អ្នកដឹកនាំព្រឹត្តិការណ៍សាទរកម្ពុជា លោក ហ៊ុន ម៉ានី អះអាងថា ក្រុមការងារកំពុងធ្វើការសហការជាមួយអាជ្ញាធរមានសមត្ថកិច្ច ដើម្បីស្រាវជ្រាវរកមូលហេតុពិតប្រាកដនៃការឆេះព្រះឆាយាល័ក្ខណ៍ព្រះមហាក្សត្រក្នុងកម្មវិធីព្រឹត្តិការណ៍ «សាទរកម្ពុជា» កាលពីយប់ឆ្លងឆ្នាំសកល។
ប្រធានសហភាពសហព័ន្ធយុវជនកម្ពុជា (ស.ស.យ.ក.) លោក ហ៊ុន ម៉ានី សរសេរលើទំព័រហ្វេសប៊ុករបស់ខ្លួននៅថ្ងៃទី១ មករា នេះថា ព្រឹត្តិការណ៍ «សាទរកម្ពុជា» បានប្រព្រឹត្តទៅក្នុងបរិយាកាសសប្បាយរីករាយ ដោយបន្សល់ទុកនូវស្នាមញញឹម និងការជួបជុំសាទរជាមហាគ្រួសារខ្មែរ។ ប៉ុន្តែលោកលើកឡើងថា ជាការសោកស្តាយ នៅចុងបញ្ចប់នៃកម្មវិធី មានកើតឧបទ្ទវហេតុអគ្គិភ័យមួយកើតឡើង ប៉ុន្តែត្រូវបានគ្រប់គ្រងភ្លាមៗដោយអាជ្ញាធរមានសមត្ថកិច្ចដែលឈរជើងក្នុងទីតាំងនោះ ដែលពុំបណ្តាលឱ្យមានគ្រោះថ្នាក់ណាមួយដល់អ្នកចូលរួមឡើយ។
លោក ហ៊ុន ម៉ានី បញ្ជាក់ថា បន្ទាប់ពីកើតមានឧបទ្ទវហេតុនេះ ក្រុមការងារបានសហការជាមួយអាជ្ញាធរមានសមត្ថកិច្ច ដើម្បីស្រាវជ្រាវរកមូលហេតុពិតប្រាកដនៃការកើតមានហេតុការណ៍នេះភ្លាមៗផងដែរ។
កាលពីរាត្រីឆ្លងឆ្នាំសកលថ្ងៃទី៣១ ខែធ្នូ ឆ្នាំ២០២៤ អគ្គិភ័យមួយបានកើតមានឡើងនៅមុខព្រះបរមរាជវាំង ដោយឆាបឆេះព្រះឆាយាល័ក្ខណ៍របស់ព្រះមហាក្សត្រខ្មែរសម្តេចព្រះបរមនាថ នរោត្តម សីហមុនី យ៉ាងសន្ធោសន្ធៅ។
បន្ទាប់ពីមានអគ្គិភ័យឆាបឆេះព្រះឆាយាល័ក្ខណ៍ព្រះមហាក្សត្រខ្មែរ អ្នកលេងបណ្ដាញសង្គមហ្វេសប៊ុកបានផ្ដិតយករូបភាព និងថតជាវីដេអូបង្ហោះលើបណ្ដាញសង្គមព្រោងព្រាត ខណៈសារព័ត៌មានដែលស្និទ្ធនឹងរដ្ឋាភិបាល ដូចជា Fresh News ឬទូរទស្សន៍បាយ័ន ជាដើម មិនបានផ្សាយអំពីហេតុការណ៍នេះទេ។
ទោះជាយ៉ាងណាក៏ដោយ ការបង្ហោះអគ្គិភ័យឆាបឆេះរូបព្រះឆាយាល័ក្ខណ៍ព្រះមហាក្សត្រនេះ ត្រូវបានអាជ្ញាធរហាមឃាត់ផងដែរ ក្រោមហេតុផលថា ការផ្សព្វផ្សាយបែបនេះនឹងនាំឱ្យខូចកេរ្តិ៍ឈ្មោះប្រទេសកម្ពុជា ប៉ុន្តែប្រជាពលរដ្ឋរិះគន់ថាជាចេតនាបំបិទព័ត៌មានប៉ុណ្ណោះ។ នេះមិនខុសពីពាក្យចាស់បុរាណខ្មែរពោលថា «ដំរីស្លាប់យកចង្អេរទៅបាំង» ដូច្នោះឯង។
អ្នកវិភាគនយោបាយ លោក គឹម សុខ ប្រាប់សារព័ត៌មាន The Cambodia Daily នៅថ្ងៃទី១ មករា នេះថា ក្នុងរដ្ឋធម្មនុញ្ញបានកំណត់យ៉ាងច្បាស់ថា មិនអនុញ្ញាតឲ្យជនណាម្នាក់ប្រមាថព្រះមហាក្សត្រដាច់ខាត ទោះក្នុងរូបភាពណាមួយក៏ដោយ ហើយការឆេះព្រះឆាយាល័ក្ខណ៍ព្រះមហាក្សត្រនេះ គឺជាការប្រមាថលើព្រះអង្គយ៉ាងធ្ងន់ធ្ងរ។
លោក គឹម សុខ លើកឡើងថា ការឆេះព្រះឆាយាល័ក្ខណ៍របស់ព្រះមហាក្សត្រ អាចមានមូលហេតុពីរ គឺទី១ ជាកំហុសបច្ចេកទេសដែលជាឧបទ្ទវហេតុ និងទី២ អាចមានបុគ្គលមានចេតនាដុតព្រះឆាយាល័ក្ខណ៍របស់ព្រះមហាក្សត្រតែម្តង។
អ្នកវិភាគរូបនេះអះអាងថា ដំណោះស្រាយជាបឋមក្នុងរឿងនេះ រដ្ឋាភិបាលត្រូវដកលោក ហ៊ុន ម៉ានី ពីតំណែងទាំងអស់ជាមុនសិន ពីព្រោះគាត់គឺជាអ្នកទទួលខុសត្រូវដោយផ្ទាល់ក្នុងនាមជាអ្នកដឹកនាំរៀបចំព្រឹត្តិការណ៍សាទរកម្ពុជានេះ។
លោកថា បន្ទាប់ពីដកតំណែងទាំងអស់ហើយ ត្រូវធ្វើការស៊ើបអង្កេតដើម្បីឱ្យលោក ហ៊ុន ម៉ានី ទទួលខុសត្រូវនៅចំពោះមុខច្បាប់ទៅតាមការរកឃើញថា ការឆេះនោះដោយចេតនា ឬកំហុសបច្ចេកទេសជាឧបទ្ទវហេតុ។
អ្នកវិភាគរូបនេះបារម្ភថា ពេលនេះមានឧបទ្ទវហេតុឆេះរូបព្រះឆាយាល័ក្ខណ៍ព្រះមហាក្សត្រ តើបន្ទាប់មកទៀត អាចមានឧបទ្ទវហេតុឆេះព្រះបរមរាជវាំងបំផ្លាញកេតនភណ្ឌជាតិដែរឬក៏អត់ ពីព្រោះមានគ្រួសារមួយដែលកំពុងក្តាប់អំណាចផ្ដាច់មុខ ចង់ធ្វើស្ដេចសាធារណរដ្ឋតពូជដូចកូរ៉េខាងជើង ទៅហើយនោះ។
បើគេនិយាយអំពីកេតនភណ្ឌពិតប្រាកដសម្រាប់ខ្មែរនោះ បច្ចុប្បន្ននេះគ្មានទេ ពីព្រោះឯករាជភាពពិតប្រាកដក៏គ្មាន សេរីភាពពេញលេញក៏គ្មាន។ បើនិយាយអំពីជំនឿតាមហោរាសាស្ត្រក្នុងសង្គមខ្មែរ អគ្គិភ័យលើព្រះឆាយាល័ក្ខណ៍ព្រះមហាក្សត្រក្នុងឱកាសបុណ្យទាន ជាប្រផ្នូលអាក្រក់ អបលក្ខណ៍មួយសម្រាប់ប្រជាជាតិ ទោះជាវាគ្រោះថ្នាក់ដោយចៃដន្យក៏ដោយ៕
© 2025, ឌឹ ខេមបូឌា ដេលី. All rights reserved.