ប្រធានាធិបតីអាមេរិក លោក ដូណាល់ ត្រាំ បានចង្អុលបង្ហាញថាពេលវេលារបស់លោក នីកូឡាស ម៉ាឌូរ៉ូ នៅក្នុងអំណាចកាន់តែជិតអស់ក្នុងពេលនេះ បើទោះបីជាលោកមិនផ្ដល់ព័ត៌មានពីការវាយប្រហារយោធាចូលទៅក្នុងទឹកដីប្រទេសនៅអាមេរិកខាងត្បូងមួយនេះក៏ដោយក្ដី។
តាមបណ្ដាញផ្សាយព័ត៌មាន ការព្រមានរបស់លោក ត្រាំ កើតឡើងចំពេលដែលលោកបន្តពង្រាយកម្លាំងយោធានៅតំបន់ការីបៀន និងការចោទប្រកាន់បន្តទៀតប្រឆាំងនឹងរដ្ឋាភិបាលលោក ម៉ាឌូរ៉ូ ថាពាក់ព័ន្ធនឹងសកម្មភាពភេរវកម្មគ្រឿងញៀន។
រដ្ឋការរបស់លោក ត្រាំ បានផ្ដល់នូវជម្រើសយោធាលើទឹកដីវេណេហ្ស៊ុយអេឡា មានបីសេណារីយ៉ូ គឺ៖
- ការប្រើប្រាស់ភ្នាក់ងារចារកម្ម CIA
- ការប្រើប្រាស់ក្រុមទ័ពពិសេសឆ្មាសមុទ្រ និងក្រុមទ័ពរាត្រី ដើម្បីតាមចាប់ខ្លួន ឬសម្លាប់លោក ម៉ាឌូរ៉ូ
- ការចាប់ធនធានប្រេងរបស់ប្រទេសនេះដោយកម្លាំងទ័ពអាមេរិក។
សេណារីយ៉ូទាំងបីនេះ ត្រូវបានមន្ត្រីសេតវិមានទម្លាយថា លោក ត្រាំ ត្រូវការពេលសម្រាប់ពិចារណា ដោយបារម្ភបរាជ័យដែលនឹងនាំមកនូវក្ដីអាម៉ាស់ ហើយបារម្ភនាំមកនូវការប៉ះពាល់ជីវិតដល់កងទ័ពអាមេរិក។
ក្នុងពេលនេះផងដែរមានការទម្លាយថា អាវុធមីស៊ីលរបស់រុស្ស៊ី និងដ្រូនរបស់អ៊ីរ៉ង់ បានដឹកជញ្ជូនចូលក្នុងទឹកដីវេណេហ្ស៊ុយអេឡា។ ចំណែកប្រទេសចិន កំពុងពិចារណាផ្ដល់ហិរញ្ញប្បទានឱ្យប្រទេសនេះខ្ចីថែមទៀតផង។
ឥឡូវនេះមានសេចក្ដីបញ្ជាក់ពីមន្ត្រីជំនិតលោក ត្រាំ នៅសេតវិមានថា ក្រសួងយុត្តិធម៌ កំពុងតែណែនាំនូវមូលដ្ឋានច្បាប់ដើម្បីឈានដល់ការធ្វើសកម្មភាពណាមួយក្នុងចំណោមសេណារីយ៉ូទាំងបីខាងលើនេះ។
បន្ថែមពីលើយុទ្ធនាការដាក់សម្ពាធលើលោក ម៉ាឌូរ៉ូ ក្នុងនាមជារដ្ឋការពាក់ព័ន្ធនឹងគ្រឿងញៀន ក្រសួងយុត្តិធម៌អាមេរិក នឹងរកវិធីសាស្ត្រដែលមិនចាំបាច់ឆ្លងកាត់សភាអនុម័តប្រើកម្លាំងយោធា ឬក៏មិនចាំបាច់ប្រើប្រាស់នូវការប្រកាសសង្គ្រាមនោះទេ។
ក្នុងខណៈដែលការណែនាំកំពុងត្រូវបានព្រាង មន្ត្រីរដ្ឋការមួយចំនួនរំពឹងថានឹងចាត់ទុកលោក ម៉ាឌូរ៉ូ និងមន្ត្រីសន្តិសុខកំពូលរបស់លោក ជាមេខ្លោងអង្គការភេរវកម្មគ្រឿងញៀន Cartel De Los Soles និង Tren de Aragua។
ក្រោមហេតុផលនេះ កងទ័ពអាមេរិកបានតាមសម្លាប់អ្នកជួញដូរគ្រឿងញៀនវេណេហ្ស៊ុយអេឡា ដោយសម្លាប់បាន ៦៧នាក់ ដែលលោក ត្រាំ ចាត់ទុកជាភេរវករគ្រឿងញៀន។ បន្ថែមពីលើហេតុផលនេះ ក្រសួងយុត្តិធម៌ ត្រូវគេរំពឹងថានឹងមិនបំពានច្បាប់ដែលហាមប្រាមការសម្លាប់មេដឹកនាំបរទេសនោះទេ។
ក្រោមហេតុផលថា លោក ត្រាំ អាចនឹងត្រូវណែនាំឱ្យប្រើប្រាស់ហេតុផលថាលោក ម៉ាឌូរ៉ូ មិនមែនជាប្រធានាធិបតីស្របច្បាប់របស់ប្រទេសវេណេហ្ស៊ុយអេឡា នោះទេ ព្រោះតែលោក ម៉ាឌូរ៉ូ ជាបេក្ខជនប្រធានាធិបតីចាញ់ឆ្នោត ហើយបេក្ខជនឈ្នះឆ្នោតគឺលោក Edmundo González មកពីបក្សប្រឆាំងរបស់អ្នកស្រី María Corina Machado។
លោក ដូណាល់ ត្រាំ ចុងក្រោយនេះបានផ្ញើសារជាសាធារណៈច្រើនដងមកហើយអំពីបំណងរបស់លោកចង់ប្ដូររបបដឹកនាំនៅវេណេហ្ស៊ុយអេឡា ដោយមិនដល់កម្រិតនៃការលើកទ័ពលុកលុយចូលទឹកដីវេណេហ្ស៊ុយអេឡា នោះទេ។
អ្នកសង្កេតការណ៍សង្ស័យថា លោក ត្រាំ នឹងប្រើប្រាស់សេណារីយ៉ូដាក់សម្ពាធខាងក្រៅជាអតិបរិមា និងការប្រើកម្លាំងយោធាអប្បបរមា ដោយការឡោមព័ទ្ធពីខាងក្រៅ និងធ្វើឱ្យកងទ័ពវេណេហ្ស៊ុយអេឡា បែកបាក់គ្នា ហើយរង់ចាំកម្លាំងប្រឆាំងក្នុងប្រទេសវេណេហ្ស៊ុយអេឡា ផ្ទុះការប្រឆាំងលោក ម៉ាឌូរ៉ូ។
នយោបាយរបស់សហរដ្ឋអាមេរិកនៃរដ្ឋការលោក ដូណាល់ ត្រាំ ចំពោះការផ្លាស់ប្ដូរអំណាចនៅវេណេហ្ស៊ុយអេឡា ត្រូវបានគេចាត់ទុកថាមិនមែនជារឿងសម្ងាត់ពេកទេ។
រដ្ឋមន្ត្រីការបរទេសអាមេរិក លោក Marco Rubio ដែលជាមនុស្សជិតស្និទ្ធនឹងប្រធានាធិបតីអាមេរិក បានបង្ហាញច្បាស់ពីចំណង់ចំណូលចិត្តនយោបាយរបស់លោក ដែលលោកមើលឃើញអំណាចរបស់លោក ម៉ាឌូរ៉ូ គួរតែត្រូវបានផ្តួលរំលំ។
លោក Rubio បាននិយាយថា លោក ម៉ាឌូរ៉ូ គឺជា “ជនផ្ដាច់ការដ៏អាក្រក់បំផុត” ហើយពេលសួរថា តើទាមទារឲ្យលោក ម៉ាឌូរ៉ូ ចាកចេញពីប្រទេស ឬក៏ចុះចេញពីអំណាច លោក Rubio បានឆ្លើយថា “យើងកំពុងធ្វើការលើគោលនយោបាយនេះហើយ”។
សហរដ្ឋអាមេរិក នៅតែមិនទទួលស្គាល់លោក ម៉ាឌូរ៉ូ ជាប្រធានាធិបតីស្របច្បាប់នៃប្រទេសវេណេហ្ស៊ុយអេឡា បន្ទាប់ពីការបោះឆ្នោតឆ្នាំ២០២៤ ជាថ្មីទៀត ត្រូវបានបដិសេធដោយអន្តរជាតិ និងគណបក្សប្រឆាំងនៅវេណេហ្ស៊ុយអេឡា។
ប្រជាជនវេណេហ្ស៊ុយអេឡា ជាង ៧០% ចង់ឱ្យអាមេរិកទម្លាក់អំណាចរបស់លោក ម៉ាឌូរ៉ូ។ នេះបើតាមក្រុមហ៊ុនស្ទង់មតិរបស់អង្គការស្ទង់មតិ Panterra មានមូលដ្ឋាននៅទីក្រុងឡុងដ៍។
អស់រយៈពេលពីរខែមកហើយដែលកងទ័ពសហរដ្ឋអាមេរិក បាននិងកំពុងបង្កើនកម្លាំងនាវាចម្បាំង យន្តហោះចម្បាំង យន្តហោះទម្លាក់គ្រាប់បែក កងទ័ពម៉ារីន យន្តហោះគ្មានមនុស្សបើក និងយន្តហោះចារកម្មនៅសមុទ្រការីបៀន នៅបន់អាមេរិកខាងត្បូង។ ឥឡូវនេះ វាផ្ទុកយន្តហោះ USS Gerald Ford ដែលអមដោយនាវាពិឃាតចំនួន ៨គ្រឿង ត្រូវបានរាយការណ៍ថាក៏បានដាក់ពង្រាយនៅតំបន់សមុទ្រការីបៀន ផងដែរ។
ការបញ្ជូននាវាផ្ទុកយន្តហោះ USS Gerald Ford ដ៏ធំជាងគេបំផុតនៅលើពិភពលោក និងការបង្ហាញសមត្ថភាពដោយយន្តហោះទម្លាក់គ្រាប់បែក B-52 B-1B នៅជិតឆ្នេរសមុទ្រវេណេហ្ស៊ុយអេឡា និងការបញ្ជ្រាបកម្លាំងភ្នាក់ងារចារកម្ម CIA នៅវេណេហ្ស៊ុយអេឡា ត្រូវបានគេមើលឃើញថា រដ្ឋការលោក ត្រាំ នឹងលើកទ័ពចូលទៅចាប់ខ្លួនបុរសខ្លាំងវេណេហ្ស៊ុយអេឡា លោក នីកូឡាស ម៉ាឌូរ៉ូ ដែលក្រសួងយុត្តិធម៌សហរដ្ឋអាមេរិក ចេញដីកាចាប់ខ្លួនករណីចោទថាជាមេខ្លោងភេរវករឧក្រិដ្ឋកម្មគ្រឿងញៀនដ៏ធំនៅអាមេរិកខាងត្បូង។
ជាមួយគ្នានេះ រដ្ឋការលោក ដូណាល់ ត្រាំ ក៏បានដំឡើងតម្លៃនៃការចាប់ខ្លួនលោក ម៉ាឌូរ៉ូ ដល់ទៅ ៥០លានដុល្លារទៅឱ្យក្រុមណាផ្ដល់ព័ត៌មានទៅភ្នាក់ងារ CIA ឬប៉ូលិស FBI ចូលទៅចាប់ខ្លួនជនផ្ដាច់ការរូបនេះនាំទៅកាត់ទោសនៅសហរដ្ឋអាមេរិក៕
© 2025, ឌឹ ខេមបូឌា ដេលី. All rights reserved.