 មកសួរនាំជុំវិញការជេរប្រមាថមេដឹកនាំបក្សកាន់អំណាចលោក ហ៊ុន សែន តាមបណ្ដាញសង្គមតិកតុក (TikTok) ពាក់ព័ន្ធនឹងគម្រោងព្រែកជីកហ្វូណន កាលពីពេលថ្មីៗនេះ គឺជាវិធានការត្រឹមត្រូវដែលកម្ពុជាត្រូវតែធ្វើ។){kind=link}
អ្នកឃ្លាំមើលចាត់ទុកការកោះហៅឯកអគ្គរដ្ឋទូតវៀតណាម ប្រចាំកម្ពុជា លោក ង្វៀង ហ៊ុយតាំង (Nguyễn Huy Tăng) មកសួរនាំជុំវិញការជេរប្រមាថមេដឹកនាំបក្សកាន់អំណាចលោក ហ៊ុន សែន តាមបណ្ដាញសង្គមតិកតុក (TikTok) ពាក់ព័ន្ធនឹងគម្រោងព្រែកជីកហ្វូណន កាលពីពេលថ្មីៗនេះ គឺជាវិធានការត្រឹមត្រូវដែលកម្ពុជាត្រូវតែធ្វើ។
អ្នកផ្តល់ប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវលោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី២១ ឧសភា នេះថា ការកោះហៅឯកអគ្គរដ្ឋទូតវៀតណាម មកសួរនាំបែបនេះ មិនមែនមានន័យថា កម្ពុជាបានចោទប្រកាន់លើវៀតណាម ទេ ប៉ុន្តែការប្រើគណនីដែលបង្ហាញពីអត្តសញ្ញាណច្បាស់លាស់បែបនេះ ក៏គួរតែមានការបកស្រាយពីភាគីវៀតណាម ដែរ។
លោក សេក សុជាតិ គូសបញ្ជាក់ថា ទាំងមេដឹកនាំបក្សកាន់អំណាចលោក ហ៊ុន សែន និងនាយករដ្ឋមន្ត្រីកម្ពុជាលោក ហ៊ុន ម៉ាណែត បានជូនដំណឹងដល់រដ្ឋាភិបាលវៀតណាម ជាបន្តបន្ទាប់ក្នុងនាមជាប្រទេសជិតខាង ខណៈសេចក្តីរាយការណ៍ស្ដីពីការសាងសង់ព្រែកជីកហ្វូណន រដ្ឋាភិបាលកម្ពុជាក៏បានត្រៀមបញ្ជូនទៅគណៈកម្មាធិការទន្លេមេគង្គរួចរាល់ដែរ បើមានការទាមទារសុំការបំភ្លឺណាមួយនោះ។
លោក សេក សុជាតិ លើកឡើងថា ក្នុងនាមកម្ពុជា និងវៀតណាម ជាអ្នកជិតខាងល្អដែលមានទំនាក់ទំនងជាប្រពៃណី និងមានមិត្តភាពយូរអង្វែង ភាគីវៀតណាមក៏គួរចូលរួមសហការទប់ស្កាត់ការជេរប្រមាថលើថ្នាក់ដឹកនាំរបស់កម្ពុជាដែរ ព្រោះថាបើបណ្តែតបណ្តោយឱ្យកើតមានអំពើបែបនេះចេះតែបន្តទៀត គឺជាហេតុនាំឱ្យមានទំនាស់រវាងប្រទេសទាំងពីរប៉ុណ្ណោះ។
អ្នកផ្តល់ប្រឹក្សាយោបល់ផ្នែកអភិវឌ្ឍន៍ផ្នត់គំនិតរូបនេះបញ្ជាក់ថា ការសាងសង់ព្រែកជីកហ្វូណន រដ្ឋាភិបាលកម្ពុជាបានអនុវត្តបានត្រឹមត្រូវហើយជាមួយនឹងប្រទេសជិតខាង ទាំងខាងផ្លូវច្បាប់ស្ដីពីការគ្រប់គ្រងអាងទន្លេ និងទំនាក់ទំនងការទូត ជាពិសេសជាមួយប្រទេសវៀតណាម។
កាលពីថ្ងៃទី២០ ខែឧសភា ឆ្នាំ២០២៤ រដ្ឋមន្ត្រីការបរទេសកម្ពុជា លោក សុខ ចិន្តាសោភា បានកោះហៅឯកអគ្គរដ្ឋទូតវៀតណាម ប្រចាំកម្ពុជា លោក ង្វៀង ហ៊ុយតាំង (Nguyễn Huy Tăng) មកសួរនាំជុំវិញរឿងខ្លឹមសារជេរប្រមាថលោក ហ៊ុន សែន នៅលើបណ្ដាញសង្គមតិកតុក (TikTok) ពាក់ព័ន្ធនឹងគម្រោងព្រែកជីកហ្វូណន។
ក្នុងជំនួបនោះ លោក សុខ ចិន្តាសោភា បានស្នើឱ្យភាគីវៀតណាម សហការស្រាវជ្រាវរកមុខអ្នកដែលបានបង្ហោះខ្លឹមសារជេរប្រមាថលោក ហ៊ុន សែន នេះ ប៉ុន្តែក្រសួងការបរទេសកម្ពុជា មិនបានបញ្ជាក់ថាភាគីវៀតណាម នឹងសហការ ឬក៏អត់នោះទេ។
រដ្ឋមន្ត្រីការបរទេសខ្មែរបញ្ជាក់ថា ការបង្ហោះខ្លឹមសារជេរប្រមាថនេះ បង្កឱ្យមានអារម្មណ៍មិនល្អក្នុងរង្វង់រដ្ឋាភិបាល និងប្រជាជននៃប្រទេសកម្ពុជាយ៉ាងធ្ងន់ធ្ងរ ព្រោះអ្នកបង្ហោះសារទាំងនោះមានគោលដៅចង់បំផ្លាញចំណងមិត្តភាពនៃប្រទេសទាំងពីរយ៉ាងពិតប្រាកដ។
ការកោះហៅឯកអគ្គរដ្ឋទូតវៀតណាម មកសួរនាំនេះ ធ្វើឡើងបន្ទាប់ពីមេដឹកនាំបក្សកាន់អំណាច លោក ហ៊ុន សែន បានបង្ហោះសារនៅលើទំព័រហ្វេសប៊ុករបស់លោកកាលពីថ្ងៃទី១៩ ឧសភា ដោយស្នើឱ្យសមត្ថកិច្ចកម្ពុជាសហការជាមួយសមត្ថកិច្ចវៀតណាម ស្រាវជ្រាវរកម្ចាស់គណនីដែលបានជេរប្រមាថរូបលោកទាក់ទិននឹងព្រែកជីកហ្វូណន។
លោក ហ៊ុន សែន លើកឡើងថា លោកមានការភ្ញាក់ផ្អើលដែលឃើញសារជេរប្រមាថទាំងនេះ តែលោកមិនប្រាកដថាសារទាំងនេះបង្ហោះដោយជនជាតិវៀតណាមក្នុងប្រទេសវៀតណាម ឬនៅក្រៅប្រទេស ឬជាអាណិកជនវៀតណាមនៅកម្ពុជានោះទេ។
ខ្លឹមសារជាភាសាវៀតណាមទាំងនោះសរសេរថា វៀតណាមបានពលីឈាមស្រស់ដើម្បីប្តូរឱ្យកម្ពុជាមានសន្តិភាព ចំណែកសារផ្សេងទៀតសរសេរថា កុំភ្លេចថាកងទ័ពស្ម័គ្រចិត្តវៀតណាមរាប់ម៉ឺននាក់បានស្លាប់នៅកម្ពុជា ដូច្នេះកុំរមិលគុណ ហើយក្លាយជាអាយ៉ងរបស់ចិន និងជាជនក្បត់ ជាដើម ខណៈសារទាំងនេះ លោក ហ៊ុន សែន បានយកមកផ្សព្វផ្សាយលើទំព័រហ្វេសប៊ុករបស់គាត់ទាំងអស់។
ជុំវិញការបង្ហោះសារនេះ ធ្វើឡើងបន្ទាប់ពីប្រធានព្រឹទ្ធសភាកម្ពុជាលោក ហ៊ុន សែន ផ្សាយផ្ទាល់ពិសេសកាលពីថ្ងៃទី១៦ ខែឧសភា កន្លងទៅ ដែលលោក ហ៊ុន សែន បានបញ្ជាក់ថា គម្រោងព្រែកជីកហ្វូណន មិនបង្កក្ដីបារម្ភណាមួយចំពោះបញ្ហាបរិស្ថាន និងសង្គមនោះទេ។ លោកបន្ថែមថា រាល់កង្វល់ទាំងឡាយពីខាងវៀតណាម ពាក់ព័ន្ធព្រែកជីកហ្វូណននេះ ក៏មិនមានភាពចាំបាច់ត្រូវបកស្រាយដែរ។ បន្ថែមលើនេះទៀត ការយកបញ្ហាព្រែកជីកហ្វូណនទៅភ្ជាប់នឹងសន្តិសុខវៀតណាម ក៏ល្មមដល់ពេលបញ្ឈប់ហើយ។
ទាក់ទិននឹងបញ្ហានេះ វិទ្យាស្ថានអភិវឌ្ឍន៍ការស្រាវជ្រាវបូព៌ារបស់ប្រទេសវៀតណាម បានអះអាងកាលពីពេលថ្មីៗនេះថា ការសាងសង់ព្រែកជីកហ្វូណន មិនត្រឹមតែជាគម្រោងដែលបម្រើសេដ្ឋកិច្ច និងសង្គមកម្ពុជាប៉ុណ្ណោះទេ ក៏ប៉ុន្តែព្រែកជីកនេះក៏មានតម្លៃចម្បងក្នុងការបម្រើវិស័យយោធារបស់ចិនដែរ។
យ៉ាងណាក៏ដោយ គម្រោងសាងសង់ព្រែកជីកហ្វូណននេះ ត្រូវបានរដ្ឋាភិបាលកម្ពុជាប្រកាសថាគម្រោងនេះគឺជាគម្រោងដែលមានការគាំទ្រពីចលនាជាតិនិយមប្រឆាំងនឹងការជំទាស់របស់វៀតណាមដាច់ខាត ខណៈពលរដ្ឋខ្មែរក៏បានបង្ហាញពីការគាំទ្រឱ្យមានការសាងសង់ព្រែកជីកនេះដែរក្នុងរយៈពេលចុងក្រោយនេះ៕