អគ្គលេខាធិការអង្គការសហប្រជាជាតិលោក Antonio Guterres បានសម្ដែងក្ដីព្រួយបារម្ភជាខ្លាំងដែលថា ពិភពលោកអាចធ្លាក់ក្នុងសង្គ្រាមនុយក្លេអ៊ែរ បន្ទាប់ពីកូរ៉េខាងជើងព្រមានថាសូម្បីអាវុធនុយក្លេអ៊ែរ ក៏អាចបើកការវាយប្រហារទៅលើប្រទេសសត្រូវផងដែរ។
ថ្លែងទៅកាន់មហាសន្និបាតអង្គការសហប្រជាជាតិនៅក្នុងទីក្រុងញីវយ៉ក ក្នុងទិវាអន្តរជាតិលុបបំបាត់អាវុធនុយក្លេអ៊ែរ លោក Antonio Guterres បានហៅស្ថានភាពអសន្តិសុខនៅលើពិភពលោកសព្វថ្ងៃនេះថាកាន់តែធ្ងន់ធ្ងរ ដែលលោកអះអាងថា គេត្រូវរួមគ្នាបញ្ឈប់ការរត់ប្រណាំងសព្វាវុធ ទោះជាអាវុធណាក៏ដោយ។
ការថ្លែងរបស់លោកអគ្គលេខាធិការអង្គការសហប្រជាជាតិ បន្ទាប់ពីលោក Kim Song ឯកអគ្គរដ្ឋទូតកូរ៉េខាងជើង ប្រចាំនៅអង្គការសហប្រជាជាតិ ថ្លែងព្រមានទៅកាន់មហាសន្និបាតដែលលោកថា កូរ៉េខាងជើង មិនបង្ខំឱ្យមានការបង្កសង្គ្រាមនៅលើឧបទ្វីបរបស់កូរ៉េនោះទេ ព្រោះវានឹងនាំឲ្យមានសង្គ្រាមនុយក្លេអ៊ែរ។ លោក Kim Song បន្តថា ពិភពលោកកុំបន្ទោស ឬវាយប្រហារកូរ៉េខាងជើង គឺកូរ៉េខាងត្បូង ទេជាអ្នកបង្កឱ្យឧបទ្វីបធ្លាក់ក្នុងស្ថានភាពតានតឹង។
កូរ៉េខាងជើង ជារដ្ឋកុម្មុយនីស្តផ្ដាច់ការ ដែលស្ថិតក្រោមការដឹកនាំដោយអំណាចសន្តតិវង្ស ជាការឡើងកាន់តំណែងពីជីតាមកកូន និងពីកូនទៅចៅ។ មេដឹកនាំវ័យក្មេងរបស់ប្រទេសនេះ គឺលោក គីម ជុងអ៊ុន។ កាលពីពេលថ្មីៗនេះ លោក គីម ព្រមានរំលាយក្រុងសេអ៊ូល ដោយអាវុធនុយក្លេអ៊ែរ បើសង្គ្រាមនៅលើឧបទ្វីបនេះផ្ទុះឡើងជាថ្មីម្ដងទៀត។
នុយក្លេអ៊ែរ ជាអាវុធប្រល័យលោក។ នៅលើពិភពលោកនេះ យ៉ាងតិច ៩ប្រទេសដែលមានក្បាលគ្រាប់នុយក្លេអ៊ែរ។
ប្រទេសរុស្ស៊ី មានជិត ៦០០០គ្រាប់។ សហរដ្ឋអាមេរិក មាន ៥៥៥០គ្រាប់។ ចិន មាន ៣៥០គ្រាប់។ បារាំង មាន ២៨០គ្រាប់។ អង់គ្លេស មាន ២២៥គ្រាប់។ ប៉ាគីស្ថាន មាន ១៦៦គ្រាប់។ ឥណ្ឌា មាន ១៥៦គ្រាប់ អ៊ីស្រាអែល មាន ៩០គ្រាប់ ហើយកូរ៉េខាងជើង មាន ៤០គ្រាប់។
បច្ចុប្បន្ននេះ សន្ធិសញ្ញាកាត់បន្ថយការសាយភាយនុយក្លេអ៊ែររវាងសហរដ្ឋអាមេរិក និងរុស្ស៊ី ត្រូវបានផ្អាកដោយសារតែរុស្ស៊ី ដកខ្លួន។
អគ្គលេខាធិការអង្គការសហប្រជាជាតិ Antonio Guterres បានទាមទារឱ្យមានការស្ដារសន្ធិសញ្ញានេះឡើងវិញ ដែលសំដៅកាត់បន្ថយការសាយភាយអាវុធនុយក្លេអ៊ែរ ហើយឈានដល់ការផ្អាកការរត់ប្រណាំងសព្វាវុធប្រល័យលោកនេះ។
លោក Antonio Guterres ទទូចថា ពិភពលោកត្រូវរួមគ្នាបញ្ចៀសឱ្យបាននូវការបង្កទៅជាសង្គ្រាមនុយក្លេអ៊ែរ ហើយពុំនោះទេ ផែនដីនឹងរលាយ ហើយអ្វីៗនឹងរលាយទាំងអស់។
លោកថ្លែងថា លោកមិនចង់រំលឹកសោកនាដកម្មនៅលើកោះ Hiroshima និង Nagasaki ដែលត្រូវបានវាយប្រហារដោយគ្រាប់បែកប៉ារ៉ាម៉ាណូ កាលពីចុងបញ្ចប់នៃសង្គ្រាមលោកលើកទី២ នោះទេ។
ជាមួយគ្នានេះ លោកអគ្គលេខាធិការអង្គការសហប្រជាជាតិ ក៏បានទទូចត្រង់ទៅប្រទេសចិន ថា កុំព្យាយាមបង្កើនក្បាលគ្រាប់នុយក្លេអ៊ែរថែមទៀតអី។
ពិភពលោកកំពុងតែធ្លាក់ក្នុងការព្រួយបារម្ភថា យ៉ាងតិច ៤ប្រទេសដែលមានផែនការសាកល្បងបាញ់ក្បាលគ្រាប់នុយក្លេអ៊ែរក្រោមសមុទ្រ។ ប្រទេសទាំង ៤ នេះ មានរុស្ស៊ី ចិន កូរ៉េខាងជើង និងសហរដ្ឋអាមេរិក។ ប្រទេសទាំង ៤ នេះ តែងតែបង្កើនការបាញ់សាកល្បងក្បាលគ្រាប់នុយក្លេអ៊ែរ។
ប្រទេសកូរ៉េខាងជើង បានឱ្យដឹងថា នឹងមានការសាកល្បងបាញ់ក្បាលគ្រាប់នុយក្លេអ៊ែរជាថ្មីទៀតនៅពេលឆាប់ៗខាងមុខនេះ ទោះជាមានការព្រមានពីសហរដ្ឋអាមេរិក និងប្រទេសជាច្រើនទៀតក៏ដោយ។
លោក Antonio Guterres ទទូចថា ការរំលាយអាវុធនុយក្លេអ៊ែរ វានឹងនាំឱ្យពិភពលោកជៀសផុតមហាវិនាសកម្ម៕