។){kind=link}
ក្រុមអ្នកឃ្លាំមើលសង្គម អំពាវនាវឱ្យប្រជាពលរដ្ឋខ្មែរយកការតស៊ូនៃពលរដ្ឋបង់ក្លាដេស ធ្វើជាគំរូក្នុងការតវ៉ាទាមទារឱ្យនាយករដ្ឋមន្ត្រីខ្មែរ លោក ហ៊ុន ម៉ាណែត លាលែងចេញពីតំណែងជានាយករដ្ឋមន្ត្រី បើគាត់មិនព្រមដកខ្លួនពីកិច្ចសហប្រតិបត្តិការជាមួយវៀតណាម ក្នុងតំបន់ត្រីកោណអភិវឌ្ឍន៍ (CLV)។
អ្នកវិភាគនយោបាយ និងជាប្រធានវេទិកាពលរដ្ឋលោក គឹម សុខ អំពាវនាវក្នុងវីដេអូឃ្លីបប្រវែងជាង ៣នាទី ដែលត្រូវបានផ្សព្វផ្សាយលើគណនីហ្វេសប៊ុករបស់លោកនៅថ្ងៃទី៨ សីហា នេះថា បើលោក ហ៊ុន ម៉ាណែត ហ៊ានបង្ក្រាបការតវ៉ាទាមទារពីពលរដ្ឋខ្មែរដែលមានបំណងការពារទឹកដីពីការឈ្លានពាននៃបរទេសជិតខាង នោះបង្ហាញថា លោក ហ៊ុន ម៉ាណែត មិនមែនជាមេដឹកនាំការពារទឹកដីប្រទេសកម្ពុជា និងជាតិសាសន៍ខ្មែរពិតប្រាកដឡើយ។
លោក គឹម សុខ លើកឡើងថា ការប្រកាសបង្ក្រាបការតវ៉ាពីប្រជាពលរដ្ឋពីសំណាក់លោក ហ៊ុន ម៉ាណែត ជុំវិញការតវ៉ាទាមទារឱ្យរដ្ឋាភិបាលដកខ្លួនចេញពីតំបន់ត្រីកោណអភិវឌ្ឍន៍ មានតែធ្វើឱ្យប្រជាពលរដ្ឋខ្មែរពុះកញ្ជ្រោលចង់ធ្វើបាតុកម្មកាន់តែខ្លាំងឡើងៗប៉ុណ្ណោះ ព្រោះការព្រមានបង្ក្រាបដោយលោក ហ៊ុន ម៉ាណែត ជាសញ្ញាមួយបង្ហាញថា រដ្ឋាភិបាលកំពុងលាក់បាំងរឿងបាត់ទឹកដីឲ្យទៅប្រទេសវៀតណាម ដែលមិនចង់ឱ្យពលរដ្ឋខ្មែរដឹង។
អ្នកវិភាគរូបនេះអះអាងថា ក្រោយពីលោក ហ៊ុន សែន ប្រកាសគម្រោងដាក់ខេត្តព្រះវិហារ ចូលក្នុងតំបន់ត្រីកោណបន្ថែមទៀត បានជំរុញឱ្យប្រជាពលរដ្ឋចង់ធ្វើបាតុកម្មរួចទៅហើយ ព្រោះការដាក់ខេត្តខ្មែរចូលក្នុងតំបន់ត្រីកោណជាមួយវៀតណាម គឺមានតែនាំឱ្យខ្មែរបាត់បង់ទឹកដីប៉ុណ្ណោះ។
លោក គឹម សុខ បញ្ជាក់ថា ការធ្វើបាតុកម្មរបស់ពលរដ្ឋខ្មែរជុំវិញការប្រឆាំងនឹងការដាក់ខេត្តខ្មែរក្នុងតំបន់ត្រីកោណ គឺជាបាតុកម្មជាតិ បាតុកម្មពលរដ្ឋ មិនមែនជាបាតុកម្មក្រោមនិន្នាការនយោបាយនៃបក្សនយោបាយណាមួយឡើយ។
កាលពីថ្ងៃទី២ ខែសីហា ឆ្នាំ២០២៤ ក្នុងកម្មវិធីទទួលទានអាហារជាមួយសមាគមឧកញ៉ា នាយករដ្ឋមន្ត្រី ហ៊ុន ម៉ាណែត ព្រមានថា ប្រសិនបើពលរដ្ឋខ្មែរហ៊ានចេញធ្វើបាតុកម្មនៅទីក្រុងភ្នំពេញដើម្បីប្រឆាំងគម្រោងតំបន់ត្រីកោណអភិវឌ្ឍន៍ កម្ពុជា ឡាវ និងវៀតណាម នោះច្បាស់ជាប្រឈមនឹងបាត់បង់ជីវិតមនុស្សយ៉ាងច្រើនដូចនៅប្រទេសបង់ក្លាដេស (Bangladesh) ដែរ។
លោក ហ៊ុន ម៉ាណែត គំរាមថា សូមកុំសាកល្បងបំផុសធ្វើបាតុកម្មឱ្យសោះ ព្រោះថាបើមានបាតុកម្មផ្ទុះឡើង នោះលោកក៏នឹងចាត់វិធានការបង្ក្រាបដែរ ដើម្បីថែរក្សាសន្តិភាព និងស្ថិរភាព ព្រមទាំងកុំឱ្យប៉ះពាល់ដល់អាជីវកម្មពលរដ្ឋនៅភ្នំពេញ វិស័យទេសចរណ៍ វិនិយោគ សេដ្ឋកិច្ច និងមុខមាត់ប្រទេសជាតិ។
កាលពីថ្ងៃទី១៦ ខែកក្កដា ឆ្នាំ២០២៤ ក្រុមនិស្សិតបង់ក្លាដេស បានចេញធ្វើបាតុកម្មដោយការគប់ដុំថ្មនៅតាមសាកលវិទ្យាល័យនានាទូទាំងប្រទេស ដើម្បីប្រឆាំងទៅនឹងនាយករដ្ឋមន្ត្រីបង់ក្លាដេស អ្នកស្រី Sheikh Hasina។
ក្រោយការតវ៉ាទាមទារអស់រយៈពេលជិត ១ខែ ហ្វូងបាតុករបានទម្លាក់នាយករដ្ឋមន្ត្រីរបស់ខ្លួនបានសម្រេចនៅថ្ងៃទី៥ ខែសីហា ឆ្នាំ២០២៤ ខណៈអ្នកស្រី Sheikh Hasina បានរត់ភៀសខ្លួនទៅកាន់ប្រទេសឥណ្ឌា និងបន្តដំណើរទៅកាន់ទីក្រុងឡុងដ៍ ចក្រភពអង់គ្លេស បន្តទៀតនៅពេលនេះ។
សម្ដីនាយករដ្ឋមន្ត្រីខ្មែរ លោក ហ៊ុន ម៉ាណែត បង្ហាញឲ្យឃើញថា ឈាមជ័រចរិតអ្នកដឹកនាំផ្ដាច់ការផ្ដាច់មុខ ក្រាញអំណាចតត្រកូល ប្រើភាសាដូចមេដឹកនាំផ្ដាច់ការផ្ដាច់មុខនៅទីដទៃៗទៀតដែរ ប៉ុន្តែពលរដ្ឋខ្មែរនៅចាំអំពីការអួតអាងហៅថាមោទនភាពជាតិនោះថា ខ្មែរក៏ធ្វើបានដែរ មិនមែនមានសាសន៍ដទៃនោះទេ៕