ប្រធានគណបក្សកាន់អំណាច និងជាប្រធានព្រឹទ្ធសភាកម្ពុជា លោក ហ៊ុន សែន ចំអកឱ្យក្រុមរដ្ឋាភិបាលនិរទេសបង្ហាញសមាសភាពក្បាលម៉ាស៊ីនដឹកនាំរដ្ឋាភិបាលនិរទេសរបស់ពួកគេឲ្យបានឆាប់ ដើម្បីឲ្យលោកងាយស្រួលបង្កើតច្បាប់រៀបចំដាក់ក្រុមជ្រុលនិយមក្រៅប្រទេសជាក្រុមភេរវកម្ម។
ថ្លែងនៅក្នុងសម័យប្រជុំពេញអង្គព្រឹទ្ធសភា នារសៀលថ្ងៃទី០៥ ខែធ្នូ ឆ្នាំ២០២៤ លោក ហ៊ុន សែន បានថ្លែងយ៉ាងដូច្នេះថា លោកចង់ឱ្យប្រកាសគណៈរដ្ឋមន្ត្រីឱ្យបានលឿន តែពួកគេមិនព្រមចេញឈ្មោះ អ្នកណាធ្វើនាយករដ្ឋមន្ត្រី អ្នកណាធ្វើឧបនាយករដ្ឋមន្ត្រី អ្នកណាធ្វើរដ្ឋមន្ត្រី ដើម្បីឲ្យលោកចេញច្បាប់មួយរៀបចំដាក់ក្រុមជ្រុលនិយមក្រៅប្រទេសជាក្រុមភេរវកម្ម។
លោក ហ៊ុន សែន អះអាងថា ពួករដ្ឋាភិបាលនិរទេសមិនហ៊ានប្រកាសទេ។ លោកថា បើពួកគេហ៊ានចេញប្រធានាធិបតី បានសេចក្ដីថាពួកគេកំពុងប្រឆាំងនឹងរបបរាជានិយម ព្រោះបង្កើតរដ្ឋាភិបាលមួយដែលមានប្រធានាធិបតី។
កាលពីថ្ងៃទី២១ ខែវិច្ឆិកា ឆ្នាំ២០២៤ លោក ហ៊ុន សែន លើកឡើងក្នុងពិធីបើកអនុសំវច្ឆរមហាសន្និបាតមន្ត្រីសង្ឃទូទាំងប្រទេសលើកទី៣២ ឆ្នាំ២០២៤ ថា លោកកំពុងតាមដានសកម្មភាពក្រុមប្រឆាំងដែលកំពុងញុះញង់ពលរដ្ឋខ្មែរម្តងហើយម្តងទៀតឱ្យធ្វើបាតុកម្មប្រឆាំងនឹងរដ្ឋាភិបាលកម្ពុជា ដើម្បីអាចកំណត់បានថា តើល្មមដល់ពេលបង្កើតច្បាប់ដាក់អ្នកទាំងនោះឱ្យក្លាយក្រុមភេរវករហើយឬនៅ។
លោក ហ៊ុន សែន អះអាងថា ទង្វើក្រុមប្រឆាំងនៅពេលនេះមិនមែនត្រឹមតែធ្វើឱ្យមានទំនាស់ផ្ទៃក្នុងរបស់កម្ពុជាទេ ប៉ុន្តែនឹងនាំទៅដល់ការផ្ទុះអាវុធរវាងប្រទេសទាំងពីរថែមទៀត។ លោកថា ការមើលមុខគ្នាមិនត្រង់ជាមួយប្រទេសជិតខាង មិនមែនបញ្ហាតូចតាចឡើយ។
ឆ្លើយតបនឹងការបង្កើតចលនាតស៊ូនយោបាយក្រៅប្រទេសនេះដែរ ប្រធានរាជបណ្ឌិត្យសភាកម្ពុជា បណ្ឌិត សុខ ទូច ចង់ឱ្យរាជរដ្ឋាភិបាលកម្ពុជាប្ដឹងលោក សម រង្ស៊ី ទៅកាន់ប្រទេសដែលពួកគេកំពុងយកជាមូលដ្ឋានដើម្បីប្រកាសបង្កើតរដ្ឋាភិបាលក្រៅប្រទេស និងកម្ទេចការបង្កើតចលនាក្រៅប្រទេសនេះតែម្ដង។
បណ្ឌិត សុខ ទូច លើកឡើងថា នៅលើពិភពលោកនេះគ្មានប្រទេសណាមួយដែលទទួលបានជោគជ័យតាមរយៈចលនាបដិវត្តន៍ពណ៌ដើម្បីប្រឆាំងរាជរដ្ឋាភិបាលស្របច្បាប់នោះទេ តួយ៉ាងដូចនៅមជ្ឈិមបូព៌ា ទុយណេស៊ី លីប៊ី អ៊ុយក្រែន ដែលកំពុងក្លាយទៅជាគំនរផេះផង់។
កាលពីដើមខែវិច្ឆិកា ឆ្នាំ២០២៤ លោក សម រង្ស៊ី សម្រេចបង្កើតចលនាជាតិតស៊ូមួយនៅក្រៅស្រុក ដែលលោកអះអាងថា ជាចលនាតំណាងឆន្ទៈពិតប្រាកដឱ្យប្រជារាស្ត្រខ្មែរដែលស្រឡាញ់ជាតិ សេរីភាព និងយុត្តិធម៌ពិតប្រាកដ ហើយចលនានេះនឹងឈានទៅបង្កើតរដ្ឋាភិបាលមួយស្ថិតនៅក្រៅប្រទេសជាបណ្ដោះអាសន្ន៕
© 2024, ឌឹ ខេមបូឌា ដេលី. All rights reserved.