អតីតមេដឹកនាំបក្សប្រឆាំង លោក សម រង្ស៊ី អះអាងថា មេដឹកនាំបក្សកាន់អំណាច លោក ហ៊ុន សែន កំពុងរកលេសកម្ចាត់មេបញ្ជាការរងកងយោធពលខេមរភូមិន្ទ លោក ហ៊ីង ប៊ុនហៀង ឱ្យបាត់ពីផែនដី ជុំវិញការពាក់ព័ន្ធនឹងករណីគប់គ្រាប់បែកដៃកាលពីជាង ២០ឆ្នាំមុន។
លោក សម រង្ស៊ី បានសរសេរលើទំព័រហ្វេសប៊ុករបស់ខ្លួននៅថ្ងៃទី២០ វិច្ឆិកា នេះថា លោកទទួលបានតាមព័ត៌មានសម្ងាត់ពីផ្ទៃក្នុងគណបក្សប្រជាជនកម្ពុជា ថាលោក ហ៊ុន សែន មានគម្រោងកម្ចាត់លោក ហ៊ីង ប៊ុនហៀង ក្រោយពីគាត់ដឹងថា លោក ហ៊ីង ប៊ុនហៀង នឹងត្រូវមានការស៊ើបអង្កេតមួយពីតុលាការអន្តរជាតិ ជុំវិញការគប់គ្រាប់បែកដៃកាលពីថ្ងៃទី៣០ ខែមីនា ឆ្នាំ១៩៩៧ កន្លងទៅ។
លោកអះអាងថា កាលពីឆ្នាំ២០០៤ លោក ហ៊ុន សែន បានបញ្ជាឱ្យលោក ហុក ឡង់ឌី បាញ់សម្លាប់ប្រធានសហជីពសេរីកម្មករ លោក ជា វិជ្ជា ប៉ុន្តែចុងក្រោយ លោក ហ៊ុន សែន ក៏បានកម្ចាត់លោក ហុក ឡង់ឌី នៅឆ្នាំ២០០៨ ដែរ បន្ទាប់ពីនគរបាលក្រៅប្រទេសបានរកឃើញថា ករណីឃាតកម្មលើលោក ជា វិជ្ជា គឺមានលោក ហ៊ុន សែន ជាអ្នកបញ្ជា។
មេដឹកនាំបក្សប្រឆាំងរូបនេះបញ្ជាក់ថា ដើម្បីបំបាត់សាក្សី និងភស្តុតាង លោក ហ៊ុន សែន ត្រូវសម្រេចចិត្តកម្ចាត់លោក ហុក ឡង់ឌី ចោលតែម្តង ប៉ុន្តែករណីស្រដៀងគ្នានេះ ក៏នឹងកើតមានទៅលើលោក ហ៊ីង ប៊ុនហៀង ដែរ ព្រោះថាលោក ហ៊ីង ប៊ុនហៀង គឺជាអ្នកដែលទទួលបានបញ្ជាពីលោក ហ៊ុន សែន ក្នុងការគប់គ្រាប់បែកនេះ។
លោក សម រង្ស៊ី គូសបញ្ជាក់ថា លោក ហ៊ីង ប៊ុនហៀង នៅពេលនេះ កំពុងតែភ័យខ្លួន បន្ទាប់ពីដឹងថាលោក ហ៊ុន សែន មានគម្រោងបំបាត់ជីវិតរបស់គាត់។
កាលពីអំឡុងឆ្នាំ២០២២ អង្គការឃ្លាំមើលសិទ្ធិមនុស្សអន្តរជាតិ Human Rights Watch បានអះអាងថា តុលាការប្រទេសបារាំង កាលពីចុងខែធ្នូ ឆ្នាំ២០២១ បានចេញដីកាឱ្យចាប់ខ្លួនឧត្ដមសេនីយ៍ថ្នាក់ខ្ពស់ពីររូបរបស់កម្ពុជា គឺលោក ហ៊ុយ ពិសិដ្ឋ និងលោក ហ៊ីង ប៊ុនហៀង ដែលរងនូវការចោទប្រកាន់ថាបានវាយប្រហារដោយគ្រាប់បែកដៃលើហ្វូងបាតុករបក្សប្រឆាំងនៅក្នុងរាជធានីភ្នំពេញ កាលពីថ្ងៃទី៣០ ខែមីនា ឆ្នាំ១៩៩៧ កន្លងទៅ។
អង្គការអន្តរជាតិដដែលនេះ អះអាងថា សាលដីកានេះបញ្ជាក់ថា មានសាលដីកាមួយផ្សេងទៀតបានបង្គាប់ឱ្យលោក ហ៊ុន សែន ចូលខ្លួនឆ្លើយបំភ្លឺករណីនេះដែរ ដោយសារតែគេរកឃើញថាគាត់បានជាប់ពាក់ព័ន្ធក្នុងរឿងគប់គ្រាប់បែកនេះ ប៉ុន្តែរដ្ឋាភិបាលបារាំង បានរារាំងមិនឱ្យបញ្ជូនដីកាកោះហៅនេះទេ ក្រោមហេតុផលថា លោក ហ៊ុន សែន មានអភ័យឯកសិទ្ធិលំដាប់អ្នកដឹកនាំប្រទេស។
ទោះជាបែបនេះក្តី មេដឹកនាំបក្សកាន់អំណាច លោក ហ៊ុន សែន ធ្លាប់បានបដិសេធថា ហេតុការណ៍ផ្ទុះគ្រាប់បែកនៅមុខអតីតមន្ទីររដ្ឋសភាចាស់កាលពីថ្ងៃទី៣០ ខែមីនា ឆ្នាំ១៩៩៧ មិនជាប់ពាក់ព័ន្ធជាមួយនឹងរូបលោកឡើយ។
អ្នកវិភាគនយោបាយ និងជាប្រធានវេទិកាពលរដ្ឋ លោក គឹម សុខ ធ្លាប់លើកឡើងថា លោក ហ៊ុន សែន បានជាប់ពាក់ព័ន្ធក្នុងឧក្រិដ្ឋកម្មធំៗទាំងអស់ដែលកើតមាននៅក្នុងប្រទេសកម្ពុជា ដូចជា ឧក្រិដ្ឋកម្មប្រឆាំងមនុស្សជាតិ ឧក្រិដ្ឋកម្មសង្គ្រាម ឧក្រិដ្ឋកម្មឈ្លានពាន និងឧក្រិដ្ឋកម្មបែបភេរវកម្មរដ្ឋ ឬឧក្រិដ្ឋកម្មបែបបណ្ដាញ ដែលភស្តុតាងនៃឧក្រិដ្ឋកម្មទាំងនោះគឺសុទ្ធតែមានក្នុងដៃតុលាការឧក្រិដ្ឋកម្មអន្តរជាតិ (ICC) ទាំងអស់៕
© 2024, ឌឹ ខេមបូឌា ដេលី. All rights reserved.