ប្រធានគណបក្សសង្គ្រោះជាតិ លោក កឹម សុខា នៅតែបន្តការពារភាពស្អាតស្អំរបស់ខ្លួនថាមិនបានឃុបឃិតជាមួយរដ្ឋបរទេសដូចការចោទប្រកាន់របស់សាលាដំបូងរាជធានីភ្នំពេញ ដែលបានសម្រេចកាត់ទោសពីបទ «ក្បត់ជាតិ» នោះទេ ខណៈអង្គសវនាការនៅថ្ងៃទី៤ មេសា នេះ បានជជែកដេញដោលលើអង្គហេតុចំនួន៣។
សហមេធាវីការពារក្តីលោក កឹម សុខា អ្នកស្រី ម៉េង សុភារី បានថ្លែងថា នៅក្នុងសវនាការលើកទី៦ នៅព្រឹកថ្ងៃទី៤ ខែមេសា ឆ្នាំ២០២៤ នេះ នៅសាលាឧទ្ធរណ៍ លោក កឹម សុខា នៅតែបន្តការពារភាពស្អាតស្អំរបស់ខ្លួនលើការចោទប្រកាន់របស់សាលាដំបូងរាជធានីភ្នំពេញ ដែលបានសម្រេចកាត់ទោសលោកឱ្យជាប់ពន្ធនាគារចំនួន ២៧ឆ្នាំ ពីបទ «ក្បត់ជាតិ»។ អ្នកស្រីថា លោក កឹម សុខា បានអះអាងការពារភាពស្អាតស្អំរបស់គាត់ថា គាត់មិនបានឃុបឃិតជាមួយបរទេសដូចការចោទប្រកាន់នោះទេ។
ចំណែកមន្ត្រីសមាគមការពារសិទ្ធិមនុស្សអាដហុក លោក យី សុខសាន្ត ដែលបានចូលរួមតាមដានសវនាការ បានឲ្យដឹងថា អង្គសវនាការនៅថ្ងៃពុធ ទី៣ មេសា នេះបានជជែកដេញដោលលើអង្គហេតុចំនួន៣ គឺទី១ ថ្ងៃចន្ទពណ៌ខ្មៅ ទី២ ផ្កាឈូក និងទី៣ កណ្ដាប់ដៃ។ លោកថា លោ កឹម សុខា នៅតែបដិសេធថាលោកពុំបានឃុបឃិតជាមួយបរទេសនោះទេ។
កាលពីថ្ងៃទី៣ ខែមីនា ឆ្នាំ២០២៣ សាលាដំបូងរាជធានីភ្នំពេញ បានផ្ដន្ទាទោសប្រធានគណបក្សសង្គ្រោះជាតិលោក កឹម សុខា ឲ្យជាប់ពន្ធនាគាររយៈពេល ២៧ឆ្នាំ ដោយឃុំខ្លួនក្នុងផ្ទះ ពីបទគប់គិតជាមួយរដ្ឋបរទេស ដើម្បីផ្តួលរំលំរដ្ឋាភិបាលរបស់លោក ហ៊ុន សែន បន្ទាប់ពីលោក កឹម សុខា ត្រូវបានសមត្ថកិច្ចសម្រុកចូលទៅចាប់ខ្លួនដល់ផ្ទះកាលពីយប់ថ្ងៃទី៣ ខែកញ្ញា ឆ្នាំ២០១៧ ហើយគណបក្សសង្គ្រោះជាតិ ត្រូវបានតុលាការកំពូលក្រុងភ្នំពេញ ប្រកាសរំលាយកាលពីថ្ងៃទី១៦ ខែវិច្ឆិកា ឆ្នាំ២០១៧ ដដែលនោះ។
សំណុំរឿងរបស់លោក កឹម សុខា កំពុងដំណើរការនៅសាលាឧទ្ធរណ៍សព្វថ្ងៃនេះ។ តុលាការថ្នាក់កណ្តាលមួយនេះ បានសម្រេចបើកសវនាការលើសំណុំរឿងនេះត្រឹមតែ ៩លើកប៉ុណ្ណោះ ហើយនឹងត្រូវធ្វើឡើង ២ដងក្នុង ១ខែ នៅរៀងរាល់ព្រឹកថ្ងៃព្រហស្បតិ៍ ដូច្នេះ បើគិតមកទល់នឹងពេលនេះ តុលាការបានបើកសវនាការបានចំនួន ៦លើកហើយ គឺលើកទី១ នៅថ្ងៃទី៣០ ខែមករា លើកទី២ នៅថ្ងៃទី៨ ខែកុម្ភៈ និងលើកទី៣ នៅថ្ងៃទី២២ ខែកុម្ភៈ លើកទី៤ គឺនៅថ្ងៃទី៧ ខែមីនា និងលើកទី៥ គឺនៅថ្ងៃទី២១ ខែមីនា និងលើកទី៦ នៅថ្ងៃទី៤ ខែមេសា ឆ្នាំ២០២៤ នេះ។
សវនាការលើសំណុំរឿងរបស់លោក កឹម សុខា ក្នុងសាលាឧទ្ធរណ៍នៅសល់តែ ៣លើកទៀតប៉ុណ្ណោះ នឹងត្រូវតុលាការសម្រេចប្រកាសសាលក្រម ខណៈលទ្ធផលនៃសវនាការនេះ គេរំពឹងថាសាលាឧទ្ធរណ៍នឹងចាត់ទុកសាលក្រមរបស់សាលាដំបូងជាបានការដដែល ក្នុងនោះ គេក៏រំពឹងដែរថា បើលោក កឹម សុខា ប្តឹងទៅតុលាការកំពូលបន្តទៀត នោះលទ្ធផលក៏មិនខុសគ្នាពីសាលាដំបូងដែរ ព្រោះគេដឹងថាតុលាការកម្ពុជាសព្វថ្ងៃនេះ គឺស្ថិតក្រោមបញ្ជារបស់លោក ហ៊ុន សែន ប៉ុណ្ណោះ។
សំណុំរឿងប្រធានគណបក្សសង្គ្រោះជាតិលោក កឹម សុខា ត្រូវបានគេចាត់ទុកថាជាសំណុំរឿងដែលយូរជាងគេក្នុងប្រវត្តិនៃការកាត់ក្តីនៅកម្ពុជា ហើយបញ្ហានេះត្រូវមជ្ឈដ្ឋាននានារិះគន់ថាជាសំណុំរឿងដែលស្ថិតក្នុងរបៀបវារៈនយោបាយ ជាជាងការស្វែងរកយុត្តិធម៌តាមប្រព័ន្ធតុលាការ ត្បិតតុលាការកម្ពុជាត្រូវគេមើលឃើញថាជាស្ថាប័នដែលលម្អៀង និងបម្រើផលប្រយោជន៍ឱ្យបក្សកាន់អំណាចរហូតមក៕