 លោកប្រើយុទ្ធសាស្ត្រជំពូកទី៤។ លើកនេះ លោកប្រើយុទ្ធសាស្ត្រជំពូកទី១ ខ្ចីដៃសត្រូវយកមកប្រើ (Jiè dāo shā rén) គឺប្រើកម្លាំងសត្រូវ (ចាស់ថ្មី) ឲ្យវាយសត្រូវ ឬអ្នកប្រឆាំងវិញ។){kind=link}
មេដឹកនាំបក្សកាន់អំណាចលោក ហ៊ុន សែន នៅតែបន្តប្រើយុទ្ធវិធីសាមកុកពីក្នុងយុទ្ធសាស្ត្រ ៦ជំពូក ៣៦យ៉ាង នៃមេទ័ពចិនសម័យបុរាណ។ ក្នុងយុទ្ធសាស្ត្របិទទ្វារវ៉ៃឆ្កែ (Guān mén zhuō zéi) លោកប្រើយុទ្ធសាស្ត្រជំពូកទី៤។ លើកនេះ លោកប្រើយុទ្ធសាស្ត្រជំពូកទី១ ខ្ចីដៃសត្រូវយកមកប្រើ (Jiè dāo shā rén) គឺប្រើកម្លាំងសត្រូវ (ចាស់ថ្មី) ឲ្យវាយសត្រូវ ឬអ្នកប្រឆាំងវិញ។
លោក ហ៊ុន សែន ដែលចេញពីតំណែងនាយករដ្ឋមន្ត្រីទៅកាន់តំណែងប្រធានបក្ស ប្រធានព្រឹទ្ធសភា ហើយធ្វើសកម្មភាពសស្រាក់សស្រាំជាងលោក ជា ស៊ីម និងលោក សាយ ឈុំ ដើម្បីជួយពង្រឹងអំណាចកូនរបស់លោក បានណែនាំឱ្យសមាជិកគណបក្សប្រជាជនកម្ពុជា ប្រើយុទ្ធសាស្ត្រយកលលកទៅទាក់លលក ដែលមានន័យថា យកក្រុមប្រឆាំងទាក់ទាញក្រុមប្រឆាំងឱ្យចុះចូលជាមួយគណបក្សរបស់ខ្លួន ក្នុងករណីបើមានអ្នកប្រឆាំងមួយ ត្រូវតែវ៉ៃមួយ ដើម្បីកម្ទេចក្រុមប្រឆាំងទាំងនោះឱ្យអស់ពីមូលដ្ឋាន។
មេដឹកនាំបក្សកាន់អំណាចដែលសល់ពីរបប ប៉ុល ពត លោក ហ៊ុន សែន បានចេញសារសំឡេងណែនាំទៅកាន់សមាជិករបស់ខ្លួនដែលត្រូវបានគេទម្លាយកាលពីយប់ថ្ងៃទី១១ មិថុនា នេះ ដោយបញ្ជាទៅកាន់សមាជិកបក្សកាន់អំណាចគ្រប់រាជធានី-ខេត្ត ឱ្យនាំគ្នាប្រើយុទ្ធសាស្ត្របំផ្លាញក្រុមប្រឆាំងឱ្យអស់នៅមុនការបោះឆ្នោត។
លោកបន្ថែមថា ត្រូវតែនាំគ្នាប្រើវិធីអូសទាញអ្នកទាំងនោះឱ្យចុះចូលជាមួយបក្សកាន់អំណាច ប៉ុន្តែបើអូសទាញមិនបាន ត្រូវតែបំផ្លាញចោល កុំឱ្យពួកគេនៅធ្វើជាឧបសគ្គបន្តទៀត។
មេដឹកនាំបក្សកាន់អំណាចរូបនេះលើកឡើងថា នៅពេលដែលមានក្រុមប្រឆាំងចុះចូលជាមួយបក្សកាន់អំណាច ត្រូវតែនាំគ្នាផ្សព្វផ្សាយតាមបណ្ដាញសង្គមនានាឱ្យផុសផុល។ លោកថា សូមកុំរង់ចាំរហូតដល់ពេលបោះឆ្នោត ទើបនាំគ្នាទាក់ទាញឱ្យក្រុមប្រឆាំងចុះចូល ព្រោះការធ្វើបែបនេះ គឺជាកំហុសធំបំផុតដែលគួរតែចៀសវាង។
លោក ហ៊ុន សែន បញ្ជាក់ថា លោកបានចេញសេចក្តីសម្រេចមួយអំពីបង្កើតក្រុមការងាររបស់បក្សប្រជាជនកម្ពុជា ដើម្បីបំផ្លាញកម្លាំងក្រុមប្រឆាំងនៅមូលដ្ឋាន ដូច្នេះមន្ត្រីគណបក្សចាប់ពីថ្នាក់ខេត្តរហូតដល់ថ្នាក់ភូមិ រាប់ចាប់តាំងពីអភិបាលខេត្តរហូតដល់ប្រធានភូមិ ត្រូវតែចូលរួមធ្វើការជាមួយក្រុមការងារនេះ ដើម្បីបំផ្លាញកម្លាំងក្រុមប្រឆាំង និងអូសទាញអ្នកទាំងនោះយកប្រើ ដើម្បីឱ្យពួកគេទៅអូសទាញក្រុមប្រឆាំងបន្តទៀត។
ការអះអាងនេះ ធ្វើឡើងស្របពេលដែលបណ្ដាញឃោសនានានារបស់បក្សកាន់អំណាច បានផ្សព្វផ្សាយជាបន្តបន្ទាប់រាល់ពេលដែលមានសមាជិកបក្សប្រឆាំងចុះចូលជាមួយគណបក្សប្រជាជនកម្ពុជា ក្នុងនោះក៏មានការផ្តល់ជាតំណែងមុខនាទីឱ្យអ្នកទាំងនោះផងដែរ។
ឧទាហរណ៍ដូចជា នៅថ្ងៃទី១២ ខែមិថុនា ឆ្នាំ២០២៤ នេះ សារព័ត៌មានដែលបម្រើនយោបាយឱ្យបក្សកាន់អំណាច ហ្វ្រែសញូវ (Fresh News) បានចុះផ្សាយពីការចុះចូលរបស់សមាជិកគណបក្សភ្លើងទៀន ក្នុងខេត្តព្រះវិហារ ដែលមានចំនួន ១៥នាក់ ខេត្តបន្ទាយមានជ័យ ចំនួន ១០នាក់ និងខេត្តបាត់ដំបង ចំនួន ១៥នាក់ រួមទាំងខេត្តមួយចំនួនទៀត ដែលការផ្សព្វផ្សាយនេះ គឺមានភាពស្របគ្នានឹងការណែនាំរបស់លោក ហ៊ុន សែន ទាំងស្រុងអំពីផែនការតាមកម្ទេចក្រុមប្រឆាំងនាពេលនេះ។
តំណាងរាស្ត្រគណបក្សសង្គ្រោះជាតិ លោក អ៊ុំ សំអាន ប្រាប់សារព័ត៌មាន The Cambodia Daily នៅថ្ងៃទី១២ មិថុនា នេះថា ការលើកឡើងពីផែនការរបស់លោក ហ៊ុន សែន គ្រាន់តែបង្ហាញពីអំពើទុច្ចរិតរបស់គាត់ប៉ុណ្ណោះ ព្រោះក្នុងសង្គមប្រជាធិបតេយ្យ គ្មាននរណាទៅបង្ខំអ្នកដទៃឱ្យទៅចុះចូលជាមួយគណបក្សរបស់ខ្លួនទេ ហើយវិធីសាស្ត្រដែលលោក ហ៊ុន សែន ប្រើនៅពេលនេះ គឺជាកលល្បិចនយោបាយរបស់ពួកកុម្មុយនីស្តប៉ុណ្ណោះ។
លោក អ៊ុំ សំអាន លើកឡើងថា ការអះអាងរបស់លោក ហ៊ុន សែន បែបនេះ ក៏បង្ហាញពីចំណុចខ្សោយរបស់បក្សកាន់អំណាចដែរ ដែលជាសញ្ញាបញ្ជាក់ថា បក្សកាន់អំណាចនៅតែភ័យព្រួយពីការមិនគាំទ្ររបស់ប្រជាពលរដ្ឋ បើទោះបីជាខ្លួនព្យាយាមប្រើល្បិចកលគ្រប់រូបភាពតាមបំផ្លាញបក្សប្រឆាំងបែបណាក៏ដោយ។
មន្ត្រីជាន់ខ្ពស់គណបក្សសង្គ្រោះជាតិរូបនេះបញ្ជាក់ថា លោកមិនអាចលក់ឧត្ដមគតិចុះចូលជាមួយគណបក្សប្រជាជនកម្ពុជា ក្នុងបំណងបម្រើជនក្បត់ជាតិកាត់ទឹកដីខ្មែរឱ្យបរទេសឈ្លានពានដូចជាលោក ហ៊ុន សែន ដាច់ខាត ទោះជាតិនេះ ឬជាតិក្រោយក៏ដោយ។
ចាប់តាំងពីដើមឆ្នាំ២០២៣ មក គេសង្កេតឃើញថា អ្នកគាំទ្របក្សប្រឆាំងបានចុះចូលជាមួយបក្សកាន់អំណាចជាបន្តបន្ទាប់ ក្នុងនោះពួកគេក៏ទទួលបានតំណែងទៅតាមការផ្តល់ឱ្យពីមេបក្សកាន់អំណាចលោក ហ៊ុន សែន ដែរ។ ប្រហែលជាដោយសារមើលឃើញអ្នកចុះចូលមុនៗទទួលបានតំណែងក្នុងជួររដ្ឋាភិបាលបែបនេះ ស្រាប់តែនៅចុងខែមេសា ឆ្នាំ២០២៣ សកម្មជន និងមន្ត្រីជាន់ខ្ពស់គណបក្សសង្គ្រោះជាតិមួយចំនួន បានសម្រុកនាំគ្នាចុះចូលជាមួយគណបក្សប្រជាជនកម្ពុជាព្រោងព្រាត ទាំងភាគីលោក កឹម សុខា និងភាគីលោក សម រង្ស៊ី។
លើសពីនេះ អតីតមន្ត្រីសង្គមស៊ីវិលខ្លះ ក៏បានចុះចូលជាមួយបក្សកាន់អំណាចថែមទៀត ខណៈហេតុផលនៃការចុះចូលរបស់អ្នកទាំងនោះ មិនសូវខុសគ្នាទេ គឺពួកគេអះអាងថា ដោយសារតែបក្សកាន់អំណាចដឹកនាំបានល្អ និងដើម្បីចូលរួមជួយកែទម្រង់ដឹកនាំរបស់រដ្ឋាភិបាល៕
© 2024, ឌឹ ខេមបូឌា ដេលី. All rights reserved.