មន្ត្រីជាន់ខ្ពស់នៃរាជបណ្ឌិត្យសភាកម្ពុជា ស្នើឱ្យរដ្ឋសភាជាតិផ្ដួចផ្ដើមគំនិតរៀបចំច្បាប់ហាមឃាត់អ្នកនយោបាយដែលមានសញ្ជាតិពីរ កុំឱ្យធ្វើនយោបាយ ព្រោះអ្នកមានសញ្ជាតិពីរតែងធ្វើឱ្យរលាយប្រទេសជាតិរបស់ខ្លួន។
ប្រធានរាជបណ្ឌិត្យសភាកម្ពុជា បណ្ឌិត សុខ ទូច លើកឡើងក្នុងពិធីបិទវេទិកាទំនាក់ទំនងអន្តរជាតិលើកទី៣ កាលពីថ្ងៃទី០៤ ខែកញ្ញា ឆ្នាំ២០២៤ ថា ពលរដ្ឋខ្មែរដែលបានមករស់នៅបរទេស គឺជាមនុស្សឥតមារយាទ ចង់តែឈ្លោះជាមួយជនជាតិខ្មែរដូចគ្នា និងកាប់ចាក់តែគ្នាឯង។
លោកថា ឱ្យតែបរទេសឱ្យលុយ ឱ្យអំណាច ឱ្យវីសា ពួកគេចាប់ផ្តើមឈ្លោះជាមួយជនជាតិខ្លួនឯងភ្លាម ដែលនេះគឺជាទម្លាប់អាក្រក់របស់អ្នកដែលបានទៅរស់នៅក្រៅស្រុកកន្លងមក។
បណ្ឌិត សុខ ទូច លើកឡើងថា ជាតិខ្មែររលាយដោយសារប្រទេសជិតខាងបោកប្រាស់ឱ្យខ្មែរឈ្លោះជាតិឯង។ លោកថា ប្រទេសតូច ធំ ឬខ្លាំង មិនសំខាន់ទេ សំខាន់គឺឯកភាពជាតិ ដូច្នេះបើជាតិខ្មែរនៅតែជឿបរទេសញុះញង់ នោះខ្មែរនៅតែបែកបាក់បន្តទៀត។
ប្រធានរាជបណ្ឌិត្យសភាកម្ពុជារូបនេះអះអាងថា ដោយសារតែវៀតណាម ទប់កម្ពុជាមិនឱ្យសាងសង់ព្រែកជីកហ្វូណន មិនបាន ទើបគេដុតបញ្ឆេះរឿងកិច្ចសហប្រតិបត្តិការតំបន់ត្រីកោណអភិវឌ្ឍន៍ (CLV-DTA) ខណៈខ្មែរនៅក្រៅស្រុកដែលមិនយល់អំពីបញ្ហានេះ បានចូលរួមដុតបញ្ឆេះប្រទេសជាតិខ្លួនឯងតាមល្បិចកលរបស់គេ។
ការអះអាងនេះ ធ្វើឡើងបន្ទាប់ពីពលរដ្ឋខ្មែររស់នៅក្រៅស្រុក ចេញធ្វើបាតុកម្មប្រឆាំងនឹងគម្រោងអភិវឌ្ឍន៍ត្រីកោណ CLV-DTA ជាបន្តបន្ទាប់នៅពេលនេះ។
អ្នកវិភាគនយោបាយ និងជាប្រធានវេទិកាពលរដ្ឋ លោក គឹម សុខ ប្រាប់សារព័ត៌មាន The Cambodia Daily នៅថ្ងៃទី៥ កញ្ញា នេះថា គំនិតរបស់លោក សុខ ទូច គឺជាចេតនាប្រហាររដ្ឋធម្មនុញ្ញ ព្រោះគំនិតបែបនេះ គឺជាការបំផ្លាញនូវខ្លឹមសារ និងស្មារតីប្រជាធិបតេយ្យសេរីដែលកើតចេញពីកិច្ចព្រមព្រៀងសន្តិភាពក្រុងប៉ារីស ១៩៩១ ទាំងស្រុង។
លោកថា ការប៉ុនប៉ងប្រហាររដ្ឋធម្មនុញ្ញ គឺនៅត្រង់ថា រដ្ឋធម្មនុញ្ញធ្វើឡើងក្នុងនាមពលរដ្ឋខ្មែរ ដូច្នេះការកែ និងការធ្វើច្បាប់កំពូលមួយនេះ ត្រូវតែឆ្លុះបញ្ចាំងពីឆន្ទៈរបស់ពលរដ្ឋខ្មែរទូទៅ ទាំងក្នុង និងក្រៅប្រទេស។ ផ្ទុយទៅវិញ បើរដ្ឋធម្មនុញ្ញត្រូវបានធ្វើឡើងតាមសំណើរបស់លោក សុខ ទូច មែន នោះមានន័យថា ការកែច្បាប់ និងធ្វើច្បាប់ថ្មីនេះ មិនស្របនឹងឆន្ទៈរបស់ពលរដ្ឋខ្មែរឡើយ ដោយសារតែពលរដ្ឋគ្មានតំណាងពិតប្រាកដរបស់ពួកគាត់នៅក្នុងសភាឡើយ ខណៈរដ្ឋសភាសព្វថ្ងៃនេះ គឺជាសភារបស់បក្សប្រជាជនកម្ពុជាប៉ុណ្ណោះ មិនមែនជារដ្ឋសភារបស់ប្រជារាស្ត្រឡើយ។
លោក គឹម សុខ លើកឡើងថា រដ្ឋធម្មនុញ្ញគឺជាច្បាប់ដែលការពារសិទ្ធិពលរដ្ឋខ្មែរទូទៅ ទាំងក្នុង និងក្រៅប្រទេស ដូច្នេះការធ្វើច្បាប់បិទសិទ្ធិនយោបាយរបស់ពលរដ្ឋខ្មែរដែលមានសញ្ជាតិពីរ គឺជាច្បាប់រើសអើង ដែលផ្ទុយស្រឡះពីស្មារតីរដ្ឋធម្មនុញ្ញ និងគោលការណ៍អន្តរជាតិដែលប្រទេសកម្ពុជាទទួលស្គាល់។
អ្នកវិភាគរូបនេះអះអាងថា សំណើរបស់លោក សុខ ទូច កំពុងទាញទម្លាក់កម្ពុជាឱ្យរអិលចូលក្នុងបែបផែនកុម្មុយនីស្តផ្ដាច់ការ ទាំងការប្រតិបត្តិ និងស្មារតីរបស់ច្បាប់។ លោកថា លោកមិនទាន់ឃើញខ្មែរសញ្ជាតិពីរណាម្នាក់ធ្វើឲ្យបាត់ទឹកដីខ្មែរមួយម៉ែត្រការ៉េទៅបរទេសនៅឡើយ។
ជុំវិញបញ្ហានេះ កាលពីដើមឆ្នាំ២០២៣ លោក ហ៊ុន សែន ធ្លាប់ព្រមានធ្វើវិសោធនកម្មរដ្ឋធម្មនុញ្ញកំណត់ឱ្យអ្នកនយោបាយខ្មែរ មន្ត្រីរាជការ និងកងកម្លាំងប្រដាប់អាវុធមានសញ្ជាតិខ្មែរតែមួយ ដើម្បីកុំឱ្យបរទេសបណ្តុះបណ្តាលអ្នកនយោបាយដែលមានសញ្ជាតិពីរ មកលូកលាន់កិច្ចការនយោបាយរបស់កម្ពុជា។
កាលពីថ្ងៃទី២៥ ខែតុលា ឆ្នាំ២០២១ រដ្ឋសភាបានអនុម័តជាឯកច្ឆន្ទលើសេចក្តីព្រាងច្បាប់ស្ដីពីវិសោធនកម្មរដ្ឋធម្មនុញ្ញកំណត់សញ្ជាតិខ្មែរតែមួយសម្រាប់ប្រធានរដ្ឋសភា ប្រធានព្រឹទ្ធសភា នាយករដ្ឋមន្ត្រី និងប្រធានក្រុមប្រឹក្សាធម្មនុញ្ញ តាមការបង្គាប់បញ្ជារបស់លោក ហ៊ុន សែន ដែលជានាយករដ្ឋមន្ត្រីនៅពេលនោះ៕
© 2024, ឌឹ ខេមបូឌា ដេលី. All rights reserved.