28 C
Phnom Penh

ក្រសួង​មហាផ្ទៃ​ចេញ​បេសកកម្ម​បង្ក្រាប​អាជីវកម្ម​ឆបោក​តាម​ប្រព័ន្ធ​អនឡាញ ហៅ​ថា online scams

ដោយ ឌឹ ខេមបូឌា ដេលី

បទវិភាគ

ក្រុម​ការងារ​ជំនាញ​ក្រសួង​មហាផ្ទៃ ចុះ​បង្ក្រាប​បទល្មើស​ឆបោក​តាម​ប្រព័ន្ធ​អនឡាញ (Scammed online) នៅ​ខេត្ត​ព្រះសីហនុ រយៈពេល ២​ថ្ងៃ នៅ​ទីតាំង​ចំនួន ៣ ផ្សេង​គ្នា ឃាត់​ខ្លួន​មនុស្ស​ទាំង​ជនជាតិ​ខ្មែរ និង​ជនបរទេស​សរុប​ជិត ៥០០​នាក់ ដោយ​ក្នុង​នោះ​ជនបរទេស​ជាង ២០០​នាក់ នឹង​ត្រូវ​បណ្ដេញ​ចេញពី​ប្រទេស​កម្ពុជា។

យោង​តាម​ព័ត៌មាន​ដែល​បង្ហោះ​នៅ​លើ​គេហទំព័រ​របស់​ក្រសួង​មហាផ្ទៃ នៅ​ថ្ងៃទី​១២ ខែ​មីនា ឆ្នាំ​២០២៤ ក្រុម​មន្ត្រី​ជំនាញ​ក្រសួង​មហាផ្ទៃ បាន​ចុះ​ធ្វើ​ប្រតិបត្តិការ​បង្ក្រាប​នេះ​អស់​រយៈពេល ២​ថ្ងៃ នៅ​ទីតាំង​ចំនួន ៣ ផ្សេង​គ្នា។ ក្នុង​ប្រតិបត្តិការ​បង្ក្រាប​បទល្មើស​ឆបោក​តាម​ប្រព័ន្ធ​អនឡាញ​នេះ អាជ្ញាធរ​ខេត្ត​ព្រះសីហនុ ចាប់​បាន​មនុស្ស​ចំនួន ៤៧៩​នាក់ ក្នុង​នោះ​មាន​ជនជាតិ​ខ្មែរ​ចំនួន ២៧៩​នាក់ និង​ជនបរទេស​ចំនួន ២០០​នាក់។

ប្រភព​ដដែល​បាន​លើកឡើង​ថា នៅ​ថ្ងៃទី​៩ ខែ​មីនា ឆ្នាំ​២០២៤ ភ្នាក់ងារ​ក្រសួង​បាន​ចុះ​ធ្វើ​ប្រតិបត្តិការ​បង្ក្រាប​ទីតាំង​ទី​១ អតីត​កាស៊ីណូ ភែរឺដល អាយលែន (Paradise Island) រក​ឃើញ​ជនបរទេស ១៧២​នាក់ (ស្រី​៤៣​នាក់) មាន ៤​សញ្ជាតិ (វៀតណាម ១០៩​នាក់ (ស្រី ១៧​នាក់) ថៃ ៥៤​នាក់ (ស្រី ២៤​នាក់) ចិន​តៃវ៉ាន់ ៨​នាក់ (ស្រី ២​នាក់) និង​ចិន​ដី​គោក​ម្នាក់។ អ្នក​គ្រប់គ្រង​ចំនួន ៥​នាក់ (ស្រី ២​នាក់) មាន ២​សញ្ជាតិ ចិន​តៃវ៉ាន់ ៤​រូប (ស្រី ២​នាក់) និង​ចិន​ដី​គោក​ម្នាក់ កំពុង​បន្ត​នីតិវិធី​កសាង​សំណុំរឿង​ទៅ​សាលាដំបូង​ខេត្ត​ព្រះសីហនុ ចាត់ការ​តាម​ច្បាប់​ជា​ធរមាន។

ប្រភព​ដដែល​អះអាង​ទៀត​ថា សម្រាប់​ជនបរទេស​ចំនួន ១៦៧​នាក់ (ស្រី ៤១​នាក់) មាន ៣​សញ្ជាតិ (វៀតណាម ១០៩​នាក់ ថៃ ៥៤​នាក់ និង​ចិន​តៃវ៉ាន់ ៤​នាក់) បញ្ជូន​ទៅ​អគ្គនាយកដ្ឋាន​អន្តោប្រវេសន៍​ដើម្បី​ត្រៀម​បណ្តេញ​ចេញ។

ក្រសួង​មហាផ្ទៃ បាន​លើកឡើង​ថា នៅ​ថ្ងៃទី​១០ ខែ​មីនា ឆ្នាំ​២០២៤ បាន​ចុះ​ប្រតិបត្តិការ​បង្ក្រាប​ទីតាំង​ទី​២ រក​ឃើញ​ជនជាតិ​ខ្មែរ​ចំនួន ២៧៩​នាក់ (ស្រី ២២៧​នាក់) និង​រក​ឃើញ​ជនបរទេស​ចំនួន ២៨​នាក់ (ស្រី ៣​នាក់) មាន ២​សញ្ជាតិ (ចិន ២៧​នាក់ មីយ៉ាន់ម៉ា ១​នាក់)។ សម្រាប់​ជនបរទេស​ចំនួន ២៨​នាក់ (ស្រី ៣​នាក់) មាន ២​សញ្ជាតិ (ចិន ២៧​នាក់ មីយ៉ាន់ម៉ា ១​នាក់) បាន​បញ្ជូន​ទៅ​អគ្គនាយកដ្ឋាន​អន្តោប្រវេសន៍​ដើម្បី​ត្រៀម​បណ្តេញ​ចេញ។

ប្រភព​ដដែល​អះអាង​ថា គោលបំណង​នៃ​ប្រតិបត្តិការ​នេះ គឺ​លុប​បំបាត់​ឱ្យ​អស់​នូវ​ទីតាំង​ដែល​មាន​បទល្មើស​ឆបោក​តាម​ប្រព័ន្ធ​អនឡាញ (Online scams) គ្រប់​ប្រភេទ​នៅ​ក្នុង​ភូមិសាស្ត្រ​ខេត្ត​ព្រះសីហនុ។

រដ្ឋលេខាធិការ​ក្រសួង​មហាផ្ទៃ និង​ជា​ប្រធាន​គណៈកម្មការ​ចំពោះ​កិច្ច​ដើម្បី​បង្ក្រាប​បទល្មើស​ឆបោក​តាម​ប្រព័ន្ធ​អនឡាញ លោក សុខ ផល ដែល​ដឹកនាំ​ប្រតិបត្តិការ​នេះ បាន​ថ្លែង​ក្នុង​សន្និសីទ​សារព័ត៌មាន​នា​ល្ងាច​ថ្ងៃទី​១០ ខែ​មីនា ថា ការ​បង្ក្រាប​ល្បែង​ខុស​ច្បាប់​នៅ​ក្នុង​ខេត្ត​ព្រះសីហនុ នេះ គឺ​ផ្អែក​ទៅ​លើ​គោលការណ៍​រាជរដ្ឋាភិបាល ដោយ​លុប​បំបាត់​ល្បែង​ស៊ីសង​ខុស​ច្បាប់​ដើម្បី​អភិវឌ្ឍ​ខេត្ត​ទៅ​ជា​ខេត្ត​ឈានមុខ​ខាង​វិស័យ​ទេសចរណ៍ និង​អភិវឌ្ឍន៍​សម្រាប់​ប្រទេស​ជាតិ។

ជាមួយ​គ្នា​នេះ លោក សុខ ផល បាន​អំពាវនាវ​ដល់​អ្នក​ប្រកប​របរ​ល្បែង​ស៊ីសង​ខុស​ច្បាប់​ទាំងអស់ ត្រូវ​បិទ​ដោយ​ខ្លួនឯង និង​រក​របរ​ផ្សេង​ដែល​ស្រប​តាម​គោលនយោបាយ​របស់​រាជរដ្ឋាភិបាល ជាពិសេស​បម្រើ​ដល់​ការ​អភិវឌ្ឍ និង​អូសទាញ​ទេសចរ​មក​កាន់​ខេត្ត​ព្រះសីហនុ ឱ្យ​បាន​កាន់តែ​ច្រើន។ តាម​លោក សុខ ផល ក្នុង​រយៈពេល​ប្រមាណ​ជា ៣​ខែ​កន្លង​មក​នេះ ទីតាំង​លេង​ល្បែង​ខុស​ច្បាប់​ជាង ៣​ពាន់​ទីតាំង ត្រូវ​បាន​បង្ក្រាប និង​បិទ​ជា​ស្ថាពរ និង​បាន​អនុវត្ត​ផ្លូវ​ច្បាប់​ចំពោះ​មនុស្ស​ជាង ១​ម៉ឺន​នាក់។

អនុប្រធាន​វេទិកា​ពលរដ្ឋ លោក ម៉ែន ណាត បាន​ប្រាប់​សារព័ត៌មាន The Cambodia Daily កន្លង​មក​ថា ដើម្បី​ធានា​ប្រសិទ្ធភាព​ក្នុង​ការ​បង្ក្រាប​បទល្មើស​បច្ចេកវិទ្យា​ដែល​កំពុង​រីក​រាលដាល​ព្រោងព្រាត​នៅ​ប្រទេស​កម្ពុជា​សព្វថ្ងៃ​នេះ​ឲ្យ​មាន​ប្រសិទ្ធភាព អាជ្ញាធរ​មិន​អាច​ពឹង​តែ​លើ​សមត្ថភាព​បង្ក្រាប​នៃ​អង្គភាព​តែ​មួយ​ផ្នែក​បាន​ទេ។ អាជ្ញាធរ​ពាក់ព័ន្ធ​អាច​ស្នើសុំ​ការ​សហការ​ជាមួយ​ក្រសួង​ប្រៃសណីយ៍ និង​ទូរគមនាគមន៍ ដែល​ជា​ស្ថាប័ន​ជំនាញ​ខាង​បច្ចេកវិទ្យា ដើម្បី​ដោះស្រាយ​បញ្ហា​នេះ។

លោក ម៉ែន ណាត បញ្ជាក់​ថា ក្រៅពី​សហការ​ជាមួយ​ស្ថាប័ន​ជំនាញ សមត្ថកិច្ច​ដែល​មាន​តួនាទី​បង្ក្រាប​បទល្មើស​ទាំងនេះ ត្រូវតែ​បើក​ទូលាយ​បង្ហាញ​ពី​ចំណុច​ខ្សោយ​របស់​ខ្លួន​ដែល​គ្មាន​សមត្ថភាព​ក្នុង​ការ​បង្ក្រាប​ឧក្រិដ្ឋជន ដើម្បី​ទទួល​យក​ធាតុ​ចូល​ពី​សាកលវិទ្យាល័យ​ឯកជន​នានា និង​ស្ថាប័ន​ពាក់ព័ន្ធ​មួយ​ចំនួន​ដែល​មាន​ជំនាញ​ខាង​បច្ចេកវិទ្យា​នេះ។

ក្រសួង​ការបរទេស​សហរដ្ឋ​អាមេរិក បាន​បញ្ចេញ​សេចក្តី​រាយការណ៍​កាលពី​ពេល​កន្លង​ទៅ ស្ដីពី​ការ​ជួញដូរ​មនុស្ស ដែល​ដាក់​ប្រទេស​កម្ពុជា​ក្នុង​បញ្ជីខ្មៅ​ស្ថិត​ក្រោម​ការ​ឃ្លាំមើល​កម្រិត​ពីរ (Tier 2 Watch List) ទម្លាក់​ទៅ​កម្រិត​៣ (Tier 3 Watch List) ដែល​ធ្វើ​ឲ្យ​រាជាណាចក្រ​កម្ពុជា​នៅតែ​បន្ត​ស្ថិត​នៅ​ក្នុង​បញ្ជីខ្មៅ​នៃ​ការ​ជួញដូរ​មនុស្ស​ធ្ងន់ធ្ងរ​ដដែល​សព្វថ្ងៃ​នេះ។

ទាក់ទិន​នឹង​បញ្ហា​នេះ កាលពី​ថ្ងៃទី​១១ ខែ​ធ្នូ ឆ្នាំ​២០២២ សហរដ្ឋ​អាមេរិក ចក្រភព​អង់គ្លេស និង​កាណាដា បាន​កំណត់​គោលដៅ​ដាក់​ទណ្ឌកម្ម​លើ​ឧក្រិដ្ឋកម្ម​ធំៗ​ដែល​កំពុង​ប្រតិបត្តិការ​ឆបោក​នៅ​ក្នុង​តំបន់​អាស៊ី​អាគ្នេយ៍ ដែល​គេ​រក​ឃើញ​មុខសញ្ញា​នៅ​ក្នុង​ប្រទេស​ឡាវ កម្ពុជា និង​មីយ៉ាន់ម៉ា ឬ​ភូមា សព្វថ្ងៃ​នេះ។

កាលពី​អំឡុង​ខែ​កក្កដា ឆ្នាំ​២០២៣ អង្គការ​សហប្រជាជាតិ បាន​បង្ហាញ​សេចក្តី​រាយការណ៍​ថា អំពើ​ឆបោក​តាម​អ៊ីនធឺណិត​នៅ​ក្នុង​តំបន់​អាស៊ី​អាគ្នេយ៍ កំពុង​បង្កើត​ប្រាក់ចំណូល​រាប់​ពាន់​លាន​ដុល្លារ​សហរដ្ឋ​អាមេរិក ដោយ​មាន​ជនរងគ្រោះ​ប្រមាណ ១​សែន​នាក់ ត្រូវ​បាន​ជួញដូរ​ចូល​ទៅ​ក្នុង​ប្រទេស​កម្ពុជា និង​ជាង ១​សែន​នាក់​ផ្សេង​ទៀត (១២០០០០​នាក់) ចូល​ទៅ​កាន់​ប្រទេស​ភូមា ផង​ដែរ ប៉ុន្តែ​តួលេខ​នេះ ត្រូវ​បាន​រាជរដ្ឋាភិបាល​កម្ពុជា បដិសេធ​ចោល​ទាំងស្រុង។

មាន​សំណួរ​ថា តើ​ហេតុ​អ្វី​រាជរដ្ឋាភិបាល​បាន​បណ្តោយ​ឲ្យ​មាន​បទល្មើស​បែប​នេះ​រស់​រាន​បាន​យូរ​ម្ល៉េះ? មាន​ចម្លើយ​តប​មក​វិញ​ថា មកពី​រាជរដ្ឋាភិបាល​ខ្វះ​ថវិកា​បង្គ្រប់​ការ​ចំណាយ​រដ្ឋ ដូច្នេះ​មាន​តែ​បណ្តែតបណ្តោយ​សកម្មភាព​ល្បែង​ស៊ីសង ឆបោក​អនឡាញ​បន្តិច​សិន ដើម្បី​រក​ចំណូល​ចែក​ដល់​រដ្ឋ​ខ្លះ​ដែរ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស