នាយករដ្ឋមន្ត្រី ហ៊ុន ម៉ាណែត អះអាងថា ការដំឡើងប្រាក់បំណាច់មុខងារ ប្រាក់ឧបត្ថម្ភប្រចាំខែ ប្រាក់កម្រៃប្រចាំខែ បច្ច័យនិច្ចភត្តប្រចាំខែ និងការផ្តល់ប្រាក់ឧបត្ថម្ភក្នុងឱកាសពិធីបុណ្យប្រពៃណីជាតិ ជាដើម គឺជាការរួមចំណែកក្នុងការលើកកម្ពស់ជីវភាពរស់នៅរបស់មន្ត្រីរាជការទាំងអស់។
ប្រមុខរដ្ឋាភិបាលមិនបាននិយាយបញ្ជាក់ថា តើមន្ត្រីរាជការណានឹងបានទទួលចំនួនប៉ុន្មានពិតប្រាកដនោះទេ។
នាយករដ្ឋមន្ត្រីខ្មែរលោក ហ៊ុន ម៉ាណែត សរសេរលើគណនីហ្វេសប៊ុកផ្លូវការរបស់ខ្លួននៅថ្ងៃទី៣១ ធ្នូ នេះថា ដើម្បីរួមចំណែកលើកកម្ពស់ជីវភាពរស់នៅមន្ត្រីរាជការ កងកម្លាំងប្រដាប់អាវុធ ជនពិការ អតីតយុទ្ធជន និងអតីតមន្ត្រីរាជការ ជាដើម សម្រាប់ឆ្នាំថ្មីឆ្នាំ២០២៥ នេះ រាជរដ្ឋាភិបាលបានសម្រេចដំឡើងថវិកាជូនពួកគេមួយកម្រិតទៀត ដែលនឹងត្រូវចាប់អនុវត្តចាប់ពីខែមករា ឆ្នាំ២០២៥ ខាងមុខនេះតទៅ។
លោក ហ៊ុន ម៉ាណែត បញ្ជាក់ថា ប្រាក់បំណាច់មុខងារ និងប្រាក់ប្រចាំខែមួយចំនួនផ្សេងទៀត ត្រូវបានដំឡើងជូនមន្ត្រីរាជការស៊ីវិល យោធិននៃកងយោធពលខេមរភូមិន្ទ មន្ត្រីនគរបាលជាតិកម្ពុជា មន្ត្រីពន្ធនាគារ សមាជិកក្រុមប្រឹក្សារាជធានី ខេត្ត ក្រុង ស្រុក ខណ្ឌ ឃុំ សង្កាត់ មន្ត្រីភូមិ មន្ត្រីជាប់កិច្ចសន្យា ឧបការីនៃអង្គភាពប្រឆាំងអំពើពុករលួយ គ្រូពុទ្ធិកសិក្សា និងមន្ត្រីបំពេញការងារនៅអគ្គាធិការដ្ឋានពុទ្ធិកសិក្សាជាតិផងដែរ។
កាលពីថ្ងៃទី៣០ ខែធ្នូ ឆ្នាំ២០២៤ លោក ហ៊ុន ម៉ាណែត បានចុះហត្ថលេខាលើអនុក្រឹត្យចំនួន៩ រួមមាន៖
- អនុក្រឹត្យដំឡើងប្រាក់បំណាច់មុខងារជូនមន្ត្រីរាជការ
- អនុក្រឹត្យដំឡើងប្រាក់បំណាច់មុខងារយោធិននៃកងយោធពលខេមរភូមិន្ទ
- អនុក្រឹត្យដំឡើងប្រាក់បំណាច់មុខងារមន្ត្រីនគរបាលជាតិ
- អនុក្រឹត្យដំឡើងប្រាក់បំណាច់មុខងារមន្ត្រីពន្ធនាគារ
- អនុក្រឹត្យដំឡើងប្រាក់ឧបត្ថម្ភប្រចាំខែដល់សមាជិកក្រុមប្រឹក្សារាជធានី ខេត្ត ក្រុង ស្រុក ខណ្ឌ ឃុំ សង្កាត់ មន្ត្រីភូមិ និងការិយាល័យប្រជាពលរដ្ឋរាជធានី ខេត្ត ក្រុង ស្រុក ខណ្ឌ
- អនុក្រឹត្យដំឡើងប្រាក់កម្រៃប្រចាំខែដល់មន្ត្រីជាប់កិច្ចសន្យា
- អនុក្រឹត្យដំឡើងប្រាក់បំណាច់មុខងារប្រចាំខែឧបការីកម្រិតទី៤ ទី៥ និងទី៦ នៃអង្គភាពប្រឆាំងអំពើពុករលួយ
- អនុក្រឹត្យដំឡើងបច្ច័យនិច្ចភត្តប្រចាំខែសម្រាប់គ្រូពុទ្ធិកសិក្សា និងមន្ត្រីបំពេញការងារនៅអគ្គាធិការដ្ឋានពុទ្ធិកសិក្សាជាតិ
- និងអនុក្រឹត្យផ្តល់ប្រាក់ឧបត្ថម្ភ ៥ម៉ឺនរៀលជូនមន្ត្រីរាជការ-កម្លាំងប្រដាប់អាវុធក្នុងឱកាសបុណ្យចូលឆ្នាំថ្មីប្រពៃណីជាតិ និងពិធីបុណ្យភ្ជុំបិណ្ឌសម្រាប់ឆ្នាំ២០២៥ នេះផងដែរ។
ជុំវិញបញ្ហានេះ តំណាងរាស្ត្រគណបក្សសង្គ្រោះជាតិ លោក អ៊ុំ សំអាន ប្រាប់សារព័ត៌មាន The Cambodia Daily នៅថ្ងៃទី៣១ ធ្នូ នេះថា ការដំឡើងប្រាក់ផ្សេងៗជូនដល់មន្ត្រីរាជការ គឺជារឿងល្អ ប៉ុន្តែបើតម្លៃទំនិញលើទីផ្សារក៏កើនឡើងដែរនោះ មានន័យថា ការដំឡើងប្រាក់សម្រាប់មន្ត្រីរាជការទាំងនេះក៏ដូចជាមិនដំឡើងដែរ ព្រោះប្រាក់ដែលត្រូវបានដំឡើងទាំងនេះក៏មិនអាចជួយជីវភាពរស់នៅរបស់ពួកគេឱ្យអាចរស់នៅសមរម្យបានដែរ។
យ៉ាងណាមិញ យោងតាមការស្រាវជ្រាវពីភ្នាក់ងារ ReliefWeb តម្លៃស្បៀងអាហារសព្វសារពើមួយ កន្ត្រកគិតជាអតិផរណាមធ្យម រក្សាបាននៅកម្រិតទាប គឺត្រឹមប្រមាណ ២% មកទល់ខែវិច្ឆិកា ឆ្នាំ២០២៤ ដែលក្នុងពលរដ្ឋម្នាក់ចំណាយលើម្ហូបអាហារប្រមាណជិត ២៧ដុល្លារសហរដ្ឋអាមេរិកក្នុងមួយខែ។
លោក អ៊ុំ សំអាន លើកឡើងថា ប្រសិនបើរដ្ឋាភិបាលអាចទប់ស្កាត់អំពើពុករលួយក្នុងប្រព័ន្ធរដ្ឋបាលក្នុងស្ថាប័នរដ្ឋឲ្យមានប្រសិទ្ធភាព មន្ត្រីរាជការទាំងអស់នឹងអាចទទួលបានប្រាក់ខែខ្ពស់គ្រប់ៗគ្នាទៅតាមកម្រិតរៀងខ្លួន ហើយរដ្ឋាភិបាលក៏មិនចាំបាច់ផ្តល់លុយឧបត្ថម្ភនៅពេលបុណ្យជាតិ ដូចជាបុណ្យចូលឆ្នាំ ឬបុណ្យភ្ជុំបិណ្ឌនោះដែរ។
ទោះជាយ៉ាងណាក៏ដោយ លោក ហ៊ុន ម៉ាណែត ហ៊ានប្រកាសឲ្យដឹងមុនបែបនេះ មកពីរាជរដ្ឋាភិបាលទើបនឹងខ្ចីបុលថវិកាបានពីធនាគារអភិវឌ្ឍន៍អាស៊ី (ADB) ក្នុងទឹកប្រាក់សរុបទាំងបំណុលចងការ ទាំងជំនួយឥតសំណង ចំនួនជាង ៤០០លានដុល្លារ។ នៅខែតុលា ឆ្នាំ២០២៤ ចុះហត្ថលេខាប្រគល់/ទទួល ៨០លានដុល្លារ ហើយនៅខែវិច្ឆិកា ប្រគល់/ទទួល ៥០លានដុល្លារ។
ចំណាយបែបបំពេញចិត្តគ្នានេះ ពាក្យសាមញ្ញអ្នករកស៊ីប្រើប្រចាំថ្ងៃគេហៅថា បង្វិលពីនេះ ទៅដាក់ឯណោះ ប៉ុន្តែមិនមែនទុនថវិកាជាតិផ្ទាល់ គឺជាបំណុលដែលត្រូវតែសងគេវិញ៕
© 2025, ឌឹ ខេមបូឌា ដេលី. All rights reserved.