29 C
Phnom Penh

ប្រធានាធិបតី​អ៊ុយក្រែន​ទទូច​ឱ្យ​លោក បៃដិន និង​លោក ស៊ី ជីនពីង ចូលរួម​វេទិកា​សន្តិភាព​សម្រាប់​អ៊ុយក្រែន

ដោយ ឌឹ ខេមបូឌា ដេលី

បទវិភាគ

កាលពី​ថ្ងៃទី​២៥ ឧសភា ទីភ្នាក់ងារ​ព័ត៌មាន Reuters បាន​ឱ្យ​ដឹង​ថា ប្រធានាធិបតី​រុស្ស៊ី លោក វ៉្លាឌីមៀ ពូទីន បង្ហាញ​អារម្មណ៍​ចង់​ឱ្យ​មាន​បទ​ឈប់​បាញ់​គ្នា​នៅ​សមរភូមិ​ជួរមុខ​នៃ​ប្រទេស​អ៊ុយក្រែន ប៉ុន្តែ​បទ​ឈប់​បាញ់​ដែល​អាច​ធ្វើ​ទៅ​បាន លុះត្រា​អ៊ុយក្រែន ទទួល​យក​លក្ខខណ្ឌ​របស់​ក្រុង​មូស្គូ។

លក្ខខណ្ឌ​ដែល​លោក ពូទីន បង្ហើប​ឱ្យ​ដឹង គឺ​អ៊ុយក្រែន ត្រូវ​ទទួលស្គាល់​ដែនដី​រុស្ស៊ី វាយ​យក​បាន​ពី​កងទ័ព​អ៊ុយក្រែន នៅ​ភាគ​ខាងកើត និង​ភាគ​ខាងត្បូង។

តាម​ប្រភព​ព័ត៌មាន​ដដែល​នេះ មេដឹកនាំ​វិមាន​ក្រឹមឡាំង ដែល​បង្ហាញ​ជំហរ​ចង់​ចរចា​ឱ្យ​មាន​ការ​បញ្ឈប់​សង្គ្រាម​នៅ​លើ​ទឹកដី​អ៊ុយក្រែន ក៏​ស្រប​ពេល​កងទ័ព​រុស្ស៊ី កំពុង​មាន​ប្រៀប​ជាង​កងទ័ព​អ៊ុយក្រែន នៅ​សមរភូមិ​ជួរមុខ។ តែ​ទោះជា​បែប​នេះ​ក្ដី ប្រធានាធិបតី​អ៊ុយក្រែន លោក វូឡូឌីមៀ ហ្សេឡេនស្គី (Volodymyr Zelensky) បាន​ចេញ​សេចក្ដី​ថ្លែងការណ៍​វាយប្រហារ​ចំអក​ឱ្យ​លោក ពូទីន ថា ការ​ដែល​លោក ពូទីន លើក​ទ័ព​លុកលុយ​ប្រទេស​អ៊ុយក្រែន ថា​តើ​បាន​គិត​ថា​អ៊ុយក្រែន ធ្វើ​តាម​គំនាប​របស់​រុស្ស៊ី ដែរ​ឬ​ទេ។

លោក Zelensky ប្រាប់​ទៅ​លោក ពូទីន ថា អ៊ុយក្រែន មិន​ចរចា​ដោយ​ផ្ទាល់​ជាមួយ​រុស្ស៊ី ទេ គឺ​ក្រុង​មូស្គូ ត្រូវ​ចរចា​ជាមួយ​ក្រុម​ប្រទេស​បស្ចិម​ប្រទេស ហើយ​អ៊ុយក្រែន រង់ចាំ​ស្ដាប់​លទ្ធផល​ចេញ​ពី​ការ​ចរចា​នោះ ថា​តើ​រុស្ស៊ី យល់ព្រម​ដក​ទ័ព​ចេញពី​ទឹកដី​អ៊ុយក្រែន ឬ​ទេ។ លោក Zelensky បាន​សង្កត់​ធ្ងន់​ថា នេះ​ជា​លក្ខខណ្ឌ​ដែល​អាច​មាន​ដំណោះស្រាយ។

តែ​ពេល​ជាមួយ​គ្នា​នេះ កាល​ពី​ថ្ងៃ​អាទិត្យ ទី​២៧ ឧសភា ប្រធានាធិបតី​អ៊ុយក្រែន បាន​ផ្ញើ​សារ​អញ្ជើញ​លោក​ប្រធានាធិបតី​ចិន និង​លោក​ប្រធានាធិបតី​សហរដ្ឋ​អាមេរិក ទៅ​ចូលរួម​ជំនួប​កំពូល​នៃ​វេទិកា​សន្តិភាព​ដែល​នឹង​ត្រូវ​ប្រព្រឹត្ត​ទៅ​នៅ​ប្រទេស​ស្វីស នៅ​ថ្ងៃទី​១៥-១៦ ខែ​មិថុនា ខែ​ក្រោយ​នេះ។

វេទិកា​សន្តិភាព​សម្រាប់​ប្រទេស​អ៊ុយក្រែន គឺ​រដ្ឋាភិបាល​ស្វីស និង​អ៊ុយក្រែន ជា​អ្នក​រៀបចំ​រួម​គ្នា។ វេទិកា​នេះ​មាន​គោលបំណង​បង្រួបបង្រួម​មតិ​ជា​សកល​អំពី​របៀប​បញ្ឈប់​សង្គ្រាម និង​បង្កើន​សម្ពាធ​លើ​ប្រធានាធិបតី​រុស្ស៊ី លោក វ៉្លាឌីមៀរ ពូទីន។ វេទិកា​នេះ​នឹង​ធ្វើ​ឡើង​នៅ​ទីក្រុង Lucerne ភាគ​កណ្តាល​ប្រទេស​ស្វីស។

កាលពី​ពេល​ថ្មីៗ​នេះ រដ្ឋាភិបាល​ស្វីស បាន​ឲ្យ​ដឹង​ថា គេ​បាន​ផ្ញើ​លិខិត​អញ្ជើញ​គណៈប្រតិភូ​ពី​បណ្តា​ប្រទេស​ចំនួន​ប្រមាណ ១៦០​ប្រទេស តែ​គិត​ត្រឹម​ដំណាក់កាល​នេះ គឺ​គេ​មិន​បាន​អញ្ជើញ​រុស្ស៊ី ឱ្យ​ចូលរួម​ទេ។

តាម​រូបភាព​ក្នុង​វីដេអូ​ដែល​ត្រូវ​បាន​ថត​នៅ​ទីក្រុង Kharkiv ភាគ​ឦសាន​ជា​សមរភូមិ​ថ្មី​មួយ​ទៀត​របស់​ក្រុង​មូស្គូ គេ​ឃើញ​រូបលោក Zelensky នៅ​ខាង​ក្នុង​សំណល់​អគារ​មួយ​ដែល​ត្រូវ​បាន​បំផ្លាញ​ដោយ​ការ​វាយប្រហារ​ពី​គ្រាប់​មីស៊ីល​របស់​រុស្ស៊ី។ ក្នុង​ឃ្លីប​វីដេអូ​នោះ លោក Zelensky បាន​ប្រកាស​ថា ប្រទេស​ជាង ៨០ នឹង​ចូលរួម​កិច្ចប្រជុំ​កំពូល​នេះ។

ក្នុង​ចំណោម​ប្រទេស និង​គណៈប្រតិភូ​ដែល​ត្រូវ​បាន​គេ​អញ្ជើញ គឺ​មាន​ក្រុម​ប្រទេស​សមាជិក G-7 សមាជិក G-20 ប្រទេស​សហភាព​អឺរ៉ុប ប្រទេស​នៃ​សមាជិក​ក្រុម BRICS រួម​នឹង​ប្រទេស​ជាច្រើន​ទៀត​នៅ​ទូទាំង​ពិភពលោក។

រុស្ស៊ី បាន​លើកឡើង​ថា ការ​រៀបចំ​ជំនួប​កំពូល​ដើម្បី​សន្តិភាព​ស្ដីពី​សង្គ្រាម​នៅ​អ៊ុយក្រែន ដែល​គ្មាន​តំណាង​របស់​រុស្ស៊ី ចូលរួម គឺ​គ្មាន​ន័យ​អ្វី​ទាំងអស់។ មិន​តែប៉ុណ្ណោះ រុស្ស៊ី​បាន​រិះគន់​ថា គំនិត​ដែល​ស្នើ​ឡើង​ដោយ​លោក Zelensky គឺ​គ្មាន​អ្វី​ក្រៅ​តែ​ពី​ចង់​ឱ្យ​ជំនួប​កំពូល​ដាក់​សម្ពាធ​លើ​រុស្ស៊ី ដក​ទ័ព​ចេញពី​អ៊ុយក្រែន និង​បង្ខំ​រុស្ស៊ី សង​សំណង​ខូចខាត​ដែល​ឈាន​ទៅ​ដល់​បង្កើត​តុលាការ​ពិសេស​មួយ​ដើម្បី​កាត់ទោស​ក្រុង​មូស្គូ។

តែ​បែប​នេះ​ក្ដី លោក Zelensky បាន​ថ្លែង​ថា លោក​សូម​អំពាវនាវ​ដល់​មេដឹកនាំ​ពិភពលោក ទាំង​ប្រធានាធិបតី​សហរដ្ឋ​អាមេរិក ចូ បៃដិន និង​ប្រធានាធិបតី​ចិន ស៊ី ជីនពីង សូម​បង្ហាញ​ភាព​ជា​អ្នក​ដឹកនាំ​របស់​អ្នក​ក្នុង​ការ​ជំរុញ​សន្តិភាព ដែល​សន្តិភាព​ពិតប្រាកដ វា​មិនមែន​គ្រាន់តែ​ជា​ការ​ផ្អាក​ការ​ប្រយុទ្ធ​គ្នា​នោះ​ទេ។ លោក ហ្សេឡេនស្គី បាន​ថ្លែង​បន្ត​ថា ការ​ប្រឹងប្រែង​របស់​ពិភពលោក គឺជា​ការ​ធានា​ដ៏​ល្អ​អំពី​ការ​ដាក់​បង្ខំ​ទៅ​លើ​ភាគី​ទាំង​ពីរ រុស្ស៊ី​និង​អ៊ុយក្រែន ត្រូវតែ​គោរព និង​អនុវត្ត បើ​ផែនការ​សន្តិភាព​ត្រូវ​អនុម័ត។

បើ​តាម​លោក​ប្រធានាធិបតី​អ៊ុយក្រែន រូប​នេះ កិច្ចប្រជុំ​កំពូល​អំពី​សន្តិភាព​សម្រាប់​ប្រទេស​អ៊ុយក្រែន នឹង​បង្ហាញ​ថា ពិភពលោក​នេះ​ពិត​ជា​ចង់​បញ្ចប់​សង្គ្រាម ហើយ​ថា​អ្នក​ដែល​គ្រាន់តែ​និយាយ​ចង់​បញ្ឈប់​សង្គ្រាម ខណៈ​កងទ័ព​ប្រទេស​នៅតែ​ឈ្លានពាន​អ៊ុយក្រែន គឺ​ប្រទេស​នោះ​គ្មាន​ភាព​សុចរិត​ទៀងត្រង់​ឡើយ។ ការ​អំពាវនាវ​របស់​លោក Zelensky បាន​បង្ហាញ​ពី​ភាព​មិន​ប្រាកដប្រជា​ថា តើ​លោក បៃដិន នឹង​ចូលរួម​ដែរ​ឬ​ទេ ខណៈ​ប្រទេស​ចិន ក៏​មិន​បាន​បញ្ជាក់​ពី​ការ​ចូលរួម​របស់​ខ្លួន​ដែរ។

នៅ​ក្នុង​ផែនការ​សន្តិភាព​របស់​លោក Zelensky ក៏​មាន​ការ​ទាមទារ​ឱ្យ​មាន​ការ​ដក​កងទ័ព​រុស្ស៊ី ទាំងស្រុង និង​ការ​ស្ដារ​ឡើងវិញ​នូវ​ព្រំដែន​ដែល​ត្រូវ​បាន​ទទួលស្គាល់​ជា​អន្តរជាតិ​នៅ​ឆ្នាំ​១៩៩១។

មក​ដល់​ពេលនេះ រដ្ឋាភិបាល​ក្រុង​ប៉េកាំង នៅ​មិន​ទាន់​ឆ្លើយតប​យ៉ាង​ណា​មួយ​ទៅ​កាន់​ប្រទេស​ស្វីស នៅឡើយ​ទេ។ តែ​ចំពោះ​សហរដ្ឋ​អាមេរិក វិញ បាន​បង្ហើប​ថា លោក បៃដិន អាច​នឹង​ទៅ​ចូលរួម។

គេ​រំពឹង​ថា​វេទិកា​ពិភពលោក​ស្ដីពី​សន្តិភាព​សម្រាប់​ប្រទេស​អ៊ុយក្រែន អាច​នឹង​លើកឡើង​ផង​ដែរ​អំពី​ការ​បង្កក​ទ្រព្យសម្បត្តិ​រុស្ស៊ី ប្រមាណ ៣០០​ពាន់​លាន​ដុល្លារ ដែល​មាន​នៅ​លើ​ទឹកដី​អឺរ៉ុប និង​សហរដ្ឋ​អាមេរិក។

សេចក្តី​ព្រាង​នៃ​សេចក្តី​ថ្លែងការណ៍​ពី​ប្រទេស​ឧស្សាហកម្ម​ជឿនលឿន G-7 ក៏​បាន​កំណត់​ពី​ការ​បើក​ផ្លូវ​ឱ្យ​មាន​ការ​រឹបអូស​ទ្រព្យសម្បត្តិ​របស់​រុស្ស៊ី ដើម្បី​ដោះដូរ​ទៅ​ជា​ហិរញ្ញវត្ថុ​ជា​ប្រយោជន៍​សម្រាប់​អ៊ុយក្រែន ដែល​ក្នុង​នោះ​មាន​ទាំង​ការ​ស្ដារ​សេដ្ឋកិច្ច ហេដ្ឋារចនាសម្ព័ន្ធ​ប្រទេស​អ៊ុយក្រែន ដែល​រង​វិនាសកម្ម​ធ្ងន់ធ្ងរ​ដោយ​សង្គ្រាម​ឈ្លានពាន​ពី​រុស្ស៊ី៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស