ពលរដ្ឋតាមបណ្តាខេត្ត អំពាវនាវឱ្យអាជ្ញាធរថ្នាក់ជាតិ ចាត់វិធានការតឹងរ៉ឹងលើអាជ្ញាធរមូលដ្ឋានក្នុងការទប់ស្កាត់ និងបង្ក្រាបសកម្មភាពក្មេងទំនើងឱ្យបានម៉ឺងម៉ាត់ បន្ទាប់ពីលោក ហ៊ុន ម៉ាណែត អំពាវនាវឱ្យស្ថាប័នអយ្យការ និងស្ថាប័នតុលាការ ចាត់វិធានការអនុវត្តច្បាប់ឱ្យបានម៉ឺងម៉ាត់ចាត់ការលើសំណុំរឿងក្មេងទំនើង។
ពលរដ្ឋមួយចំនួនមកពីស្រុកជីក្រែង ខេត្តសៀមរាប ស្រុកកណ្ដៀង ខេត្តពោធិ៍សាត់ ស្រុកស្ទោង ខេត្តកំពង់ធំ ស្រុកមោងឫស្សី ខេត្តបាត់ដំបង និងស្រុកមង្គលបុរី ខេត្តបន្ទាយមានជ័យ បាននាំគ្នាប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះនៅថ្ងៃទី២៤ ឧសភា នេះថា ក្មេងទំនើងដែលបង្កអសន្តិសុខក្នុងភូមិ-ឃុំរាល់ថ្ងៃ គឺដោយសារតែអាជ្ញាធរមូលដ្ឋានបើកដៃឱ្យពួកគេបង្កចលាចលប៉ុណ្ណោះ។
ប្រភពដដែលលើកឡើងថា សព្វថ្ងៃនេះ ពលរដ្ឋមិនហ៊ានរាយការណ៍ទៅអាជ្ញាធរទេ ពីព្រោះពួកគេដឹងថាក្មេងទំនើងទាំងនោះសុទ្ធសឹងតែជាបណ្ដាញលក់គ្រឿងញៀនដែលមានការបើកដៃពីមេប៉ុស្តិ៍ និងកម្លាំងកងរាជអាវុធហត្ថនៅតាមឃុំ-សង្កាត់ ហើយមានក្មេងទំនើងខ្លះទៀតគឺជាបងប្អូន សាច់ញាតិ និងជាកូនរបស់មេប៉ុស្តិ៍តែម្តង ដូច្នេះបើពួកគេប្តឹងទៅអាជ្ញាធរ គឺមានតែនាំទុក្ខដាក់ខ្លួនឯងវិញប៉ុណ្ណោះ។
ពលរដ្ឋទាំងនោះអះអាងថា អាជ្ញាធរក៏បានចាប់ក្មេងទំនើងទាំងនោះដែរ បន្ទាប់ពីមានការរាយការណ៍ថាពួកគេបានលួចទ្រព្យសម្បត្តិអ្នកដទៃ ជាដើម ប៉ុន្តែក្រោយការចាប់ខ្លួនបាន ២ ទៅ ៣ថ្ងៃ ពួកគេក៏ត្រូវបានដោះលែងឱ្យមានសេរីភាព និងបង្កភាពចលាចលនៅក្នុងភូមិដូចមុនដដែល។
ប្រភពដដែលបញ្ជាក់ថា អ្វីដែលធ្វើឱ្យពលរដ្ឋភ័យខ្លាចបំផុតនោះ គឺនៅពេលដែលពួកគេរួចផុតពីការឃាត់ខ្លួន ក្មេងទំនើងទាំងនោះបានគំរាមអ្នកភូមិថា ពួកគេនឹងមិនឱ្យអ្នកដែលបានប្តឹងពួកគេរួចខ្លួនឡើយ។
កាលពីថ្ងៃទី២៣ ខែឧសភា ឆ្នាំ២០២៤ អគ្គស្នងការដ្ឋាននគរបាលជាតិ បានចេញសេចក្តីប្រកាសព័ត៌មានមួយ ដោយប្ដេជ្ញាចាត់គ្រប់វិធានការជំនាញ និងវិធានការច្បាប់ ក្នុងការបង្ការ ទប់ស្កាត់ និងបង្ក្រាបនូវរាល់សកម្មភាពក្មេងទំនើងឱ្យបានម៉ឺងម៉ាត់ ដើម្បីពង្រឹងសន្តិសុខ សណ្ដាប់ធ្នាប់សាធារណៈ និងសុវត្ថិភាពសង្គម។
សេចក្តីប្រកាសព័ត៌មានដដែលនេះបញ្ជាក់ថា អគ្គស្នងការដ្ឋាននគរបាលជាតិបានកត់សម្គាល់ឃើញថា សកម្មភាពក្មេងទំនើងបានកើតមានឡើងជាញឹកញាប់ និងមានចរិតកាចសាហាវគួរឱ្យព្រួយបារម្ភ ដែលធ្វើឱ្យបាត់បង់សណ្ដាប់ធ្នាប់សង្គម និងបង្កឱ្យមានការភ័យខ្លាច ព្រមទាំងរំខានដល់ការរស់នៅរបស់ប្រជាពលរដ្ឋនៅមូលដ្ឋានយ៉ាងធ្ងន់ធ្ងរបច្ចុប្បន្ននេះ។
ការចេញវិធានការនេះ ធ្វើឡើងបន្ទាប់ពីលោក ហ៊ុន ម៉ាណែត បានលើកឡើងកាលពីថ្ងៃទី២៣ ឧសភា នេះថា លោកបានសង្កេតឃើញមានការកើតឡើងជាញឹកញាប់នូវសកម្មភាពក្រុមក្មេងទំនើង ដែលបង្កភាពអនាធិបតេយ្យតាមដងផ្លូវសាធារណៈ ដែលធ្វើឱ្យប៉ះពាល់ដល់សណ្ដាប់ធ្នាប់សាធារណៈ សន្តិសុខសង្គម។
លោក ហ៊ុន ម៉ាណែត អំពាវនាវឱ្យស្ថាប័នអយ្យការ និងស្ថាប័នតុលាការ ចាត់វិធានការអនុវត្តច្បាប់ឱ្យបានម៉ឺងម៉ាត់ក្នុងការចាត់ការលើសំណុំរឿងពាក់ព័ន្ធករណីក្មេងទំនើងប្រកបដោយការយកចិត្តទុកដាក់ និងការទទួលខុសត្រូវខ្ពស់ ដើម្បីលើកកម្ពស់ប្រសិទ្ធភាពនៃការអនុវត្តច្បាប់ និងដើម្បីការពារសង្គមជាតិ ព្រមទាំងភាពសុខសាន្តរបស់ពលរដ្ឋផងដែរ។
ស្នងការដ្ឋាននគរបាលរាជធានីភ្នំពេញ បានឲ្យដឹងថា រយៈពេល ៥ខែចុងក្រោយនេះ សមត្ថកិច្ចបង្ក្រាបក្រុមក្មេងទំនើងបានជាង ៣០០ករណី (៣៣៧) និងឃាត់ខ្លួនជិត ៨០០នាក់ (៧៨៨នាក់) ហើយបានបញ្ជូនទៅតុលាការជាង ២០០ករណី (២៤១)។ នៅក្នុងសំណុំរឿងក្មេងទំនើងទាំងនោះ ភាគច្រើនពាក់ព័ន្ធការប្រើអំពើហិង្សា ចោរកម្ម និងបង្ហោះម៉ូតូនៅតាមដងផ្លូវ ដែលធ្វើឱ្យប៉ះពាល់ដល់សណ្ដាប់ធ្នាប់សាធារណៈ។
អ្នកសង្កេតការណ៍និយាយថា បញ្ហាអសន្តិសុខសង្គមនៅមូលដ្ឋានមិនមែនមានតែបញ្ហាក្មេងទំនើងទេ ប៉ុន្តែក៏បណ្តាលមកពីការបើកដៃឱ្យមានល្បែងភ្នាល់ផ្សេងៗ ដូចជា ល្បែងជល់មាន់ ល្បែងបៀ និងល្បែងចាក់អាប៉ោង ជាដើម ពីអាជ្ញាធរមូលដ្ឋានដែរ។
ក្នុងចំណោមអ្នកលេងល្បែងភ្នាល់ទាំងនេះ ក៏មានជាសាច់ញាតិ ឬបងប្អូនរបស់ប៉ូលិសប៉ុស្តិ៍ អាជ្ញាធរឃុំ និងអាជ្ញាធរស្រុកដែរ ដែលពួកគេតែងតែរួមតុផឹកស៊ីជាមួយគ្នា ដូច្នេះនៅពេលដែលមានកម្លាំងបង្ក្រាបចុះទៅពីថ្នាក់ខេត្តទៅ អាជ្ញាធរទាំងនោះបានផ្តល់ដំណឹងដល់បងប្អូនរបស់ពួកគេដែលជាអ្នកលេងល្បែងភ្នាល់ទាំងនោះឱ្យដឹងមុនជានិច្ច។
ដោយសារតែមានការគប់គិតគ្នាជាប្រព័ន្ធបែបនេះហើយ ទើបរាល់ការបង្ក្រាបក្មេងទំនើង ឬការបង្ក្រាបទីតាំងល្បែងភ្នាល់ខ្លះ មិនដែលមានប្រសិទ្ធភាពឡើយ ដែលជាហេតុធ្វើឱ្យរដ្ឋាភិបាលបាត់បង់នូវព័ត៌មានពិតពីសកម្មភាពរបស់ក្មេងទំនើង និងការប្រព្រឹត្តល្បែងភ្នាល់ទាំងនេះ។
ប្រភពពីម្ចាស់ទីតាំងល្បែងខ្លះបានទម្លាយប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះថា ម្ចាស់សង្វៀនមាន់ជល់ ម្ចាស់ទីតាំងល្បែងចាក់អាប៉ោង ម្ចាស់ទីតាំងល្បែងបៀ និងការចែកចាយថ្នាំញៀនពីសំណាក់ក្មេងទំនើងនៅមូលដ្ឋាន ដែលអាចដំណើរការទៅបាន គឺដោយសារមានការសូកប៉ាន់ឱ្យអាជ្ញាធរមូលដ្ឋានជាប្រចាំ ហើយអាជ្ញាធរទាំងនោះក៏ធ្វើជាភ្នែកជាច្រមុះឱ្យពួកគេរាល់ពេលមានការបង្ក្រាបពីថ្នាក់ជាតិចុះទៅមូលដ្ឋានផងដែរ៕