33 C
Phnom Penh

លោក ហ៊ុន ម៉ាណែត ព្រមាន​ថា​ទោះ​ក្នុង​តម្លៃ​ណា​ក៏ដោយ​ត្រូវ​ទប់ស្កាត់​បដិវត្តន៍​ពណ៌​ដើម្បី​ថែរក្សា​សន្តិភាព

ដោយ ឌឹ ខេមបូឌា ដេលី

បទវិភាគ

នាយករដ្ឋមន្ត្រី​កម្ពុជា លោក ហ៊ុន ម៉ាណែត អះអាង​ថា រាល់​សកម្មភាព​របស់​កម្លាំង​អមិត្ត ទាំង​ក្នុង និង​ក្រៅ​ប្រទេស ដែល​ប៉ុនប៉ង​បង្កើត​បដិវត្តន៍​ពណ៌​នៅ​កម្ពុជា និង​បង្ក​អសន្តិសុខ​ដល់​សង្គម​ជាតិ ទោះ​ក្នុង​តម្លៃ​ណា​ក៏ដោយ ត្រូវ​ថែរក្សា​សន្តិភាព​ឲ្យ​បាន។

ថ្លែង​នៅ​ព្រឹក​ថ្ងៃទី​១៩ ខែ​មេសា ឆ្នាំ​២០២៤ ក្នុង​ឱកាស​អញ្ជើញ​ជា​អធិបតី​សម្ពោធ​ដាក់​ឱ្យ​ប្រើប្រាស់​អគារ​សហ​សិក្សា អគារ​ស្នាក់នៅ និង​អគារ​អាហារដ្ឋាន​នៅ​សាកលវិទ្យាល័យ​ការពារ​ជាតិ លោក ហ៊ុន ម៉ាណែត អះអាង​ថា កងយោធពល​ខេមរភូមិន្ទ​ត្រូវតែ​ជា​កម្លាំង​ដែល​មាន​ថាមពល​ខ្លាំង ការពារ​សន្តិសុខ​សណ្ដាប់ធ្នាប់​សង្គម​នៅ​គ្រប់​កាលៈទេសៈ រាល់​ឧបាយកល និង​សកម្មភាព​របស់​កម្លាំង​អមិត្ត ទាំង​ក្នុង និង​ក្រៅ​ប្រទេស​ដែល​ប៉ុនប៉ង​បង្កើត​បដិវត្តន៍​ពណ៌​នៅ​កម្ពុជា។

លោក​អះអាង​ថា កងយោធពល​ខេមរភូមិន្ទ​ត្រូវតែ​ជា​កម្លាំង​ដែល​មាន​ថាមពល​ខ្លាំង មាន​សមត្ថភាព​ពេញលេញ មាន​ឆន្ទៈ​មោះមុត មនសិការ និង​វិន័យ​ល្អ ដើម្បី​ការពារ​ឱ្យ​បាន​រឹងមាំ​នូវ​ឯករាជ្យ​ជាតិ អធិបតេយ្យភាព និង​បូរណភាព​ទឹកដី។

អ្នកវិភាគ​នយោបាយ​លោក សេង សារី កាលពី​ពេល​ថ្មីៗ​នេះ​លើកឡើង​ថា គណបក្ស​ប្រជាជន​កម្ពុជា ជា​គណបក្ស​ដឹកនាំ​ប្រទេស​គ្រប់គ្រង​លើ​មេ​ទ័ព និង​កងកម្លាំង​ប្រដាប់​អាវុធ​ទាំងអស់ ហើយ​សមាជិក​កងកម្លាំង​ប្រដាប់​អាវុធ​សុទ្ធសឹងតែ​ជា​សមាជិក​របស់​បក្ស​នេះ​ទាំងអស់ ដែល​ជា​ការ​ផ្ទុយ​ពី​ច្បាប់​ដែល​ចែង​ថា កងទ័ព​ជា​កម្លាំង​អព្យាក្រឹត្យ​ការពារ​ជាតិ​នោះ។

ចំណែក​ប្រធាន​វេទិកា​ពលរដ្ឋ លោក គឹម សុខ ធ្លាប់​បាន​អះអាង​កាលពី​ពេល​ថ្មីៗ​នេះ​ថា មាន​លក្ខខណ្ឌ​ពីរ​ដែល​បង្ហាញ​ថា ផ្ទៃក្នុង​បក្ស​កាន់​អំណាច​កំពុង​បែកបាក់​ធ្ងន់ធ្ងរ គឺ​ទី​១ អង្គភាព​កង​អង្គរក្ស​របស់​លោក ហ៊ុន សែន ដែល​ក្រុម​ផ្សេង​នៃ​ផ្ទៃក្នុង​របស់​ខ្លួន​បាន​ទាមទារ​ឲ្យ​មាន​ការ​កាត់បន្ថយ​យ៉ាង​ច្រើន​នៅ​ត្រឹម ២០០​នាក់​នោះ ក៏​ត្រូវ​លោក ហ៊ុន សែន ចោទ​ថា​ជា​ការ​ប៉ុនប៉ង​ផ្តួល​រំលំ​អំណាច និង​ធ្វើ​ឃាត​គាត់​ទៅវិញ។

កាលពី​ខែ​កុម្ភៈ ឆ្នាំ​២០១៧ រដ្ឋាភិបាល​កម្ពុជា​បាន​ចេញ​ផ្សាយ​សៀវភៅ «ស» រៀបរាប់​ថា កម្ពុជា​កំពុង​កើត​មាន​នូវ​បដិវត្តន៍​ពណ៌​រៀបចំ​ឡើង​ដោយ​គណបក្ស​សង្គ្រោះ​ជាតិ និង​ថា​មាន​អង្គការ​សង្គម​ស៊ីវិល​ជាតិ និង​អន្តរជាតិ​ប្រមាណ ៣០០ បាន​ចូលរួម​ក្នុង​បដិវត្តន៍​ពណ៌​នោះ ដើម្បី​ផ្ដួល​រំលំ​រដ្ឋាភិបាល​កម្ពុជា​ដែល​ស្ថិត​ក្រោម​ការ​ដឹកនាំ​របស់​លោក ហ៊ុន សែន ដែល​ជា​ប្រធាន​គណបក្ស​កាន់​អំណាច​ផង និង​ជា​នាយករដ្ឋមន្ត្រី​ផង​នា​ពេល​បច្ចុប្បន្ន​នេះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស