28 C
Phnom Penh

លោក សម រង្ស៊ី ថា​មូលហេតុ​ប្រធានាធិបតី​បារាំង​ចាញ់​ឆ្នោត​គឺ​ដោយសារ​សេពគប់​លោក ហ៊ុន សែន

ដោយ ឌឹ ខេមបូឌា ដេលី

បទវិភាគ

អតីត​មេដឹកនាំ​បក្ស​ប្រឆាំង​លោក សម រង្ស៊ី លើកឡើង​ថា មូលហេតុ​ដែល​ប្រធានាធិបតី​បារាំង លោក អេម៉ានុយអែល ម៉ាក្រុង (Emmanuel Macron) ចាញ់​ការ​បោះឆ្នោត​នៅ​ពេលនេះ គឺ​ដោយសារតែ​ប្រធានាធិបតី​បារាំង បាន​សេពគប់ និង​គាំទ្រ​របប​ដឹកនាំ​របស់​ត្រកូល​ហ៊ុន។

លោក សម រង្ស៊ី សរសេរ​លើ​ទំព័រ​ហ្វេសប៊ុក​របស់​ខ្លួន​នៅ​ថ្ងៃទី​១០ មិថុនា នេះ​ថា ប្រធានាធិបតី​បារាំង លោក Emmanuel Macron បាន​ប្រព្រឹត្តិ​កំហុស​នយោបាយ និង​កំហុស​សីលធម៌​យ៉ាង​ធំ​កន្លង​មក​ដែល​បាន​ទទួល​អតីត​នាយករដ្ឋមន្ត្រី​កម្ពុជា ហ៊ុន សែន កាលពី​ឆ្នាំ​២០២២ និង​បាន​ទទួល​នាយករដ្ឋមន្ត្រី​ខ្មែរ​បច្ចុប្បន្ន​លោក ហ៊ុន ម៉ាណែត ក្នុង​ឆ្នាំ​២០២៣ ដោយ​គ្មាន​ការ​លើកឡើង​សូម្បី​ពាក្យ​មួយ​ម៉ាត់​ពី​ស្ថានភាព​សិទ្ធិមនុស្ស​នៅ​កម្ពុជា ក្នុង​ការ​ទំនាក់ទំនង​របស់​ពួកគេ។

លោក សម រង្ស៊ី លើកឡើង​ថា នៅ​ពេល​ដែល​វិលត្រឡប់​ពី​ប្រទេស​បារាំង ទៅ​កម្ពុជា​វិញ ទាំង​លោក ហ៊ុន សែន និង​លោក ហ៊ុន ម៉ាណែត បាន​បញ្ជាក់​ពី​ការ​គាំទ្រ​របស់​បារាំង ចំពោះ​របប​ផ្ដាច់ការ​របស់​ពួកគេ​យ៉ាង​ពេញ​ទំហឹង ហើយ​ពីរ​នាក់​ឪពុក​កូន​នេះ ក៏​បាន​ធ្វើការ​ចាប់​ខ្លួន​ថ្មីៗ​ទៅ​លើ​ក្រុម​អ្នក​នយោបាយ​ប្រឆាំង សកម្មជន​បរិស្ថាន និង​អ្នក​ការពារ​សិទ្ធិមនុស្ស​ផង​ដែរ។

លោក សម រង្ស៊ី អំពាវនាវ​ឱ្យ​ប្រជាជន​បារាំង ដែល​មាន​ដើមកំណើត​ខ្មែរ​ទាំងអស់ ចូលរួម​បោះឆ្នោត​ជូន​បេក្ខជន​ដែល​មាន​គណបក្ស​ប្ដេជ្ញា​ស្ដារ​កិត្តិយស​បារាំង នៅ​កម្ពុជា​ឡើងវិញ ដើម្បី​ធានា​ថា រដ្ឋាភិបាល​បន្ទាប់ នឹង​គោរព​ចំពោះ​ការ​ប្ដេជ្ញា​ចិត្ត​ដែល​ទីក្រុង​ប៉ារីស បាន​ធ្វើ​ចំពោះ​កម្ពុជា ជាពិសេស​ការ​ប្ដេជ្ញា​ចិត្ត​ធានា​ការ​គោរព​របស់​ទីក្រុង​ប៉ារីស ដែល​បាន​ចុះហត្ថលេខា​កាលពី​ថ្ងៃទី​២៣ ខែ​តុលា ឆ្នាំ​១៩៩១ កន្លង​ទៅ គឺ​កិច្ចព្រមព្រៀង​សន្តិភាព​ទីក្រុង​ប៉ារីស ឆ្នាំ​១៩៩១។

កាលពី​ថ្ងៃទី​៩ ខែ​មិថុនា ឆ្នាំ​២០២៤ ប្រធានាធិបតី​បារាំង លោក អេម៉ានុយអែល ម៉ាក្រុង (Emmanuel Macron) ប្រកាស​ថា លោក​នឹង​រំលាយ​សភា ហើយ​ស្នើ​ឱ្យ​មាន​ការ​រៀបចំ​ការ​បោះឆ្នោត​សភា​បារាំង មុន​អាណត្តិ បន្ទាប់ពី​លទ្ធផល​បោះឆ្នោត​បណ្ដោះអាសន្ន​បង្ហាញ​ថា គណបក្ស​របស់​លោក​បាន​បរាជ័យ​ធ្ងន់ធ្ងរ​ក្នុង​ការ​បោះឆ្នោត​សភា​អឺរ៉ុប ជាមួយ​នឹង​គណបក្ស​គូប្រជែង National Rally (RN) របស់​អ្នកស្រី ម៉ារីន ឡឺប៉ែន (Marine Le Pen)។

ប្រទេស​បារាំង គឺជា​ម្ចាស់​ហត្ថលេខី​មួយ​ក្នុង​ចំណោម​ម្ចាស់​ហត្ថលេខី ១៨​ប្រទេស​ផ្សេង​ទៀត​ក្នុង​នាម​ជា​សមាជិក​អចិន្ត្រៃយ៍​ក្រុមប្រឹក្សា​សន្តិសុខ​អង្គការ​សហប្រជាជាតិ ដូចជា អាមេរិក អង់គ្លេស ចិន និង​សហភាព​សូវៀត ដូច្នេះ បារាំង ត្រូវ​មាន​តួនាទី​ជ្រោមជ្រែង​កម្ពុជា​ស្រប​តាម​លក្ខខណ្ឌ​ច្បាប់​ដែល​បាន​ចែង​ក្នុង​កិច្ចសន្យា​អន្តរជាតិ​នេះ ដូចជា ការ​តាមដាន​លើ​អធិបតេយ្យភាព​ជាតិ​របស់​កម្ពុជា ឱ្យ​ស្ថិត​ក្នុង​ភាព​អព្យាក្រឹត្យ មិន​ឱ្យ​ចំណុះ​មហាអំណាច​ណា​មួយ ជាដើម។

កាលពី​ពាក់កណ្តាល​ខែ​មករា ឆ្នាំ​២០២៤ នាយករដ្ឋមន្ត្រី​ថ្មី​របស់​កម្ពុជា​លោក ហ៊ុន ម៉ាណែត បាន​ធ្វើ​ដំណើរ​ទស្សនកិច្ច​ទៅ​កាន់​ប្រទេស​បារាំង ក្រោយ​ឡើង​កាន់​តំណែង​ជា​នាយករដ្ឋមន្ត្រី​បាន​ប្រមាណ ៤​ខែ ប៉ុន្តែ​ក្នុង​ដំណើរ​ទស្សនកិច្ច​នេះ គេ​មិន​បាន​ឃើញ​ប្រធានាធិបតី​បារាំង លោក អេម៉ានុយអែល ម៉ាក្រុង រំលឹក​កម្ពុជា​ពី​បញ្ហា​សិទ្ធិមនុស្ស ឬ​បញ្ហា​ស្ដារ​ប្រជាធិបតេយ្យ​ឡើយ។

យ៉ាងណា​ក៏ដោយ កាលពី​ចុង​ឆ្នាំ​២០២២ ក្នុង​ដំណើរ​ទស្សនកិច្ច​របស់​លោក ហ៊ុន សែន ទៅ​កាន់​ប្រទេស​បារាំង លោក អេម៉ានុយអែល ម៉ាក្រុង ក៏​ធ្លាប់​បាន​រម្លឹក​ឡើងវិញ​អំពី​ការ​ចុះហត្ថលេខា​លើ​កិច្ចព្រមព្រៀង​ទីក្រុង​ប៉ារីស ក្នុង​ឆ្នាំ​១៩៩១ ស្ដីពី​សន្តិភាព​នៅ​កម្ពុជា ដើម្បី​ធានា​អធិបតេយ្យភាព បូរណភាព​ទឹកដី​របស់​កម្ពុជា សម្រាប់​ការ​កសាង​កម្ពុជា​ឡើងវិញ​ដែរ។

ចំណែក​ស្ថានទូត​បារាំង ប្រចាំ​កម្ពុជា ក៏​ធ្លាប់​បាន​លើកឡើង​កាលពី​ពេល​កន្លង​ទៅ​ដែរ​ថា បារាំង និង​កម្ពុជា មាន​ទំនាក់ទំនង​ពិសេស ដោយសារតែ​ប្រទេស​ទាំង​ពីរ​មាន​ប្រវត្តិ​រួម​គ្នា​ផង និង​ជា​ប្រទេស​ដែល​និយាយ​ភាសា​បារាំង ដែរ។ ម្យ៉ាង​វិញ​ទៀត បារាំង​ក៏​មាន​តួនាទី​ចូលរួម​អភិវឌ្ឍ​ប្រទេស​កម្ពុជា​ក្រោយ​កិច្ចព្រមព្រៀង​ទីក្រុង​ប៉ារីស ឆ្នាំ​១៩៩១ ថែម​ទៀត។

ទាក់ទិន​នឹង​បញ្ហា​នេះ មេដឹកនាំ​បក្ស​កាន់​អំណាច​លោក ហ៊ុន សែន ធ្លាប់​បាន​លើកឡើង​កាលពី​អំឡុង​ខែ​កុម្ភៈ ឆ្នាំ​២០២៣ ក្នុង​ន័យ​ឌឺដង​ទៅ​ក្រុម​ប្រឆាំង​ថា ទំនាក់ទំនង​រវាង​រូបលោក និង​ប្រធានាធិបតី​បារាំង លោក អេម៉ានុយអែល ម៉ាក្រុង គឺ​លើស​ពី​ទំនាក់ទំនង​រវាង​រដ្ឋ និង​រដ្ឋ គឺ​មាន​ទំនាក់ទំនង​ក្នុង​ភាព​ជា​បងប្អូន។

បែប​នេះ​ក្តី កាលពី​ខែ​កក្កដា ឆ្នាំ​២០២៣ ស្ថានទូត​បារាំង ប្រចាំ​នៅ​កម្ពុជា បាន​បង្ហាញ​ការ​សោកស្តាយ និង​ក្តី​ព្រួយបារម្ភ​យ៉ាង​ខ្លាំង ក្រោយ​កម្ពុជា​រៀបចំ​ការ​បោះឆ្នោត​មួយ​ដោយ​អវត្តមាន​គណបក្ស​ជំទាស់ គឺ​គណបក្ស​ភ្លើង​ទៀន។

រដ្ឋាភិបាល​បារាំង ក៏​បាន​ជំរុញ​ឱ្យ​កម្ពុជា​ស្ដារ​ស្ថានការណ៍​ឡើងវិញ​ឱ្យ​ស្រប​តាម​កិច្ចព្រមព្រៀង​សន្តិភាព​ទីក្រុង​ប៉ារីស​ឆ្នាំ​១៩៩១ និង​រដ្ឋធម្មនុញ្ញ​កម្ពុជា​ផង​ដែរ។

កាលពី​អំឡុង​ខែ​សីហា ឆ្នាំ​២០២០ សហភាព​អឺរ៉ុប ដែល​បារាំង ជា​សមាជិក បាន​ដក​ប្រព័ន្ធ​អនុគ្រោះ​ពន្ធ EBA (Everything But Arms) ចំនួន ២០% ពី​កម្ពុជា ដោយសារ​រក​ឃើញ​ការ​រំលោភ​សិទ្ធិមនុស្ស​ធ្ងន់ធ្ងរ ការ​រំលាយ​អតីត​គណបក្ស​សង្គ្រោះ​ជាតិ និង​ការ​ដក​សិទ្ធិ​នយោបាយ​របស់​មន្ត្រី​បក្ស​ប្រឆាំង ជាដើម៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស