ខណៈមានការបង្ខំឲ្យមន្ត្រីក្រោមឱវាទគាំទ្រគម្រោងព្រែកជីកហ្វូណន មេដឹកនាំបក្សកាន់អំណាចលោក ហ៊ុន សែន អះអាងថា លោកនឹងមិនអនុវត្តវប្បធម៌សន្ទនាជាមួយក្រុមអ្នកនយោបាយក្បត់ជាតិ ដែលបានវាយប្រហារលើរូបលោក និងក្រុមគ្រួសាររបស់លោកដាច់ខាត ព្រោះទង្វើទាំងនោះគឺជាអំពើជ្រុលនិយម។
លោក ហ៊ុន សែន ដែលមានមុខនាទីជាបរិនាយក និងដឹកនាំប្រទេសតាមសំណល់នយោបាយ ប៉ុល ពត លើកឡើងក្នុងកម្មវិធីបិទសន្និសីទស្ដីពីអនាគតកម្ពុជាគ្មានអំពើប្រល័យពូជសាសន៍ នៅថ្ងៃទី២២ ខែឧសភា ឆ្នាំ២០២៤ នេះថា អ្នកនយោបាយប្រឆាំងនៅតែចិញ្ចឹមចិត្តកម្ចាត់រាជរដ្ឋាភិបាលដែលដឹកនាំដោយគណបក្សប្រជាជនកម្ពុជារហូតមក ហើយពួកគេបានប្រកាន់ខ្ជាប់នូវមនោគមវិជ្ជា និងវប្បធម៌នយោបាយជ្រុលនិយម និងហិង្សានិយម ដូចគ្នានឹងមនោគមវិជ្ជាហិង្សាបង្ហូរឈាមពីអតីតកាលដែរ។
អ្នកសង្កេតការណ៍ខ្លះមើលឃើញរបៀបដឹកនាំស្រុកខ្មែរពីសម័យមុនបង្ហូរឈាម ប៉ុន្តែសម័យនេះសម្រក់ឈាម។
លោក ហ៊ុន សែន លើកឡើងថា ការបង្កើតវប្បធម៌សន្ទនា គឺជាការស្រុះស្រួលគ្នាជាមួយគ្នា និងការបង្កើតលទ្ធិប្រជាធិបតេយ្យសេរីពហុបក្ស ដោយគោរពគោលការណ៍នីតិរដ្ឋ មិនមែនជាការប្រើនយោបាយទុច្ចរិតនោះទេ។ មេដឹកនាំបក្សកាន់អំណាចរូបនេះបញ្ជាក់ថា បច្ចុប្បន្ននេះ អំពើហិង្សានានាបានរលាយសាបសូន្យពីឆាកនយោបាយកម្ពុជា បន្ទាប់ពីការសម្រេចជោគជ័យនៃនយោបាយឈ្នះឈ្នះរបស់លោក ដែលនេះក៏បង្ហាញពីភាពចាស់ទុំ និងលទ្ធិប្រជាធិបតេយ្យក្នុងប្រទេសកម្ពុជាដែរ។
មានសំណួរថា តើលោក ហ៊ុន សែន ស្គាល់របៀបរបបលទ្ធិប្រជាធិបតេយ្យត្រឹមតែប៉ុណ្ណឹងទេឬ បានជាគាត់ចាត់ទុករបបនេះថាប្រជាធិបតេយ្យ?
ការអះអាងនេះ ធ្វើឡើងផ្ទុយស្រឡះពីវត្ថុបំណងមជ្ឈដ្ឋានជាតិ និងអន្តរជាតិ ដែលមើលឃើញថា ការផ្សះផ្សានយោបាយនៅប្រទេសកម្ពុជា ទើបជាវិធីបញ្ចប់បញ្ហាគ្រប់យ៉ាងកំពុងកើតមានក្នុងប្រទេសសព្វថ្ងៃនេះ។
វិបត្តិជាប់គាំងនយោបាយនៅប្រទេសកម្ពុជា ត្រូវគេមើលឃើញថា កំពុងដើរដល់ផ្លូវទាល់ដោះស្រាយមិនចេញ ខណៈមេដឹកនាំនយោបាយធំៗនៅតែបន្តឈ្លោះគ្នា បើទោះបីជាសហភាពអឺរ៉ុប និងបណ្តាប្រទេសលោកសេរីជាច្រើន ជំរុញឱ្យអ្នកនយោបាយខ្មែរវិលទៅរកការចរចាបញ្ចប់ជម្លោះនយោបាយ ដោយតម្កល់ផលប្រយោជន៍ជាតិជាធំ ជាងផលប្រយោជន៍បុគ្គល ឬបក្សរបស់ខ្លួនក៏ដោយ។
ចាប់តាំងពីឆ្នាំ១៩៩១ មក បើទោះបីជាកម្ពុជាមានកិច្ចព្រមព្រៀងសន្តិភាពទីក្រុងប៉ារីស ដើម្បីបញ្ចប់វិបត្តិនយោបាយរបស់ខ្លួនក៏ដោយ ក៏ជម្លោះរវាងអ្នកនយោបាយខ្មែរនៅតែបន្តកើតមានរហូតដល់សព្វថ្ងៃនេះដែរ ហើយជម្លោះនេះត្រូវគេមើលឃើញថាកំពុងទាញទម្លាក់កម្ពុជាឱ្យធ្លាក់ជ្រោះដែលពិបាកនឹងស្រោចស្រង់។
មកទល់ពេលនេះ ពន្លឺនៃកិច្ចចរចានយោបាយនៅកម្ពុជា នៅមិនទាន់មានសង្ឃឹមនៅឡើយទេ ខណៈមេដឹកនាំបក្សកាន់អំណាចលោក ហ៊ុន សែន និងនាយករដ្ឋមន្ត្រីថ្មីរបស់កម្ពុជាលោក ហ៊ុន ម៉ាណែត នៅតែប្រកាសតាមកម្ទេចក្រុមប្រឆាំងកាន់តែខ្លាំងឡើងៗសព្វថ្ងៃនេះ។
ទាក់ទិននឹងបញ្ហានេះ អ្នកវិភាគនយោបាយនិងសង្គម បណ្ឌិត ឡៅ ម៉ុងហៃ លើកឡើងថា អ្នកនយោបាយដែលគិតពីផលប្រយោជន៍ជាតិពិតប្រាកដ ត្រូវតែមានគំនិតដោះស្រាយបញ្ហា និងកសាងប្រទេសជាតិឱ្យបានរីកចម្រើន មិនមែនដឹកនាំនយោបាយឆ្ពោះទៅរកការហែកហួរគ្នានោះទេ។
បណ្ឌិត ឡៅ ម៉ុងហៃ លើកឡើងថា បេសកកម្មរបស់អ្នកនយោបាយដើម្បីជាតិ និងប្រជាជន គឺត្រូវតែលើកយកបញ្ហាសង្គមជាតិមកជជែកវែកញែកដោះស្រាយដោយប្រកាន់គោលការណ៍ក្រមសីលធម៌ ចៀសវាងការវាយប្រហាររឿងបុគ្គលផ្ទាល់ខ្លួន ដែលគ្រាន់តែដើម្បីឈ្នះចាញ់គ្នា និងបង្កជាវិបត្តិដល់ប្រទេសជាតិកាន់តែធ្ងន់ធ្ងរនោះ។
អ្នកវិភាគរូបនេះបញ្ជាក់ថា ក្នុងនាមជាអ្នកនយោបាយ ត្រូវរកវិធីគ្រប់បែបយ៉ាងដើម្បីកសាងរៀបចំសង្គមឲ្យមានសុភមង្គល ដើម្បីជីវភាពរស់នៅ និងសុខមាលភាពរបស់ប្រជាពលរដ្ឋ មិនមែនព្រោះតែអំណាច ឬសេចក្តីសុខផ្ទាល់ខ្លួននោះទេ។
ចំណែកអ្នកស្រាវជ្រាវការអភិវឌ្ឍសង្គម បណ្ឌិត មាស នី លើកឡើងកាលពីពេលថ្មីៗនេះថា ជម្លោះរវាងបក្សកាន់អំណាច និងក្រុមបក្សប្រឆាំង បានធ្វើឱ្យការបែកបាក់សាមគ្គីជាតិយ៉ាងធ្ងន់ធ្ងរ ហើយក៏ជាមូលហេតុនាំឱ្យមានការបែកបាក់សាមគ្គីរបស់ពលរដ្ឋដែរ ព្រោះតែការប្រកាន់និន្នាការនយោបាយ ហើយលទ្ធផលចុងក្រោយគឺមានតែភាពវិនាសហិនហោចអន្តរាយដល់ជាតិប៉ុណ្ណោះ។
ជុំវិញបញ្ហានេះ អ្នកវិភាគនយោបាយ និងជាប្រធានវេទិកាពលរដ្ឋលោក គឹម សុខ លើកឡើងកាលពីពេលថ្មីៗនេះថា បើលោក ហ៊ុន សែន ផ្សះផ្សាបង្រួបបង្រួមជាតិនៅពេលនេះ គាត់នឹងទទួលបានទាំងអំណាច និងកិត្តិយសដោយថ្លៃថ្នូរពីប្រជាជាតិខ្មែរទូទាំងប្រទេស។
លោកបន្ថែមថា សូម្បីនយោបាយ «ឈ្នះឈ្នះ» របស់គាត់ ក៏នឹងត្រូវខ្មែរគ្រប់ភាគីលើកតម្កើងជាមតិរួមជាតិដែរ ប៉ុន្តែផ្ទុយទៅវិញ បើគាត់មិនផ្សះផ្សាជាតិទេ នោះគ្រួសារ និងខ្លួនគាត់ផ្ទាល់ បានតែអំណាចមិនស្របច្បាប់ប៉ុណ្ណោះ។
ចំណែកឯមជ្ឈដ្ឋានខ្មែរខ្លះទៀត ចោទសួរថា បើឧបមាថាគណបក្សប្រជាជនកម្ពុជា រាជរដ្ឋាភិបាលដឹកនាំដោយគណបក្សប្រជាជនកម្ពុជា ចាញ់ឆ្នោតក្នុងសម័យបោះឆ្នោតអាណត្តិណាមួយដោយសារខ្មែរឆ្អែត លែងគាំទ្រ តើលោក ហ៊ុន សែន និងគ្រួសារ បក្ខពួក ចោទថាជាការធ្វើបដិវត្តន៍ពណ៌ប៉ុនប៉ងផ្តួលរំលំរដ្ឋាភិបាលរបស់លោកដែរឬ បើលោកយល់ថារបៀបដឹកនាំសព្វថ្ងៃដើរតាមគន្លងប្រជាធិបតេយ្យនោះ?៕