អ្នកវិភាគប្រកាសទុកពេល ១ខែមិនរិះគន់រឿងនយោបាយសង្គម ដើម្បីរង់ចាំស្ដាប់ការឆ្លើយតបរបស់លោក ហ៊ុន សែន ក្នុងការស្វែងរកការបង្រួបបង្រួមជាតិ។
អ្នកវិភាគនយោបាយ និងជាប្រធានវេទិកាពលរដ្ឋលោក គឹម សុខ សរសេរលើគណនីហ្វេសប៊ុករបស់ខ្លួននៅថ្ងៃទី២២ មេសា នេះថា លោកនឹងទុកពេល ១ខែ បន្ទាប់ពីការបង្ហោះ «សេណារីយ៉ូដំណោះស្រាយវិបត្តិនយោបាយកម្ពុជា» របស់លោកនៅពេលនេះ ដោយមិនរិះគន់រឿងនយោបាយសង្គម និងផ្អាកធ្វើយុទ្ធនាការ «ទាមទារយុត្តិធម៌ កុំសុំយុត្តិធម៌» រយៈពេល ១ខែផងដែរ ដើម្បីរង់ចាំស្ដាប់ការឆ្លើយតបរបស់លោក ហ៊ុន សែន ចំពោះសេណារីយ៉ូដែលលោកលើកឡើងពីការបង្រួបបង្រួមជាតិខាងលើនេះ ព្រោះថាឆន្ទៈរបស់លោកពិតប្រាកដ គឺចង់ឃើញខ្មែរ «ផ្សះផ្សាបង្រួបបង្រួមជាតិ» ប៉ុណ្ណោះ។
លោក គឹម សុខ លើកឡើងថា បើលោក ហ៊ុន សែន ផ្សះផ្សាបង្រួបបង្រួមជាតិនៅពេលនេះ គាត់នឹងទទួលបានទាំងអំណាច និងកិត្តិយសដោយថ្លៃថ្នូរពីប្រជាជាតិខ្មែរទូទាំងប្រទេស ក្នុងនោះនយោបាយ «ឈ្នះឈ្នះ» របស់គាត់ ក៏នឹងត្រូវខ្មែរគ្រប់ភាគីលើកតម្កើងជាមតិរួមជាតិថែមទៀត ប៉ុន្តែផ្ទុយទៅវិញ បើគាត់មិនផ្សះផ្សាជាតិទេ នោះគ្រួសារ និងខ្លួនគាត់ផ្ទាល់ បានតែអំណាចមិនស្របច្បាប់ប៉ុណ្ណោះ ហើយការបញ្ចើចបញ្ចើពីនយោបាយឈ្នះឈ្នះរបស់គាត់កន្លងមក ក៏ជាការបញ្ចើចបញ្ចើដើម្បីទាញយកផលប្រយោជន៍ពីខ្លួនគាត់ និងក្រុមគ្រួសាររបស់គាត់ដែរ។
អ្នកវិភាគរូបនេះអះអាងថា ប្រសិនបើមេដឹកនាំបក្សកាន់អំណាចលោក ហ៊ុន សែន មិនអាចផ្សះផ្សាបង្រួបបង្រួមជាតិនៅពេលនេះបានទេ នោះមនុស្សដែលចាញ់ធំបំផុតទៅថ្ងៃអនាគត គឺក្រុមគ្រួសាររបស់គាត់ទាំងមូល ប៉ុន្តែបើគាត់ព្រមដោះស្រាយវិបត្តិប្រទេសជាតិឱ្យមានការឯកភាពជាតិវិញ អ្នកដែលឈ្នះធំជាងគេ ក៏ជាគ្រួសាររបស់គាត់ ហើយពលរដ្ឋខ្មែរនៅទូទាំងប្រទេសក៏នឹងទះដៃអបអរសាទររីករាយអស់ពីចិត្តថែមទៀត។
អ្នកវិភាគនយោបាយរូបនេះសង្ឃឹមថា លោក ហ៊ុន សែន នឹងពិចារណាសេណារីយ៉ូដំណោះស្រាយនយោបាយដែលខ្លួនបានលើកឡើងខាងលើនេះ ដោយមានវត្តមានលោក ហ៊ុន សែន ជួបគ្នាជាមួយអតីតមេដឹកនាំប្រឆាំងលោក សម រង្ស៊ី និងប្រធានគណបក្សសង្គ្រោះជាតិលោក កឹម សុខា ជជែកគ្នាក្នុងពេលសមស្របឆាប់ៗ ទាន់ស្ថានការណ៍ជាតិតម្រូវនាពេលនេះ។
ការអះអាងនេះ ធ្វើឡើងស្របពេលដែលស្ថានភាពនយោបាយនៅកម្ពុជាកំពុងធ្លាក់ចូលទៅក្នុងវិបត្តិធ្ងន់ធ្ងររវាងអ្នកនយោបាយ និងអ្នកនយោបាយ ដោះស្រាយមិនចេញ អស់រយៈពេលជាច្រើនឆ្នាំមកនេះ។
វិបត្តិជាប់គាំងនយោបាយនៅកម្ពុជា ត្រូវគេមើលឃើញថា កំពុងដើរដល់ផ្លូវទាល់ដោះស្រាយមិនចេញ ខណៈមេដឹកនាំនយោបាយធំៗមិនបានយកចិត្តទុកដាក់ដោះស្រាយពីវិបត្តិជាតិដែលកំពុងតែញាំញីពលរដ្ឋរបស់ខ្លួននោះទេ បើទោះបីជាសហភាពអឺរ៉ុប និងបណ្តាប្រទេសលោកសេរីជាច្រើន ជំរុញឱ្យអ្នកនយោបាយខ្មែរវិលទៅរកការចរចាបញ្ចប់ជម្លោះនយោបាយ ដោយតម្កល់ផលប្រយោជន៍ជាតិជាធំជាងផលប្រយោជន៍បុគ្គល ឬបក្សរបស់ខ្លួនក៏ដោយ។
ពាក់ព័ន្ធនឹងសេណារីយ៉ូដំណោះស្រាយវិបត្តិនយោបាយកម្ពុជារបស់លោក គឹម សុខ បាននាំឲ្យមានការសាទរពីតំណាងរាស្ត្ររបស់គណបក្សសង្គ្រោះជាតិមួយរូប។
តំណាងរាស្ត្រមណ្ឌលខេត្តកំពង់ស្ពឺ លោក សួន រីដា បានសរសេរនៅលើគណនីហ្វេសប៊ុករបស់លោកនៅថ្ងៃទី២២ មេសា នេះថា លោក ហ៊ុន សែន គួរយកគំនិតរបស់លោក គឹម សុខ ទៅពិចារណាសម្រាប់ដំណោះស្រាយវិបត្តិនយោបាយរវាងខ្មែរ និងខ្មែរ ដើម្បីផលប្រយោជន៍ខ្មែរ។
មកទល់ពេលនេះ ពន្លឺនៃកិច្ចចរចានយោបាយនៅកម្ពុជា នៅមិនទាន់មានសង្ឃឹមនៅឡើយទេ ខណៈមេដឹកនាំបក្សកាន់អំណាចលោក ហ៊ុន សែន និងនាយករដ្ឋមន្ត្រីថ្មីរបស់កម្ពុជាលោក ហ៊ុន ម៉ាណែត នៅតែប្រកាសតាមកម្ទេចក្រុមដែលប្រឆាំងសព្វថ្ងៃនេះដដែល។
ទាក់ទិននឹងបញ្ហានេះ មេដឹកនាំបក្សកាន់អំណាចលោក ហ៊ុន សែន ធ្លាប់បានអះអាងកាលពីពេលកន្លងទៅថា លោកបានធ្វើច្រើនណាស់ក្នុងការដឹកនាំជាតិរកការបង្រួបបង្រួមជាតិរវាងខ្មែរ និងខ្មែរ ប៉ុន្តែភាគីនយោបាយក្រុមប្រឆាំងមិនយល់អំពីការបង្រួបបង្រួមជាតិនេះទេ។
លោក ហ៊ុន សែន ព្រមានថា សូមឈប់ស្រមើស្រមៃថាលោកនឹងធ្វើការចរចារកដំណោះស្រាយនយោបាយទៀតទៅ ហើយពួកអ្នកដែលមានទោស ត្រូវទៅទទួលទោសជាប់គុក ២ភាគ៣ សិន ចាំគិតដល់រឿងការលើកលែងទោស ឬបន្ធូរបន្ថយទោសនៅថ្ងៃក្រោយបន្តទៀត។
ក្រុមអ្នកសង្កេតការណ៍លើកឡើងថា ការដឹកនាំនយោបាយរបស់លោក ហ៊ុន សែន ចាប់តាំងពីឡើងកាន់តំណែងជានាយករដ្ឋមន្ត្រីពីឆ្នាំ១៩៨៥ មក បានប្រើអំណាចហួសដែនកំណត់ ដូចជា ការចាប់សកម្មជនសង្គម រំលោភរដ្ឋធម្មនុញ្ញ រំលោភព្រះមហាក្សត្រ រំលាយបក្សប្រឆាំង និងចាប់ប្រធានគណបក្សសង្គ្រោះជាតិដាក់ពន្ធនាគារទាំងអយុត្តិធម៌ ជាដើម។
ប្រភពដដែលបន្ថែមថា កម្ពុជានឹងមិនអាចស្វែងរកការសាមគ្គីជាតិរវាងខ្មែរ និងខ្មែរបានទេ បើលោក ហ៊ុន សែន នៅតែបន្តនយោបាយតាមរបបកុម្មុយនីស្តដូចសព្វថ្ងៃនេះ ដូច្នេះដើម្បីមានការរួបរួមមួយដោយពិតប្រាកដ ក្រុមអ្នកនយោបាយដែលស្រឡាញ់ប្រជាធិបតេយ្យ ត្រូវតែប្រមូលផ្ដុំកម្លាំងគ្នាផ្លាស់ប្ដូរទម្រង់រដ្ឋាភិបាលផ្ដាច់ការជាមុនសិន នោះទើបកម្ពុជាមានពន្លឺនៃការផ្សះផ្សាជាតិឡើងវិញ។
ចាប់តាំងពីចុងឆ្នាំ២០២០ មក សហភាពអឺរ៉ុប និងបណ្តាប្រទេសលោកសេរីជាច្រើន បានជំរុញឱ្យអ្នកនយោបាយខ្មែរវិលទៅរកការចរចាបញ្ចប់ជម្លោះនយោបាយ ដោយតម្កល់ផលប្រយោជន៍ជាតិឱ្យធំជាងផលប្រយោជន៍បុគ្គល ឬបក្សរបស់ខ្លួន ប៉ុន្តែមកទល់ពេលនេះ ពន្លឺនៃកិច្ចចរចានយោបាយនៅកម្ពុជានៅមិនទាន់មានច្រកចេញនៅឡើយទេ ខណៈគំនុំនយោបាយបុគ្គលរបស់អ្នកនយោបាយខ្មែរ កំពុងបង្កភ្លើងឆាបឆេះកម្ពុជាកាន់តែខ្លាំងសព្វថ្ងៃនេះ៕