ក្រសួងមហាផ្ទៃ បានដាក់មន្ត្រីសវនកម្មចំនួន ៧នាក់ឱ្យស្ថិតក្រោមការស៊ើបអង្កេត បន្ទាប់ពីពួកគេព្រមទទួលស្គាល់កំហុសថា ខ្លួនបានដឹកនាំក្រុមការងារចុះធ្វើសវនកម្មនៅតាមបណ្តាឃុំមួយចំនួនក្នុងស្រុកសាមគ្គីមានជ័យ ខេត្តកំពង់ស្ពឺ ពិតប្រាកដមែន។
ហ្វេសប៊ុករបស់ក្រសួងមហាផ្ទៃ កាលពីពេលថ្មីៗនេះ បានឲ្យដឹងថា ក្រសួងមហាផ្ទៃបានអញ្ជើញលោក កែវ សារ៉ាវុធ ដែលមានតួនាទីជាអគ្គនាយករងនៃអគ្គនាយកដ្ឋានសវនកម្មផ្ទៃក្នុងរបស់ក្រសួងមហាផ្ទៃ ចូលមកបំភ្លឺក្នុងអគ្គនាយកដ្ឋានកាលពីថ្ងៃទី២១ ខែឧសភា កន្លងទៅនេះ ហើយលោកព្រមទទួលស្គាល់កំហុសថា លោកពិតជាបានដឹកនាំក្រុមការងារ ៧រូប ធ្វើសវនកម្មនៅខេត្តកំពង់ស្ពឺ ចាប់ពីថ្ងៃទី២៤ ខែមេសា ឆ្នាំ២០២៤ ដោយប្រើមធ្យោបាយធ្វើដំណើរដោយរថយន្តផ្ទាល់ខ្លួនចំនួន ២គ្រឿង ហើយទើបតែធ្វើសវនកម្មបានចំនួន ៤ស្រុកប៉ុណ្ណោះ។
ប្រភពដដែលបានឲ្យដឹងថា ចំណាត់ការរបស់ក្រសួងមហាផ្ទៃ កើតឡើងក្រោយមានការផ្សព្វផ្សាយព័ត៌មានតាមបណ្ដាញសង្គមហ្វេសប៊ុកអំពីភាពមិនប្រក្រតីនៃការបំពេញការងាររបស់មន្ត្រីទាំង ៧នាក់នោះ ដោយបានដកយកប្រាក់ពីសាលាឃុំក្នុងមួយឃុំចំនួន ១លានរៀល ក្នុងពេលដែលក្រុមការងាររបស់លោក កែវ សារ៉ាវុធ ចុះធ្វើសវនកម្មនៅការិយាល័យសាលាឃុំចំនួន១០។
អ្នកនាំពាក្យក្រសួងមហាផ្ទៃ លោក ទូច សុខៈ ប្រាប់សារព័ត៌មានក្នុងស្រុកថា បច្ចុប្បន្នដំណើររឿងនេះកំពុងស្ថិតនៅក្នុងដំណាក់កាលស៊ើបអង្កេត និងសិក្សាស្រាវជ្រាវបន្ត ព្រោះសមាសភាពក្រុមការងាររបស់លោក កែវ សារ៉ាវុធ មានច្រើននាក់។
ប្រភពដដែលបន្តថា ពួកគេបានទទួលស្គាល់កំហុសថា បានទទួលយកលុយនោះមែន ហើយលុយដែលទទួលបានពីបណ្តាឃុំទាំងនោះ គឺជាទឹកចិត្ត និងការរាប់អានគ្នា មិនមែនជាថ្នូរ ឬការគាបសង្កត់ ឬក៏ការដាក់សម្ពាធនោះទេ។
លោកថា នេះគ្រាន់តែជាការអះអាងរបស់ក្រុមមន្ត្រីទាំងនោះប៉ុណ្ណោះ ហើយអ្វីដែលអាចនឹងធ្វើឱ្យដឹងច្បាស់ជាងនេះ គឺការស៊ើបអង្កេតបន្ថែមរបស់ក្រសួងដែលកំពុងខិតខំស្រាវជ្រាវរកមូលហេតុឱ្យពិតប្រាកដ ដើម្បីផ្តល់យុត្តិធម៌ដល់ភាគីពាក់ព័ន្ធទាំងអស់។
ក្រសួងមហាផ្ទៃ អំពាវនាវជូនសាធារណជនថា ដើម្បីប្រសិទ្ធភាពនៃការងារកំណែទម្រង់ស្របតាមយុទ្ធសាស្ត្របញ្ចកោណរបស់រដ្ឋាភិបាល និងទស្សនៈដឹកនាំ «សម្អាតផ្ទះយើង» របស់លោក ហ៊ុន ម៉ាណែត ការចូលរួមចំណែកពីប្រព័ន្ធផ្សព្វផ្សាយ និងសាធារណមតិ ពិតជាមានសារសំខាន់ណាស់។ ក្រសួងមហាផ្ទៃ លើកទឹកចិត្ត និងទទួលយកដោយការពិចារណាខ្ពស់នូវព័ត៌មានទាំងឡាយដែលពាក់ព័ន្ធនឹងភាពមិនប្រក្រតីនៃការអនុវត្តតួនាទីភារកិច្ចរបស់មន្ត្រីរាជការស៊ីវិល មន្ត្រីនគរបាលជាតិ និងមន្ត្រីពន្ធនាគារគ្រប់ថ្នាក់ ក៏ដូចជាសំណើ សំណូមពរ និងមតិយោបល់របស់ពលរដ្ឋគ្រប់មជ្ឈដ្ឋាន។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ បានលើកឡើងថា ការកិបកេងថវិការបស់រដ្ឋនេះជាផ្នែកមួយនៃការប្រព្រឹត្តអំពើពុករលួយ ដែលជាបញ្ហាដ៏ធំ និងធ្វើឱ្យប៉ះពាល់ដល់ការអនុវត្តច្បាប់របស់ប្រទេស។
ប្រភពដដែលបានឲ្យដឹងថា រដ្ឋាភិបាលគួរតែធ្វើការត្រួតពិនិត្យឡើងវិញទៅលើបញ្ហាទាំងអស់នេះ ហើយដាក់ចេញគោលការណ៍អនុវត្តច្បាប់ដោយយុត្តិធម៌ ព្រមទាំងស៊ើបអង្កេតទៅលើបញ្ហាផ្សេងៗជុំវិញកិច្ចការសវនកម្មស្ថាប័នរដ្ឋ ដើម្បីកុំឱ្យរឿងស្រដៀងនឹងអ្វីដែលបានកើតឡើងនៅខេត្តកំពង់ស្ពឺ នោះ អាចកើតឡើងជាថ្មីទៀត។
យោងតាមរបាយការណ៍របស់អង្គការតម្លាភាពអន្តរជាតិ ស្តីអំពីស្ថានភាពអំពើពុករលួយនៅកម្ពុជាក្នុងឆ្នាំ២០២៣ ត្រូវគេរកឃើញថា បានធ្លាក់ចុះ ៨លេខ បើធៀបនឹងឆ្នាំ២០២២ កន្លងទៅ ដែលធ្វើឱ្យសន្ទស្សន៍ស្ដីពីអំពើពុករលួយឆ្នាំ២០២៣ ជាប់ចំណាត់ថ្នាក់លេខ១៥៨ ក្នុងចំណោមប្រទេស ១៨០ លើពិភពលោក និងនៅក្នុងតំបន់អាស៊ាន។
បើធៀបជាមួយប្រទេសខ្លះក្នុងតំបន់អាស៊ាន កម្ពុជានៅតែស្ថិតជិតបាតតារាង ពោលនៅពីលើតែប្រទេសភូមា មួយគត់ដែលទទួលបានពិន្ទុ ២០។ ចំណែកនៅអាស៊ីប៉ាស៊ីហ្វិក វិញ កម្ពុជាមានលេខរៀងទាបបំផុតជាងគេទី៤ ដោយនាំមុខតែប្រទេសអាហ្វហ្គានីស្ថាន ភូមា និងកូរ៉េខាងជើង៕