ប្រធានព្រឹទ្ធសភា លោក ហ៊ុន សែន អះអាងថា ព្រះមហាក្សត្រខ្មែរសម្តេចព្រះបរមនាថ នរោត្តម សីហមុនី ទទួលការវះកាត់ព្រះរោគក្រពេញប្រូស្តាតបានដោយជោគជ័យពីក្រុមវេជ្ជបណ្ឌិតនៅមន្ទីរពេទ្យក្នុងទីក្រុងប៉េកាំង នៃសាធារណរដ្ឋប្រជាមានិតចិន នៅថ្ងៃចន្ទដើមសប្ដាហ៍នេះ។
មេដឹកនាំបក្សកាន់អំណាច លោក ហ៊ុន សែន សរសេរលើទំព័រហ្វេសប៊ុករបស់ខ្លួននៅថ្ងៃទី២០ មេសា នេះថា ក្រោយចេញពីបន្ទប់វះកាត់ ព្រះអង្គបានដឹងព្រះកាយវិញហើយ បន្ទាប់ពីអស់សារធាតុថ្នាំសណ្ដំ ខណៈគ្រូពេទ្យកំពុងតាមដានដោយយកចិត្តទុកដាក់នូវការវិវត្តប្រែប្រួលក្រោយការវះកាត់នេះ។
លោក ហ៊ុន សែន អះអាងថា ពេលនេះកូនប្រុសទាំងពីររបស់លោក គឺលោក ហ៊ុន ម៉ានិត និងលោក ហ៊ុន ម៉ានី រួមទាំងរូបលោកផ្ទាល់ កំពុងមានវត្តមាននៅទីក្រុងប៉េកាំង ប្រទេសចិន ដែលមានគោលដៅតែមួយគត់ គឺកំដរព្រះមហាក្សត្រ និងសម្តេចព្រះមហាក្សត្រី នរោត្តម មុនីនាថ សីហនុ ក្នុងពេលនេះ។
មេដឹកនាំបក្សកាន់អំណាចរូបនេះបញ្ជាក់ថា ព្រះរាជសុខភាពរបស់ព្រះមហាក្សត្រ គឺជាសុខភាពរបស់ប្រទេសជាតិទាំងមូល ប៉ុន្តែក្នុងករណីព្រះរាជសុខភាពរបស់ព្រះអង្គល្អប្រសើរ លោកនឹងត្រឡប់ទៅកម្ពុជាវិញនៅថ្ងៃទី២២ ខែមេសា ឆ្នាំ២០២៦។
កាលពីថ្ងៃទី២៧ ខែកុម្ភៈ ឆ្នាំ២០២៦ ព្រះមហាក្សត្រខ្មែរ និងសម្តេចព្រះមហាក្សត្រី នរោត្តម មុនីនាថ សីហនុ ព្រះវររាជមាតាជាតិខ្មែរបានយាងចាកចេញពីប្រទេសកម្ពុជា ដើម្បីទៅពិនិត្យព្រះរាជសុខភាពនៅទីក្រុងប៉េកាំង សាធារណរដ្ឋប្រជាមានិតចិន ប៉ុន្តែនៅថ្ងៃទី១០ ខែមេសា ឆ្នាំ២០២៦ ព្រះមហាក្សត្រខ្មែរបានចេញព្រះរាជសារថា ព្រះអង្គមានព្រះរោគមហារីកនៅក្រពេញប្រូស្តាតដែលត្រូវបានបញ្ជាក់ពីក្រុមគ្រូពេទ្យនៃមន្ទីរពេទ្យរដ្ឋធានីប៉េកាំង ប្រទេសចិន ដូច្នេះព្រះអង្គត្រូវបន្តគង់ប្រថាប់នៅមន្ទីរពេទ្យក្នុងប្រទេសចិន រយៈពេលពី ១ខែទៅ ២ខែទៀត។
ជុំវិញបញ្ហានេះ ក្រសួងព្រះបរមរាជវាំង បានចេញសេចក្តីប្រកាសព័ត៌មានថា សម្តេចព្រះបរមនាថ នរោត្តម សីហមុនី បានយាងចាកចេញពីបន្ទប់វះកាត់រួចហើយនៅថ្ងៃទី២០ ខែមេសា នេះ ប៉ុន្តែព្រះអង្គត្រូវគង់ប្រថាប់មួយរយៈពេលទៀត ដើម្បីពិនិត្យ តាមដាន និងថែទាំព្រះរាជសុខភាពបន្តនៅក្នុងមន្ទីរពេទ្យក្នុងទីក្រុងប៉េកាំង នោះ។
ព្រះករុណា សម្តេច ព្រះបរមនាថ នរោត្តម សីហមុនី ប្រសូតនៅថ្ងៃទី១៥ ខែឧសភា ឆ្នាំ១៩៥៣ ហើយបើគិតមកទល់នឹងពេលនេះ ទ្រង់មានព្រះជន្ម ៧៣ព្រះវស្សាហើយ។ ព្រះអង្គត្រូវបានក្រុមប្រឹក្សារាជសម្បត្តិ ជ្រើសតាំងជាឯកច្ឆន្ទឱ្យឡើងសោយរាជ្យជាព្រះមហាក្សត្រខ្មែរក្នុងព្រះជន្ម ៥៣ព្រះវស្សា កាលពីថ្ងៃទី១៤ ខែតុលា ឆ្នាំ២០០៤ កន្លងទៅ។ រហូតដល់ថ្ងៃទី២៩ ខែតុលា ឆ្នាំ២០០៤ ព្រះអង្គត្រូវបានប្រកាសឱ្យឡើងសោយរាជ្យសម្បត្តិជាព្រះមហាក្សត្រនៃព្រះរាជាណាចក្រកម្ពុជា ជាផ្លូវការបន្តពីអតីតព្រះមហាក្សត្រខ្មែរសម្តេចព្រះបាទ នរោត្តម សីហនុ ដែលជាព្រះបិតា។
មាត្រា៧ នៃរដ្ឋធម្មនុញ្ញកម្ពុជា ចែងថា ព្រះមហាក្សត្រខ្មែរទ្រង់គ្រងរាជ្យសម្បត្តិ តែមិនកាន់អំណាចទេ ប៉ុន្តែព្រះអង្គមិនអាចនរណារំលោភបំពានបានឡើយ។
ចំណែកមាត្រា៨ ចែងថា ព្រះអង្គគឺជានិមិត្តរូបនៃឯកភាពជាតិ និងនិរន្តរភាពជាតិ ធានាឯករាជ្យជាតិ អធិបតេយ្យ និងបូរណភាពទឹកដីនៃប្រទេសកម្ពុជា និងធានានូវការគោរពសិទ្ធិសេរីភាពរបស់ពលរដ្ឋ និងការគោរពសន្ធិសញ្ញាអន្តរជាតិនានាផងដែរ៕
© 2026, ឌឹ ខេមបូឌា ដេលី. All rights reserved.