 នឹងធ្វើដំណើរទៅកាន់សហរដ្ឋអាមេរិក នៅសប្តាហ៍ក្រោយនេះ។ នេះបើតាមលោក Sergii Nykyforov អ្នកនាំពាក្យរបស់លោក Zelenskyy ដែលប្រកាសឱ្យដឹងកាលពីថ្ងៃព្រហស្បតិ៍ ទី១៩ ខែកញ្ញា។){kind=link}
ប្រធានាធិបតីអ៊ុយក្រែន លោក វូឡូឌីមៀរ ហ្សេឡេនស្គី (Volodymyr Zelenskyy) នឹងធ្វើដំណើរទៅកាន់សហរដ្ឋអាមេរិក នៅសប្តាហ៍ក្រោយនេះ។ នេះបើតាមលោក Sergii Nykyforov អ្នកនាំពាក្យរបស់លោក Zelenskyy ដែលប្រកាសឱ្យដឹងកាលពីថ្ងៃព្រហស្បតិ៍ ទី១៩ ខែកញ្ញា។
យោងតាមសារព័ត៌មាន Politico មេដឹកនាំអ៊ុយក្រែនរូបនេះនឹងត្រូវថ្លែងសុន្ទរកថានៅឯមហាសន្និបាតអង្គការសហប្រជាជាតិ និងបន្ទាប់មក មានកិច្ចប្រជុំដាច់ដោយឡែកមួយជាមួយនឹងលោកប្រធានាធិបតី ចូ បៃដិន (Joe Biden)។
បើតាមអ្នកនាំពាក្យសម្រាប់ប្រធានាធិបតីអ៊ុយក្រែន ក្នុងជំនួបនោះ លោក Zelenskyy នឹងបង្ហាញផែនការជ័យជម្នះរបស់អ៊ុយក្រែន ទៅលោក បៃដិន។ លោក Zelenskyy រំពឹងថាលោកនឹងបានពិភាក្សាលម្អិតអំពីផែនការនេះ ព្រមទាំងការគាំទ្របន្ថែមទៀតនូវជំនួយយោធាពីសហរដ្ឋអាមេរិកសម្រាប់ប្រទេសអ៊ុយក្រែន។
លោក Nykyforov បានបន្ថែមថា ក្រៅពីជួបជាមួយលោក Biden លោក Zelenskyy គ្រោងនឹងជួបជាមួយអនុប្រធានាធិបតីអាមេរិក អ្នកស្រី Kamala Harris មន្ត្រីជាន់ខ្ពស់តំណាងសភាមកពីគណបក្សទាំងពីរ និងបេក្ខជនប្រធានាធិបតីមកពីគណបក្សសាធារណរដ្ឋ លោក ដូណាល់ ត្រាំ (Donald Trump)។ លើសពីនេះទៅទៀត លោក Zelenskyy នឹងជួបជាមួយអ្នកតំណាងមកពីក្រុមហ៊ុនថាមពលសហរដ្ឋអាមេរិក ហើយនឹងជួបពិភាក្សាទ្វេភាគីជាមួយមេដឹកនាំជាច្រើន និងអង្គការអន្តរជាតិនៅខាងក្រៅមហាសន្និបាត។
សេតវិមានបានបញ្ជាក់ថា លោក Biden នឹងជួបជាមួយលោក Zelenskyy នៅថ្ងៃទី២៦ ខែកញ្ញា ខណៈអ្នកស្រី Harris នឹងជួបជាមួយលោក Zelenskyy ដាច់ដោយឡែកមួយទៀត។ នេះបើតាមអ្នកនាំពាក្យសេតវិមាន Karine Jean-Pierre ដែលបានបញ្ជាក់នៅក្នុងសេចក្តីថ្លែងការណ៍មួយកាលពីថ្ងៃព្រហស្បតិ៍។
អ្នកស្រីអ្នកនាំពាក្យបាននិយាយថា មេដឹកនាំទាំងពីរនឹងពិភាក្សាស្ថានភាពនៃសង្គ្រាមរវាងរុស្ស៊ី និងអ៊ុយក្រែន រួមមានការរៀបចំផែនការយុទ្ធសាស្ត្ររបស់អ៊ុយក្រែន និងការគាំទ្ររបស់អាមេរិកសម្រាប់អ៊ុយក្រែន នៅក្នុងការការពាររបស់ខ្លួនទប់ទល់នឹងការឈ្លានពានរបស់រុស្ស៊ី។
អ្នកស្រី Karine Jean-Pierre បាននិយាយថា ប្រធានាធិបតី និងអនុប្រធានាធិបតី នឹងសង្កត់ធ្ងន់លើការប្ដេជ្ញាចិត្តក្នុងការឈរជាមួយអ៊ុយក្រែន រហូតដល់ក្រុងគៀវ ឈ្នះនៅក្នុងសង្គ្រាមរបស់រុស្ស៊ី។
កាលពីដើមខែសីហា លោក Zelenskyy បានប្រកាសពីចេតនារបស់លោកក្នុងការបង្ហាញផែនការជ័យជម្នះរបស់អ៊ុយក្រែន ទៅកាន់បេក្ខជនប្រធានាធិបតីទាំងពីរ ក៏ដូចជាចំពោះលោក Biden ផងដែរ។ លោក Trump ដែលពីមុនបានបដិសេធមិននិយាយពីការចង់ឱ្យអ៊ុយក្រែន ឈ្នះសង្គ្រាមប្រឆាំងនឹងរុស្ស៊ី បាននិយាយថា លោកប្រហែលជាជួប Zelenskyy នៅខាងក្រៅមហាសន្និបាតអង្គការសហប្រជាជាតិ ឬនៅទីណាមួយនៃទឹកដីអាមេរិក។
ជាមួយគ្នានេះ ប្រធានាធិបតីអ៊ុយក្រែន បានប្រកាសនៅក្នុងសេចក្ដីថ្លែងការណ៍មួយថា “ផែនការជ័យជម្នះ” របស់លោក បានរៀបចំអស់ហើយ។
លោកបន្តថា៖ ផែនការនេះកំពុងទទួលបានការគាំទ្រទាំងយោធា នយោបាយ ការទូត និងសេដ្ឋកិច្ចសម្រាប់អ៊ុយក្រែន។ បើតាមលោក Zelenskyy ជំហានចាំបាច់សម្រាប់អ៊ុយក្រែន ត្រូវបានកំណត់យ៉ាងច្បាស់លាស់រួចហើយ។
លោក Zelenskyy ពន្យល់ថា ផែនការជ័យជម្នះនេះផ្ដល់នូវជំហរដ៏រឹងមាំដើម្បីនាំមកនូវសន្តិភាព ដែលជាសន្តិភាពពិតប្រាកដ និងច្បាស់លាស់អំពីអ្វីដែលត្រូវការ និងអ្វីដែលនឹងពង្រឹងកាន់តែរឹងមាំថែមទៀត។
លោកបន្តថា គ្មានអ្វីដែលមិនអាចទៅរួចក្នុងផែនការនេះទេ គឺ ជាង ៩០% ត្រូវបានរៀបរៀងរួចទៅហើយ។
នៅក្នុងសុន្ទរកថានៅឯពិធីការបើកជំនួបយុទ្ធសាស្ត្រអឺរ៉ុប ប្រចាំឆ្នាំលើកទី២០ នៅក្នុងរដ្ឋធានីគៀវ កាលពីថ្ងៃសុក្រសប្តាហ៍មុន លោក Zelenskyy បាននិយាយថា សង្គ្រាមឈ្លានពានដូចជាសង្គ្រាមដែលត្រូវបានធ្វើឡើងដោយរុស្ស៊ី ប្រឆាំងនឹងអ៊ុយក្រែន អាចបញ្ចប់ដោយវិជ្ជមាន ដោយកងទ័ពដែលត្រួតត្រាត្រូវបានរុញច្រានចេញពីសមរភូមិ ឬតាមរយៈដំណោះស្រាយការទូត ដែលក្នុងនោះ ប្រទេសដែលត្រូវគេឈ្លានពានរួចផុតពីការត្រួតត្រា ហើយឯករាជភាពរបស់ខ្លួនត្រូវបានការពារ។
ក្នុងប៉ុន្មានសប្តាហ៍ថ្មីៗនេះ លោក Zelenskyy បានសម្ដែងនូវការរកាំចិត្ត ដែលមិនបានទទួលការអនុញ្ញាតជាក់លាក់ពីសម្ព័ន្ធមិត្ត ជាពិសេសសហរដ្ឋអាមេរិក និងចក្រភពអង់គ្លេស ដើម្បីប្រើប្រាស់អាវុធវង់ប្រតិបត្តិការឆ្ងាយរបស់ពួកគេ វាយប្រហារទៅលើទីតាំងយោធានានានៅខាងក្នុងប្រទេសរុស្ស៊ី។
សហរដ្ឋអាមេរិក និងចក្រភពអង់គ្លេស បានសម្ដែងនូវការព្រួយកង្វល់អំពីការទាញចូលក្នុងការប្រឈមមុខដោយផ្ទាល់ជាមួយរុស្ស៊ី។
ស្របពេលដែលទីក្រុងគៀវ កំពុងស្វែងរកការបើកសិទ្ធិឱ្យអ៊ុយក្រែន អាចប្រើប្រាស់អាវុធរយៈចម្ងាយវាយប្រហារខាងក្នុងទឹកដីរុស្ស៊ី កាលពីថ្ងៃព្រហស្បតិ៍ សភាអឺរ៉ុបបានបោះឆ្នោតដោយសេចក្ដីអំពាវនាវដល់ប្រទេសសម្ព័ន្ធ ឱ្យបើកភ្លើងខៀវព្រមគ្នាផ្ដល់ឱកាសឱ្យអ៊ុយក្រែន បាញ់ប្រហារលើទីតាំងអាវុធរបស់រុស្ស៊ី នៅខាងក្នុងទឹកដីរបស់ប្រទេសមហាអំណាចនេះ។
សេចក្ដីសម្រេចរបស់សភាអឺរ៉ុប ធ្វើឡើងតាមរយៈការបោះឆ្នោតដោយសំឡេង ៤២៥គាំទ្រ ១៣១ជំទាស់ និង ៦៣បោះឆ្នោតអនុប្បវាទ។
ក្នុងសេចក្ដីថ្លែងការណ៍របស់សភាអឺរ៉ុប បានសង្កត់ធ្ងន់ពីការប្ដេជ្ញាចិត្តថែមទៀតរបស់អឺរ៉ុប ក្នុងការគាំទ្រការតស៊ូរបស់ប្រជាជនអ៊ុយក្រែន កំពុងប្រយុទ្ធដើម្បីសេរីភាព ប្រជាធិបតេយ្យ និងភាពឯករាជ្យរបស់ខ្លួនពីការឈ្លានពានរបស់រុស្ស៊ី។
សហភាពអឺរ៉ុប ជាសហគមន៍ធំមួយមានសមាជិក ២៧ប្រទេស។ ជាក្រុមសម្ព័ន្ធភាពដ៏ធំដូចសហរដ្ឋអាមេរិក ដែលផ្ដល់ជំនួយយោធា និងជំនួយមនុស្សធម៌សម្រាប់ប្រជាជនអ៊ុយក្រែន ដ៏ច្រើន ក្នុងទំហំសាច់ប្រាក់ជំនួយរបស់សហភាពអឺរ៉ុប មានជាង ១០០ពាន់លានដុល្លារ ដូចនឹងទំហំជំនួយរបស់សហរដ្ឋអាមេរិកផងដែរ៕