តាំង សារ៉ាដា

ក្នុងសេចក្តីរាយការណ៍ភាគ១ សារព័ត៌មាន The Cambodia Daily បានបង្ហាញរបាយការណ៍ស៊ើបអង្កេតរបស់សមាជិករងគ្រោះពីការផ្តល់ប្រាក់កម្ចីដើម្បីទទួលបានការប្រាក់ខ្ពស់ ដែលបានទាមទារឱ្យអ្នកគ្រប់គ្រងជាន់ខ្ពស់ក្នុងក្រុមហ៊ុន ខេមបូឌាន អ៊ិនវេសស្ទ័រ ឃែភីថល ផាតនើរ (Cambodian Investor Capital Partner) ចំនួន ១៣នាក់ ដូចជា លោក គុយ វ៉ាត, លោក សោម សម្បត្តិ និងលោក ឃីម សុខហេង ជាដើម សងលុយពួកគេវិញ បន្ទាប់ពីក្រុមហ៊ុននេះផ្អាកបង់ការប្រាក់ឱ្យម្ចាស់ភាគហ៊ុនរងគ្រោះទាំងនោះអស់រយៈពេលជិត ១ឆ្នាំកន្លងមក។

បន្ទាប់ពីផ្ទុះព័ត៌មានជាបន្តបន្ទាប់ ប្រធានក្រុមប្រឹក្សា និងជាអគ្គនាយកប្រតិបត្តិនៃក្រុមហ៊ុន ម៉េងលី ជេគួច អ្នកឧកញ៉ា គួច ម៉េងលី ជាម្ចាស់ភាគហ៊ុនម្នាក់ក្នុងចំណោមម្ចាស់ភាគហ៊ុនជាង ៦០០នាក់ ដែលបានចំណាយទុនជិត ៣០ម៉ឺនដុល្លារវិនិយោគក្នុងក្រុមហ៊ុននេះ បានចេញមុខទាមទារឲ្យមានការស៊ើបអង្កេតលើក្រុមហ៊ុននេះ ដែលរងការចោទប្រកាន់ថា ក្លែងបន្លំប្រាក់វិនិយោគរួមគ្នារាប់សិបលានដុល្លារនៅពេលកន្លងមកនេះ។

ក្រោយពីមានការផ្ទុះព័ត៌មានយ៉ាងល្បីខ្ទរខ្ទារជាបន្តបន្ទាប់ ប្រធានក្រុមប្រឹក្សា និងជាអគ្គនាយកប្រតិបត្តិនៃក្រុមហ៊ុន ម៉េងលី ជេគួច អ្នកឧកញ៉ា គួច ម៉េងលី ជាម្ចាស់ភាគហ៊ុនម្នាក់ក្នុងចំណោមម្ចាស់ភាគហ៊ុនជាង ៦០០នាក់ផ្សេងទៀតដែលបានចំណាយទុនវិនិយោគជិត ៣០ម៉ឺនដុល្លារក្នុងក្រុមហ៊ុន ខេមបូឌាន អ៊ិនវេសស្ទ័រ ឃែភីថល ផាតនើរ ម.ក (Cambodian Investors Capital Partners Plc.) ដែលហៅកាត់ថា CIC Partner។

លោក គឺជាជនរងគ្រោះម្នាក់ដែលហ៊ានចេញមុខទាមទារឲ្យមានការស៊ើបអង្កេតលើក្រុមហ៊ុននេះ ពាក់ព័ន្ធនឹងការក្លែងបន្លំប្រាក់វិនិយោគរួមគ្នាក្នុងចំនួនរាប់សិបលានដុល្លារអាមេរិកនៅពេលកន្លងមក។

ឧកញ៉ា គួច ម៉េងលី ប្រធានក្រុមហ៊ុន Mengly J Quach Group

នៅក្នុងសំណេរទាំងភាសាខ្មែរ និងភាសាអង់គ្លេសនៅលើហ្វេសប៊ុក នៅថ្ងៃទី២៣ ខែមីនា ឆ្នាំ២០២៤ អ្នកឧកញ៉ា គួច ម៉េងលី បានបញ្ជាក់ថា សំណុំរឿងព្រហ្មទណ្ឌគួរតែត្រូវចាប់ផ្ដើមស៊ើបអង្កេត និងដោយបើកចំហ ហើយជនល្មើសត្រូវតែទទួលខុសត្រូវដោយកាត់ទោសតាមផ្លូវច្បាប់។

លោកវេជ្ជបណ្ឌិត គួច ម៉េងលី អះអាងថា ប្រជាជនស្លូតត្រង់ជាច្រើនកំពុងរងទុក្ខវេទនា ខូចចិត្ត និងទទួលរងនូវផលអវិជ្ជមានដោយសារពួកគេកំពុងរងគ្រោះពីការបោកប្រាស់ដែលកំពុងកើតមានឡើងនៅគ្រប់ទីកន្លែងក្នុងប្រទេសកម្ពុជា ខណៈឧក្រិដ្ឋជននៅតែមានសេរីភាព និងកំពុងរស់នៅក្នុងជីវិតដ៏ឡូយឆាយក្រៅសំណាញ់ច្បាប់។

លោក គួច ម៉េងលី អះអាងថា ប្រសិនបើរឿងនេះនៅតែបន្តកើតមាន ហើយឧក្រិដ្ឋជនមិនត្រូវបាននាំមកកាត់ទោសតាមផ្លូវច្បាប់ទេ នោះវានឹងបង្កឱ្យកាន់តែមានភាពច្របូកច្របល់នៅក្នុងសង្គម ហើយអាចនាំទៅរកការបំផ្លិចបំផ្លាញនូវសក្ដានុពលផ្នែកមីក្រូ និងប្រព័ន្ធម៉ាក្រូសេដ្ឋកិច្ចរបស់កម្ពុជា។ លោកបន្តថា ការវិនិយោគផ្ទាល់ពីបរទេសក៏រងផលប៉ះពាល់កាន់តែខ្លាំងដែរ។

ក្រុមហ៊ុន ខេមបូឌាន អ៊ិនវេសស្ទ័រ ឃែភីថល ផាតនើរ ម.ក (Cambodian Investors Capital Partners Plc.) ដែលហៅកាត់ថា CIC Partner គឺជាក្រុមហ៊ុនបុត្រសម្ព័ន្ធមួយរបស់ក្រុមហ៊ុន ខេមបូឌាន អ៊ិនវេសស្ទ័រ ខបភើរេសិន ភីអិលស៊ី (Cambodian Investors Corporation Plc.) ដែលត្រូវបានបង្កើតឡើងក្នុងចំណោមក្រុមហ៊ុនជាច្រើនផ្សេងទៀត ស្ថិតក្រោមឈ្មោះបុគ្គលតែម្នាក់ គឺលោក គុយ វ៉ាត និងមានការចូលរួមសហការផ្ដួចផ្ដើមពីសហស្ថាបនិកចំនួន ៣៣នាក់ផ្សេងទៀតកាលពីដើមខែមេសា ឆ្នាំ២០១៣ ដោយកំណត់ផែនការវិនិយោគរយៈពេល ៩៩ឆ្នាំ។

ក្រុមហ៊ុន CIC Partner ត្រូវបានបង្កើតឡើងតាមកម្មវត្ថុអាជីវកម្មនៅកម្ពុជា និងនៅប្រទេសដទៃទៀត ដោយប្រតិបត្តិការលើ៖

ការផ្តល់សេវាពិគ្រោះយោបល់ផ្នែកហិរញ្ញវត្ថុពាណិជ្ជកម្ម
សេវាកម្មអចលនវត្ថុ
ទិញ លក់ ផ្លាស់ប្ដូរ នីហរ័ណ អាហរ័ណ ផលិតផល ដំណាំកសិកម្ម កសិ-ឧស្សាហកម្ម និងគ្រឿងបរិក្ខារគ្រប់ប្រភេទ
ការជួលឃ្លាំងផលិតផលទំនិញគ្រប់ប្រភេទ
ការទិញលក់ ជួល បញ្ចាំមូលនិធិ ពាណិជ្ជកម្ម
និងទិញលក់ ជួល ដីធ្លី ផ្ទះសម្បែង
រួមទាំងការវិនិយោគជាច្រើនបែបច្រើនប្រភេទផ្សេងទៀតផងដែរ។

របាយការណ៍អ្នកវិនិយោគនៃក្រុមហ៊ុន CIC នៅត្រីមាសទី១ ឆ្នាំ២០២៣

ក្រុមហ៊ុន ខេមបូឌាន អ៊ិនវេសស្ទ័រ ឃែភីថល ផាតនើរ (Cambodian Investors Corporation Plc.) បានចែងក្នុងលក្ខន្តិកៈរបស់ខ្លួនថា ក្រុមហ៊ុនមានគោលការណ៍ទទួលយកការបណ្ដាក់ទុនតាមគ្រប់មធ្យោបាយជាមួយក្រុមហ៊ុន ឬសហគ្រាសដទៃទៀត ដូចជា ការបង្កើតក្រុមហ៊ុនថ្មីដើម្បីបញ្ចូលភាគទុនជាមួយគ្នា ការចុះឈ្មោះ ឬទិញសិទ្ធិជាសមាជិក ការរំលាយបញ្ចូលគ្នា ការបង្កើតសម្ព័ន្ធភាព ឬការចូលរួមសហប្រតិបត្តិការនានាជាច្រើនផ្សេងទៀតផងដែរ។

ក្រោយបង្កើតចេញជារូបរាង និងដើម្បីអនុវត្តដំណើរការអាជីវកម្មរបស់ខ្លួន ក្រុមហ៊ុន CIC Partner បានសម្រេចជ្រើសរើសស្ថាបនិកចំនួន ១៣នាក់ជាអ្នកគ្រប់គ្រងកំពូលរបស់ក្រុមហ៊ុន ឬ Board of Director ក្នុងនោះរួមមាន៖

លោក គុយ វ៉ាត ដែលមានតួនាទីជានាយកប្រតិបត្តិក្នុងក្រុមហ៊ុន Z1 Group
លោក ហ៊ុន មុន្នីវណ្ណ មានតួនាទីជាក្រុមប្រឹក្សាភិបាលឯករាជ្យ និងជាប្រធានគណៈកម្មាធិការសវនកម្មនៃធនាគារស្ថាបនា
លោក ម៉ៅ សាវិន ជាប្រធានទីប្រឹក្សាវិនិយោគកម្ពុជា
លោក សេង ឡូន មានតួនាទីជានាយកគ្រប់គ្រងក្នុងក្រុមហ៊ុន Phnom Penh Technology
លោក ឃីម សុខហេង ជាស្ថាបនិកវិទ្យាស្ថាន LSI Business School
លោក លី លាង ប្រធានក្រុមហ៊ុន Zillion Trust Plc
លោក ជិន ភារុំ ជាទីប្រឹក្សានៃក្រុមប្រឹក្សាភិបាលជាន់ខ្ពស់របស់ក្រុមហ៊ុន CIC នេះតែម្តង
លោក ជា សារិន ជាសហស្ថាបនិក និងជាប្រធានក្រុមហ៊ុន Champei Wellness
អ្នកស្រី អ៊ុំ រចនី ឬ Grace Rachny ជានាយកប្រតិបត្តិក្នុងក្រុមហ៊ុន Century 21 Cambodia
លោក សោម សម្បត្តិ ជាសហស្ថាបនិក និងជានាយកប្រតិបត្តិនៃក្រុមហ៊ុនថ្នាំលាប Cam-Paint
ឧកញ៉ា សុង សារ៉ន ជានាយកក្នុងក្រុមហ៊ុន Amru Rice Cambodia
លោក ហុង លាងអ៊ី ជានាយកគ្រប់គ្រងក្នុងក្រុមហ៊ុន Lotus Green Team ផងដែរ។

ក្នុងចំណោមអ្នកគ្រប់គ្រងកំពូលរបស់ក្រុមហ៊ុនទាំង ១៣នាក់ខាងលើនេះ លោក គុយ វ៉ាត មានតួនាទីជាប្រធានក្រុមប្រឹក្សាភិបាល ចំណែកសហស្ថាបនិក ១២នាក់ផ្សេងទៀត គឺមានតួនាទីជាអភិបាលដូចគ្នាទាំងអស់។

ក្រៅពីជ្រើសរើសអ្នកគ្រប់គ្រងជាន់ខ្ពស់ ក្រុមហ៊ុន CIC Partner ក៏បានជ្រើសរើសទីប្រឹក្សារបស់ក្រុមហ៊ុនចំនួន ២១នាក់ថែមទៀត ដែលពួកគេសុទ្ធសឹងតែជាស្ថាបនិករបស់ក្រុមហ៊ុននេះ រួមមាន៖

លោក យក់ ចំរើនរិទ្ធ ជានាយកក្រុមហ៊ុនធានារ៉ាប់រងជីវិត Forte Life
លោក ឌិន សុមេធារិទ្ធ ជាសហស្ថាបនិក និងជានាយកប្រតិបត្តិរបស់ក្រុមហ៊ុន Frangipani Villa Hotel Group
លោក ប៉ុលហំម នីកូឡា ជាដៃគូសហការគ្រប់គ្រងរបស់ក្រុមហ៊ុន EMC
ចំណែកឧកញ៉ា សុខ ពិសិដ្ឋ ជានាយកគ្រប់គ្រងក្នុងក្រុមហ៊ុន G Gear (ក្រុមហ៊ុន G Gear គឺជាក្រុមហ៊ុនរបស់អ្នកស្រី ពេជ ចន្ទមុន្នី ភរិយារបស់លោក ហ៊ុន ម៉ាណែត)
លោក ថៃ សារ៉ាយ នាយកក្រុមហ៊ុន H Silver Office Space
លោក វង្ស សុខា ប្រធានក្រុមហ៊ុន V Trust Appraisal
លោក សុខ សុផាន់ណា ជាស្ថាបនិកក្រុមហ៊ុន SokSiphana & Assosiate
លោក ខូយ គឹមឡេង ជានាយកសវនកម្ម និងជាប្រធានក្រុមហ៊ុន Deloitte
អ្នកស្រី ជាស៊ុន ដាណែត នាយិកាគ្រប់គ្រងស្ថានីយវិទ្យុ FM ១០២ មេការហឺត
លោក លឹម សុជាតិ នាយកប្រតិបត្តិក្រុមហ៊ុន Laksmi Prime Investments
ឧកញ៉ា ហ៊ុន ឡាក់ ជានាយកគ្រប់គ្រងក្រុមហ៊ុន Mekong Oryza
លោក ហេង សុខគង់ ជារដ្ឋលេខាធិការក្រសួងរ៉ែ និងថាមពល
ឧកញ៉ា គួច ម៉េងលី ជាស្ថាបនិក និងជាប្រធានក្រុមហ៊ុន Mengly J Quach Group
លោកគ្រូជោគជ័យ អោម សេង បូរ៉ា នាយកប្រតិបត្តិ CEO Master Club
ឧកញ៉ា ប៉ិច បូឡែន អគ្គនាយកបណ្ដាញគ្រឹះស្ថានអប់រំ វេសឡាញ អេឌ្យូខេសិន គ្រុប និងជាប្រធានសមាគមសហគ្រិនវ័យក្មេងកម្ពុជា
លោក លឹម ខេវិន ជាប្រធានក្រុមហ៊ុន Key Real Estate
លោក អិន មាត្រា ប្រធាននាយកដ្ឋានធានារ៉ាប់រង និងសោធននិវត្តន៍
លោក កាយ ឡូត ជានាយកធនាគារ អេស៊ីលីដា
លោក ហ៊ីម សាម៉េត ស្ព្រោង អនុប្រធានសាលាអន្តរជាតិ CIA First International School
លោក តាន់ មុន្នីវណ្ណ អនុប្រធានក្រុមហ៊ុន ម៉ុង ឫទ្ធី គ្រុប
និងឧកញ៉ា ត្រាំង លី ប្រធានសាលាអន្តរជាតិ CIA First International School ផងដែរ។

ក្រោយរៀបចំរចនាសម្ព័ន្ធបានរឹងមាំ ក្រុមហ៊ុន CIC Partner ចាប់ផ្តើមធ្វើប្រតិបត្តិការប្រមូលទុនវិនិយោគដោយការកៀរគរលុយពីវិនិយោគិនទាំងលក្ខណៈជាបុគ្គល និងស្ថាប័ន ទាំងក្នុងស្រុក និងក្រៅស្រុក សម្រាប់អ្នកដែលមានបំណងបណ្ដាក់ទុនក្នុងទម្រង់ជាការទិញឯកតាមូលនិធិ ដោយក្រុមហ៊ុនចុះកិច្ចព្រមព្រៀងសន្យាផ្ដល់ប្រាក់ចំណេញតាមរយៈនៃការបង់ការប្រាក់ដល់អ្នកដែលចូលរួមវិនិយោគទាំងនោះត្រឡប់ទៅវិញ។

ក្រុមហ៊ុន CIC Partner បានចែងអំពីលក្ខខណ្ឌត្រង់ប្រការ១២ ក្នុងលក្ខន្តិកៈរបស់ក្រុមហ៊ុនជុំវិញការប្រមូលទុននេះថា ភាគហ៊ុនទាំងអស់របស់ក្រុមហ៊ុន មិនអាចបែងចែកជាចំណែកតូចៗបានឡើយ ដូច្នេះម្ចាស់ភាគហ៊ុនតូចៗត្រូវតែងតាំងអាណត្តិអ្នកតំណាង ឬគាហករ មួយរូបក្នុងចំណោមម្ចាស់ភាគហ៊ុនទាំងអស់ជាតំណាងឱ្យធ្វើជាម្ចាស់ភាគហ៊ុនទាំងនោះ ហើយក្រុមហ៊ុនក៏បានបញ្ជាក់ក្នុងជំពូក២ ស្ដីពី ដើមទុន ភាគហ៊ុន និងម្ចាស់ភាគហ៊ុន ក្នុងប្រកា២.២ ដែរថា ១ភាគហ៊ុន គឺស្មើនឹង ១ដុល្លារសហរដ្ឋអាមេរិក។

យោងតាមលក្ខន្តិកៈខាងលើ ឧកញ៉ា សុង សារ៉ន ដែលមានតួនាទីជាអភិបាលរបស់ក្រុមហ៊ុន CIC Partner ត្រូវបានតែងតាំងជាអ្នកតំណាងឱ្យម្ចាស់ភាគហ៊ុនតូចៗរាប់រយនាក់ដែលមិនបានចុះឈ្មោះនៅក្នុងលក្ខន្តិកៈដែលក្រុមហ៊ុនបានចុះបញ្ជីនៅក្រសួងពាណិជ្ជកម្ម ដើម្បីទុកជាឯកសារយោងសម្រាប់ដាក់ជូននិយ័តករមូលបត្រកម្ពុជាក្នុងការទទួលផលប្រយោជន៍ពីក្រុមហ៊ុននេះ។

ក្រៅពីឧកញ៉ា សុង សារ៉ន ក៏មានស្ថាបនិកដទៃទៀតដែរដែលឈរឈ្មោះជាអ្នកតំណាង ឬគាហករ ឱ្យម្ចាស់ភាគហ៊ុនតូចៗដែលជាបណ្ដាញរបស់ខ្លួន ដូចជា លោក ឃីម សុខហេង ជាដើម ដែលគេទម្លាយថាគ្រូជោគជ័យរូបនេះបានប្រមូលលុយពីម្ចាស់ភាគហ៊ុនតូចៗរាប់រយនាក់ ដែលមានចំនួនទឹកប្រាក់រហូតដល់ទៅជាង ៧លានដុល្លារអាមេរិកឯណោះ។

ក្រោយប្រមូលទុនវិនិយោគពីម្ចាស់ភាគហ៊ុនដែលជាសមាជិករបស់ខ្លួន ស្ថាបនិកទាំង ១៣នាក់បានរៀបចំឯកសារចុះឈ្មោះក្រុមហ៊ុន CIC Partner ក្នុងបញ្ជីក្រសួងពាណិជ្ជកម្មជាផ្លូវការនៅថ្ងៃទី២ ខែមីនា ឆ្នាំ២០១៥ ក្នុងនាមជាអ្នកតំណាងឱ្យម្ចាស់ភាគហ៊ុនរាប់រយនាក់ដែលបានបណ្ដាក់ទុនក្នុងក្រុមហ៊ុននេះ។

ការចុះបញ្ជីនៅក្រសួងពាណិជ្ជកម្មនេះ ក្រុមហ៊ុន CIC Partner បានចុះបញ្ជីនូវចំនួនទឹកប្រាក់របស់ខ្លួនផងដែរ ដែលមានចំនួនទឹកប្រាក់សរុបចំនួន ១លានដុល្លារសហរដ្ឋអាមេរិក (១ ០០០ ០០០ដុល្លារអាមេរិក) ដែលស្មើនឹង ១លានភាគហ៊ុនដែរ ក្នុងនោះ លោក ហ៊ុន មុន្នីវណ្ណ, លោក ម៉ៅ សាវិន, លោក ប៉ុលហំម នីកូឡា, លោក សេង ឡូន, លោក លឹម សុជាតិ, លោក លី លាង, ឧកញ៉ា សុខ ពិសិដ្ឋ, លោក ឃីម សុខហេង, លោក អោម សេង បូរ៉ា, ឧកញ៉ា ប៉ិច បូឡែន និងឧកញ៉ា គួច ម៉េងលី បានចុះបញ្ជីភាគហ៊ុនចំនួន ៧៦ ៩២៣ភាគហ៊ុនដូចគ្នាទាំងអស់ ដោយឡែកមានតែលោក គុយ វ៉ាត ម្នាក់ប៉ុណ្ណោះដែលចុះបញ្ជីភាគហ៊ុនលើសអ្នកទាំង ១២នាក់នោះចំនួន ១ភាគហ៊ុន គឺចំនួន ៧៦ ៩២៤ភាគហ៊ុន ដែលគិតជាសរុបគឺមានចំនួន ១លានភាគហ៊ុន ឬស្មើនឹង ១លានដុល្លារសហរដ្ឋអាមេរិកដែរ។

ជាងនេះទៀត នៅថ្ងៃទី១៣ ខែមីនា ឆ្នាំ២០១៩ លោក គុយ វ៉ាត បានចុះភាគហ៊ុនចំនួន ៤លានភាគហ៊ុនជាលើកទី២ នៅក្រសួងពាណិជ្ជកម្ម បន្ថែមទៀត ដែលស្មើនឹងទឹកប្រាក់ចំនួន ៤លានដុល្លារអាមេរិក (៤ ០០០ ០០០ដុល្លារ) ចំណែកលោក លី លាង និងលោក ហុង លាងអ៊ី ក៏បានបន្ថែមភាគហ៊ុនក្នុងម្នាក់ៗ ៣លានភាគហ៊ុនទៀតដែរ ដែលស្មើនឹង ៦លានដុល្លារអាមេរិក និងសរុបជាទឹកប្រាក់របស់អ្នកទាំង៣ គឺមានចំនួន ១០លានដុល្លារអាមេរិកថែមទៀត ដោយឡែកតំណាងម្ចាស់ភាគហ៊ុន ១០នាក់ផ្សេងទៀតមិនបានចុះបញ្ជីថែមភាគហ៊ុនជាលើកទី២ នេះទេ។

នៅថ្ងៃទី១៣ ខែកញ្ញា ឆ្នាំ២០២១ លោក គុយ វ៉ាត បានចុះបញ្ជីភាគហ៊ុនជាលើកទី៣ គឺចំនួន ៩សែន ៦ម៉ឺនភាគហ៊ុនបន្តទៀត ចំណែកលោក លី លាង និងលោក ហុង លាងអ៊ី ក៏បានបន្ថែមភាគហ៊ុនក្នុងម្នាក់ៗ ៧សែន ២ម៉ឺនភាគហ៊ុនទៀតដែរ ដែលគិតជាទឹកប្រាក់សរុបរបស់ម្ចាស់ភាគហ៊ុនទាំង ៣នាក់នេះ គឺស្មើនឹង ២លាន ៤សែនដុល្លារអាមេរិក ហើយក៏ស្មើនឹង ២លាន ៤សែនភាគហ៊ុនដែរ។

លើកទី៤ គឺនៅថ្ងៃទី២ ខែមិថុនា ឆ្នាំ២០២៣ អ្នកគ្រប់គ្រងជាន់ខ្ពស់របស់ក្រុមហ៊ុន CIC Partner ចំនួន១០នាក់ បានចុះបញ្ជីភាគហ៊ុនបន្តទៀត ដែលគិតជាទឹកប្រាក់សរុបគឺមានចំនួន ៤៥លានដុល្លារអាមេរិកក្នុងនោះរួមមាន៖

លោក គុយ វ៉ាត ចុះបញ្ជីភាគហ៊ុនបន្ថែម ២លាន ១សែន ៨ម៉ឺន ២ពាន់ ៥០០ដុល្លារអាមេរិក (២ ១៨២ ៥០០ដុល្លារ) ស្មើនឹង ២លាន ១សែន ៨ម៉ឺន ២ពាន់ ៥០០ភាគហ៊ុន។
លោក ហ៊ុន ម៊ុន្នីវណ្ណ ចុះបញ្ជីភាគហ៊ុនបន្ថែម ១លាន ៤សែន ១ម៉ឺន ៧ពាន់ ៥០០ដុល្លារអាមេរិក (១ ៤១៧ ៥០០ដុល្លារ) ស្មើនឹង ១លាន ៤សែន ១ម៉ឺន ៧ពាន់ ៥០០ភាគហ៊ុន។
លោក ម៉ៅ សាវិន ចុះបញ្ជីភាគហ៊ុនបន្ថែម ១លាន ៤សែន ៨ពាន់ដុល្លារអាមេរិក (១ ៤០៨ ០០០ដុល្លារ) ស្មើនឹង ១លាន ៤សែន ៨ពាន់ ភាគហ៊ុន។
លោក សេង ឡូន ចុះបញ្ជីភាគហ៊ុនបន្ថែម ១សែន ៨ម៉ឺន ដុល្លារអាមេរិក (១ ៨០០ ០០០ដុល្លារ) ស្មើនឹង ១សែន ៨ម៉ឺនភាគហ៊ុន។
លោក ហុង លាងអ៊ី ចុះបញ្ជីភាគហ៊ុនបន្ថែម ១លាន ៦ម៉ឺន ៦ពាន់ ៥០០ដុល្លារអាមេរិក (១ ០៦៦ ៥០០ដុល្លារ) ស្មើនឹង ១លាន ៦ម៉ឺន ៦ពាន់ ៥០០ភាគហ៊ុន។
លោក ឃីម សុខហេង ចុះបញ្ជីភាគហ៊ុនបន្ថែម ១លាន ៩សែន ៥ម៉ឺន ៣០០០ដុល្លារអាមេរិក (១ ៩៥៣ ០០០ដុល្លារ) ស្មើនឹង ១លាន ៩សែន ៥ម៉ឺន ៣០០០ភាគហ៊ុន។
សេង បូរ៉ាលោក សោម សម្បត្តិ ចុះបញ្ជីភាគហ៊ុនបន្ថែម ៦សែន ៧ពាន់ ៥០០ដុល្លារអាមេរិក (៦០៧ ៥០០ដុល្លារ) ស្មើនឹង ៦សែន ៧ពាន់ ៥០០ភាគហ៊ុន។
លោក សុង សារ៉ន ចុះបញ្ជីភាគហ៊ុនបន្ថែម ៣៣លាន ៧សែន ៩ម៉ឺន ៩ពាន់ ៥០០ដុល្លារអាមេរិក (៣៣ ៧៩៩ ៥០០ដុល្លារ) ស្មើនឹង ៣៣លាន ៧សែន ៩ម៉ឺន ៩ពាន់ ៥០០ភាគហ៊ុន។
លោក ជិន ភារុំ ចុះបញ្ជីភាគហ៊ុនបន្ថែម ១លាន ២សែន ៣ម៉ឺន ៧ពាន់ ៥០០ដុល្លារអាមេរិក (១ ២៣៧ ៥០០ដុល្លារ) ស្មើនឹង ១លាន ២សែន ៣ម៉ឺន ៧ពាន់ ៥០០ភាគហ៊ុន។
អ្នកស្រី អ៊ុំ រចនី ក៏បានចុះបញ្ជីភាគហ៊ុនបន្ថែម ១សែន ៣ម៉ឺន ៩ពាន់ ៥០០ដុល្លារអាមេរិក (១៣៩ ៥០០ដុល្លារ) ដែលស្មើនឹង ១សែន ៣ម៉ឺន ៩ពាន់ ៥០០ភាគហ៊ុនដែរ។

ចំណែកលោក ប៉ុលហំម នីកូឡា, លោក លឹម សុជាតិ, ឧកញ៉ា សុខ ពិសិដ្ឋ, លោក អោម សេង បូរ៉ា, ឧកញ៉ា ប៉ិច បូឡែន, ឧកញ៉ា ត្រាំង លី និងឧកញ៉ា គួច ម៉េងលី ជាដើម មិនបានចុះបញ្ជីភាគហ៊ុនបន្ថែមនៅលើកទី៤ នេះទេ។

ដូច្នេះ ភាគហ៊ុនដែលស្ថាបនិកខាងលើបានចុះបញ្ជីភាគហ៊ុននៅក្រសួងពាណិជ្ជកម្ម ទាំង ៤លើកនេះ គិតជាទឹកប្រាក់សរុបមានចំនួន ៤៩លាន ៤សែនដុល្លារសហរដ្ឋអាមេរិក (៤៩ ៤០០ ០០០ដុល្លារ) ដែលស្មើនឹង ៤៩លាន ៤សែនភាគហ៊ុនដែរ។

ក្រៅពីការដាក់បន្ថែមភាគហ៊ុនទាំង ៤លើកនេះ តំណាងម្ចាស់ភាគហ៊ុនខាងលើ ក៏បានចុះបញ្ជីភាគហ៊ុនបន្ថែមជាបន្តបន្ទាប់ទៀតដែរតាមរយៈនៃការបណ្ដាក់ទុនពីសមាជិករបស់ខ្លួនរាប់រយនាក់ទៀត ដែលធ្វើឱ្យក្រុមហ៊ុន CIC Partner កើនឡើងនូវទឹកប្រាក់វិនិយោគសរុបរហូតដល់ទៅជាង ២០០លានដុល្លារអាមេរិក។

តាមរយៈឯកសាររបស់ក្រុមហ៊ុន CIC Partner ដែលសារព័ត៌មាន The Cambodia Daily ទទួលបាន បង្ហាញថា ចំនួនលុយរាប់រយលានដុល្លារអាមេរិកនេះ គឺជាលុយដែលក្រុមហ៊ុនទទួលបានពីការដាក់ទុនពីអ្នកផ្តល់ប្រាក់កម្ចីដែលជាម្ចាស់ភាគហ៊ុនតូចៗរាប់រាយនាក់កន្លងមក ហើយបើគិតត្រឹមឆ្នាំ២០២២ កន្លងទៅ ក្រុមហ៊ុនមានម្ចាស់ភាគហ៊ុនចូលរួមដាក់ទុនវិនិយោគតាមលក្ខខណ្ឌផ្តល់ប្រាក់កម្ចីជាង ៦០០នាក់ឯណោះ។

ឯកសារដដែលបង្ហាញថា៖

ចន្លោះពីឆ្នាំ២០១៣ ដល់ឆ្នាំ២០១៤ មានម្ចាស់ភាគហ៊ុនចូលរួមប្រមាណជាង ១០០នាក់
ប៉ុន្តែចន្លោះពីឆ្នាំ២០១៤ ដល់ឆ្នាំ២០១៥ ម្ចាស់ភាគហ៊ុនបានកើនឡើងដល់ជាង ២០០នាក់
ចន្លោះពីឆ្នាំ២០១៥ ដល់ឆ្នាំ២០១៦ មិនមានម្ចាស់ភាគហ៊ុនថ្មីចូលរួមទេ
ប៉ុន្តែចន្លោះពីឆ្នាំ២០១៦ ដល់ឆ្នាំ២០១៧ ម្ចាស់ភាគហ៊ុនថ្មីបានកើនឡើងដល់ ២២២នាក់ផងដែរ
នៅចន្លោះពីឆ្នាំ២០១៧ ដល់ឆ្នាំ២០១៨ ម្ចាស់ភាគហ៊ុនបានកើនឡើងដល់ ២៥០នាក់
ចន្លោះពីឆ្នាំ២០១៨ ដល់ឆ្នាំ២០១៩ ម្ចាស់ភាគហ៊ុនបានកើនឡើងដល់ ៣៥០នាក់
ចន្លោះពីឆ្នាំ២០១៩ ដល់ឆ្នាំ២០២០ ម្ចាស់ភាគហ៊ុនបានកើនឡើងដល់ ៤០០នាក់
ចន្លោះពីឆ្នាំ២០២០ ដល់ឆ្នាំ២០២១ ម្ចាស់ភាគហ៊ុនបានឡើងដល់ ៤៥០នាក់
ចន្លោះពីឆ្នាំ២០២១ ដល់ឆ្នាំ២០២២ ម្ចាស់ភាគហ៊ុនបានកើនឡើងជាង ៥០០នាក់
និងចាប់ពីដើមខែមករា រហូតដល់ខែមីនា ឆ្នាំ២០២២ ម្ចាស់ភាគហ៊ុនក៏បានកើនឡើងរហូតដល់ជាង ៦០០នាក់បន្ថែមទៀតដែរ ក្នុងនោះម្ចាស់ភាគហ៊ុននីមួយៗបានដាក់ទុនវិនិយោគក្នុងម្នាក់ៗយ៉ាងតិច ១ម៉ឺនដុល្លារអាមេរិក ដែលស្មើនឹង ១ម៉ឺនភាគហ៊ុនដែរ។

ក្រោយប្រមូលលុយពីម្ចាស់ភាគហ៊ុនរហូតមានចំនួនរាប់រយលានដុល្លារអាមេរិក ក្រុមហ៊ុន CIC Partner បានបង្វិលលុយទាំងនោះទៅវិនិយោគក្នុងក្រុមហ៊ុនផ្សេងៗដែលជាដៃគូសហការវិនិយោគរបស់ខ្លួនជាបន្តបន្ទាប់ផងដែរ ដូចជា៖

ការបណ្ដាក់ទុនវិនិយោគក្នុងក្រុមហ៊ុន Shichida Cambodia ក្នុងទំហំទឹកប្រាក់ជាង ២សែន ៥ម៉ឺនដុល្លារអាមេរិកក្នុងឆ្នាំ២០១៩
បណ្ដាក់ទុនក្នុងក្រុមហ៊ុន Champei Spa ក្នុងទំហំទឹកប្រាក់ ៥សែនដុល្លារអាមេរិកក្នុងឆ្នាំ២០២០
បណ្ដាក់ទុនវិនិយោគក្នុងក្រុមហ៊ុន Aplus Consulting ក្នុងទំហំទឹកប្រាក់ជាង ៨សែនដុល្លារអាមេរិក (៨០៤ ៤១២ដុល្លារ) ក្នុងឆ្នាំ២០២១
បណ្ដាក់ទុនក្នុងក្រុមហ៊ុនធានារ៉ាប់រងជីវិត Forte Insurance ក្នុងទំហំទឹកប្រាក់ ១លានដុល្លារអាមេរិកក្នុងឆ្នាំ២០២១
បណ្ដាក់ទុនវិនិយោគក្នុងក្រុមហ៊ុនអប់រំតាមបែបឌីជីថល Westline Education Group ក្នុងទំហំទឹកប្រាក់ ១លាន ៥សែនដុល្លារអាមេរិកក្នុងឆ្នាំ២០២១
បណ្ដាក់ទុនវិនិយោគក្នុងក្រុមហ៊ុនធានារ៉ាប់រងជីវិត Global General Insurance Broker Plc ក្នុងទំហំទឹកប្រាក់ ៤សែន ៥ពាន់ដុល្លារអាមេរិកក្នុងឆ្នាំ២០២២
បណ្ដាក់ទុនវិនិយោគក្នុងក្រុមហ៊ុនឱសថ PillTech ក្នុងទំហំទឹកប្រាក់ ៣សែនដុល្លារអាមេរិកក្នុងឆ្នាំ២០២២
បណ្ដាក់ទុនវិនិយោគក្នុងក្រុមហ៊ុន Amatak Innovest ក្នុងទំហំទឹកប្រាក់ ២សែនដុល្លារអាមេរិកក្នុងឆ្នាំ២០២៣
ហើយក៏មានការបណ្ដាក់ទុនវិនិយោគក្នុងក្រុមហ៊ុនជាច្រើនផ្សេងទៀតផងដែរ ដូចជាការបណ្ដាក់ទុនលើការទិញលក់អចលនទ្រព្យ ដូចជា ការទិញលក់ដីឡូត៍ និងផ្ទះល្វែង ជាដើម។

ក្រោយប្រតិបត្តិការក្នុងការបណ្ដាក់ទុនវិនិយោគជាហូរហែ ក្រុមហ៊ុន ខេមបូឌាន អ៊ិនវេសស្ទ័រ ឃែភីថល ផាតនើរ ម.ក (Cambodian Investors Capital Partners Plc.) ក៏ទទួលបានសិទ្ធិវិនិយោគពីនិយ័តករមូលបត្រកម្ពុជាតាមសំណើរបស់ខ្លួនជាបន្តបន្ទាប់ ក្នុងនោះ ក្រុមហ៊ុន CIC Partner ទទួលបានអាជ្ញាបណ្ណ និងការគ្រប់គ្រងអាជីវកម្មវិនិយោគរួមពីនិយ័តករមូលបត្រកម្ពុជាជាផ្លូវការកាលពីថ្ងៃទី២៩ ខែឧសភា ឆ្នាំ២០១៨ កន្លងទៅ។

ជាងនេះទៀត និយ័តករមូលបត្រកម្ពុជា ក៏បានទទួលស្គាល់សមាសភាពក្រុមប្រឹក្សាភិបាល ការទទួលស្គាល់ចំនួនដើមទុនវិនិយោគ ការទទួលស្គាល់សមាសភាពភាគហ៊ុនិក និងការផ្តល់អាជ្ញាបណ្ណភ្នាក់ងារគ្របគ្រងមូលនិធិដល់ក្រុមហ៊ុន CIC Partner កាលពីថ្ងៃទី៣០ ខែកក្កដា ឆ្នាំ២០១៩ រួមទាំងទទួលស្គាល់ការបង្កើនដើមទុន និងការផ្លាស់ប្ដូររចនាសម្ព័ន្ធភាគហ៊ុនរបស់ក្រុមហ៊ុនមូលនិធិនេះកាលពីថ្ងៃទី១៨ ខែតុលា ឆ្នាំ២០២១ ផងដែរ។

បើទោះបីជាក្រុមហ៊ុន CIC Partner បានបណ្ដាក់ទុនវិនិយោគជាមួយក្រុមហ៊ុនដៃគូសហការនានាជាបន្តបន្ទាប់ និងទទួលបានសិទ្ធិវិនិយោគស្របច្បាប់ពីនិយ័តករមូលបត្រកម្ពុជា ក៏ដូចជាក្រសួងពាណិជ្ជកម្ម ជាហូរហែក៏ដោយ ប៉ុន្តែសមាជិកដែលជាម្ចាស់ភាគហ៊ុនតូចៗរាប់រយនាក់បានអះអាងថា ពួកគេមិនបានទទួលការប្រាក់តាមកិច្ចសន្យារបស់ខ្លួនដូចដែលមានចែងក្នុងកិច្ចព្រមព្រៀងជាមួយក្រុមហ៊ុនកន្លងមកនោះទេ។

ក្នុងនោះ មានអ្នកខ្លះមិនទទួលបានការប្រាក់អស់រយៈពេល ៩ឆ្នាំមកហើយ បើគិតចាប់តាំងពីឆ្នាំ២០១៥ រហូតដល់ដើមឆ្នាំ២០២៤ នេះ ជាពិសេសគឺនៅពេលដែលក្រុមហ៊ុននេះមានវិបត្តិហិរញ្ញវត្ថុកាន់តែធ្ងន់ធ្ងរចាប់តាំងពីពាក់កណ្តាលឆ្នាំ២០២៣ មក ដែលបានធ្វើឲ្យម្ចាស់ភាគហ៊ុនតូចកាន់តែច្រើនឡើងៗមិនទទួលបានការប្រាក់ពីការវិនិយោគក្នុងក្រុមហ៊ុនមួយនេះ។

បន្ទាប់ពីក្រុមហ៊ុន CIC Partner ខកខានបង់ការប្រាក់អស់រាប់ខែ នៅអំឡុងខែមិថុនា ឆ្នាំ២០២៣ ម្ចាស់ភាគហ៊ុនតូចៗបានចាប់ផ្តើមរៀបចំឱ្យមានកិច្ចប្រជុំក្នុងចំណោមសមាជិករងគ្រោះដូចគ្នាជាបន្តបន្ទាប់ រហូតដល់ថ្ងៃទី២៩ ខែកក្កដា ឆ្នាំ២០២៣។ ពួកគេបានរៀបចំការបោះឆ្នោតជ្រើសរើសតំណាងបណ្ដោះអាសន្នមួយ ដើម្បីប្រមូលម្ចាស់ភាគហ៊ុនរងគ្រោះផ្សេងទៀតឆ្ពោះទៅរកការបោះឆ្នោតជ្រើសរើសតំណាងជាផ្លូវការ ក្នុងការតវ៉ាទាមទារលុយដែលពួកគេបានបាត់បង់ពីការបណ្ដាក់ទុនក្នុងក្រុមហ៊ុន CIC Partner ត្រឡប់មកវិញ។

លទ្ធផលនៃការបោះឆ្នោត បានសម្រេចជ្រើសរើសឧកញ៉ា ត្រាំង លី ធ្វើតំណាងបណ្ដោះអាសន្ន និងមានតួនាទីជាប្រធានដឹកនាំ ខណៈលោក ហេង កក្កដា ជាអនុប្រធាន លោក តែង គឹមសាន ជាអនុប្រធាន។ ក្រៅពីនេះ ដូចជាលោក ម៉ៅ វឹង លោក ឃឹម លាង លោក ទេព វិចិត្រ អ្នកស្រី ចាន់ ហួយ លោក អៀ ខៀវហ៊ី អ្នកស្រី ខេង សុកចិន្តា និងឯកឧត្តម មាស ពិនពីលី គឺជាសមាជិកដែលគិតជាសរុបគឺមានចំនួន ១០នាក់។

តំណាងក្រុមបណ្ដោះអាសន្ននេះ មានតួនាទីកៀរគរប្រមូលអ្នកផ្តល់កម្ចីរងគ្រោះដទៃទៀត ដើម្បីឆ្ពោះទៅរកការបង្កើតតំណាងក្រុមស្របច្បាប់មួយក្នុងការស្វែងរកការចរចារកដំណោះស្រាយជាមួយក្រុមហ៊ុន ដើម្បីឱ្យពួកគេសងលុយម្ចាស់ភាគហ៊ុនរងគ្រោះទាំងនោះត្រឡប់មកវិញទាំងប្រាក់ដើម និងការប្រាក់ ដែលក្រុមហ៊ុនបានខកខានសងអ្នកទាំងនោះអស់រយៈពេលជិត ១ឆ្នាំកន្លងមកនោះ។

ក្នុងកំណត់ហេតុដដែលនេះ បញ្ជាក់ថា ការជ្រើសរើសតំណាងបណ្ដោះអាសន្ននេះ ម្ចាស់ភាគហ៊ុនដែលបានចូលរួមនៅពេលនោះ គឺភាគច្រើនសុទ្ធសឹងតែជាសាច់ញាតិ បងប្អូនរបស់ពួកគេដែលបានប្រមូលលុយគ្នាយកទៅបណ្ដាក់ទុនក្នុងក្រុមហ៊ុននេះតែប៉ុណ្ណោះ ខណៈម្ចាស់ភាគហ៊ុនរងគ្រោះដទៃទៀតមិនបានចូលរួមទេ ដោយសារតែពួកគេមិនទាន់ទទួលបានព័ត៌មាននៃការចងក្រងសមាជិកដើម្បីជ្រើសរើសតំណាងនេះនៅឡើយ។

ក្រោយពេលដែលម្ចាស់ភាគហ៊ុនរងគ្រោះបោះឆ្នោតជ្រើសរើសតំណាងបណ្ដោះអាសន្ន និងមានការទាមទារកាន់តែខ្លាំងឡើងៗ នៅដើមខែវិច្ឆិកា ឆ្នាំ២០២៣ លោក គុយ វ៉ាត បានលាលែងតំណែងជាប្រធានក្រុមប្រឹក្សាភិបាល និងបានតែងតាំងឧកញ៉ា សុខ ពិសិដ្ឋ ជាប្រធានក្រុមប្រឹក្សាភិបាលជំនួសវិញ។ ឧកញ៉ា សុខ ពិសិដ្ឋ ក៏ត្រូវបានតែងតាំងជាប្រធានគណៈកម្មការស្ដារក្រុមហ៊ុន និងមូលនិធិនៅអំឡុងពេលនោះដែរ។

និយ័តករមូលបត្រកម្ពុជា បានទទួលស្គាល់លោក គុយ វ៉ាត ជាប្រធានក្រុមប្រឹក្សាភិបាល លោក ហុង លាងអ៊ី និងលោក លី លាង ជាអភិបាលកាលពីថ្ងៃទី២១ ខែមករា ឆ្នាំ២០២១ កន្លងទៅ ប៉ុន្តែអាណត្តិជាប្រធានក្រុមប្រឹក្សាភិបាលរបស់លោក គុយ វ៉ាត និងអាណត្តិជាអភិបាលរបស់លោក ហុង លាងអ៊ី និងលោក លី លាង មានរយៈពេលត្រឹមតែ ២ឆ្នាំប៉ុណ្ណោះ គឺត្រូវផុតកំណត់នៅចុងខែមករា ឆ្នាំ២០២៤ កន្លងទៅនេះ ប៉ុន្តែដោយសារក្រុមហ៊ុនមានវិបត្តិហិរញ្ញវត្ថុធ្ងន់ធ្ងរ លោក គុយ វ៉ាត ក៏បានលាលែងតំណែងមុនពេលកំណត់តែម្តង។

លោក គុយ វ៉ាត ម្ចាស់ហាង Park Café លោក សោម សម្បត្តិ និងលោក គីម សុខហេង

ក្រោយឧកញ៉ា សុខ ពិសិដ្ឋ ឡើងកាន់តំណែងជាប្រធានក្រុមប្រឹក្សាភិបាល ឧកញ៉ា ត្រាំង លី ដែលជាប់ឆ្នោតជាតំណាងបណ្ដោះអាសន្ន បានចេញលិខិតមួយទៅកាន់ឧកញ៉ា សុខ ពិសិដ្ឋ កាលពីថ្ងៃទី៧ ខែវិច្ឆិកា ឆ្នាំ២០២៣ ដោយស្នើសុំបញ្ជីឈ្មោះអ្នកផ្តល់ប្រាក់កម្ចីឱ្យក្រុមហ៊ុន CIC Partner ទាំងអស់ ដើម្បីចងក្រងពួកគេជាសមាជិកក្នុងការទាមទាររកដំណោះស្រាយជុំវិញវិបត្តិលុយកម្ចី និងការប្រាក់មូលនិធិដែលកំពុងជាប់គាំងទាំងនោះ។

ក្នុងលិខិតដដែលបញ្ជាក់ថា ការស្នើសុំបញ្ជីឈ្មោះម្ចាស់ភាគហ៊ុនរងគ្រោះទាំងអស់នេះ គឺដើម្បីភាពងាយស្រួលឱ្យម្ចាស់ភាគហ៊ុនទាំងនោះអាចចូលរួមសម្រេចចិត្តក្នុងការរកដំណោះស្រាយនានាជុំវិញបញ្ហានេះដែរ ប៉ុន្តែរហូតមកដល់ពេលនេះ ឧកញ៉ា សុខ ពិសិដ្ឋ មិនបានផ្តល់បញ្ជីឈ្មោះអ្នកផ្តល់ប្រាក់កម្ចីទាំងនោះឱ្យឧកញ៉ា ត្រាំង លី នៅឡើយទេ ដែលទំនងជាឧកញ៉ា សុខ ពិសិដ្ឋ មិនចង់ឱ្យមានការប្រមូលផ្ដុំការតវ៉ាទាមទារកាន់តែធំ ទើបបានជាគាត់មិនផ្តល់បញ្ជីឈ្មោះម្ចាស់ភាគហ៊ុនរងគ្រោះទាំងនោះបែបនេះ។

បន្ទាប់ពីរងនូវការទាមទារពីម្ចាស់ភាគហ៊ុនជាបន្តបន្ទាប់ ឧកញ៉ា សុខ ពិសិដ្ឋ ក៏បានលាលែងតំណែងពីប្រធានក្រុមប្រឹក្សាភិបាលបន្តទៀត ប៉ុន្តែក្រុមហ៊ុនក៏បានជ្រើសរើសលោក ឡែម ចាន់សំរេច ជាប្រធានក្រុមប្រឹក្សាភិបាលជំនួសវិញ ខណៈឧកញ៉ា សុខ ពិសិដ្ឋ នៅបន្តកាន់តំណែងជាប្រធានគណៈកម្មការស្ដារក្រុមហ៊ុន និងមូលនិធិដូចមុនដដែល។

បើទោះបីជាក្រុមហ៊ុន CIC Partner ជួបវិបត្តិហិរញ្ញវត្ថុមិនបង់ការប្រាក់ដល់ម្ចាស់កម្ចីរាប់រយនាក់អស់រយៈពេលជាច្រើនខែយ៉ាងណាក៏ដោយ ក៏រឿងអាស្រូវរបស់ក្រុមហ៊ុននេះមិនត្រូវបានគេទម្លាយមកខាងក្រៅដែរ រហូតដល់ថ្ងៃទី១៥ ខែមករា ឆ្នាំ២០២៤ កន្លងទៅថ្មីៗនេះ ក៏មានម្ចាស់គណនីហ្វេសប៊ុកមួយឈ្មោះ ប៉ែន ជីវ័ន្ត (Chivann Pen) ដែលមានឈ្មោះពិតថា យ៉ង់ ប៉ាក់ ដែលគេស្គាល់ថាជាម្ចាស់ភាគហ៊ុនរងគ្រោះម្នាក់ពីការផ្តល់ប្រាក់កម្ចីឱ្យក្រុមហ៊ុន CIC Partner នេះដែរនោះ បានទម្លាយថា អ្នកវិនិយោគជាង ៥០០នាក់ (៥៤៦នាក់) បានខាតបង់លុយកាក់ធ្ងន់ធ្ងរពីការដាក់ទុនវិនិយោគក្នុងក្រុមហ៊ុន CIC Partner និងក្ស័យធនគ្រប់ៗគ្នា ដោយសារតែអ្នកគ្រប់គ្រងជាន់ខ្ពស់របស់ក្រុមហ៊ុននេះ បានធ្វើឱ្យបាត់លុយមូលនិធិក្នុងក្រុមហ៊ុនចំនួន ៨០លានដុល្លារអាមេរិក ដោយគ្មានការបកស្រាយតាមលក្ខខណ្ឌច្បាប់ពិតប្រាកដ។

អគ្គនាយកប្រតិបត្តិក្រុមហ៊ុន អាហ្គ្រីប៊ី (AGRIBEE) លោក យ៉ង់ ប៉ាក់ ដែលជាម្ចាស់គណនីហ្វេសប៊ុកឈ្មោះ ប៉ែន ជីវ័ន្ត (Chivann Pen)។

ម្ចាស់គណនីហ្វេសប៊ុកខាងលើចោទថា ការបាត់លុយនេះ ដោយសារតែអតីតប្រធានអង្គការតម្លាភាព លោក ព្រាប កុល គប់គិតជាមួយលោក គុយ វ៉ាត ដែលជាប្រធានក្រុមប្រឹក្សាភិបាលរួមទាំងសមាជិកអភិបាលជាង ១០នាក់ផ្សេងទៀត បានលួចលុយទាំងនោះយកទៅបណ្ដាក់ទុនវិនិយោគក្នុងក្រុមហ៊ុនផ្សេងបាត់ទៅហើយ។

យ៉ាងណាក៏ដោយ បន្ទាប់ពីការទម្លាយអាថ៌កំបាំងនេះ លោក យ៉ង់ ប៉ាក់ ក៏ត្រូវបានលោក ព្រាប កុល ប្តឹងទៅតុលាការ និងត្រូវបានសមត្ថកិច្ចចាប់ខ្លួនដោយចោទប្រកាន់ពីបទ «បរិហារកេរ្តិ៍» កាលពីថ្ងៃទី២០ ខែមករា ឆ្នាំ២០២៤ ផងដែរ ប៉ុន្តែអំឡុងពេលលោក យ៉ង់ ប៉ាក់ ត្រូវបានឃុំខ្លួន សារព័ត៌មានដែលស្និទ្ធនឹងបក្សកាន់អំណាច ហ្វ្រែសញូវ (Fresh News) ក៏បានចុះផ្សាយពីបណ្តឹងកសិករមួយចំនួនដែលអះអាងថា លោក យ៉ង់ ប៉ាក់ បានបោកប្រាស់លុយរបស់ពួកគេចំនួន ៩ម៉ឺនដុល្លារអាមេរិក អំឡុងពេលដែលពួកគេរកស៊ីជួញដូរអង្កាមជាមួយគ្នាកាលពីចុងឆ្នាំ២០២៣ កន្លងទៅនោះ ប៉ុន្តែការចោទប្រកាន់នេះ ត្រូវបានម្ចាស់ភាគហ៊ុនរងគ្រោះក្នុងក្រុមហ៊ុន CIC Partner មួយចំនួនអះអាងថា លុយទាំង ៩ម៉ឺនដុល្លារអាមេរិកនោះ ក៏ទំនងជាកំពុងជាប់គាំងដោយសារការបណ្ដាក់ទុនវិនិយោគក្នុងក្រុមហ៊ុននេះដែរ។

បន្ទាប់ពីរងនូវការចោទប្រកាន់ថាក្រុមហ៊ុន CIC Partner ធ្វើឱ្យបាត់លុយអស់ ៨០លានដុល្លារអាមេរិក ឧកញ៉ា សុខ ពិសិដ្ឋ ដែលជាប្រធានគណៈកម្មការស្ដារក្រុមហ៊ុន និងមូលនិធិ បានចេញលិខិតបំភ្លឺមួយតាមសំណើរបស់លោក ព្រាប កុល កាលពីថ្ងៃទី២៣ ខែមករា ឆ្នាំ២០២៤ កន្លងទៅថា ក្រុមហ៊ុនគ្មានប្រវត្តិធ្វើប្រតិបត្តិការផ្ទេរសាច់ប្រាក់ចំនួន ៨០លានដុល្លារអាមេរិកទៅឱ្យលោក ព្រាប កុល នោះទេ។

លោកនាយករដ្ឋមន្ត្រី ហ៊ុន ម៉ាណែត (ឆ្វេង) និងលោក ព្រាប កុល អតីតប្រធានអង្គការតម្លាភាពកម្ពុជា

ទោះជាបែបនេះក្តី លោក សុខ ពិសិដ្ឋ ក៏មិនបានបញ្ជាក់ទេថា ក្រុមហ៊ុននេះបានបាត់លុយចំនួន ៨០លានដុល្លារអាមេរិកដូចការលើកឡើងរបស់ម្ចាស់ភាគហ៊ុនរងគ្រោះទាំងនោះដែរ ឬក៏អត់នោះ ខណៈលោក គុយ វ៉ាត ដែលរងនូវការចោទប្រកាន់នេះ ក៏មិនបានចេញមុខបកស្រាយពីការចោទប្រកាន់នេះថែមទៀត។

ស្ថិតក្នុងភាពចម្រូងចម្រាសមិនដាច់ស្រេចជុំវិញបញ្ហារបស់ក្រុមហ៊ុន CIC Partner នៅពេលនេះ ម្ចាស់ភាគហ៊ុនរងគ្រោះជាច្រើន បាននាំគ្នាបើកកិច្ចប្រជុំជាក្រុមតូច និងក្រុមធំជាបន្តបន្ទាប់ ដើម្បីរកវិធីប្រមូលលុយពួកគេត្រឡប់មកវិញ។ ជាក់ស្តែង សារព័ត៌មាន The Cambodia Daily ក៏បានទទួលសារសំឡេងក្នុងកិច្ចប្រជុំទាំងនោះជាហូរហែផងដែរ។

ម្ចាស់ភាគហ៊ុនដែលបានចូលរួមក្នុងកិច្ចប្រជុំទាំងនោះ លើកឡើងថា តាមការពិត គោលការណ៍វិនិយោគរបស់ក្រុមហ៊ុន CIC Partner ដែលធ្វើបទបង្ហាញរហូតធ្វើឱ្យពួកគេផ្តល់ប្រាក់កម្ចីកន្លងមក គឺពិតជាមានប្រយោជន៍សម្រាប់អ្នកផ្តល់កម្ចីឱ្យក្រុមហ៊ុននេះប្រាកដមែន ដែលមានន័យថា ក្រុមហ៊ុននេះនឹងដើរតួនាទីជាធនាគារកណ្តាលមួយសម្រាប់ម្ចាស់លុយកម្ចីទាំងអស់ ក្នុងការទទួលលុយដែលពួកគេចង់វិនិយោគក្នុងក្រុមហ៊ុននេះ។

ប្រភពដដែលបញ្ជាក់ថា បើយោងតាមលក្ខខណ្ឌរបស់ក្រុមហ៊ុន បានចែងយ៉ាងច្បាស់ថា បើម្ចាស់ភាគហ៊ុនត្រូវការលុយរបស់ខ្លួនត្រឡប់ទៅវិញនៅពេលណាមួយ ពួកគេគ្រាន់តែជូនដំណឹងឱ្យក្រុមហ៊ុន ២សប្តាហ៍មុនប៉ុណ្ណោះ នោះក្រុមហ៊ុននឹងបង្វិលសាច់ប្រាក់ដែលបានស្នើសុំនោះត្រឡប់ទៅវិញជាមិនខាន ប៉ុន្តែក្រុមហ៊ុនបែរអនុវត្តផ្ទុយពីលក្ខខណ្ឌរបស់ខ្លួនជាបន្តបន្ទាប់រហូតមកដល់ពេលនេះ។

ប្រភពដដែលលើកឡើងថា ចាប់តាំងពីពួកគេបានដាក់លុយវិនិយោគមក ក្រុមហ៊ុនមិនដែលបានផ្តល់ការប្រាក់ ឬបង្វិលលុយដែលពួកគេបានស្នើសុំត្រឡប់មកវិញបានម្តងណានោះទេ ប៉ុន្តែក្រោយផ្ទុះការតវ៉ាកាន់តែខ្លាំង ទើបក្រុមហ៊ុនបើកកិច្ចប្រជុំមួយដោយសុំពន្យារពេល ៣ខែសម្រាប់រកដំណោះស្រាយ និងសន្យាសងរំលស់ប្រាក់ដើមឱ្យម្ចាស់ភាគហ៊ុនទាំងនោះជាដំណាក់កាលៗថែមទៀត ប៉ុន្តែរហូតដល់ពេលនេះ ខាងក្រុមហ៊ុនមិនបានអនុវត្តតាមការសន្យានោះឡើយ។

ម្ចាស់ភាគហ៊ុនខាងលើត្អូញត្អែរថា មុននឹងមានបញ្ហាដូចពេលនេះ ពួកគេក៏ធ្លាប់លេចឮថា ក្រុមហ៊ុនមានបញ្ហាបាត់លុយតាំងពីឆ្នាំ២០២២ មកដែរ ខណៈការប្រាក់ក៏ពួកគេមិនទទួលបានតាមកិច្ចសន្យានោះទៀត។

ម្ចាស់ភាគហ៊ុនទាំងអស់ បានស្នើសុំទៅប្រធានក្រុមប្រឹក្សាភិបាលឱ្យបង្ហាញពីដំណើរការប្រតិបត្តិការសាច់ប្រាក់របស់ក្រុមហ៊ុន ឱ្យពួកគេដឹងពីមូលហេតុពិតប្រាកដជាបន្តបន្ទាប់ ប៉ុន្តែទោះជាមានការស្នើសុំយ៉ាងណាក៏ដោយ ក៏ក្រុមអភិបាលជាន់ខ្ពស់របស់ក្រុមហ៊ុននេះ មិនទទួលយកសំណើនេះឡើយ។

ប្រភពដដែលបញ្ជាក់ថា បញ្ហាចម្បងដែលកំពុងកើតមាននៅក្នុងក្រុមហ៊ុន CIC Partner នៅពេលនេះ គឺបញ្ហាទំនុកចិត្តតែម្តង ព្រោះថាក្នុងនាមជាម្ចាស់ភាគហ៊ុន ត្រូវតែដឹងពីព័ត៌មានរបស់ក្រុមហ៊ុនទាំងអស់ ប៉ុន្តែអ្នកគ្រប់គ្រងជាន់ខ្ពស់របស់ក្រុមហ៊ុន បែរជាព្យាយាមលាក់បាំង និងបំបិទព័ត៌មានដែលម្ចាស់ភាគហ៊ុនគួរតែដឹងទៅវិញ ដែលទង្វើនេះបង្ហាញថា ក្រុមហ៊ុនកំពុងធ្វើអាជីវកម្មមិនសុចរិត និងរំលោភលើសេចក្តីទុកចិត្តដែលខុសទៅនឹងមាត្រាច្បាប់យ៉ាងធ្ងន់ធ្ងរ។

បន្ទាប់ពីមានការតវ៉ាទាមទារសំណងកាន់តែខ្លាំង នៅទីបំផុត ក្រុមហ៊ុន CIC Partner បានសម្រេចផ្តល់ដំណោះស្រាយដល់ម្ចាស់ភាគហ៊ុនរងគ្រោះទាំងអស់ ដោយសងសំណងជាដីឡូត៍ដែលជាទ្រព្យសម្បត្តិរបស់ក្រុមហ៊ុន ជំនួសឱ្យការសងជាលុយសុទ្ធវិញ ប៉ុន្តែដំណោះស្រាយនេះស្ថិតក្នុងភាពមិនដាច់ស្រេចនៅឡើយ។

ឯកសារស្ដីពីការធ្វើបច្ចុប្បន្នភាពទ្រព្យសម្បត្តិក្រុមហ៊ុន ដើម្បីដោះស្រាយបញ្ហាជូនម្ចាស់ភាគហ៊ុនដែលសារព័ត៌មាន The Cambodia Daily ទទួលបាន បង្ហាញថា ក្រុមហ៊ុន CIC Partner បានធ្វើបច្ចុប្បន្នភាពទ្រព្យសម្បត្តិមួយផ្នែករបស់ក្រុមហ៊ុនឡើងវិញ ដែលមានទំហំទឹកប្រាក់ចំនួន ៨២លាន ៣ម៉ឺន ២ពាន់ ៨៧ដុល្លារអាមេរិក (៨២ ០៣២ ០៨៧ដុល្លារអាមេរិក) ដែលកំពុងវិនិយោគលើគម្រោងធំៗចំនួន ៥ រួមមាន៖

គម្រោងទី១ គឺគម្រោង Thean Long មានភាគហ៊ុន ៤៥% ស្ថិតក្នុងកោះក្របី ខេត្តកណ្តាល លើផ្ទៃដីជាង ១៦ហិកតា (១៦,១៧ហិកតា) ដែលក្រុមហ៊ុនបានកំណត់តម្លៃ ១ម៉ឺន ៥ពាន់ដុល្លារអាមេរិកក្នុងមួយម៉ែត្រការ៉េ និងសរុបជាទឹកប្រាក់មានចំនួនជាង ២៤លានដុល្លារសហរដ្ឋអាមេរិក (២៤ ២៥៩ ២៣០ដុល្លារ)។
គម្រោងទី២ គឺគម្រោង Golden Tree មានភាគហ៊ុន ២៥% ស្ថិតក្នុងរាជធានីភ្នំពេញ ដែលវិនិយោគលើសំណង់អគារមានតម្លៃសរុបជាង ៧លានដុល្លារសហរដ្ឋអាមេរិក (៧ ០២៦ ៧១៥ដុល្លារ)។
គម្រោងទី៣ គឺគម្រោងដីខេត្តកំពត ដំណាក់កាលទី១ ស្ថិតក្នុងខេត្តកំពត មានទំហំជាង ៤០ហិកតា (៤០,៦៥ហិកតា) ដែលក្រុមហ៊ុនបានកំណត់តម្លៃ ៦៧ដុល្លារអាមេរិកក្នុង ១ម៉ែត្រការ៉េ ដែលមានទំហំទឹកប្រាក់សរុបជាង ២៧លានដុល្លារអាមេរិក (២៧ ២៣២ ២៨៤ដុល្លារ)។
គម្រោងទី៤ គឺគម្រោងដីខេត្តកំពត ដំណាក់កាលទី២ ស្ថិតក្នុងខេត្តកំពត ដដែល មានទំហំជិត ៣០ហិកតា (២៩,៤១ហិកតា) ដែលក្រុមហ៊ុនបានកំណត់តម្លៃ ៦៧ដុល្លារអាមេរិកក្នុង ១ម៉ែត្រការ៉េ ដែលមានទឹកប្រាក់សរុបជិត ២០លានដុល្លារអាមេរិក (១៩ ៧០២ ៩៥៨ដុល្លារ)។
ចំណែកគម្រោងទី៥ គឺគម្រោងដីក្នុងខេត្តព្រះសីហនុ ដែលមានទំហំជាង ២ហិកតា (២,៥៤ហិកតា) ដែលក្រុមហ៊ុនបានកំណត់តម្លៃ ៦៧ដុល្លារអាមេរិកក្នុង ១ម៉ែត្រការ៉េ និងមានទំហំទឹកប្រាក់សរុបជិត ៤លានដុល្លារអាមេរិក (៣ ៨១០ ៩០០ដុល្លារ) ដែលគិតជាសរុប គម្រោងចំនួន ៥ នេះ គឺមានទំហំដីវិនិយោគសរុបជិត ១០០ហិកតា (៨៨,៧៧ហិកតា) លើកលែងតែគម្រោងក្នុងទីក្រុងភ្នំពេញប៉ុណ្ណោះ ដែលក្រុមហ៊ុនមិនបានបញ្ជាក់ទំហំដីដែលខ្លួនបានវិនិយោគនោះ។

ជុំវិញការស្វែងរកដំណោះស្រាយនេះ បើទោះបីជាក្រុមហ៊ុន CIC Partner អះអាងចំពោះម្ចាស់ភាគហ៊ុនថា ខ្លួននឹងសងដីឡូត៍ជំនួសលុយសុទ្ធក៏ដោយ ក៏មិនទាន់មានការឯកភាពគ្នាទាំងស្រុងតាមលក្ខខណ្ឌផ្លូវច្បាប់ដែរ ដោយសារតែម្ចាស់ភាគហ៊ុនទាំងនោះមិនទុកចិត្តថា ដីដែលក្រុមហ៊ុនដោះដូរឱ្យខ្លួន ពួកគេអាចនឹងលក់យកលុយមកទូទាត់ជាមួយលុយដែលបានខាតបង់ក្នុងក្រុមហ៊ុននេះកន្លងមកនោះ។

ជាងនេះទៀត បើទោះបីជាក្រុមហ៊ុនកំណត់តម្លៃដីឡូត៍ទាំងនោះហើយក៏ដោយ ក៏គ្រាន់តែជាការកំណត់របស់ក្រុមហ៊ុនតែម្ខាងប៉ុណ្ណោះ ខណៈស្តង់ដារតម្លៃដីលើទីផ្សារអចលនទ្រព្យជាក់ស្តែង ក៏មិនដឹងថា តើដីទាំងនោះមានតម្លៃដូចក្រុមហ៊ុនបានកំណត់ឬក៏អត់នោះទេ ដែលបញ្ហានេះកំពុងស្ថិតក្នុងការជជែកតវ៉ាគ្នានៅឡើយរហូតដល់ពេលនេះ។

ក្រោយបែកធ្លាយរឿងអាថ៌កំបាំងជាបន្តបន្ទាប់ គេសង្កេតឃើញថា ក្រុមហ៊ុន CIC Partner ក៏បានព្យាយាមបិទបាំងនូវរឿងអាស្រូវរបស់ខ្លួនជាបន្តបន្ទាប់ដែរ ក្នុងនោះ ក្រុមហ៊ុនបានចេញលិខិតបដិសេធមួយកាលពីថ្ងៃទី៨ ខែកុម្ភៈ ឆ្នាំ២០២៤ ដោយបញ្ជាក់ថា ការចុះផ្សាយព័ត៌មានជុំវិញករណីមិនសងការប្រាក់ដល់ម្ចាស់ភាគហ៊ុន និងករណីបាត់លុយក្នុងក្រុមហ៊ុន CIC កន្លងមក គឺជាព័ត៌មានមិនពិត និងជាការចុះផ្សាយដែលមានចរិតចោទប្រកាន់ ទម្លាក់កំហុសដោយគ្មានមូលដ្ឋានច្បាស់លាស់ប៉ុណ្ណោះ។

ជាងនេះទៀត ក្រុមហ៊ុនក៏ព្រមានស្នើស្ថាប័ន និងអង្គភាពជំនាញពាក់ព័ន្ធ បើកការស៊ើបអង្កេតស្រាវជ្រាវអ្នកដែលទម្លាយពីវិបត្តិរបស់ក្រុមហ៊ុនដែលកំពុងកើតមាននៅពេលនេះថែមទៀត ដើម្បីចាត់ការតាមនីតិវិធីច្បាប់ ដោយក្រុមហ៊ុនអះអាងថា ការទម្លាយរឿងសម្ងាត់ទាំងនោះ គឺជារឿងមិនពិត។

ជាងនេះទៀត កាលពីថ្ងៃទី១៥ ខែកុម្ភៈ ឆ្នាំ២០២៤ ស្ថាបនិកមួយរូបរបស់ក្រុមហ៊ុន CIC Partner គឺលោក ឃីម សុខហេង ដែលគេនិយមហៅថា គ្រូជោគជ័យ ក៏បានចេញមុខបដិសេធជុំវិញរឿងអាស្រូវរបស់ក្រុមហ៊ុន CIC Partner ក្នុងវីដេអូប្រវែងជាង ៨នាទី ដែលបង្ហោះលើទំព័រហ្វេសប៊ុកផ្លូវការរបស់លោកផងដែរថា ការចុះផ្សាយរបស់សារព័ត៌មានកន្លងមក គឺជារឿងមិនពិត ហើយលោកក៏មិនបានប្រមូលលុយពីម្ចាស់ភាគហ៊ុននានាយកទៅបណ្ដាក់ទុនក្នុងក្រុមហ៊ុន CIC Partner ដូចសារព័ត៌មានបានចុះផ្សាយនោះដែរ។

ម្ចាស់ហាង Park Café លោក គុយ វ៉ាត ឈរខាងក្រោយលោក ឃីម សុខហេង

លោក ឃីម សុខហេង បញ្ជាក់ថា នៅពេលដែលលោកមិនបានធ្វើរឿងមិនត្រឹមត្រូវដូចការផ្សព្វផ្សាយ នោះលោកក៏មិនមានភារកិច្ចអ្វីត្រូវបកស្រាយដែរ ប៉ុន្តែក្នុងវីដេអូនោះលោក ឃីម សុខហេង ក៏មិនបានបញ្ជាក់ថា លោកគឺជាស្ថាបនិកក្នុងក្រុមហ៊ុន CIC Partner នេះដែរ ដែលទំនងជាលោកមានចេតនាមិនចង់បកស្រាយជុំវិញរឿងរ៉ាវដែលបានកើតឡើងក្នុងក្រុមហ៊ុននេះនាពេលកន្លងមកនោះ។

បន្ទាប់ពីការបដិសេធរបស់លោក ឃីម សុខហេង ម្ចាស់ភាគហ៊ុនរងគ្រោះដែលត្រូវគ្រូជោគជ័យរូបនេះប្រមូលលុយ បានប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះថា ការអះអាងរបស់លោក ឃីម សុខហេង គឺជាការនិយាយកុហកប៉ុណ្ណោះ ហើយការអះអាងបែបនេះ ក៏គ្រាន់តែជាការលើកឡើងរបស់លោក ឃីម សុខហេង តែម្ខាងដែរ។

ប្រភពដដែលបញ្ជាក់ថា ការអះអាងពីបុគ្គលផ្ទាល់ខ្លួន ឬក្រុមហ៊ុនសាមីកន្លងមក មិនអាចយកជាមូលដ្ឋានច្បាប់បានឡើយ ព្រោះថាទាំងក្រុមហ៊ុន និងស្ថាបនិកទាំងនោះ មិនទាន់ត្រូវបានបញ្ជាក់ពីភាពស្អាតស្អំពីការស៊ើបអង្កេតក្រោមការស្រាវជ្រាវរបស់ស្ថាប័នជំនាញណាមួយនៅឡើយទេរហូតដល់ពេលនេះ។

ក្រៅពីលោក ឃីម សុខហេង ស្ថាបនិកក្រុមហ៊ុននេះផ្សេងទៀត ដូចជា លោក គុយ វ៉ាត លោក ហ៊ុន មុន្នីវណ្ណ និងឧកញ៉ា សុខ ពិសិដ្ឋ ជាដើម មិនបានចេញមុខបកស្រាយជុំវិញរឿងអាស្រូវរបស់ក្រុមហ៊ុនដែលបានបែកធ្លាយនៅពេលនេះនៅឡើយទេរហូតដល់ពេលនេះ បើទោះបីជាមានការចោទប្រកាន់លើក្រុមហ៊ុននេះយ៉ាងណាក៏ដោយ។

ជុំវិញបញ្ហានេះ និយ័តករមូលបត្រកម្ពុជា (ន.ម.ក.) បានដាក់ចេញវិធានការដោយតម្រូវឱ្យក្រុមហ៊ុន CIC កែទម្រង់ ពិនិត្យ និងរៀបចំគ្រប់គ្រងចំនួនប្រាក់វិនិយោគរបស់វិនិយោគិនស្របច្បាប់។ លើសពីនេះ ន.ម.ក បានតម្រូវឱ្យ CIC ចាត់ចែងទ្រព្យដែលកាត់កងបានឱ្យបានត្រឹមត្រូវតាមគោលការណ៍ច្បាប់ ក្នុងគោលដៅអភិវឌ្ឍ ដើម្បីធានាប្រយោជន៍ដល់វិនិយោគិនដែលដាក់ប្រាក់ជាមួយក្រុមហ៊ុន។

កាលពីថ្ងៃទី២៥ ខែមីនា ក្រុមហ៊ុន CIC ក៏បានចេញសេចក្តីបំភ្លឺថា ករណីក្រុមហ៊ុនខ្លួនមិនមែនជាសំណុំរឿងបោកប្រាស់ដូចការចោទប្រកាន់តាមរយៈបណ្ដាញទំនាក់ទំនងសង្គមមួយចំនួនឡើយ ប៉ុន្តែជាវិបត្តិសន្ទនីយភាពសាច់ប្រាក់ដែលរងឥទ្ធិពលពីវិបត្តិសកល និងភាពខ្វះចន្លោះក្នុងការត្រៀមខ្លួនរបស់ក្រុមហ៊ុន។

ក្រុមហ៊ុនអះអាងថា នឹងនៅតែរក្សាជំហរយ៉ាងម៉ឺងម៉ាត់ក្នុងការដោះស្រាយបញ្ហាចំពោះមុខ ដោយធានាឱ្យបានជាអតិបរិមានូវផលប្រយោជន៍របស់វិនិយោគិនគ្រប់រូប។

ប្រភពដដែលលើកឡើងថា ក្រុមហ៊ុននឹងបន្តធ្វើការដោយអនុលោមទៅតាមគោលការណ៍ និងបទប្បញ្ញត្តិដែលកំណត់ដោយ ន.ម.ក. ដែលតែងតែតម្កល់ផលប្រយោជន៍វិនិយោគិនជាអាទិភាព។

ក្រុមហ៊ុនសុំឱ្យវិនិយោគិនទាំងអស់ចូលរួមក្នុងយន្តការដោះស្រាយបញ្ហានេះ ក្រោមក្របខ័ណ្ឌនៃច្បាប់គម្រោងវិនិយោគដែល ន.ម.ក. ជាអាជ្ញាធរមានសមត្ថកិច្ច ដើម្បីអាចឱ្យក្រុមហ៊ុនបញ្ចប់បេសកកម្មក្នុងការវេចខ្ចប់ទ្រព្យដែលជាមូលដ្ឋានគ្រឹះនៃដំណោះស្រាយសម្រាប់វិនិយោគិន។

ទាក់ទិននឹងបញ្ហានេះ អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវលោក សេក សុជាតិ ប្រាប់សារព័ត៌មាន The Cambodia Daily ថា ក្រុមស្ថាបនិករបស់ក្រុមហ៊ុន CIC Partner គួរតែបើកទូលាយឱ្យមានការស៊ើបអង្កេត ដើម្បីស្វែងរកការពិតជុំវិញបញ្ហាដែលខ្លួនកំពុងរងនូវការចោទប្រកាន់ពីការបាត់សាច់ប្រាក់ និងការតវ៉ាទាមទារពីអ្នកដែលបានផ្តល់កម្ចីរាប់រយនាក់នៅពេលនេះ។

លោក សេក សុជាតិ លើកឡើងថា មានតែការបើកឱ្យមានការស៊ើបអង្កេតពីស្ថាប័នពាក់ព័ន្ធប៉ុណ្ណោះ ទើបក្រុមហ៊ុននេះអាចលុបបំបាត់នូវមន្ទិលសង្ស័យនានាពីមហាជន និងរួចផុតពីទោសទណ្ឌតាមផ្លូវច្បាប់បាន ហើយក៏អាចបញ្ជាក់ថា ខ្លួនពិតជាមានភាពស្អាតស្អំមិនដូចការចុះផ្សាយរបស់សារព័ត៌មាននានា និងការលើកឡើងរបស់អ្នកផ្តល់កម្ចីរាប់រយនាក់ទាំងនោះដែរ។

អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិតរូបនេះបញ្ជាក់ថា ផ្ទុយទៅវិញ បើរកឃើញថា ក្រុមហ៊ុនពិតជាមានកំហុសដោយការបំពានកិច្ចសន្យាមិនផ្តល់ការប្រាក់ដល់ម្ចាស់កម្ចីរងគ្រោះមែននោះ ក្រុមហ៊ុនក៏ត្រូវហ៊ានទទួលខុសត្រូវចំពោះមុខច្បាប់ និងទទួលពិន័យទៅតាមកម្រិតទោសដែលខ្លួនប្រព្រឹត្តដែរ ដើម្បីជាគំរូល្អដល់ក្រុមហ៊ុនដែលកំពុងប្រតិបត្តិការរកស៊ីរបៀបនេះក្នុងប្រទេសកម្ពុជាទៅថ្ងៃមុខ។

លោក សេក សុជាតិ បញ្ជាក់ថា ស្ថាប័នពាក់ព័ន្ធ ដូចជាក្រសួងពាណិជ្ជកម្ម និយ័តករមូលបត្រកម្ពុជា និងអង្គភាពប្រឆាំងអំពើពុករលួយ ជាដើម គួរតែពិនិត្យលើករណីនេះឱ្យបានហ្មត់ចត់ ព្រោះថាបើក្រុមហ៊ុន CIC Partner ពិតជាបានប្រព្រឹត្តទង្វើរំលោភច្បាប់មែន ប៉ុន្តែនៅតែអាចបន្តធ្វើសកម្មភាពបានទៀតនោះ គឺមានន័យថា ហាក់ដូចជានាំគ្នាលើកទឹកចិត្តឱ្យក្រុមហ៊ុនបែបនេះប្រព្រឹត្តអំពើល្មើសច្បាប់កាន់តែខ្លាំងឡើងៗបន្ថែមទៀតដែរ។

ចំណែកអ្នកវិភាគនយោបាយ និងជាប្រធានវេទិកាពលរដ្ឋលោក គឹម សុខ ក៏បានប្រាប់សារព័ត៌មាន The Cambodia Daily ដែរថា ការបាត់លុយរាប់រយលានដុល្លារអាមេរិកក្នុងក្រុមហ៊ុន CIC Partner រហូតគ្មានលុយបង់ការឱ្យម្ចាស់ភាគហ៊ុនរាប់រយនាក់នៅពេលនេះ មិនមែនគ្រាន់តែជាករណីបាត់លុយធម្មតាទេ គឺជាអំពើឆបោកដ៏ធំ ដែលអាចនឹងរអិលធ្លាក់ទៅក្នុងអំពើឧក្រិដ្ឋកម្មពុករលួយថែមទៀត ដោយសារតែអ្នកពាក់ព័ន្ធដែលជាស្ថាបនិកធំៗក្នុងក្រុមហ៊ុននេះ ក៏ទាក់ទិននឹងមន្ត្រីជាន់ខ្ពស់ក្នុងជួររដ្ឋាភិបាលកម្ពុជាដែរ ខណៈការស៊ើបអង្កេតស្រាវជ្រាវពីស្ថាប័នជំនាញនៅតែមិនត្រូវបានអនុវត្តនោះ។

លោក គឹម សុខ លើកឡើងថា ការស្រាវជ្រាវត្រូវធ្វើឡើងក្រោមតម្លាភាពតាមផ្លូវច្បាប់ដ៏ហ្មត់ចត់ ដើម្បីរកឱ្យឃើញថា តើបុគ្គលណាខ្លះជាអ្នកគ្រប់គ្រងក្នុងក្រុមហ៊ុននេះ ហើយពួកគេមានឋានៈជាអ្វីក្នុងសង្គម។ ជាងនេះទៀត តើមានអ្នកពាក់ព័ន្ធនៅពីក្រោយនៃការគ្រប់គ្រងក្រុមហ៊ុននេះដែរឬទេ បើមាន តើបុគ្គលនោះគឺជានរណា មានតួនាទីជាអ្វី ហេតុអ្វីមានសិទ្ធិធំក្នុងការបញ្ជា និងគ្រប់គ្រងក្រុមហ៊ុននេះទាំងមូលពីក្រោយខ្នងរហូតមកនោះ?

លោក គឹម សុខ បញ្ជាក់ថា បើមិនមានការស្រាវជ្រាវស៊ើបអង្កេតទេ នោះក្រុមហ៊ុននេះនឹងជាប់សង្ស័យពីការប្រព្រឹត្តអំពើឆបោក និងការប្រព្រឹត្តអំពើឧក្រិដ្ឋកម្មពុករលួយជាមិនខាន ដែលនាំឱ្យមានការសង្ស័យដល់រដ្ឋាភិបាលរបស់លោក ហ៊ុន ម៉ាណែត ថែមទៀត។

លោកបន្តថា ស្ថាបនិកដែលបង្កើតក្រុមហ៊ុននេះឡើងសុទ្ធសឹងតែជាក្រុមមនុស្សដែលមានទំនាក់ទំនងនឹងបណ្ដាញក្នុងជួររដ្ឋាភិបាល រួមទាំងលោក ហ៊ុន ម៉ាណែត ផ្ទាល់ និងឧកញ៉ា សុខ ពិសិដ្ឋ ដែលជានាយកក្រុមហ៊ុន ជី ហ្គៀរ ដែលគេស្គាល់ថាជាក្រុមហ៊ុនរបស់អ្នកស្រី ពេជ ចន្ទមុន្នី ស្របពេលដែលឧកញ៉ារូបនេះក៏ជាទីប្រឹក្សារបស់លោក ហ៊ុន ម៉ាណែត ដែរ។

ទាក់ទិននឹងបញ្ហានេះ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា បណ្ឌិត គី សេរីវឌ្ឍន៍ លើកឡើងជុំវិញការបោកប្រាស់របស់ក្រុមហ៊ុនដែលខ្ចីលុយពីប្រជាពលរដ្ឋដោយសន្យាផ្តល់ការប្រាក់ខ្ពស់ នៅថ្ងៃទី១៨ ខែមីនា ឆ្នាំ២០២៤ នេះថា ប្រជាពលរដ្ឋមិនគួរយកលុយទៅវិនិយោគក្នុងក្រុមហ៊ុនដែលសន្យាផ្តល់ការប្រាក់ខ្ពស់ឱ្យខ្លួននោះទេ។

លោកបន្ថែមថា ប្រសិនបើម្ចាស់ក្រុមហ៊ុនទាំងនោះអាចផ្តល់ការប្រាក់ខ្ពស់ឱ្យម្ចាស់លុយបានពិតមែន ពួកគេច្បាស់ជាមិនផ្តល់ការប្រាក់ទាំងនោះឱ្យទៅអ្នកដទៃឡើយ គឺពួកគេច្បាស់ជាទៅយកលុយពីធនាគារជាមិនខាន ព្រោះថាពិដានការប្រាក់របស់ធនាគារដែលកំណត់ដោយរដ្ឋខ្ពស់បំផុត គឺត្រឹមតែ ១,៥% ប៉ុណ្ណោះ ប៉ុន្តែពួកគេមិនអាចខ្ចីធនាគារបានទេ ដូច្នេះជម្រើសល្អបំផុតសម្រាប់អ្នកទាំងនោះ គឺមានតែខ្ចីលុយពីប្រជាពលរដ្ឋក្រោមរូបភាពនៃការបណ្ដាក់ទុនវិនិយោគប៉ុណ្ណោះ។

បណ្ឌិត គី សេរីវឌ្ឍន៍ បញ្ជាក់ថា មុខជំនួញដែលមានហានិភ័យខ្ពស់ តែងតែសន្យាផ្តល់ការប្រាក់ខ្ពស់ ដែលគេហៅថាហានិភ័យខ្ពស់ត្រូវបានលុបបំបាត់ដោយផលចំណេញខ្ពស់ដែរ។ លោកបន្ថែមថា អ្នកផ្តល់កម្ចីតែងតែរំពឹងថា បើក្រុមហ៊ុនដែលពួកគេផ្តល់កម្ចីនោះផ្តល់ការប្រាក់ត្រឹមតែរយៈពេល ៣ ទៅ ៤ខែ នោះពួកគេនឹងរួចខ្លួន ហើយបើពួកគេនៅតែអាចបន្តទទួលបានការប្រាក់នៅខែបន្ទាប់ទៀត នោះពួកគេនឹងចំណេញជាមិនខាន ប៉ុន្តែពួកគេមិនដែលទទួលបានការប្រាក់ដល់ទៅ ៤ ឬ ៥ខែនោះទេ យ៉ាងយូរបំផុតត្រឹម ១ខែ ឬ ២ខែប៉ុណ្ណោះ ពួកគេច្បាស់ជាលែងទទួលបានការប្រាក់នោះទៀតហើយ។

អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជារូបនេះគូសបញ្ជាក់ថា ការវិនិយោគបែបនេះ គេហៅថា ជាការវិនិយោគបោកប្រាស់ Fraud Investment ឬ Ponzi Scheme ដែលប្រជាពលរដ្ឋគួរប្រុងប្រយ័ត្នខ្ពស់បំផុត ព្រោះថាការបោកប្រាស់បែបនេះ ត្រូវបានប្រើក្នុងក្រុមហ៊ុនផ្សេងៗពីគ្នា ប៉ុន្តែស្ថិតក្នុងទម្រង់តែមួយប៉ុណ្ណោះ។

ជុំវិញបញ្ហានេះ គេក៏សង្កេតឃើញដែរថា ស្ថាប័នមានសមត្ថកិច្ចក៏មិនបានបើកការស៊ើបអង្កេតលើក្រុមហ៊ុន CIC Partner ដូចគ្នាដែរ បើទោះបីជាមានការទម្លាយពីអាថ៌កំបាំងមិនប្រក្រតីផ្ទៃក្នុង និងការតវ៉ាទាមទារលុយពីម្ចាស់ភាគហ៊ុនរងគ្រោះរាប់រយនាក់ដែលបានដាក់លុយចូលក្នុងក្រុមហ៊ុននេះជាបន្តបន្ទាប់នៅពេលនេះក៏ដោយ ដែលនាំឱ្យមានចម្ងល់ជាច្រើនជុំវិញបញ្ហានេះ ដូចជា៖

តើកន្លងមក ក្រុមហ៊ុន CIC Partner បានប្រមូលបានពីម្ចាស់ភាគហ៊ុនមានចំនួនប៉ុន្មាន ហើយប្រតិបត្តិការលើការវិនិយោគអ្វីខ្លះ និងចំណាយទុនវិនិយោគអស់ប៉ុន្មាន?
តើក្រុមហ៊ុននេះជួបវិបត្តិហិរញ្ញវត្ថុមកពីមូលហេតុអ្វី?
តើក្រុមហ៊ុនពិតជាបាត់លុយចំនួន ៨០លានដុល្លារអាមេរិកដូចការចោទប្រកាន់របស់ម្ចាស់ភាគហ៊ុនរងគ្រោះមែនដែរទេ?
បើគ្មានការស៊ើបអង្កេតទេ តើក្រុមហ៊ុន CIC Partner អាចជាក្រុមហ៊ុនលាងលុយខ្មៅឱ្យអ្នកមានអំណាចដែរទេ ទើបបានជាស្ថាប័នមានសមត្ថកិច្ចរបស់កម្ពុជា មិនបើកការស៊ើបអង្កេតលើរឿងនេះ?

រហូតមកដល់ពេលនេះ គេនៅមិនទាន់ឃើញស្ថាបនិកក្រុមហ៊ុន និងក្រុមហ៊ុនផ្ទាល់ ចេញមកបញ្ជាក់លើបញ្ហាបាត់លុយ និងបញ្ហាមិនផ្តល់ការប្រាក់ដែលកំពុងផ្ទុះការតវ៉ានៅពេលនេះទៅតាមផ្លូវច្បាប់ ដូចជា ការធ្វើសវនកម្មដើម្បីបញ្ជាក់ពីភាពស្អាតស្អំរបស់ខ្លួននៅឡើយទេ គឺមានតែការបដិសេធដែលធ្វើឡើងដោយភាគីក្រុមហ៊ុនផ្ទាល់ខ្លួនប៉ុណ្ណោះ។

ការវិនិយោគទុនដាក់លុយទទួលបានការប្រាក់របស់ក្រុមហ៊ុន CIC Partner គឺមានលក្ខណៈដូចគ្នាទៅនឹងរបៀបបោកបញ្ឆោតមួយជាភាសាអង់គ្លេសហៅថា Ponzi scheme ដែលមានឫសគល់ចេញពីបុរសជនជាតិអ៊ីតាលីម្នាក់ឈ្មោះ Charles Ponzi នាឆ្នាំ១៩២០។ មុខរបរបោកប្រាស់បែបនេះ ដោយសារតែពួកគេមានគំនិតលោភលន់ចង់បានផលប្រយោជន៍ច្រើន និងឆាប់រហ័ស។

នៅសហរដ្ឋអាមេរិក អាជ្ញាធរមានសមត្ថកិច្ចបានផ្ដន្ទាទោសមនុស្សរកស៊ីទុច្ចរិតបោកប្រាស់ក្នុងមុខជំនួញបែបនេះច្រើននាក់មកហើយ រួមទាំងគ្រួសារខ្មែរ-អាមេរិកាំងផងដែរ។

តាមអត្ថន័យក្នុងគេហទំព័រវិនិយោគតាមច្បាប់ Investopia និងការិយាល័យអ្នកច្បាប់ Zamansky LLC អ្នកផ្តើមរបររកស៊ី Ponzi ដាក់ទុនតិចតួច រួចដើរប្រមូលមនុស្សឲ្យចូលរួមដាក់ទុន ដោយសន្យាថានឹងផ្តល់ផលប្រយោជន៍លើសគេ ដូចជា ការប្រាក់ខ្ពស់ ផលចំណេញច្រើន ជាដើម។ ជួនកាល គេយកសាច់ញាតិរបស់គេដាក់ទុននាំមុខ ដើម្បីបង្ហាញអ្នកដទៃឲ្យមានការទាក់ចិត្តចង់ដាក់ទុនរកស៊ីដែរ។ គេបង់ការប្រាក់ខ្ពស់លើដើមទុនយ៉ាងទៀងទាត់ប៉ុន្មានខែដំបូង។

ម្ចាស់ដើមទុនចូលរួមសប្បាយចិត្តណាស់ ព្រោះឃើញបានផលដូចការសន្យាមែន។ តាមការពិត វិធីបង់ការប្រាក់លើប្រាក់ដើមទុន គឺគេគ្រាន់តែបង្វិលប្រាក់ក្នុងក្រុមហ៊ុននោះយកប្រាក់ពីអ្នកចូលរួមក្រោយៗ ទៅបង់ឲ្យអ្នកចូលរួមមុនៗតែប៉ុណ្ណោះ ពោលគឺបង្វិលយកពីមួយទៅឲ្យមួយទៀត រួមទាំងឲ្យខ្លួនឯងផ្ទាល់ជាអ្នកគ្រប់គ្រង ដោយមិនបានយកទុនទាំងនោះទៅបណ្ដាក់ក្នុងគម្រោងវិនិយោគណាមួយ ដើម្បីរកផលចំណេញឲ្យសមាជិកនោះឡើយ។ គេហៅម្យ៉ាងទៀតថា ជាវិធីរកស៊ីយកប្រាក់ពីអ្នកដទៃទៅចែកចាយគ្នាធ្វើសេដ្ឋី។

Ponzi scheme រស់រានទៅមុខបាន ហើយអាចបង់ការប្រាក់ខ្ពស់ដល់សមាជិករបស់ខ្លួនបាន អាស្រ័យនៅលើការរើសសមាជិកចូលថ្មីថែមទៀតតែប៉ុណ្ណោះ បើគ្មានសមាជិកចូលថ្មីថែមទៀតទេ នោះធនធានក្នុងដើមទុនពីមុនក៏ស្រកស្រុត ហើយនឹងរលាយបាត់អស់តែម្តង។ អ្នកច្បាប់អាមេរិកាំងរំឭកសាធារណជន អតិថិជនថា បើក្រុមហ៊ុនណាសន្យាក្នុងមុខរបរថាផ្តល់ផលច្រើនលើសគេ សូមឲ្យប្រយ័ត្នពិចារណា ហើយស៊ើបសួរតាមដានសិន។

នៅប្រទេសកម្ពុជាសព្វថ្ងៃនេះ ត្រូវគេមើលឃើញថា មានក្រុមហ៊ុនរកស៊ីបោកប្រាស់យកប្រាក់ពីពលរដ្ឋប្រភេទនេះច្រើនណាស់ ទាំងនៅជនបទ និងនៅតាមទីក្រុង ដោយពួកគេឃោសនាថា ក្រុមហ៊ុននឹងផ្តល់ការប្រាក់ខ្ពស់ជារៀងរាល់ខែ ប្រសិនបើពលរដ្ឋណាយកប្រាក់ទៅដាក់ទុននៅក្នុងក្រុមហ៊ុនរបស់ពួកគេនោះ។

ក្រោយពេលមានអ្នកជឿស្ម័គ្រចិត្តដាក់ដើមទុនចូលក្នុងក្រុមហ៊ុនរយៈពេល ២ ទៅ ៣ខែដំបូង ម្ចាស់ប្រាក់ទុនទាំងនោះតែងតែទទួលបានការប្រាក់យ៉ាងទៀងទាត់ ក្នុងនោះមានម្ចាស់ប្រាក់ខ្លះបានដាក់ប្រាក់ថែមទៀតរហូតដល់រាប់សិបម៉ឺនដុល្លារសហរដ្ឋអាមេរិក និងណែនាំឱ្យសាច់ញាតិ មិត្តភក្ដិ ព្រមទាំងខ្ចីប្រាក់ធនាគារទៅដាក់ក្នុងក្រុមហ៊ុននោះថែមទៀត។

ប៉ុន្តែនៅខែទី៥ ឬខែទី៦ ខាងក្រុមហ៊ុនមិនបានផ្តល់ការប្រាក់ឱ្យម្ចាស់ទុនទៀតនោះទេ ខណៈម្ចាស់ទុនទៅតវ៉ាយកប្រាក់របស់ខ្លួនត្រឡប់មកវិញ ភាគីខាងក្រុមហ៊ុនតែងប្រើល្បិចដោះដូរជាដីឡូត៍ដែលមានតម្លៃថោកៗ ឱ្យទៅម្ចាស់លុយទាំងនោះ ខណៈម្ចាស់លុយដែលធ្លាប់តែអស់សង្ឃឹមក្នុងការទទួលបានលុយត្រឡប់មកវិញ ក៏សុខចិត្តទទួលយកដីទាំងនោះ ទោះដឹងថាខ្លួនលក់ដីនោះមិនអាចទូទាត់លុយដែលខ្លួនបានបាត់បង់ក៏ដោយ ចំណែកខាងក្រុមហ៊ុន ក៏រួចខ្លួនពីសំណាញ់ច្បាប់ដោយសារតែល្បិចកលមួយនេះ ហើយលុយដែលពួកគេប្រមូលបាន ក៏ក្លាយជាលុយស្របច្បាប់របស់ពួកគេផ្ទាល់ខ្លួនតែម្តង។

ប្រភេទក្រុមហ៊ុនដូចបានរៀបរាប់ទាំងនេះ បានធ្វើប្រតិបត្តិការឆបោកពីពលរដ្ឋស្ទើរតែទូទាំងប្រទេសកម្ពុជាទៅហើយសព្វថ្ងៃនេះ ប៉ុន្តែគេមិនដែលឃើញរាជរដ្ឋាភិបាលមានវិធានការច្បាប់ណាមួយទៅលើក្រុមហ៊ុនទាំងនោះទេ ខណៈក្រុមហ៊ុនទាំងនោះអះអាងថា ខ្លួនជាក្រុមហ៊ុនស្របច្បាប់ដែលមានអាជ្ញាបណ្ណប្រកបអាជីវកម្មត្រឹមត្រូវពីរដ្ឋាភិបាលថែមទៀត៕

ភាគ២៖ ម្ចាស់ភាគហ៊ុនរងគ្រោះក្នុងក្រុមហ៊ុន CIC Partner ទាមទារស៊ើបអង្កេតករណីបាត់លុយរាប់សិបលានដុល្លារ

បទវិភាគ

បទវិភាគ៖ អាហ្វ្រិកខាងត្បូងអូសអ៊ីស្រាអែលឡើង ICC តែផ្ដល់ឱកាសឱ្យរុស្ស៊ីបន្តវិនាសកម្មនៅអ៊ុយក្រែន

បទវិភាគ៖ បក្សប្រឆាំងនៅថៃឡើងកាន់អំណាច បានទាញឱ្យមានការផ្សះផ្សាជាតិទូលំទូលាយ

បទវិភាគ៖ ហ្វីលីពីនលេងហ្គេមជាមួយចិនដើម្បីអូសចិនទៅកាន់តុលាការអន្តរជាតិសាជាថ្មីទៀតករណីជម្លោះដែនសមុទ្រ

បទវិភាគ៖ ពិភពលោកទំនងមិនអាចជួយបញ្ចប់ភ្លើងកំហឹងរបស់អ៊ីស្រាអែលបានទេ

អត្ថបទវិភាគ៖ ដំណោះស្រាយនយោបាយតឹងតែង

បទវិភាគ៖ បក្សកាន់អំណាចបង្កើតបន្ទប់ឃ្លាំមើលអ្នកប្រើប្រាស់អ៊ីនធឺណិត១០ឆ្នាំមកហើយ

បទវិភាគ៖ បើបក្សប្រឆាំងនៅថៃឈ្នះឆ្នោត តើពលរដ្ឋកម្ពុជាគួរបង្ហាញឆន្ទៈបោះឆ្នោតដូចម្តេចនៅខែកក្កដា?

បទវិភាគ៖ អ្វីនៅពីក្រោយមេដឹកនាំចិនសម្រេចលើកទូរសព្ទនិយាយទៅរកលោក ហ្សេឡេនស្គី?

អត្ថបទទាក់ទង

តុលាការបង្កកទ្រព្យសម្បត្តិនិងគណនីធនាគារលោក ជា សារ៉ន ៩៥គណនីនិងបង្គាប់ចាប់ខ្លួនមនុស្ស៩នាក់ទៀត

អាជ្ញាធរកម្ពុជាបណ្តេញជនជាតិវៀតណាម២៣១នាក់ជាប់ពាក់ព័ន្ធបទល្មើសឆបោកតាមអនឡាញ

អត្ថបទអានច្រើន

និស្សិតភូមា យករូបមេដឹកនាំកម្ពុជាលោក ហ៊ុន សែន ទៅជាន់ឈ្លីនិងដុតចោលតាមទីសាធារណៈ

លោក ហ៊ុន សែន គំរាមមិនឱ្យលោក ស ខេង ឈរជាបេក្ខភាពនាយករដ្ឋមន្ត្រីបន្ទាប់ពីលោកជាដាច់ខាត

អតិថិជនទិញអចលនទ្រព្យពីអ្នកឧកញ៉ា ឡេង ណាវ៉ាត្រា ទាមទារផ្ទះតាមកិច្ចសន្យា

អតិថិជនទិញផ្ទះល្វែងពីបុរីពិភពថ្មីកំបូលខកចិត្តនឹងគុណភាពសំណង់ផ្ទះល្វែង និងសេវាមួយចំនួនរបស់ក្រុមហ៊ុននេះ

លោក ជា សុផារ៉ា រងការចោទប្រកាន់ថាប្រព្រឹត្តអំពើពុករលួយក្នុងជួរបក្សកាន់អំណាចរបស់ខ្លួន

លោក សម រង្ស៊ី ប្រកាសរកការរួបរួមជាមួយបក្សកាន់អំណាចរបស់លោក ហ៊ុន សែន ដើម្បីជាតិខ្មែររុងរឿង

សេចក្ដីរាយការណ៍ពិសេស

អាជ្ញាធរបិទសំណុំរឿងឃាតកម្មសម្លាប់លោក ឈុត វុទ្ធី ដោយសារតែឃាតករជាប់ពាក់ព័ន្ធនឹងត្រកូលហ៊ុន

ថ្ងៃទី១៧មេសាឆ្នាំនេះ លោក ហ៊ុន សែន ត្រូវគេចាត់ទុកថាកំពុងបើកសករាជជ្រែករាជ្យដូចសេ្តចកន

ក្រុមហ៊ុន CIC Partner បាត់លុយ តើបាត់ទៅឯណា អ្នកណាទទួលខុសត្រូវ?

អ៊ុយក្រែន និង ICC សហការប្រមូលភស្តុតាងនាំខ្លួនលោក ពូទីន និងបក្ខពួកយកទៅកាត់ទោសករណីសម្លាប់រង្គាលនៅអ៊ុយក្រែន

សូមមេត្តាជួយគាំទ្រសារព័ត៌មានឯករាជ្យនៅកម្ពុជា។