របបគ្រប់គ្រងផ្ដាច់ការក្នុងពិភពលោក បានព្យាយាម និងកំពុងតែព្យាយាមអនុវត្តវិធានការបំបិទមាត់ក្រុមជំទាស់ ក្រុមអ្នកតស៊ូមតិទាមទារសិទ្ធិសេរីភាព យុត្តិធម៌ និងប្រជាធិបតេយ្យ ដោយប្រើធនធានបញ្ជូនភ្នាក់ងារដៃជើងរបស់គេ ឲ្យឆ្លងប្រទេសទៅតាមដានក្រុមទាំងនោះក្នុងទឹកដីមានសេរីភាព និងប្រជាធិបតេយ្យ ដូចជាសហរដ្ឋអាមេរិក កាណាដា សហភាពអឺរ៉ុប ជាដើម។
សភាអាមេរិកាំងបានស្នើច្បាប់មួយចំនួនដើម្បីឆ្លើយតបទៅនឹងការគំរាមកំហែងឆ្លងដែននេះ។
គណៈកម្មការសិទ្ធិមនុស្ស ថម ឡាន់ថូស នៃរដ្ឋសភាសហរដ្ឋអាមេរិក ដែលមានសហប្រធានពីគណបក្សនយោបាយទាំងពីរ គឺលោក James McGovern ពីបក្សប្រជាធិបតេយ្យ និងលោក Christopher Smith ពីបក្សសាធារណរដ្ឋ បើកកិច្ចប្រជុំមួយនៅថ្ងៃព្រហស្បតិ៍ ទី១៥ ខែកុម្ភៈ នេះ ដើម្បីស្តាប់សាក្សីបង្ហាញទឡ្ហីកម្ម ពិនិត្យលើសកម្មភាព ឥទ្ធិពល និងទំហំរបបផ្ដាច់ការ និងសំណើដើម្បីឆ្លើយតបទៅនឹងអំពើផ្ដន្ទាពីអ្នកដឹកនាំផ្ដាច់ការ។
ក្នុងចំណោមសាក្សីទាំង ៨នាក់ជាអ្នកការពារសិទ្ធិមនុស្ស ការពារសេរីភាព និងអ្នកកាសែត លោក តាំង សារ៉ាដា អ្នកឆ្លងឆ្លើយផ្សាយព័ត៌មាននៃសារព័ត៌មាន The Cambodia Daily ក៏ត្រូវបានអញ្ជើញធ្វើជាសាក្សីដែរ ព្រោះធ្លាប់រងនូវការគំរាមកំហែងពីដៃជើងអ្នកដឹកនាំផ្ដាច់ការនៅប្រទេសកម្ពុជា។
ដោយសារតែពួកអ្នកដឹកនាំផ្ដាច់ការក្នុងពិភពលោកមិនត្រឹមតែធ្វើទុក្ខបុកម្នេញ ផ្ដន្ទា គាបសង្កត់ បង្ក្រាបពលរដ្ឋរបស់ខ្លួនដែលទាមទាររកយុត្តិធម៌ក្នុងប្រទេសរបស់ខ្លួនទេ គេថែមទាំងតាមរាវរកសកម្មជនទាំងនោះនៅក្នុងប្រទេសសេរីថែមទៀត ដើម្បីបំភិតបំភ័យអ្នកទាំងនោះ និងក្រុមគ្រួសារនៅឯស្រុកកំណើត។
គេរកឃើញថា ពីឆ្នាំ២០១៤ ដល់ឆ្នាំ២០២២ មានព្រឹត្តិការណ៍កើតឡើងលើរូបកាយសកម្មជនតស៊ូមតិ ៨៥៤ករណីដែលបង្កហេតុដោយរដ្ឋាភិបាលចំនួន៣៨ ពីប្រទេសចំនួន៩១។ សាធារណរដ្ឋប្រជាមានិតចិន ប្រព្រឹត្តការគាបសង្កត់ឆ្លងដែនច្រើនជាងគេ បន្ទាប់មកប្រទេសតួកគី អេហ្ស៊ីប និងរ៉ូវ័នដា។ រីឯរបបដឹកនាំស្រុកខ្មែរគ្រប់គ្រងដោយបក្សប្រជាជនកម្ពុជា គេបង្កើតសាខាបក្សជាបណ្ដាញ ហៅថាក្រុមការងារយុវជនបក្សក្រៅប្រទេស ដើម្បីបង្ហាញវត្តមានរបស់ខ្លួនក្នុងប្រទេសសេរីប្រជាធិបតេយ្យ ឲ្យសមាជិកសហគមន៍ខ្មែរពុទ្ធសាសនិកខ្លបខ្លាចចូលជាសមាជិក ឬគាំទ្របក្សកាន់អំណាចដើម្បីផលប្រយោជន៍ផ្ទាល់ខ្លួន ដូចជាការព្រួយបារម្ភខ្លាចមិនបានទៅលេងស្រុកកំណើត ជាដើម។ល។
សភាតំណាងរាស្ត្របានធ្វើសេចក្តីស្នើច្បាប់លេខ HR-3654 មានឈ្មោះថា ច្បាប់ស្តីអំពីគោលការណ៍នយោបាយប្រឆាំងការគាបសង្កត់ឆ្លងដែន (Trans-national Repression Policy Act)។ ចំណែកឯខាងព្រឹទ្ធសភាសហរដ្ឋអាមេរិក ក៏មានសេចក្តីស្នើច្បាប់ឈ្មោះដូចគ្នា មានខ្លឹមសារស្រដៀងគ្នា ហៅថា S-831 ស្នើដោយសមាជិកព្រឹទ្ធសភា Jeff Merkley ពីរដ្ឋ Oregon ខាងបក្សប្រជាធិបតេយ្យ។ ដំណាលពេលគ្នានេះ សាខានីតិប្រតិបត្តិ ឬខាងសេតវិមាន ក៏ចាប់ផ្តើមស្នើបញ្ចូលលក្ខខណ្ឌច្បាប់បន្ថែម ដើម្បីឲ្យក្រសួងហិរញ្ញវត្ថុ មានអំណាចតាមដាន ស៊ើបអង្កេតរកប្រភពដើមដែលប្រើធនធានពីអាជីវកម្មទុច្ចរិតឧក្រិដ្ឋរបស់ខ្លួន ដើម្បីទិញអចលនទ្រព្យក្នុងទឹកដីសហរដ្ឋអាមេរិក។
លក្ខខណ្ឌច្បាប់នេះ តម្រូវឲ្យភ្នាក់ងារនៃក្រុមហ៊ុនទិញ-លក់អចលនទ្រព្យ ដីធ្លី ផ្ទះសម្បែង ហៅថា real estate agents រាយការណ៍ទៅកាន់ការិយាល័យបណ្ដាញអនុវត្តច្បាប់លើបទឧក្រិដ្ឋហិរញ្ញវត្ថុ ហៅថា FinCEN៕