29 C
Phnom Penh

អតីត​នាយករដ្ឋមន្ត្រី​កម្ពុជា​អរគុណ​ចិន​ជំនួស​នាយករដ្ឋមន្ត្រី​ដឹកនាំ​រាជរដ្ឋាភិបាល​បច្ចុប្បន្ន

ដោយ ឌឹ ខេមបូឌា ដេលី

បទវិភាគ

មេដឹកនាំ​បក្ស​កាន់​អំណាច​លោក ហ៊ុន សែន ថ្លែង​នៅ​មុខ​ឯកអគ្គរដ្ឋទូត​សាធារណរដ្ឋ​ប្រជាមានិត​ចិន ប្រចាំ​ប្រទេស​កម្ពុជា លោក Wang Wentian ដែល​ត្រូវ​បញ្ចប់​អាណត្តិ​របស់​ខ្លួន​ថា ទំនាក់ទំនង​រវាង​ប្រទេស​កម្ពុជា និង​ចិន ដែល​ជា​ទំនាក់ទំនង​ប្រវត្តិសាស្ត្រ​យូរ​អង្វែង បាន​រីកចម្រើន​រហូត​ដល់​កម្រិត​ដែល​មិន​អាច​បំបែក​បាន ទោះ​ជា​មាន​ការ​ផ្លាស់ប្ដូរ​នាយករដ្ឋមន្ត្រី​ថ្មី​ក៏ដោយ។

ប្រធាន​ព្រឹទ្ធសភា លោក ហ៊ុន សែន សរសេរ​លើ​ទំព័រ​ហ្វេសប៊ុក​របស់​ខ្លួន​នៅ​ថ្ងៃទី​២៧ ឧសភា នេះ​បន្ទាប់ពី​បាន​ជួប​ជាមួយ​លោក Wang Wentian ឯកអគ្គរដ្ឋទូត​ចិន​ប្រចាំ​កម្ពុជា នៅ​ថ្ងៃទី​២៧ ខែ​ឧសភា ឆ្នាំ​២០២៤ នៅ​វិមាន​ព្រឹទ្ធសភា មុន​នឹង​លោក​ត្រូវ​ចប់​អាណត្តិ​របស់​ខ្លួន​ថា ទំនាក់ទំនង​រវាង​ប្រទេស​កម្ពុជា និង​ចិន គឺ​មាន​ភាព​ស័ក្តិសម​នឹង​មាន​គុណតម្លៃ​នៃ​ការ​ជឿ​ទុកចិត្ត​គ្នា ជាពិសេស​គឺ​ទំនុក​ចិត្ត​ខាង​នយោបាយ ត្បិត​ជំនួយ​ពី​ប្រទេស​ចិន ដល់​ប្រទេស​កម្ពុជា​រហូត​មក មិន​ត្រឹមតែ​ជួយ​អភិវឌ្ឍ​សង្គម សេដ្ឋកិច្ច​នៅ​ប្រទេស​កម្ពុជា​ប៉ុណ្ណោះ​ទេ តែ​ថែមទាំង​ជួយ​ពង្រឹង​ឯករាជភាព​ខាង​នយោបាយ​នៃ​កម្ពុជា​ទៀត​ផង។

លោក ហ៊ុន សែន លើកឡើង​ថា លោក Wang Wentian បាន​ចាត់ទុក​ថា​ទំនាក់ទំនង​រវាង​ប្រទេស​ទាំង​ពីរ គឺជា​គំរូ​នៃ​ទំនាក់ទំនង​អន្តរជាតិ​បែប​ថ្មី ខណៈ​ចិន បាន​ចាត់ទុក​ប្រទេស​កម្ពុជា​ជា​ប្រទេស​អាទិភាព​ក្នុង​កិច្ច​សហប្រតិបត្តិការ​ឱ្យ​មាន​ការ​រីកចម្រើន ដើម្បី​ផល​ប្រយោជន៍​ទៅវិញ​ទៅមក​នៃ​ប្រទេស​ទាំង​ពីរ។

ឯកអគ្គរដ្ឋទូត​នៃ​សាធារណរដ្ឋ​ប្រជាមានិត​ចិន ក៏​បាន​ថ្លែង​អំណរគុណ​ដល់​រាជរដ្ឋាភិបាល​ផង​ដែរ ដែល​រក្សា​ជំហរ​យុត្តិធម៌​ស្ដីពី​សមុទ្រ​ចិន​ខាងត្បូង បញ្ហា​កោះ​តៃវ៉ាន់ និង​តំបន់​ស៊ីនជាំង ដើម្បី​ការពារ​ផល​ប្រយោជន៍​ចិន-កម្ពុជា និង​ផល​ប្រយោជន៍​អាស៊ាន-ចិន ដែល​ក្នុង​ន័យ​នេះ គឺ​បង្ហាញ​ថា ទោះបីជា​ស្ថានការណ៍​ពិភពលោក​ប្រែប្រួល​ក៏ដោយ ក៏​ទំនាក់ទំនង​រវាង​ចិន និង​កម្ពុជា មិន​ប្រែប្រួល​ដែរ។

ទាក់ទិន​នឹង​បញ្ហា​នេះ មេដឹកនាំ​បក្ស​កាន់​អំណាច​លោក ហ៊ុន សែន ធ្លាប់​បញ្ជាក់​ជំហរ​របស់​ខ្លួន​ជារឿយៗ​ទៅ​កាន់​ប្រទេស​ក្នុង​តំបន់​អាស៊ី និង​មហាអំណាច​ពិភពលោក​នានា​កាលពី​ពេល​កន្លង​ទៅ​ថា ដោយសារតែ​បាន​មិត្ត​ចិន ទើប​កម្ពុជា​មាន​ស្ពាន​ឆ្លង​ទន្លេ មាន​ផ្លូវ​ខ្វាត់ខ្វែង​ដូច​សព្វថ្ងៃ​នេះ ដូច្នេះ​បើ​មិន​ឱ្យ​កម្ពុជា​ពឹង​ចិន តើ​ឱ្យ​កម្ពុជា​ទៅ​ពឹង​អ្នក​ណា?

ចាប់តាំងពី​ដើម​ឆ្នាំ​២០២០ ដែល​លោក ហ៊ុន សែន បាន​ចុះហត្ថលេខា​លើ​កិច្ចព្រមព្រៀង​នយោបាយ​ជោគ​វាសនា​រួម​គ្នា​ជាមួយ​ចិន និង​បាន​ប្រកាស​យក​ចិន ជា​មិត្ត​ស្រោប​ដែក ឬ «ដែកថែប» មក គេ​សង្កេត​ឃើញ​ថា ប្រទេស​កម្ពុជា​បាន​ចុះ​កិច្ចព្រមព្រៀង​ពាណិជ្ជកម្ម​ជា​បន្តបន្ទាប់​ជាមួយ​ចិន ចាប់តាំងពី​ចុង​ឆ្នាំ​២០២០ មក ខណៈ​ការ​ខ្ចី​បុល​របស់​ចិន ក៏​ចេះតែ​កើន​ឡើង​រហូត​ដល់​ជាង ១​ម៉ឺន​លាន​ដុល្លារ​សហរដ្ឋ​អាមេរិក​ដែរ​នៅ​ពេលនេះ។ ចំពោះ​កិច្ចព្រមព្រៀង​មួយ​ចំនួន​វិញ គេ​សង្កេត​ឃើញ​ថា មាន​កិច្ចព្រមព្រៀង​ខ្លះ​ធ្វើ​ឡើង​ជា​របៀប​សម្ងាត់ មិន​ឲ្យ​សាធារណជន​ខ្មែរ​បាន​ឃើញ ដឹង​ឮ​ឡើយ ហើយ​មាន​ខ្លះ​ជា​កិច្ចព្រមព្រៀង​យោធា​ទៀត​ផង។

ក្រៅពី​ការ​ខ្ចី​បុល​ចិន និង​ការ​ធ្វើ​ពាណិជ្ជកម្ម ការ​អភិវឌ្ឍ​នានា ដូចជា​ការ​កសាង​ផ្លូវ​ល្បឿន​លឿន ការ​សាងសង់​ផ្លូវអាកាស និង​ការ​ប្រកាស​ពី​ការ​សាងសង់​ផ្លូវទឹក​ព្រែកជីក​ហ្វូណន​តេជោ​នៅ​ពេលនេះ ជាដើម ក៏​សុទ្ធសឹងតែ​ជា​គម្រោង​វិនិយោគ​របស់​ក្រុមហ៊ុន​ចិន ដែរ ក្រោម​កិច្ច​សហប្រតិបត្តិការ​ទម្រង់ BOT ដែល​កម្ពុជា​នឹង​ប្រគល់​ឱ្យ​ចិន គ្រប់គ្រង​រយៈពេល​ជាង ៥០​ឆ្នាំ​ទៅ​ថ្ងៃ​មុខ។

ជុំវិញ​ទំនាក់ទំនង​កម្ពុជា-ចិន គេ​សង្កេត​ឃើញ​ថា បាន​ចាប់ផ្តើម​តាំងពី​ឆ្នាំ​២០១២ មក​ម្ល៉េះ ព្រោះ​ថា​នៅ​ពេល​ដែល​កម្ពុជា​ដើរ​តួនាទី​ជា​ប្រធាន​អាស៊ាន​នៅ​ពេល​នោះ លោក ហ៊ុន សែន មិន​បាន​ចេញ​សេចក្តី​ថ្លែងការណ៍​ជុំវិញ​ជម្លោះ​សមុទ្រ​ចិន​ខាងត្បូង​រវាង​ចិន និង​ប្រទេស​ភាគី​ជម្លោះ​ជាមួយ​ចិន នោះ​ទេ ក្រោម​ហេតុផល​ថា កម្ពុជា​មិន​លូក​ដៃ​ចូល​កិច្ចការ​ផ្ទៃក្នុង​ប្រទេស​ដទៃ ប៉ុន្តែ​មជ្ឈដ្ឋាន​ខ្លះ​អះអាង​ថា ទង្វើ​របស់​លោក ហ៊ុន សែន គឺ​បម្រើ​ប្រយោជន៍​ឱ្យ​ចិន។

ចាប់តាំងពី​ឆ្នាំ​២០១៩ មក គេ​បាន​សង្ស័យ​ពី​ទំនាក់ទំនង​រវាង​កម្ពុជា-ចិន កាន់តែ​ខ្លាំង​លើស​ពី​ទំនាក់ទំនង​ការទូត​ក្នុង​នាម​ប្រទេស​ជា​មិត្ត ជាពិសេស​ការ​សង្ស័យ​ទៅ​លើ​ការ​ផ្តល់​មូលដ្ឋាន​ជើងទឹក​រាម​របស់​កម្ពុជា ឱ្យ​ជា​មូលដ្ឋាន​ទ័ព​ជើងទឹក​របស់​កងទ័ព​ចិន ឈរជើង ដែល​បាន​ចុះផ្សាយ​ដោយ​កាសែត​អាមេរិក The Wall Street Journal កាលពី​អំឡុង​ឆ្នាំ​២០១៩ កន្លង​ទៅ​នោះ។

អ្នកវិភាគ​នយោបាយ សង្គម និង​ជា​ប្រធាន​វេទិកា​ពលរដ្ឋ លោក គឹម សុខ បាន​ប្រាប់​សារព័ត៌មាន The Cambodia Daily នៅ​ថ្ងៃទី​២៧ ឧសភា នេះ​ថា កម្ពុជា​អាច​ធ្វើ​ជា​មិត្ត​ល្អ​ជាមួយ​ចិន​បាន តែ​មិន​ត្រូវ​ឱន​ក្បាល​ដាក់​ចិន​ទេ នាំ​ឱ្យ​បាត់បង់​កិត្តិយស​របស់​ខ្លួន​លើ​ឆាក​អន្តរជាតិ។

អ្នកវិភាគ​រូប​នេះ​លើកឡើង​ថា ការ​ប្រកាស​ក្ដែងៗ​ពី​ទំនាក់ទំនង​ជាមួយ​ចិន ដែល​ថា​គ្មាន​នរណា​បំបែក​បាន​បែប​នេះ គ្រាន់តែ​ជា​ភាសា​ការទូត​នយោបាយ​ដើម្បី​យក​ចិត្ត​ចិន ឱ្យ​មិត្ត​កុម្មុយនីស្ត​មួយ​នេះ​បន្ត​ផ្តល់​នូវ​អ្វី​ដែល​ខ្លួន​ចង់​បាន​បន្ថែម​ទៀត​ប៉ុណ្ណោះ ព្រោះ​ថា​គ្មាន​បរទេស​ណា​មក​បំបែក​ទំនាក់ទំនង​ការទូត​នៃ​ប្រទេស​មួយ​ជាមួយ​នឹង​ប្រទេស​មួយ​ផ្សេង​ទៀត​នោះ​ទេ កុំ​ឱ្យ​តែ​ទំនាក់ទំនង​នោះ​ជា​ការ​គប់គិត​ខុស​ច្បាប់​ដែល​បង្ក​អសន្តិសុខ​ក្នុង​តំបន់។

លោក គឹម សុខ បញ្ជាក់​ថា ការ​ឱន​ក្បាល​ដាក់​ចិន ព្រោះ​ចង់​បាន​ជំនួយ ឬ​ការ​ខ្ចី​បុល​ពី​គេ ប្រទេស​កម្ពុជា​នឹង​ខាតបង់​យ៉ាង​ធំធេង ដូចជា​ហិនហោច​ព្រៃឈើ រ៉ែ និង​ភោគទ្រព្យ​ដទៃ​ទៀត។ បន្ថែម​ពី​នេះ ប្រទេស​កម្ពុជា​ក៏​នឹង​ក្លាយ​ជា​ទីផ្សារ​លាង​លុយ​កង្វក់ និង​ក្លាយ​ជា​កន្លែង​ប្រព្រឹត្ត​អំពើ​ឧក្រិដ្ឋ​ផ្សេងៗ​សម្រាប់​ចិន ដែរ ដែល​បញ្ហា​នេះ​មិន​ត្រឹមតែ​ខាត​ផល​ប្រយោជន៍​សេដ្ឋកិច្ច​កម្ពុជា​ទេ ថែមទាំង​បង្កើត​វិបត្តិ​សង្គម​ធ្ងន់ធ្ងរ​ដល់​ពលរដ្ឋ​ខ្មែរ​ថែម​ទៀត​ផង៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស