អ្នកគាំទ្របក្សឆាំងដែលជាជនពិការ លោក ភុន យុទ្ធ ត្រូវបានសមត្ថកិច្ចឃាត់ខ្លួន និងដាក់ពន្ធនាគារជាលើកទី២ ក្រោមបទចោទប្រកាន់ «ញុះញង់ឱ្យមានការរើសអើង» ក្រោយពីបង្ហោះសារនៅលើបណ្ដាញសង្គមក្នុងន័យរិះគន់រាជរដ្ឋាភិបាលកម្ពុជា។
ព្រះរាជអាជ្ញារងនៃអយ្យការអមសាលាដំបូងខេត្តតាកែវ លោក ទៀវ ពណ្ណរាយ បានប្រាប់អ្នកសារព័ត៌មានថា សមត្ថកិច្ចចាប់ខ្លួនឈ្មោះ ភុន យុទ្ធ ដោយគ្មានដីកា ពីព្រោះព្រះរាជអាជ្ញាពិនិត្យឃើញថាជាបទល្មើសជាក់ស្តែង ដោយសារគាត់សរសេររិះគន់ដោយប្រើប្រាស់ពាក្យមិនគប្បីមកលើរដ្ឋាភិបាលកម្ពុជាជាច្រើនលើកច្រើនសានៅតាមបណ្ដាញសង្គមហ្វេសប៊ុក។
ប្រភពខាងលើបានលើកឡើងថា សមត្ថកិច្ចធ្លាប់ហៅបុគ្គលរូបនេះមកធ្វើកិច្ចសន្យាចំនួនពីរលើករួចមកហើយ។ បច្ចុប្បន្ន សមត្ថកិច្ចឃុំខ្លួនគាត់បណ្ដោះអាសន្ន ដើម្បីចាត់ការបន្តតាមនីតិវិធីច្បាប់។
នាយកគ្រប់គ្រងកម្មវិធីនៃអង្គការលីកាដូ លោក អំ សំអាត ថ្លែងថា នេះជាការរឹតត្បិតសិទ្ធិសេរីភាពក្នុងការបញ្ចេញមតិរបស់ពលរដ្ឋ។ លោកមិនគិតថាលោក ភុន យុទ្ធ មានគំនិតទៅបង្កឱ្យមានការរើសអើងដល់បុគ្គល និងជាតិសាសន៍ណាមួយឡើយ ការរិះគន់របស់លោកកន្លងមក គឺដើម្បីកែលម្អស្ថាបនាសម្រាប់ផលប្រយោជន៍ជាតិ។ លោកស្នើឱ្យតុលាការដោះលែងលោក ភុន យុទ្ធ ឱ្យមានសេរីភាពឡើងវិញ។
កាលពីល្ងាចថ្ងៃទី១៩ ខែមីនា សមត្ថកិច្ចខេត្តតាកែវ បានចូលទៅចាប់ខ្លួនលោក ភុន យុទ្ធ នៅក្នុងផ្ទះស្ថិតនៅភូមិត្រពាំងឈូក ឃុំត្រឡាច ស្រុកទ្រាំង ខេត្តតាកែវ ក្រោមបទចោទ «ញុះញង់ឱ្យមានការរើសអើង»។
កាលពីចុងខែតុលា ឆ្នាំ២០១៩ តុលាការខេត្តសៀមរាប បានផ្ដន្ទាទោសលោក ភុន យុទ្ធ ឱ្យជាប់ពន្ធនាគារ ១៨ខែ ពីបទញុះញង់ឱ្យមានការរើសអើង និងជេរប្រមាថជាសាធារណៈ ដោយលោកប្រើគណនីហ្វេសប៊ុកឈ្មោះ «ខ្ញុំចង់បាននាយករដ្ឋមន្ត្រីថ្មី» ដែលបានបង្ហោះសាររិះគន់អំពីចំណុចអវិជ្ជមាន របបដឹកនាំបច្ចុប្បន្ន និងទាមទារឲ្យលោក ហ៊ុន សែន ចុះចេញពីតំណែង៕