 ដែលមានជើងហោះហើរជិត ៥០០ជើងហោះហើរ (៤៩៦ជើងហោះហើរ) ប៉ុន្តែក្រសួងមិនបានបង្ហាញថា តើមានជើងហោះហើរដែលបានលុបចោលមានចំនួនប៉ុន្មាននោះទេ។){kind=link}
ក្រសួងទេសចរណ៍ លើកឡើងថា រយៈពេល ១សប្តាហ៍ កម្ពុជាទទួលបានភ្ញៀវទេសចរជាតិ និងអន្តរជាតិជាង ៣សែននាក់ (៣៤៧១៩៧នាក់) ដែលមានជើងហោះហើរជិត ៥០០ជើងហោះហើរ (៤៩៦ជើងហោះហើរ) ប៉ុន្តែក្រសួងមិនបានបង្ហាញថា តើមានជើងហោះហើរដែលបានលុបចោលមានចំនួនប៉ុន្មាននោះទេ។
ក្រសួងទេសចរណ៍កម្ពុជា សរសេរលើទំព័រហ្វេសប៊ុករបស់ខ្លួននៅថ្ងៃទី១៦ កក្កដា នេះថា ចាប់ពីថ្ងៃទី៨ ដល់ថ្ងៃទី១៤ ខែកក្កដា ឆ្នាំ២០២៤ កម្ពុជាទទួលបានភ្ញៀវទេសចរជាតិប្រមាណជិត ៣សែននាក់ (២៩៥៨៣១នាក់) និងភ្ញៀវទេសចរបរទេសប្រមាណជាង ៥ម៉ឺននាក់ (៥១៣៦៦នាក់)។
ប្រភពដដែលអះអាងថា ក្នុងរយៈពេល ១សប្តាហ៍ដូចគ្នា កម្ពុជាបានលក់បណ្ណចូលទស្សនាតំបន់រមណីយដ្ឋានអង្គរ ជូនភ្ញៀវទេសចរបរទេសសរុបជាង ១ម៉ឺនបណ្ណ (១២៩៥៧បណ្ណ) កើនឡើង ៦,៦% និងទទួលបានចំណូលពីការលក់បណ្ណនេះសរុបជាង ៥សែនដុល្លារអាមេរិក (៥៨៣៩៩៤ដុល្លារអាមេរិក) កើនឡើង ៨,៦% ផងដែរ។
ក្រសួងទេសចរណ៍កម្ពុជា បញ្ជាក់ថា ជើងហោះហើរអន្តរជាតិចូលមកកាន់ប្រទេសកម្ពុជាមានចំនួនសរុបជាង ៤០០ជើងហោះហើរ ក្នុងនោះ អាកាសយានដ្ឋានអន្តរជាតិភ្នំពេញមានចំនួនជាង ៣០០ជើងហោះហើរ (៣៣៧ជើងហោះហើរ) អាកាសយានដ្ឋានអន្តរជាតិសៀមរាបអង្គរមានចំនួនប្រមាណ ១០០ជើងហោះហើរ (១០២ជើងហោះហើរ) និងអាកាសយានដ្ឋានអន្តរជាតិព្រះសីហនុមានចំនួន ១៧ជើងហោះហើរផងដែរ។
ការអះអាងនេះ ធ្វើឡើងស្របពេលដែលគេមើលឃើញថា វិស័យទេសចរណ៍របស់កម្ពុជាកំពុងធ្លាក់ចុះធ្ងន់ធ្ងរនៅពេលនេះ។
មគ្គុទ្ទេសក៍ទេសចរណ៍ប្រចាំតំបន់អង្គរ ប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះនៅថ្ងៃទី១៦ កក្កដា នេះថា ស្ថានភាពភ្ញៀវទេសចរក្នុងខេត្តសៀមរាប សព្វថ្ងៃនេះ ស្ថិតក្នុងកម្រិតទាបនៅឡើយ ដោយសារតែមគ្គុទ្ទេសក៍ទេសចរណ៍ភាគច្រើននៅតែគ្មានការងារនៅឡើយ ចំណែកមគ្គុទ្ទេសក៍ទេសចរណ៍ដែលទទួលបានភ្ញៀវ គឺមានចំនួនតិចតួច ហើយយូរៗម្តងប៉ុណ្ណោះ។
ប្រភពដដែលលើកឡើងថា បើគិតពីចំនួនជើងហោះហើរសម្រាប់ព្រលានយន្តហោះខេត្តសៀមរាប អាចមានចំនួនដល់ទៅប្រមាណជា ១០០ជើងហោះហើរមែន ប៉ុន្តែមិនមានភ្ញៀវពេញយន្តហោះទេ ហើយក្នុងចំណោមភ្ញៀវទាំងនោះ ក៏សម្បូរភ្ញៀវខ្មែរដែរ ដែលគ្រាន់តែធ្វើដំណើរពីភ្នំពេញ ឬពីខេត្តព្រះសីហនុ ទៅខេត្តសៀមរាប ក្នុងគោលដៅជាក់លាក់ណាមួយ ប៉ុន្តែមិនមែនដើម្បីដំណើរកម្សាន្តនោះទេ។
មគ្គុទ្ទេសក៍ទេសចរណ៍តំបន់អង្គររូបនេះបញ្ជាក់ថា បើចង់ដឹងថាខេត្តសៀមរាប មានភ្ញៀវទៅលេងច្រើន ឬក៏អត់ គ្រាន់តែទៅមើលកន្លែងកម្សាន្ត ផាប់ស្ត្រីត (Pub Street) ក្នុងក្រុងសៀមរាប គឺច្បាស់ជាដឹងហើយ។ ប្រភពដដែលថា ទីតាំងអាជីវកម្មនីមួយៗក្នុងខេត្តសៀមរាប កំពុងដំណើរការទាំងត្រដរខ្យល់ ខណៈអាជីវករត្អូញត្អែរគ្រប់ៗគ្នាដោយសារតែលក់ទំនិញមិនដាច់។
រយៈពេលចុងក្រោយនេះ អ្នកលេងបណ្ដាញសង្គមហ្វេសប៊ុក នាំគ្នាបង្ហោះពីសភាពស្ងប់ស្ងាត់របស់ព្រលានយន្តហោះអន្តរជាតិសៀមរាប ព្រោងព្រាត ដែលក្នុងវីដេអូទាំងនោះបង្ហាញថា គ្មានភ្ញៀវទេសចរធ្វើដំណើរក្នុងព្រលានសូម្បីតែម្នាក់នៅថ្ងៃខ្លះ។
ជាងនេះទៀត ក៏មានការបង្ហោះវីដេអូពីសភាពស្ងប់ស្ងាត់ក្នុងក្រុងសៀមរាប កន្លែងកម្សាន្ត ផាប់ស្ត្រីត (Pub Street) ផងដែរ ដែលក្នុងវីដេអូនោះបង្ហាញឱ្យឃើញថា នៅក្នុងក្រុងសៀមរាប ស្ទើរតែគ្មានភ្ញៀវទេសចរដើរលេងកម្សាន្ត ខណៈតាមតូបលក់អីវ៉ាន់ ដូចជា វត្ថុអនុស្សាវរីយ៍ ជាដើម ក៏ស្ទើរតែគ្មានភ្ញៀវទិញដែរ។
ជុំវិញបញ្ហានេះ គេបានរកឃើញថា ក្នុងរយៈពេល ៣០ថ្ងៃ គឺចាប់ពីថ្ងៃទី៦ ខែមិថុនា រហូតដល់ថ្ងៃទី៦ ខែកក្កដា ឆ្នាំ២០២៤ ចំនួនជើងយន្តហោះដឹកអ្នកដំណើរដែលគ្រោងនឹងទៅប្រទេសកម្ពុជា (Schedule Flights) មានចំនួនជាង ៤០០ជើងហោះហើរ (៤៥៩ជើង) សម្រាប់ព្រលានយន្តហោះអន្តរជាតិភ្នំពេញ ខណៈជើងយន្តហោះដែលទៅដល់ប្រទេសកម្ពុជាជាក់ស្តែង (Track Flights) មានចំនួន ៤៥៨ជើងហោះហើរ គឺខកខានអស់ ១ជើង៕