អគ្គលេខាធិការអង្គការសហប្រជាជាតិ លោក Antonio Guterres ប្រាប់ប្រធានាធិបតីរុស្ស៊ី លោក វ្ល៉ាឌីមៀ ពូទីន ថា សង្គ្រាមឈ្លានពានរបស់លោកលើប្រទេសអ៊ុយក្រែន គឺជាការរំលោភធម្មនុញ្ញអង្គការសហប្រជាជាតិ និងច្បាប់អន្តរជាតិ។
តាមការចេញផ្សាយដោយសារព័ត៌មាន TRT World នៃប្រទេសតួកគី ដែលបានធ្វើសេចក្ដីរាយការណ៍នៅថ្ងៃសុក្រ ទី២៥ ខែតុលា នេះថា លោក Guterres បានជួបលោក ពូទីន នៅក្រៅកិច្ចប្រជុំកំពូល BRICS ក្នុងទីក្រុង Kazan នៃប្រទេសរុស្ស៊ី បន្ទាប់ពីលោកបានថ្លែងសុន្ទរកថានៅចំពោះមុខមេដឹកនាំនៃក្រុមប្រទេស BRICS និងមេដឹកនាំប្រទេសដទៃទៀតដៃគូ BRICS ដោយបានអំពាវនាវឱ្យមានសន្តិភាពប្រកបដោយយុត្តិធម៌នៅអ៊ុយក្រែន។
សូមបញ្ជាក់ថា៖ ប្រទេសចូលរួមក្នុងប្រព័ន្ធដោះដូរទូទាត់រូបិយប័ណ្ណ BRICS គឺចង់បោះបង់ការប្រើប្រាស់រូបិយប័ណ្ណដុល្លារសហរដ្ឋអាមេរិក។
តាមប្រភពដដែលនេះ លោក Guterres ក៏បានថ្លែងសុំឱ្យមានការបញ្ចប់សង្គ្រាមផងដែរនៅតំបន់ហ្កាហ្សាដែនដីប៉ាឡេស្ទីន និងក្នុងទឹកដីប្រទេសលីបង់ ដែលជាសង្គ្រាមអ៊ីស្រាអែល វាយសងសឹកលើក្រុមហាម៉ាស-ប៉ាឡេស្ទីន និងវាយលើក្រុមហេសបូឡា នៅលើទឹកដីលីបង់។
មន្ត្រីនាំពាក្យម្នាក់របស់លោក Guterres បាននិយាយថា ក្នុងអំឡុងការជួបមុខគ្នានោះ លោកអគ្គលេខាធិការអង្គការសហប្រជាជាតិ បានប្រាប់លោក ពូទីន ថា ការឈ្លានពានពីរុស្ស៊ី លើប្រទេសអ៊ុយក្រែន ជាការរំលោភបំពានធម្មនុញ្ញរបស់អង្គការសហប្រជាជាតិ ច្បាប់អន្តរជាតិ និងសេចក្ដីថ្លែងការណ៍របស់មហាសន្និបាតអង្គការសហប្រជាជាតិ។
វត្តមានរបស់លោក Guterres នៅឯកិច្ចប្រជុំ BRICS ក្នុងប្រទេសរុស្ស៊ី ដោយបានជួបជាមួយលោក ពូទីន គឺជាលើកទី២ បន្ទាប់ពីលោកបានជួបលោក ពូទីន នៅក្រុងមូស្គូ កាលពីខែមេសា ឆ្នាំ២០២២ គឺប៉ុន្មានសប្តាហ៍ក្រោយពីលោក ពូទីន ប្រធានាធិបតីរុស្ស៊ី បានបញ្ជាឱ្យកងទ័ពរុស្ស៊ី វាយលុកចូលអ៊ុយក្រែន នៅថ្ងៃទី២៤ ខែកុម្ភៈ ឆ្នាំ២០២២។
នៅពេលលោក Guterres ទៅដល់ប្រទេសរុស្ស៊ី ភ្លាម រដ្ឋាភិបាលប្រទេសអ៊ុយក្រែន ក៏បានរិះគន់ខ្លាំងដោយទាមទារឱ្យលោក Guterres ព្យាយាមប្រើឥទ្ធិពល និងមុខនាទីជាអគ្គលេខាធិការអង្គការសហប្រជាជាតិ គាបសង្កត់លោក ពូទីន ជាជាងទៅចូលរួមប្រជុំគ្រាន់តែបំពេញវត្តមានរបស់ប្រតិភូសម្រាប់ជំនួបកំពូល BRICS។
ទំនងប្រតិកម្មនឹងការវាយប្រហាររបស់ក្រុងគៀវ លោក Guterres បានថ្លែងទៅកាន់គណៈប្រតិភូនៃជំនួបកំពូល BRICS ថា វាមានសារសំខាន់ដែលត្រូវគោរពគោលការណ៍អធិបតេយ្យ បូរណភាពទឹកដី និងឯករាជភាពនៃរដ្ឋជាសមាជិកអង្គការសហប្រជាជាតិ ដែលមានទាំងប្រទេសអ៊ុយក្រែន ផងដែរ។
ជាមួយគ្នានេះ លោក Guterres ក៏បានលើកឡើងអំពីផែនការរបស់ក្រុងមូស្គូ ដែលកំពុងវាយយ៉ាងសន្ធាប់ចាប់យកតំបន់ភាគខាងកើត និងខាងត្បូងប្រទេសអ៊ុយក្រែន ដោយលោកបញ្ជាក់ថា វាជាដែនដីប្រទេសអ៊ុយក្រែន។
អ្នកនាំពាក្យម្នាក់របស់លោក Guterres រូបនោះដែលមានវត្តមាននៅចំពោះមុខអ្នកសារព័ត៌មានបានថ្លែងថា លោក Guterres មានឆន្ទៈចង់ដើរតួជាយន្តការីជួយសម្រុះសម្រួលឱ្យមានជំនួបជាថ្មីរវាងអ៊ុយក្រែន និងរុស្ស៊ី ក្នុងគោលបំណងឱ្យមានកិច្ចសន្ទនាសន្តិភាពសម្រាប់ប្រទេសអ៊ុយក្រែន។
តែចំពោះលោក ពូទីន វិញ លោកបានថ្លែងព្រមានពួកលោកខាងលិចថា ក្រុងមូស្គូ មិនអាចចាញ់សង្គ្រាមនៅអ៊ុយក្រែន ជាដាច់ខាត។ លោក ពូទីន បន្តដាក់លក្ខខណ្ឌឱ្យអ៊ុយក្រែន ចុះចាញ់ ហើយថាទឹកដីដែលទ័ពរុស្ស៊ី កំពុងវាយកាន់កាប់បាន ត្រូវតែជារបស់រុស្ស៊ី។
លោក ពូទីន បានថ្លែងដូចនេះទំនងជាការឆ្លើយតបចំពោះលោក Guterres ដែលលើកឡើងអំពីអធិបតេយ្យអ៊ុយក្រែន។
នៅពេលអ្នកសារព័ត៌មានសួរអំពីវត្តមានទ័ពកូរ៉េខាងជើង ជួយច្បាំងកងទ័ពរុស្ស៊ី អ្នកនាំពាក្យក្រសួងការបរទេសរុស្ស៊ី បាននិយាយថា គេគួរសួរទៅក្រុងព្យុងយ៉ាង ខណៈអ្នកនាំពាក្យរូបនោះព្យាយាមគេចចេញពីសំណួររបស់អ្នកសារព័ត៌មាន។
ប៉ុន្តែលោក ពូទីន បែរជាថ្លែងដោយចំអកថា គេមិនត្រូវភ្ញាក់ផ្អើលពេកទេ ព្រោះជារឿងធម្មតាចំពោះប្រទេសរុស្ស៊ី និងកូរ៉េខាងជើង។ លោក ពូទីន បញ្ជាក់ថា យោងតាមមាត្រា៤ នៃកិច្ចព្រមព្រៀងវិស័យការពារជាតិនៃប្រទេសទាំងពីរបានបញ្ជាក់ពីការជួយគ្នាទៅវិញទៅមកក្នុងកាលៈទេសៈដែលចាំបាច់។
លោក ពូទីន បន្ថែមថា ការពិតគេបានដឹងហើយថាប្រទេសខ្លះនៃសមាជិកណាតូ បានចូលពាក់ព័ន្ធផ្ទាល់ទៅហើយនៅក្នុងប្រទេសអ៊ុយក្រែន។ ទោះជាបែបនេះក្ដី លោក ពូទីន មិនបញ្ចេញឈ្មោះប្រទេសសមាជិកណាតូណាមួយនោះទេ។
កន្លងមក ប្រទេសមួយចំនួននៃសមាជិកណាតូ មានដូចជា ប្រទេសលីទុយអានី ឡាតវៀល អេស្តូនី ដែលជាសមាជិកណាតូ បានបង្ហើបថា ការបញ្ជូនទ័ពជួយអ៊ុយក្រែន គឺជាកត្តាសំខាន់ បើអ៊ុយក្រែន មិនអាចទប់ទល់បាននឹងការវាយលុកពីកងទ័ពរុស្ស៊ី។
ចំពោះប្រធានាធិបតីបារាំង លោក ម៉ាក្រុង ក៏បានលើកឡើងដែរថា បើខ្សែការពាររបស់ទ័ពអ៊ុយក្រែន នៅសមរភូមិជួរមុខត្រូវទ័ពរុស្ស៊ី វាយបំបែក វាច្បាស់ណាស់ ក្រុមបស្ចិមប្រទេសត្រូវលើកទ័ពទៅអ៊ុយក្រែន ហើយប្រទេសបារាំង ក៏ត្រូវសម្រេចដូចនេះដែរ។
ប្រធានាធិបតីអ៊ុយក្រែន ថា បើទោះជាដាក់សំណើឱ្យមានសន្និសីទអន្តរជាតិជាថ្មីម្ដងទៀតអំពីសន្តិភាពសម្រាប់អ៊ុយក្រែន ក៏ដោយ ប្រទេសអ៊ុយក្រែន មិនទន់ដៃប្រយុទ្ធនៅឡើយទេ។ យោងតាមផែនការរបស់លោក ហ្សេឡេនស្គី ជាផែនការឈ្នះសង្គ្រាម វាបានបញ្ជាក់ច្បាស់ណាស់ថា សម្រាប់អ៊ុយក្រែន គ្មានទេការទម្លាក់អាវុធចុះចាញ់សត្រូវរបស់ខ្លួន។
ផែនការនេះ ក្រុងគៀវ បង្ខំណាតូចាប់យកអ៊ុយក្រែន ជាសមាជិកទី៣៣ ក្នុងអង្គការយោធាអឺរ៉ុបមួយនេះជាដាច់ខាត ជាមួយនឹងការទទូចជួយអ៊ុយក្រែន ឱ្យមានសមត្ថភាពកាន់តែខ្លាំង និងរឹងមាំក្នុងការប្រយុទ្ធដើម្បីរុញទ័ពរុស្ស៊ី ចេញពីទឹកដីអ៊ុយក្រែន៕
© 2024, ឌឹ ខេមបូឌា ដេលី. All rights reserved.