31 C
Phnom Penh

មុន​ទៅ​ចិន លោក ពូទីន គាំទ្រ​សំណើ​សន្តិភាព​របស់​ចិន​សំដៅ​បញ្ចប់​សង្គ្រាម​រុស្ស៊ី​នៅ​អ៊ុយក្រែន

ដោយ ឌឹ ខេមបូឌា ដេលី

បទវិភាគ

ប្រធានាធិបតី​ចិន ស៊ី ជីនពីង នឹង​ស្វាគមន៍​លោក ពូទីន ដែល​ទៅ​កាន់​ទីក្រុង​ប៉េកាំង នៅ​ថ្ងៃ​ព្រហស្បតិ៍ ទី​១៦ ឧសភា ក្នុង​សប្ដាហ៍​នេះ​ដែល​ជា​ទស្សនកិច្ច​លើក​ទី​២ របស់​មេដឹកនាំ​វិមាន​ក្រឹមឡាំង រូប​នេះ ធ្វើ​ឡើង​មិន​ដល់​មួយ​ឆ្នាំ​នោះ​ទេ។

លោក ពូទីន ផ្ដើម​ទស្សនកិច្ច​នៅ​ក្រៅ​ដ៏​កម្រ​នេះ បន្ទាប់ពី​លោក​ចូល​កាន់​តំណែង​អាណត្តិ​ទី​៥ របស់​លោក​រយៈពេល ៦​ឆ្នាំ​ទៀត ឋានៈ​ជា​ប្រធានាធិបតី​ជាប់​ឆ្នោត​នៅ​ក្នុង​ការ​បោះឆ្នោត​នា​ថ្ងៃទី​១៧ ខែ​មីនា ដែល​សឹងតែ​គ្មាន​គូប្រកួត ព្រោះ​គូប្រជែង​ដែល​មាន​ថាមពល និង​ប្រជាប្រិយភាព​ខ្លាំង​ត្រូវ​ចាប់​ដាក់​គុក​រហូត​ស្លាប់​ក្នុង​គុក និង​ខ្លះ​ទៀត​រត់ចោល​ប្រទេស។

លោក ពូទីន ទៅ​ចិន លើក​នេះ ក៏​ចំ​ពេល​រុស្ស៊ី បើក​វាយលុក​ទ្រង់ទ្រាយ​ចូល​ទៅ​ទឹកដី​អ៊ុយក្រែន ហើយ​ចំ​ពេល​ក្រុង​មូស្គូ ប្រឈមមុខ​គ្នា​ខ្លាំង​ជាមួយ​កម្លាំង​សម្ពន្ធភាព​ណាតូ ដែល​ព្រមាន​ថា​លើក​ទ័ព​ចូល​ជួយ​ប្រទេស​អ៊ុយក្រែន បើ​ខ្សែការពារ​ជួរ​មុខ​ត្រូវ​ទ័ព​រុស្ស៊ី វាយ​បំបែក។

គេ​ថា​របៀបវារៈ​ដែល​មេដឹកនាំ​ក្រុង​ប៉េកាំង និង​ក្រុង​មូស្គូ នឹង​ពិភាក្សា​គ្នា​មាន​ជាច្រើន ប៉ុន្តែ​សង្គ្រាម​នៅ​អ៊ុយក្រែន ជា​អាទិភាព​ជាងគេ ព្រោះ​ប្រទេស​ស្វីស នឹង​បើក​វេទិកា​ពិភពលោក​ស្ដីពី​ការ​ស្វែងរក​សន្តិភាព​ដើម្បី​បញ្ចប់​សង្គ្រាម​នៅ​អ៊ុយក្រែន នៅ​ខែ​ក្រោយ​នេះ។

វេទិកា​នេះ​នឹង​ប្រព្រឹត្ត​ទៅ​នៅ​រវាង​ថ្ងៃទី​១៥-១៦ ខែ​មិថុនា ឆ្នាំ​២០២៤ នេះ។ គេ​ថា​លោក ពូទីន ទៅ​ក្រុង​ប៉េកាំង ជា​ថ្មី​នេះ បន្ទាប់ពី​លោក ស៊ី ដែល​ទៅ​ដល់​អឺរ៉ុប​ហើយ​កាលពី​ថ្ងៃទី​៥ បែរ​ជា​មិន​ហួស​ទៅ​ក្រុង​មូស្គូ ហើយ​វិល​ទៅ​ក្រុង​ប៉េកាំង វិញ ប៉ុន្តែ​អ្វី​ជា​ចំណោទ​នោះ គេ​និយាយ​ថា លោក ពូទីន អាច​នឹង​ស្នើ​ឱ្យ​ចិន ធ្វើ​អ្វី​មួយ​ដើម្បី​រុស្ស៊ី ធ្វើ​សង្គ្រាម​នៅ​លើ​ទឹកដី​នៃ​ប្រទេស​អ៊ុយក្រែន គឺ​ដូច​ក្រសួង​ការបរទេស​រុស្ស៊ី ប្រកាស​ថា រុស្ស៊ី​ពិត​ណាស់​គាំទ្រ​សំណើ​សន្តិភាព​របស់​ចិន ដែល​ចង់​បញ្ចប់​សង្គ្រាម​នៅ​អ៊ុយក្រែន។

តាម​ទីភ្នាក់ងារ​សារព័ត៌មាន Reuters ក្រសួង​ការបរទេស​រុស្ស៊ី ប្រកាស​ដូចនេះ បន្ទាប់ពី​ប្រធានាធិបតី​រុស្ស៊ី លោក វ្ល៉ាឌីមៀ ពូទីន ដែល​បាន​និយាយ​នៅ​ក្នុង​បទសម្ភាសន៍​មួយ​ចេញ​ផ្សាយ​នៅ​ព្រឹក​ថ្ងៃ​ពុធ ទី​១៥ ខែ​ឧសភា នេះ​ថា លោក​ផ្ទាល់​គាំទ្រ​ផែនការ​សន្តិភាព​របស់​ចិន​សម្រាប់​សង្គ្រាម​នៅ​អ៊ុយក្រែន ដ្បិត​ចិន​បាន​យល់​យ៉ាង​ច្បាស់​ពី​មូលហេតុ​នៅ​ពីក្រោយ​វិបត្តិ​អ៊ុយក្រែន។

នៅ​ក្នុង​បទសម្ភាសន៍​ជាមួយ​ទីភ្នាក់ងារ​សារព័ត៌មាន​ចិន ស៊ីនហួរ មុន​នឹង​ធ្វើ​ទស្សនកិច្ច​ទៅ​កាន់​ទីក្រុង​ប៉េកាំង ក្នុង​សប្ដាហ៍​នេះ លោក ពូទីន បាន​បញ្ជាក់​ឡើងវិញ​ថា​លោក​នៅតែ​បើក​ចំហ​ចំពោះ​កិច្ចចរចា​ដើម្បី​ដោះស្រាយ​បញ្ចប់​សង្គ្រាម​ដែល​បាន​អូស​បន្លាយ​រយៈពេល ២​ឆ្នាំ​ជិត ៣​ខែ​មក​នេះ។

តាម​លោក ពូទីន ផែនការ​សន្តិភាព​របស់​ប្រធានាធិបតី ស៊ី ជីនពីង បាន​បង្ហាញ​ពី​ការ​យល់ដឹង​យ៉ាង​ច្បាស់​ពី​មូលហេតុ​នៃ​ជម្លោះ​នៅ​អ៊ុយក្រែន។

លោក ពូទីន បញ្ជាក់​ទៀត​ថា លោក​មាន​គំនិត​វិជ្ជមាន​លើ​ការ​វាយតម្លៃ​លើ​ផែនការ​សន្តិភាព​របស់​ចិន ដើម្បី​ដោះស្រាយ​វិបត្តិ​អ៊ុយក្រែន ហើយ ថ្នាក់​ដឹកនាំ​ចិន​បាន​យល់​យ៉ាង​ច្បាស់​ពី​មូលហេតុ និង​និយមន័យ​ភូមិសាស្ត្រ​នយោបាយ​សកល។

ដំណើរ​ទស្សនកិច្ច​របស់​លោក ពូទីន ទៅ​កាន់​ប្រទេស​ចិន ក៏​ធ្វើ​ឡើង​នៅ​មុន ៦​ខែ​ទៀត​ដែល​សហរដ្ឋ​អាមេរិក​នឹង​បោះឆ្នោត​ប្រធានាធិបតី ដោយ​មាន​បេក្ខជន​ពីរ គឺ​លោក ចូ បៃដិន ប្រធានាធិបតី​កាន់​អំណាច​មកពី​ប្រជាធិបតេយ្យ និង​លោក ដូណាល់ ត្រាំ បេក្ខជន​ចាញ់​ឆ្នោត​នៅ​ក្នុង​ការ​បោះឆ្នោត​ខែ​វិច្ឆិកា ឆ្នាំ​២០២០ មកពី​បក្ស​សាធារណរដ្ឋ។

ការ​បោះឆ្នោត​ប្រធានាធិបតី​សហរដ្ឋ​អាមេរិក អាច​ជា​ប្រធានបទ​មួយ​ដែរ​នៅ​ចំពោះ​មុខ​មេដឹកនាំ​មហាអំណាច​ពីរ​នេះ​ជួប​គ្នា​នៅ​ក្រុង​ប៉េកាំង។

បេក្ខជន​សហរដ្ឋ​អាមេរិក​ពីរ​រូប​នេះ គឺ​លោក ដូណាល់ ត្រាំ ជា​អ្នក​នយោបាយ​មួយ​ដែល​លោក ពូទីន ចង់​ឱ្យ​ជាប់​ឆ្នោត តែ​លោក ស៊ី មើល​ទៅ​ទាំង​លោក បៃដិន និង​លោក ដូណាល់ ត្រាំ មិន​ដឹង​ជា​គាំទ្រ​មួយ​ណា​ទេ ព្រោះ​អ្នក​នយោបាយ​ពីរ​រូប​នេះ​សុទ្ធតែ​ចាត់ទុក​ចិន ជា​ដៃគូ​ដែល​អាច​ធ្វើ​ឱ្យ​សហរដ្ឋ​អាមេរិក​ជួប​ផលវិបាក​ធ្ងន់ធ្ងរ។

យ៉ាងណា ការ​ដែល​លោក ពូទីន លើក​ឡើង​អំពី​ផែនការ​សន្តិភាព​របស់​ចិន សម្រាប់​ប្រទេស​អ៊ុយក្រែន នេះ អាច​នឹង​លោក ពូទីន ចាត់ទុក​ជា​ល្បែង​អុក​របស់​លោក​រុញ​ឱ្យ​លោក ស៊ី ដែល​គេ​ថា​លោក ស៊ី អាច​នឹង​មាន​វត្តមាន​នៅ​ក្នុង​វេទិកា​នៅ​ប្រទេស​ស្វីស នៅ​ពាក់​កណ្ដាល​ខែ​ក្រោយ​នេះ​អាច​នឹង​ត្រូវ​លោក ពូទីន ស្នើ​ឱ្យ​លោក ស៊ី ព្យាយាម​បង្ហាញ​ផែនការ​សន្តិភាព​របស់​ក្រុង​ប៉េកាំង ហើយ​ទាត់​ចោល​ផែនការ​សន្តិភាព​របស់​លោក​ប្រធានាធិបតី​អ៊ុយក្រែន ដែល​និយាយ​យោង​ដល់​ការ​ដក​ទ័ព​រុស្ស៊ី ចេញពី​ប្រទេស​អ៊ុយក្រែន តែ​ចំពោះ​សន្តិភាព​របស់​ចិន មិន​បាន​លើកឡើង​ត្រង់​ឃ្លា​ប្រយោគ​នេះ​ទេ។

ករណី​នេះ​ក៏​អាច​ជា​របៀបវារៈ​ដែល​លោក ពូទីន លើកឡើង​ចំពោះ​មុខ​លោក ស៊ី ពេល​លោក​ជួប​លោក ស៊ី នៅ​ថ្ងៃទី​១៦ ឧសភា នេះ។

ក្រសួង​ការបរទេស​ចិន និយាយ​ថា ប្រធានាធិបតី​រុស្ស៊ី លោក ពូទីន ធ្វើ​ដំណើរ​ទស្សនកិច្ច​ផ្លូវការ​មក​កាន់​ប្រទេស​ចិន ក្នុង​សប្តាហ៍​នេះ​មាន​រយៈពេល ២​ថ្ងៃ តប​តាម​ការ​អញ្ជើញ​របស់​ប្រធានាធិបតី​ចិន លោក ស៊ី ជីនពីង។

លោក ពូទីន បាន​ធ្វើ​ដំណើរ​ទៅ​កាន់​រដ្ឋធានី​ប៉េកាំង កាលពី​ខែ​តុលា ឆ្នាំ​មុន ដើម្បី​ចូលរួម​នៅ​ក្នុង​វេទិកា​គំនិត​ផ្ដួចផ្ដើម​ក្រវាត់​ផ្លូវ​ពាណិជ្ជកម្ម​របស់​លោក​ប្រធានាធិបតី ស៊ី ដែល​ត្រូវ​បាន​បង្កើត​ឡើង​ក្នុង​ឆ្នាំ​២០១៣ ដើម្បី​ជំរុញ​ពាណិជ្ជកម្ម និង​ការ​វិនិយោគ​តាមរយៈ​ការ​លើកកម្ពស់​បណ្ដាញ​ដឹកជញ្ជូន​របស់​ចិន ជាមួយ​ប្រទេស​នានា​ក្នុង​ពិភពលោក។

ចាប់តាំងពី​តុលាការ​ឧក្រិដ្ឋកម្ម​អន្តរជាតិ ICC ចេញ​ដីកា​ចាប់​ខ្លួន​លោក ពូទីន ករណី​ឧក្រិដ្ឋកម្ម​សង្គ្រាម​នៅ​ប្រទេស​អ៊ុយក្រែន កាលពី​ខែ​មីនា ឆ្នាំ​២០២៣ មក លោក ពូទីន កម្រ​ចាកចេញ​ពី​ប្រទេស។ លោក ពូទីន មិន​បាន​ទៅ​ចូលរួម​វេទិកា​អន្តរជាតិ​ធំ​ជាច្រើន​ហើយ ដែល​ធ្វើឡើង​នៅ​លើ​ទឹកដី​ដែល​មាន​កិច្ចព្រមព្រៀង​ជាមួយ​តុលាការ​អន្តរជាតិ​នេះ។

លោក ពូទីន ប្រឈមមុខ​នឹង​ការ​ចាប់​ខ្លួន​ដោយ​រដ្ឋអាជ្ញា ICC សហការ​ជាមួយ​ប៉ូលិស Interpol និង​ប្រទេស​សាមី​ខ្លួន។ ចំពោះ​ចិន ពុំ​មែន​ជា​សមាជិក​របស់ ICC នោះ​ទេ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស