 ទៅប្រទេសកម្ពុជា ក្នុងនាមគណបក្សភឿថៃ និងគណបក្សប្រជាជនកម្ពុជា នៅពេលនេះ គឺដើម្បីរឹតចំណងបក្សនិងបក្ស គ្រួសារនិងគ្រួសារ សម្រាប់ផលប្រយោជន៍ត្រកូលហ៊ុន និងត្រកូលស៊ីណាវ៉ាត្រា តែប៉ុណ្ណោះ។){kind=link}
ក្រុមអ្នកវិភាគនយោបាយ លើកឡើងថា ដំណើរទស្សនកិច្ចរបស់ប្រធានគណបក្សភឿថៃ អ្នកស្រី ផែថងថាន ស៊ីណាវ៉ាត្រា (Paetongtarn Shinawatra) ទៅប្រទេសកម្ពុជា ក្នុងនាមគណបក្សភឿថៃ និងគណបក្សប្រជាជនកម្ពុជា នៅពេលនេះ គឺដើម្បីរឹតចំណងបក្សនិងបក្ស គ្រួសារនិងគ្រួសារ សម្រាប់ផលប្រយោជន៍ត្រកូលហ៊ុន និងត្រកូលស៊ីណាវ៉ាត្រា តែប៉ុណ្ណោះ។
អ្នកវិភាគនយោបាយ និងជាប្រធានវេទិកាពលរដ្ឋលោក គឹម សុខ ប្រាប់សារព័ត៌មាន The Cambodia Daily នៅថ្ងៃទី១៩ មីនា នេះថា ការរឹតចំណងបក្សនិងបក្ស គ្រួសារនិងគ្រួសារនេះប្រាកដជាទទួលបានការសន្យាពីគ្រួសារលោក ថាក់ស៊ីន ស៊ីណាវ៉ាត្រា ក្នុងការជួយគាបសង្កត់អ្នកតស៊ូដើម្បីប្រជាធិបតេយ្យ ដែលកំពុងស្នាក់នៅទឹកដីថៃ សព្វថ្ងៃនេះជាមិនខាន។
ជាងនេះទៀត ក៏អាចទទួលបានជំនួយហិរញ្ញវត្ថុពីត្រកូល ស៊ីណាវ៉ាត្រា ក្នុងកិច្ចសហប្រតិបត្តិការវិនិយោគដែលគ្មានតម្លាភាពនានា ជាពិសេសគម្រោងវិនិយោគក្នុងដែនសមុទ្រត្រួតស៊ីគ្នារវាងថៃ និងកម្ពុជា ដែលកំពុងចរចាគ្នានៅពេលនេះផងដែរ។
លោកបន្ថែមថា ផ្ទុយទៅវិញ កម្ពុជាក៏ប្រឈមនឹងគ្រោះថ្នាក់បាត់បង់ផលប្រយោជន៍យ៉ាងធំក្រោមចំណងមិត្តភាពនេះ ព្រោះថាគ្រួសារលោក ថាក់ស៊ីន ស៊ីណាវ៉ាត្រា អាចទាញផលចំណេញសម្រាប់គ្រួសារ គណបក្ស និងសម្រាប់ប្រទេសថៃ ផង ដូចជាការទាញយកផលប្រយោជន៍ប្រេងពីដែនសមុទ្រត្រួតស៊ីគ្នាកម្ពុជា-ថៃ ទៅថ្ងៃមុខ។
ជាងនេះទៀត ប្រទេសថៃ ក៏នឹងបោះជំហានទៅរកផលប្រយោជន៍ពីគម្រោងវិនិយោគនានាផ្សេងទៀតដែរពីកម្ពុជា ដូចជានៅខេត្តកោះកុង តំបន់ប្រាសាទព្រះវិហារ និងតំបន់ព្រំដែនត្រីកោណបីប្រទេសកម្ពុជា-ថៃ-ឡាវ ថែមទៀត។
លោក គឹម សុខ បញ្ជាក់ថា បញ្ហាប្រឈមខាងលើនេះ កម្ពុជានឹងរងនូវការគំរាមកំហែងដល់បូរណភាពទឹកដីរបស់ខ្លួនយ៉ាងធ្ងន់ធ្ងរ ស្របពេលដែលគ្រួសារលោក ថាក់ស៊ីន ស៊ីណាវ៉ាត្រា ព្រមទាំងគណបក្សភឿថៃ នឹងទទួលបានជំនួយពីគ្រួសារលោក ហ៊ុន សែន គ្រប់បែបយ៉ាងក្នុងផែនការជួយគ្នារក្សាអំណាចទៅវិញទៅមក។
អ្នកវិភាគនយោបាយរូបនេះបញ្ជាក់ថា ក្រៅពីផលប្រយោជន៍របស់គ្រួសារលោក ថាក់ស៊ីន ស៊ីណាវ៉ាត្រា គ្រួសារលោក ហ៊ុន សែន ក៏មានផលប្រយោជន៍ដែរ គឺត្រកូល ហ៊ុន កំពុងព្យាយាមបង្កើតទំនាក់ទំនងឱ្យមានគណបក្សដៃគូមួយនៅប្រទេសថៃ ដែលអាចទុកចិត្តគ្នាបានសម្រាប់ជួយអំណាចគ្រួសាររបស់គាត់ក្នុងគ្រាអាសន្ននៅពេលណាមួយ ព្រោះថាក្រុមគ្រួសារត្រកូល ហ៊ុន សព្វថ្ងៃនេះ កំពុងព្រួយបារម្ភខ្លាចគណបក្សកុម្មុយនីស្តវៀតណាម បោះបង់ខ្លួនចោល ដោយការផ្លាស់ប្ដូរមេដឹកនាំថ្មីឱ្យក្តោបក្តាប់គណបក្សប្រជាជនកម្ពុជាទៅថ្ងៃមុខ។
កាលពីថ្ងៃទី១៨ ខែមីនា ឆ្នាំ២០២៤ នេះ ប្រធានគណបក្សភឿថៃ អ្នកស្រី ផែថងថាន ស៊ីណាវ៉ាត្រា បានបំពេញទស្សនកិច្ចនៅកម្ពុជាតាមសំណើរបស់មេដឹកនាំបក្សកាន់អំណាចលោក ហ៊ុន សែន ក្នុងនោះគណបក្សប្រជាជនកម្ពុជា ក៏បានចេញសេចក្តីប្រកាសព័ត៌មានជុំវិញដំណើរទស្សនកិច្ចនេះកាលពីថ្ងៃចន្ទ ដើមសប្ដាហ៍នេះដែរ ដោយបញ្ជាក់ថា ដំណើរទស្សនកិច្ចនេះ គឺជាការផ្លាស់ប្ដូរទស្សនកិច្ចជាន់ខ្ពស់រវាងគណបក្សប្រជាជនកម្ពុជា និងគណបក្សភឿថៃ ដោយផ្អែកលើចំណងមិត្តភាព និងកិច្ចសហប្រតិបត្តិការជិតស្និទ្ធរវាងគណបក្សទាំងពីរ។
សេចក្តីប្រកាសព័ត៌មានដដែលបញ្ជាក់ថា ក្នុងដំណើរទស្សនកិច្ចនេះ ភាគីទាំងពីរបានផ្លាស់ប្ដូរទស្សនទាន និងបទពិសោធន៍នៅក្នុងការកសាងបក្ស និងអភិបាលកិច្ចស្ថាប័នរដ្ឋ។
ជាងនេះទៀត ដំណើរទស្សនកិច្ចនេះក៏ជាការចូលរួមចំណែកក្នុងការជំរុញកិច្ចសហប្រតិបត្តិការនៃប្រទេសជាប់ភូមិផងរបងជាប់គ្នា និង «ភាពជាដៃគូយុទ្ធសាស្ត្រ» ដែលបានប្រកាសនៅក្នុងដំណើរទស្សនកិច្ចផ្លូវការរបស់នាយករដ្ឋមន្ត្រីកម្ពុជាលោក ហ៊ុន ម៉ាណែត នៅប្រទេសថៃ កាលពីអំឡុងខែកុម្ភៈ ឆ្នាំ២០២៤ កន្លងទៅដែរ។
ក្នុងដំណើរទស្សនកិច្ចនេះ ប្រធានគណបក្សភឿថៃ អ្នកស្រី ផែថងថាន ស៊ីណាវ៉ាត្រា បានជួបជាមួយមេដឹកនាំបក្សកាន់អំណាចលោក ហ៊ុន សែន នាយករដ្ឋមន្ត្រីកម្ពុជាលោក ហ៊ុន ម៉ាណែត ប្រធានព្រឹទ្ធសភាលោក សាយ ឈុំ និងប្រធានរដ្ឋសភាកម្ពុជាអ្នកស្រី ឃួន សុដារី ផងដែរ។ ក្រៅពីនេះ ក៏មានជំនួបជាមួយមន្ត្រីរដ្ឋាភិបាលផ្សេងៗទៀតដែរ ដូចជា រដ្ឋមន្ត្រីក្រសួងមុខងារសាធារណៈ លោក ហ៊ុន ម៉ានី ជាដើម។
ទាក់ទិននឹងបញ្ហានេះ កាលពីចុងខែកុម្ភៈ ឆ្នាំ២០២៤ មេដឹកនាំបក្សកាន់អំណាចលោក ហ៊ុន សែន បានធ្វើដំណើរទៅសួរសុខទុក្ខអតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត្រា ដល់ទីក្រុងបាងកក ប្រទេសថៃ ព្រមទាំងបានស្នើឱ្យប្រធានគណបក្សភឿថៃ ទៅទស្សនកិច្ចនៅប្រទេសកម្ពុជាផងដែរ។
ជុំវិញដំណើរទស្សនកិច្ចរបស់ប្រធានគណបក្សភឿថៃ អ្នកស្រី ផែថងថាន ស៊ីណាវ៉ាត្រា នៅពេលនេះ ត្រូវបានសារព័ត៌មាន Khaosod របស់ថៃ ចុះផ្សាយកាលពីថ្ងៃចន្ទ ទី១៨ មីនា ថា ដំណើរទស្សនកិច្ចនេះគឺដើម្បីពង្រឹងទំនាក់ទំនងកម្ពុជា-ថៃ។
ប្រភពដដែលបញ្ជាក់ថា ការពង្រឹងទំនាក់ទំនងម្តងនេះនឹងនាំឱ្យកិច្ចសហប្រតិបត្តិការ និងទំនាក់ទំនងកាន់តែប្រសើរឡើងរវាងប្រទេសទាំងពីរ ខណៈមជ្ឈដ្ឋាននានាក្នុងប្រទេសថៃ មើលឃើញថា ដំណើរទស្សនកិច្ចនេះជាការចរចាជុំវិញតំបន់ជម្លោះត្រួតស៊ីគ្នារវាងសមុទ្រថៃ និងកម្ពុជា ដែលបានអូសបន្លាយអស់រយៈពេលរាប់ឆ្នាំកន្លងមកនោះ៕