38 C
Phnom Penh

លោក ស៊ី ជីនពីង នឹង​ប្រឈម​នឹង​សំណួរ​ទាក់ទង​នឹង​រុស្ស៊ី ក្នុង​ដំណើរ​ទស្សនកិច្ច​ទៅ​អឺរ៉ុប

ដោយ ឌឹ ខេមបូឌា ដេលី

បទវិភាគ

មេដឹកនាំ​ចិន លោក ស៊ី ជីនពីង ចាប់ផ្ដើម​ដំណើរ​ទស្សនកិច្ច​រយៈពេល ៥​ថ្ងៃ​ទៅ​កាន់​បី​ប្រទេស​នៅ​អឺរ៉ុប គឺ​បារាំង ស៊ែប៊ី និង​ហុងគ្រី ដោយ​ចាប់ផ្ដើម​ពី​ថ្ងៃទី​៥ ដល់​ថ្ងៃទី​១០ ឧសភា។ នេះ​បើ​យោង​តាម​ការ​ប្រកាស​ព័ត៌មាន​របស់​ក្រសួង​ការបរទេស​ប្រទេស​ចិន។

យោង​តាម​សារព័ត៌មាន The Economic Times ប្រទេស​ទាំង​បី​នេះ​គឺជា​គោលដៅ​នៃ​ទំនាក់ទំនង​ពាណិជ្ជកម្ម​ជាមួយ​នឹង​ចិន ដែល​លោក ស៊ី ចាប់​យក​ជា​អាទិភាព​នៃ​ទស្សនកិច្ច​របស់​លោក​នៅ​អឺរ៉ុប។

តែ​ការ​ធ្វើ​ដំណើរ​ទស្សនកិច្ច​ទៅ​កាន់​ប្រទេស​បារាំង របស់​មេដឹកនាំ​ចិន ធ្វើឡើង​តាម​ការ​អញ្ជើញ​របស់​លោក Emmanuel Macron។ អ្នក​សង្កេតការណ៍​រំពឹង​ថា លោក Macron នឹង​ចោទ​សួរ​លោក ស៊ី អំពី​ឥទ្ធិពល​របស់​ចិន ទៅ​លើ​ប្រទេស​រុស្ស៊ី ហើយ​ថែមទាំង​ស្នើ​ឱ្យ​ចិន ដាក់​សម្ពាធ​លើ​រុស្ស៊ី ឱ្យ​ឆាប់​បិទ​បញ្ចប់​សង្គ្រាម​នៅ​អ៊ុយក្រែន។

ក្នុង​ឱកាស​នៃ​ការ​ចរចា​ជាមួយ​លោក ស៊ី ជីនពីង លោក Macron អាច​នាំ​លោក ស៊ី ទៅ​ជួប​មេដឹកនាំ​សហភាព​អឺរ៉ុប ផង​ដែរ ប៉ុន្តែ​សហភាព​អឺរ៉ុប​តែងតែ​ព្រមាន​ចិន កុំ​ឱ្យ​ជ្រុល​ដៃ​ផុង​ជ្រៅ​ក្នុង​សង្គ្រាម​របស់​រុស្ស៊ី ឈ្លានពាន​អ៊ុយក្រែន។

លោក ស៊ី និង​ប្រធានាធិបតី​រុស្ស៊ី វ៉្លាឌីមៀរ ពូទីន បាន​សហការ​គ្នា​ប្រជែង​សណ្ដាប់ធ្នាប់​ពិភពលោក​ដឹកនាំ​ដោយ​សហរដ្ឋ​អាមេរិក ដែល​ក្រុង​ប៉េកាំង ព្យាយាម​ការពារ​ខ្លួន​ថា​ជា​ការ​ពង្រឹង​គោលការណ៍​អន្តរជាតិ។

លោក​រដ្ឋមន្ត្រី​ការបរទេស​ចិន បាន​ប្រាប់​ទីប្រឹក្សា​ការទូត​របស់​លោក Macron កាលពី​ថ្ងៃ​សៅរ៍​សប្ដាហ៍​មុន​ថា ក្រុង​ប៉េកាំង សង្ឃឹម​ថា សហភាព​អឺរ៉ុប​នឹង​ជួយ​ពង្រឹង​គោលនយោបាយ​ការទូត​សមរម្យ​មួយ​ឆ្ពោះ​ទៅ​ក្រុង​ប៉េកាំង។ លោក Macron និង​ប្រធាន​គណៈកម្មការ​អឺរ៉ុប អ្នកស្រី Ursula von der Leyen នឹង​ជួប​ត្រីភាគី​ជាមួយ​លោក ស៊ី។

ប្រធាន​សហភាព​អឺរ៉ុប អ្នកស្រី von der Leyen ធ្លាប់​បាន​ព្រមាន​ចិន​ចំពោះ​មុខ​លោក ស៊ី ដោយ​ព្រមាន​ថា បើ​ចិន​ចង់​បន្ត​សហប្រតិបត្តិការ​ស្អិតល្មួត​ស្មើភាព​គ្នា​នឹង​សហភាព​អឺរ៉ុប ហើយ​មិន​ចង់​មាន​វិធានការ​លើ​ទីក្រុង​ប៉េកាំង នោះ ប្រទេស​ចិន​ត្រូវ​ដក​ខ្លួន​ចេញពី​ការ​ដែល​គេ​ចោទ​ថា ចិន​នៅ​ពីក្រោយ​ការ​ឈ្លានពាន​របស់​រុស្ស៊ី លើ​ប្រទេស​អ៊ុយក្រែន។ តែ​ផ្ទុយទៅវិញ ចិន​ត្រូវ​ជួយ​បញ្ឈប់​សង្គ្រាម​នៅ​អ៊ុយក្រែន។

កន្លង​មក ចារកម្ម​សហរដ្ឋ​អាមេរិក​សង្ស័យ​ថា ចិន​បាន​បញ្ជូន​សព្វាវុធ​ទៅ​កាន់​រុស្ស៊ី ហើយ​ប៉ុន្មាន​ថ្ងៃ​ចុងក្រោយ​នេះ សហរដ្ឋ​អាមេរិក​ព្រមាន​ចិន ដើរ​ឱ្យ​ឆ្ងាយ​ពី​សង្គ្រាម​រុស្ស៊ី នៅ​អ៊ុយក្រែន ដោយ​កុំ​ពាក់ព័ន្ធ​កិច្ចការ​ណា​មួយ​ឱ្យ​សោះ។

ជាមួយ​គ្នា​នេះ អគ្គលេខាធិការ​អង្គការ​ណាតូ ក៏​បាន​ដាក់​ការ​សង្ស័យ​ដូច​គ្នា​នេះ​ដែរ។ មេដឹកនាំ​អង្គការ​ណាតូ លោក Jens Stoltenberg បាន​ស្នើ​ពិភពលោក​ឱ្យ​ដាក់​វិធានការ​ទៅ​កាន់​ចិន ចំពោះ​ការ​ឃុបឃិត​ជាមួយ​រុស្ស៊ី។

លោក​បាន​ទាមទារ​ឱ្យ​ចិន ទទួលស្គាល់​ការ​ឈ្លានពាន​ប្រទេស​ឯករាជ្យ​មួយ គឺជា​ទង្វើ​ខុស​ច្បាប់​អន្តរជាតិ​ដ៏​ធ្ងន់ធ្ងរ​ដែល​ត្រូវតែ​ដាក់​សម្ពាធ​ឱ្យ​ខ្លាំងក្លា​លើ​ក្រុង​មូស្គូ។

តែ​យ៉ាងណា ក្រុង​ប៉េកាំង តែងតែ​ច្រានចោល​ការ​លើកឡើង​របស់​ពួក​បស្ចិម​ប្រទេស​ដែល​ចោទ​ថា ចិន​មាន​ការ​ពាក់ព័ន្ធ​ក្នុង​ការ​បញ្ជូន​អាវុធ​សម្ភារៈ​សឹក​ទៅ​ឱ្យ​រុស្ស៊ី។ ចិន​ប្រកែក​ដាច់ខាត​ថា​មិន​មាន​ទំនាក់ទំនង​នៅ​ពីក្រោយ​សង្គ្រាម​ដែល​រុស្ស៊ី ឈ្លានពាន​អ៊ុយក្រែន ចាប់ពី​ថ្ងៃទី​២៤ ខែ​កុម្ភៈ ឆ្នាំ​២០២២ មក​នោះ។

តែ​បើ​តាម The Economic Times នៅ​ពេល​លោក ស៊ី ជីនពីង ត្រឡប់​ទៅ​ទីក្រុង​ប៉េកាំង វិញ ក្រោយ​បិទ​បញ្ចប់​ទស្សនកិច្ច​បី​ប្រទេស​នៅ​អឺរ៉ុប លោក​ត្រូវ​ជួប​សមភាគី​រុស្ស៊ី លោក វ៉្លាឌីមៀរ ពូទីន។

សារព័ត៌មាន​របស់​រុស្ស៊ី The Moscow Times ថា​លោក ពូទីន ចង់​ធ្វើ​ទស្សនកិច្ច​ទៅ​កាន់​ក្រុង​ប៉េកាំង នៅ​ក្នុង​ខែ​ឧសភា ដើម្បី​រឹតចំណង​មិត្តភាព​ឱ្យ​កាន់តែ​ច្បាស់លាស់ និង​ស៊ីជម្រៅ។

អ្នក​សង្កេតការណ៍​ថា លោក ពូទីន ចង់​ទាញ​ចិន ឱ្យ​នៅ​ពីក្រោយ​សង្គ្រាម​នេះ ដែល​លោក ពូទីន អាច​និយាយ​ថា​ករណី​ចិន ចង់​ពឹងពាក់ និង​ចង់​ឱ្យ​រុស្ស៊ី ជួយ​ដោយ​ប្រការ​ណា​មួយ​វិញ គឺ​រុស្ស៊ី ត្រូវតែ​ជួយ​ចិន។

គួរ​ឱ្យ​កត់​សម្គាល់​ថា ក្នុង​កម្មវិធី​សម្ពោធ​ការ​បើក​ព្រឹត្តិការណ៍​កីឡា​អូឡាំពិក​អន្តរជាតិ​នៅ​ទីក្រុង​ប៉េកាំង កាលពី​ឆ្នាំ​២០២២ លោក ពូទីន បាន​ជួប​លោក ស៊ី។ ពេល​ត្រឡប់​មក​វិញ លោក ពូទីន បាន​បញ្ជា​ឱ្យ​លើក​កងទ័ព​ឡោមព័ទ្ធ​អ៊ុយក្រែន រហូត​ដល់​បើក​ការ​វាយលុក​លើ​អ៊ុយក្រែន នៅ​ថ្ងៃទី​២៤ ខែ​កុម្ភៈ ឆ្នាំ​២០២២។

អ្នក​សង្កេតការណ៍​សង្ស័យ​ថា លោក ពូទីន ទំនង​ទទួល​បាន​ការ​លើក​ទឹកចិត្ត​ពី​លោក ស៊ី ក្នុង​ការ​លើក​ទ័ព​ធ្វើ​សង្គ្រាម​នៅ​អ៊ុយក្រែន បើ​ទោះជា​ក្រុង​ប៉េកាំង បញ្ជាក់​ជំហរ​ជា​ញឹកញាប់​ថា ចិន​ចង់​ធ្វើ​ឱ្យ​ពិភពលោក​ស្ងប់ស្ងាត់​ក្រោម​សន្តិភាព​ក៏ដោយ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស