មន្ត្រីជាន់ខ្ពស់ក្នុងគណបក្សប្រជាជនកម្ពុជា ទម្លាយថា ចំណាត់ការរបស់លោក ហ៊ុន សែន លើឧកញ៉ា លី សាម៉េត មិនមែនព្រោះតែឧកញ៉ារូបនេះបានប្រព្រឹត្តអំពើឆបោក ហើយក៏មិនមែនដើម្បីភាពស្អាតស្អំសម្រាប់យុត្តិធម៌សង្គមដែរ គឺដោយសារតែគាត់ហ៊ានយកលុយអ្នកដទៃដោយគ្មានការអនុញ្ញាតពីលោក ហ៊ុន សែន។
មន្ត្រីជាន់ខ្ពស់ក្នុងជួររដ្ឋាភិបាលម្នាក់ប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះនៅថ្ងៃទី១០ តុលា នេះថា បញ្ហាធំរបស់លោក លី សាម៉េត នៅត្រង់ចំណុចដែលឈ្មោះ សុខ ឡេង បានប្រគល់លុយ ១០លានដុល្លារអាមេរិកឱ្យលោក ហ៊ុន សែន ប៉ុន្តែបែរជាលោក លី សាម៉េត លួចកិបកេងលុយនោះយកជារបស់ខ្លួនឯងទៅវិញ ដែលទង្វើនេះហើយទើបលោក ហ៊ុន សែន ត្រូវតែកម្ចាត់លោក លី សាម៉េត ចោល។
ប្រភពគួរឱ្យទុកចិត្តបានដដែលនេះ អះអាងថា ចំពោះបញ្ហាលុយកាក់ជាង ២០ម៉ឺនដុល្លារអាមេរិករបស់លោក មួង ឃីម និងលុយ ៣០ម៉ឺនដុល្លារអាមេរិករបស់លោក កន សុខកាយ អភិបាលស្រុកល្វាឯម ជាមួយលោក លី សាម៉េត មិនមែនជាបញ្ហាធំធ្វើឱ្យលោក ហ៊ុន សែន កម្ចាត់មនុស្សដែលបម្រើផលប្រយោជន៍ឱ្យគាត់ និងក្រុមគ្រួសាររបស់គាត់ចោលនោះទេ។
មន្ត្រីរដ្ឋាភិបាលរូបនេះលើកឡើងថា រយៈពេលដែលគណបក្សប្រជាជនកម្ពុជាដឹកនាំប្រទេសជាង ៤០ឆ្នាំមកនេះ លោក ហ៊ុន សែន ដឹងយ៉ាងច្បាស់ថា រដ្ឋាភិបាលក្រោមការគ្រប់គ្រងរបស់គាត់កន្លងមក បានប្រព្រឹត្តអំពើពុករលួយសូកប៉ាន់ដើម្បីទទួលបានតំណែងជាហូរហែរហូតមក។
ប្រភពដដែលថា រាល់ការប្រព្រឹត្តអំពើសូកប៉ាន់បែបនេះ គឺសុទ្ធតែបានទទួលផលប្រយោជន៍ដល់ខ្លួនគាត់ផ្ទាល់ផង ដល់គ្រួសាររបស់គាត់ផង និងដល់គណបក្សប្រជាជនកម្ពុជាមួយចំណែកផងដែរ។
មន្ត្រីជាន់ខ្ពស់ក្នុងគណបក្សប្រជាជនកម្ពុជារូបនេះ បញ្ជាក់ថា មានករណីមួយដែលមន្ត្រីក្នុងកងកម្លាំងប្រដាប់អាវុធម្នាក់ត្រូវលោក ហ៊ុន សែន ទះកំផ្លៀងកាលពីប៉ុន្មានឆ្នាំមុន នៅពេលដែលមន្ត្រីរូបនោះបានជួបជាមួយក្រុមហ៊ុនចិន និងទទួលបានលុយមួយចំនួន ហើយហ៊ានកាត់យកលុយនោះមួយចំណែកដោយចិត្តឯង គ្មានការបែងចែកពីលោក ហ៊ុន សែន ជាមុន។
កាលពីថ្ងៃទី៧ ខែតុលា ឆ្នាំ២០២៤ លោក ហ៊ុន សែន សម្រេចទម្លាយរឿងឧកញ៉ា លី សាម៉េត ដែលបានប្រើឈ្មោះរបស់គាត់ដើរបោកប្រាស់លុយជនរងគ្រោះ ក្នុងនោះមានការបោកលុយឈ្មោះ សុខ ឡេង ចំនួន ១០លានដុល្លារអាមេរិក បោកប្រាស់លុយរបស់លោក មួង ឃីម ទីប្រឹក្សាក្រសួងយុត្តិធម៌ ចំនួន ២៣ម៉ឺនដុល្លារអាមេរិក និងបានបោកលុយអភិបាលស្រុកល្វាឯម លោក កន សុខកាយ ចំនួន ៣០ម៉ឺនដុល្លារអាមេរិកផងដែរ ជាថ្នូរនឹងការរត់ការឱ្យអភិបាលស្រុកល្វាឯម រូបនេះ ទទួលបានតំណែងជាអភិបាលក្រុងអរិយក្សត្រ។
ជុំវិញបញ្ហានេះ ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត ប្រាប់សារព័ត៌មាន The Cambodia Daily នៅថ្ងៃទី១០ តុលា នេះថា សម្រាប់របបដឹកនាំដូចលោក ហ៊ុន សែន គ្រប់គ្រងសព្វថ្ងៃនេះ គឺត្រូវចិញ្ចឹមមនុស្សឱ្យរកផលប្រយោជន៍សម្រាប់គ្រួសារគាត់ ដើម្បីធានាការក្តោបក្តាប់អំណាចក្នុងការដឹកនាំរបបបែបនេះបន្តទៅថ្ងៃមុខទៀត។
លោក ម៉ែន ណាត បញ្ជាក់ថា ចំពោះបុគ្គលដែលអស់ផលប្រយោជន៍សម្រាប់គ្រួសារលោក ហ៊ុន សែន ហើយ នឹងនាំឱ្យខូចកិត្តិយសដល់គ្រួសារគាត់ទៀតនោះ គាត់ត្រូវតែកម្ចាត់បុគ្គលនោះចោល។
ចំណែកអតីតមេដឹកនាំបក្សប្រឆាំង លោក សម រង្ស៊ី លើកឡើងថា ករណីឧកញ៉ា លី សាម៉េត គឺជាករណីពាលស៊ីពាល ព្រោះថាពេលដែលពួកពាលឈ្លោះគ្នា និងលែងមានផលប្រយោជន៍ លោក ហ៊ុន សែន ត្រូវតែកម្ចាត់ចោល៕
© 2024, ឌឹ ខេមបូឌា ដេលី. All rights reserved.